Read Sahu Markus 8 Bible Online

Markus 8 - Sahu bible

Markus 8

¹Toma 'orasa gena-ge, 'age rema ngowa'a repe masala 'aḏi malomu. Ananga gena-ge, manga dofoma 'i moini ḏua. Ḏua Yesus 'o 'aro'o 'Ai me-mete'e re 'O kanau i'a ra ananga, “Tari 'akala re sinyingara 'i baolo dadalara toma ngowa'a repe, sababu wangere ro'ange ḏua ananga 'aḏi mete-mete'e Ngoi, dadi manga dofoma 'i moini ḏua.

³Na'o Ngoi to soma'a ananga 'aḏi maḏibo remanga sawini, toma ngo'omo ma golona 'aḏi beberete, sababu ngowa'a mamuni'a tegoro toma giḏanga.”

⁴Yesus 'ai me-mete'e 'aḏi sangoro, “Sanga ngo-ngoromo le'a ḇato, nga'unu sipula'a oromo toma ngowa'a repe nena-ne? Sababu ngi'i nena-ne 'i tiwongo ino?”

⁵Yesus 'o sano, “ 'Age roti ngai muḏuo i'a ra ngini?” Ananga ya sangoro, “Ngai tumudingi.”

⁶Ḏua Yesus 'o soma'a ngowa'a repe 'aḏi tegoro toma tana'a. Gena ḏua, Unanga 'a 'oro roti ngai tumudingi gena-ge re 'O sibere ie murasa ma la ra Ma Jou'ongu Madutu. Ḏua Unanga 'a poti-poti roti gena-ge, kara 'O sipula'a Tai me-mete'e di'a ya sibalangu toma ngowa'a repe. Re 'Ai me-mete'e ya siḏagi mo-moini gena-ge.

⁷Ananga remanga nyao'o ngai muḏuo i'a mada'a i'a 'alusu. Yesus 'o sibere ie murasa ma la ra Ma Jou'ongu Madutu ḏi'i, kara 'O soma'a 'Ai me-mete'e ya sibalangu nyao'o gena-ge ra ananga mo-moini.

⁸Ngowa'a repe 'aḏi oromo singadolo 'aḏi wunusu. Ananga ḏa nga cala rata. Togumu i'a, 'Ai me-mete'e ya lomu ma jingianga, pipigu tumudingi roma-romanga. Ḏua Yesus 'o soma'a ngowa'a repe gena-ge 'aḏi maḏibo,

¹⁰kara Yesus re 'Ai me-mete'e, 'aḏi mabalene toma oti si'a toma daeraha Dalmanuta.

¹¹Ngowa'a Farisi nga muḏuo i'a mau 'aḏi disa Yesus 'ai sala. Sababu gena-ge 'aḏi sapolo ra Yesus re 'aḏi sano Unanga. Ananga 'aḏi golo'o Yesus 'o 'a'a didina'o da'u diwanga tala, la ananga ya waro Unanga gena-ge mode-mode'e 'o sapolo da'u ra Ma Jou'ongu Madutu tala.

¹²Yesus 'a iḏala 'ai sangagara re 'a sangoro, “I'a sa'olo ngowa-ngowa'a toma 'orasa nena-ne ni golo'o Ngoi to 'a'a didina'o heranga? Ni ngaku mode-mode'e 'Ari demo-demo nena-ne: Didina'o heranga rimoi i'a mai ua To pula'a ra ngini!”

¹³Ḏua Yesus re 'Ai me-mete'e 'aḏi sisoi'i tala ngowa'a Farisi gena-ge re 'aḏi mabalene toma oti, kara 'aḏi si'a da'a toma talaga kaci moi.

¹⁴Wakutu Yesus 'ai me-mete'e 'aḏi palene toma oti, ananga ya sidaioranga manga ngo-ngoromo; 'aḏi gasa pa'i 'o roti ngai moi.

¹⁵Yesus 'o si'elingi ananga, “Ni ma'istiari mangale Herodes re ngowa'a Farisi manga ragi.”

¹⁶Ḏua Yesus 'ai me-mete'e, ananga 'aḏi ma'u kanau matengo re matengo, “Unanga 'o kanau so'o gena, sababu ngene nanga roti 'i cua.”

¹⁷Yesus to waro ḏua mangale ananga 'aḏi ma'u kanau matengo re matengo. Sababu gena-ge, Unanga 'o sano ra ananga, “I'a sa'olo, ngini ni ma'u kanau mangale roti 'i cua?! Ngini ni waro ua re ni sahe nyangu maksudu 'Ari ga'a hera-heranga gena-ge?! Ninga 'akala re sinyingara lai te'e!”

¹⁸Ngini reninga la'o — i'a sa'olo ni oḏi'i ua? Ngini reninga ngau'u — i'a sa'olo ni 'isene ua? Re ni 'elingi riwara 'Ari ga'a hera-heranga nange-ge.

¹⁹Wakutu roti ngai romotoa ta pinga-pingana di'a ngowa'a nga cala romotoa, ngini ni lomu ma bai'i pipigu muḏuo? Ananga ya sangoro, “Pipigu nyagi moi re romoḏiḏi.”

²⁰Yesus dadunu 'o sano, “Wakutu ngoi ta pinga-pingana roti di'a ngowa'a nga cala rata, ngini ni lomu ma bai'i pipigu muḏuo?” Ananga ya sangoro, “Pipigu tumudingi.”

²¹Yesus 'o kanau, “Na'o so'o gena, i'a sa'olo ni sahe nyangu ḏi'i mangale Ngoi to sapolo da'u ra Ma Jou'ongu Madutu tala?”

²²Ananga 'aḏi ngadolo toma limau Betsaida. 'Age rema ngowa'a nga muḏuo i'a 'aḏi gasa ino ngowa'a hafu matengo ra Yesus re 'aḏi golo'o 'a siteru 'ai giama, la ngowa'a gena-ge 'o la.

²³Ḏua Yesus 'a gu'u 'ai giama 'u tuda sisupu toma limau ma ḏuḏunu. Gena ḏua, 'A obi'i ngowa'a hafu gena-ge 'ai la'o kaci ḏiḏi re 'A siteru 'Ai giama ra unanga 'ai la'o, kara 'O sano, “Na oḏi'i nyengara ḏua, bolo nyangu?”

²⁴Ngowa'a gena-ge 'o oḏi'i i'a toma biono re 'o kanau, “Ya, ngoi to oḏi'i ngowa'a 'aḏi tagi-tagi, mada'a sa'olo 'o ate.”

²⁵Yesus dadunu 'a siteru 'Ai giama toma ngowa'a hafu gena-ge 'ai la'o. Ḏua ngowa'a gena-ge 'ai la'o ri la, re oḏi'i ri tarangi.

²⁶Yesus 'o sipo-poma unanga, “Maḏibo tani wala, mada'a no mete'e ḏuḏunu re no siajele awa ra guna ḇato Ngoi to si-la ngana!”

²⁷Yesus re 'Ai me-mete'e, ananga 'aḏi tagi toma gamu-gamu toma daeraha Kaisarea Filipi. Toma ngo'omo ma golona, Yesus 'o sano ra ananga, “Ngowa'a 'aḏi aje Ngoi ne 'a guna?”

²⁸Ananga ya sangoro, “ 'Age mamuni'a 'aḏi kanau Jou 'a Yohanes tukanga baptis, 'age mamuni'a 'aḏi kanau Jou 'a Elia, re 'age mamuni'a ḏi'i 'aḏi kanau Jou nabi ma lelegu.”

²⁹Yesus dadunu 'o sano, “Mada'a na'o mete'e ngini masiretene nena-ne, Ngoi ne 'a guna?” Petrus 'a sangoro, “Jou 'O Kristus.”

³⁰Ḏua Yesus 'o sipo-poma ananga, “Ni siajele awa ra guna ḇato mangale Ngoi.”

³¹Gena ḏua, Yesus mulaingi 'o doto'o 'Ai me-mete'e mangale Unanga, Manusia ma Ngowa'a Nau'u, balasu sanga sangisara ma repe, Yahudi manga bi-biri'i, 'imam-'imam ma sae'e re guru-guru 'agama, ananga 'aḏi dawongo Unanga ua re balasu wu sisengene. Mada'a toma wangere ma soi ro'ange, Unanga dadunu 'o 'ahu moju.

³²Dadi Yesus 'a gogono riwara, mada'a Unanga 'a siajele Tai me-mete'e. Ḏua Petrus 'o taba'a Yesus 'ai giama re 'aḏi masai'i i'a, kara 'o ḇangata Yesus.

³³Mada'a Yesus 'o magelelo i'a re 'O tatamo 'Ai me-mete'e re 'U ḇangata 'a Petrus, “ 'Iblisi, tagi i'a da'a! Fikirana gena-ge manusia manga fikirana. Ma Jou'ongu Madutu 'ai fikirana ua.”

³⁴Gena ḏua, toma ngi'i gena-ge Yesus 'o 'aro'o ngowa'a repe (ma'u mete'e ra Unanga re 'Ai me-mete'e). Ḏua Unanga 'o kanau i'a ra ananga, “ 'A guna ḇato mau 'o mete'e Ngoi, balasu 'a mete'e 'ai mau masiretene riwara[13] re balasu 'o doiti 'ai salib,[14] kara mete'e Ngoi tau-taunu.

³⁵Sababu 'a guna ḇato ga'a 'o kadiarata pa'i 'ai 'ahu toma dungia nena-ne, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o mete'e 'ai mau masiretene riwara sababu 'o mau mete'e Ngoi re di'a Habari Roanga ra Ma Jou'ongu Madutu ino, unanga gena-ge ḏuanga i'a 'o sanga 'ahu kasingado-ngadolo i'a.

³⁶Sababu ma 'utungu 'i cua na'o ngowa'a matengo 'o sanga 'ori i'a rana mo-moini toma dungia nena-ne ma dara, mada'a 'o sanga ua 'ahu kasingado-ngadolo!

³⁷Sidogo ḏi'i, Sababu 'ori i'a rana mo-moini toma dungia nena-ne ma dara 'i sipula'a ua 'ahu kasingado-ngadolo i'a!

³⁸Toma dungia nena-ne, 'i romanga reo ngowa'a 'aḏi 'isene Ma Jou'ongu Madutu ua? 'A guna ḇato 'o mara'a mangaku mete'e Ngoi re 'ari do-doto'o; Ngoi to mara'a ḏi'i mangaku unanga gena-ge 'Ari me-mete'e wakutu Ngoi, Manusia ma Ngowa'a Nau'u, dadunu to sapolo moju mamete'e Rari Ḇaḇa ma kuasa re mala'ekata-mala'ekata 'Ofi-'Ofi.”