Read Sahu Markus 9 Bible Online

Markus 9 - Sahu bible

Markus 9

¹Yesus 'o kanau, “Ni ngaku mode-mode'e 'Ari demo-demo nena-ne: Taninga sigolona 'age rema ngowa'a ga'a 'aḏi 'ahu-'ahu moju re 'aḏi oḏi'i Ma Jou'ongu Madutu 'o parenta Rai kuasa.”

²Wangere rarama palisi'i i'a, Yesus 'o gasa ananga nga ḏu'ange: 'a Petrus, 'a Yakobus re 'a Yohanes. Ananga 'aḏi masai'i re mabere ie toma kie kau'u rimoi. Yesus 'ai rupa 'i ngali ra ananga nga ḏu'ange manga biono:

³'Ai juba 'i dadi buḏo jama-jamanga. Matengo i'a mai ua toma dungia nena-ne 'aḏi 'uju singadolo 'i buḏo ma tero so'o gena-ge.

⁴Gena ḏua, ananga 'aḏi oḏi'i Yesus 'o ma'u kanau rea Elia re 'a Musa.

⁵Sababu gena-ge, Petrus 'o kanau i'a ra Yesus, “Rabi[15], rousu madutu ngene 'ane-ne. Jobilaha ngomi mi side'oso ninga suyu'u ḏu ro'ange. Ḏu moi di'a Jou, ḏu moi di'a Musa re ḏu moi di'a Elia ḏi'i.”

⁶Petrus pa'i 'o kanau ḇato, mada'a unanga 'o waro ua 'oru ga'a 'o kanau sababu unanga re 'ai ḏagilomu nga muḏiḏi 'aḏi heranga woḏi singadolo ya waro manga gagare riwara!

⁷Togumu i'a, kakamo 'uci ya'u sao re toma kakamo gena-ge ma dara 'aḏi 'isene iḏingi enanga ma betongo so'o ne: “Unanga nena-ne, 'Ari Ngowa'a Nau'u ta dadalara. Ni 'isene Unanga!”

⁸Wakutu 'aḏi tatamo kuwiḏa re kuḇali, kage-kage ngowa'a nange-ge re 'aḏi cua ḏua; sisoi'i tala pa'i 'a Yesus matengo ḇato.

⁹Wakutu ananga 'aḏi 'uci da'u kie tala, Yesus 'o sipo-poma ra ananga, “Awa ni sijarita ra guna ḇato mangale 'oru ga'a ni oḏi'i nange-ge singadolo Ngoi, Manusia ma Ngowa'a Nau'u, dadunu to 'ahu moju toma ngowa'a senge-sengene manga sigolona.”

¹⁰Ananga ya mete'e 'Ai bererongo gena-ge, mada'a ananga 'aḏi ma'u sano matengo re matengo ma maksudu 'oru Yesus 'o kanau nange-ge: “Dadunu To 'ahu moju toma ngowa'a senge-sengene manga sigolona.”

¹¹Ḏua ananga 'aḏi sano ra Yesus, “I'a sa'olo guru-guru 'agama 'aḏi kanau mangale nabi Elia balasu 'o sapolo siḏa, kara 'O Kristus[16] 'o sapolo.”

¹²Yesus 'a sangoro, “Mode-mode'e, nabi Elia ḏuanga i'a 'o sapolo siḏa di'a 'o sidiai 'ori i'a mo-moini di'a 'O Kristus. Na'o so'o gena, i'a sa'olo 'i silefo toma Boku 'Ofi-'Ofi ma dara mangale Ngoi, Manusia Ma Ngowa'a Nau'u, balasu sanga sangisara repe re ngowa'a 'aḏi dawongo ua Ngoi?

¹³Mada'a, Ngoi to siajele ra ngini nena-ne: 'A Elia[17] 'o sapolo ḏua re ngowa-ngowa'a 'aḏi 'a'a cira ra unanga mete'e ananga manga mau ḇato. Gena-ge 'i ma tero toma Boku 'Ofi-'Ofi 'i silefo pasala ḏua mangale unanga.”

¹⁴Wakutu 'a Yesus, Petrus, Yakobus re 'a Yohanes 'aḏi 'uci ḏua da'u kie tala, ananga 'aḏi oḏi'i ngowa'a repe re 'aḏi malomu tai me-mete'e ma lelegu. Toma ngowa'a repe manga sigolona gena-ge, guru 'agama nga muḏuo i'a 'aḏi ma'u sangoro ra Yesus 'ai me-mete'e ma lelegu.

¹⁵Ngowa'a repe gena-ge 'aḏi oḏi'i Yesus, ḏua 'aḏi heranga rema roanga, kara 'aḏi lalara re 'aḏi jau i'a Unanga.

¹⁶Yesus 'o sano Tai me-mete'e, “Ngini ni ma'u sangoro 'oru re 'o guru-guru 'agama gena-ge?”

¹⁷Toma ngowa'a repe manga sigolona, 'age rema ngowa'a matengo 'o masiajele, “Guru, ngoi to gasa 'ari ngowa'a ra Guru. Unanga 'o mou sababu 'o roh ma jira 'u dungosama.

¹⁸Wakutu unanga 'ai si-siḏi 'i sapolo 'a sibau-bau'u 'ai lese toma tana'a, 'ai sopu'u 'i pa'ala, 'ai ngiḏi 'i kirioto, ḏua 'ai lese cokutu 'i yoḏu'u. Ngoi to golo'o Tani me-mete'e ya dusu'u roh ma jira gena-ge, mada'a ananga nga'unu ua ya dusu'u.”

¹⁹Ḏua Yesus 'o kanau i'a ra ananga, “Ngini mode-mode'e ngowa-ngowa'a ga'a ni ngaku Ngoi ua! Singadolo ma di'ara ngau moju, Ngoi balasu to tegoro marimoi ra ngini?! Singadolo ma di'ara ngau moju, Ngoi to sidodai 'Ari 'akala ḇanyo ra ngini?! Gasa ino ngowa 'olo gena-ge!”

²⁰Gena ḏua, ananga 'aḏi gasa i'a ngowa 'olo gena-ge ra Yesus. Wakutu roh ma jira 'i waro Unanga gena-ge 'a Yesus, enanga 'i 'a'a ngowa 'olo gena-ge 'ai lese 'i ḏaba-ḏaba'a singadolo 'o ruba lulu ie toma tana'a re 'ai sopu'u 'i pa'ala.

²¹Ḏua Yesus 'o sano toma ngowa 'olo gena-ge 'ai ḇaḇa, “Ma di'ara sa'olo ḏua, enanga 'i 'a'a so'o nena-ne?” Ma ḇaḇa 'a sangoro, “Wakutu unanga 'o ce-ceka'a i'a moju!

²²Ma jelele ḏua, roh ma jira gena-ge mau 'u sisengene unanga: soi rai o'o i'a 'o ruba toma u'u ma dara, soi rai o'o i'a 'o ruba toma ḇanyo ma dara. Na'o Jou no nga'unu No si'a'a 'ori i'a ḇato, No sijumu dadalara ra ngomi re No riono ngomi!”

²³Yesus 'o sangoro, “I'a sa'olo no aje, ‘Na'o Jou no nga'unu?’ Mo-moini nyengara 'i dadi ra guna ḇato na'o ni ngaku Ngoi!”

²⁴Kage-kage, ma ḇaḇa 'o kanau 'a siduga-duga, “Jou, ngoi to ngaku mada'a 'ari ngo-ngaku 'i te'e ua! Riono ngoi, la 'ari ngo-ngaku lebe te'e.”

²⁵Wakutu Yesus 'o oḏi'i ngowa'a manga repe 'aḏi sapolo ḏi'i, Unanga 'o sikanga roh ma jira gena-ge, “Roh popongolo re roh mou, masupu toma ngowa 'olo nena-ne re osama rawara ra unanga!”

²⁶Roh ma jira gena-ge 'i poa'a re 'i 'a'a ngowa 'olo gena-ge 'ai lese 'i ḏaba-ḏaba'a lai siḏi kara 'i masupu. Ngowa 'olo gena-ge 'ai lese ma tero sa'olo maiyeti singadolo ngowa'a mo-moini 'aḏi kanau, “Unanga ro sengene!”

²⁷Mada'a Yesus 'u riono re 'a gu'u 'ai giama kara 'u simomi'i ngowa 'olo gena-ge, ḏua unanga ro momi'i.

²⁸Pasala i'a, wakutu Yesus toma wala re pa'i 'Ai me-mete'e ḇato, ananga 'aḏi sano, “I'a sa'olo ngomi mi dusu'u yoḏu'u roh ma jira gena-ge?”

²⁹Yesus 'a sangoro, “Roh ma jira so'o nena-ne wa dusu'u reo 'oru ḇato 'i yoḏu'u; balasu wo manyiata.”[18]

³⁰Yesus re 'Ai me-mete'e 'aḏi sisoi'i tala ngi'i gena-ge re ya dowanga manga ḏo-ḏagi 'aḏi tola'a i'a toma daeraha Galilea. Yesus 'o oḏu'u ngowa'a ya waro Unanga 'ai ngi'i

³¹sababu Unanga mau doto'o 'Ai me-mete'e. Unanga 'o kanau, “Ngoi, Manusia Ma Ngowa'a Nau'u, sipula'a toma manusia ma kuasa. Re Ngoi ananga Ri sisengene, mada'a toma wangere ma soi ro'ange, Ngoi dadunu to 'ahu moju!”

³²'Ai me-mete'e 'aḏi sahe ua Yesus 'ai do-doto'o, mada'a ananga ya sano ua sababu 'aḏi mojongo.

³³Yesus re 'Ai me-mete'e 'aḏi ngadolo toma limau Kapernaum. Ngadolo toma wala, Yesus 'o sano Tai me-mete'e, “Ngini ni ma'u rubutu 'oru toma ngo'omo ma golona nange-ge?”

³⁴Ananga ya sangoro ua, sababu toma ngo'omo ma golona nange-ge, ananga ma'u rubutu mangale 'a guna lebe la-lamo'o i'a.

³⁵Yesus 'o maḏegoro tala kara 'O 'aro'o 'Ai me-mete'e nga nyagi moi re nga muḏiḏi re 'O kanau i'a ra ananga, “ 'A guna ḇato mau lebe la-lamo'o i'a, unanga gena-ge balasu dadi lebe ceka'a ma tero sa'olo falalomu matengo ga'a de-de'oso ngowa'a mo-moini.”

³⁶Gena ḏua, Yesus 'o 'oro ngowa 'olo matengo re 'O side-de'oso ngowa 'olo gena-ge tamanga biono. Yesus 'o sibo'olo ngowa 'olo gena-ge re kanau i'a Tai me-mete'e,

³⁷“ 'A guna ḇato ga'a dawongo ngowa 'olo so'o nena-ne sababu unanga gena-ge 'o mete'e Ngoi, unanga gena-ge ma tero ḏi'i 'o dawongo Ngoi. Re pa'i Ngoi ḇato ua, mada'a 'o dawongo Unanga ga'a 'O cumutu Ngoi.”

³⁸Ḏua 'a Yohanes 'o kanau ra Yesus, “Guru, ngomi mi oḏi'i re mi 'isene matengo 'o dusu'u roh ma jira 'a terongo Jou 'ani lomanga. Dadi ngomi simaha ua unanga sababu unanga ra ngene ua.”

³⁹Mada'a Yesus 'o kanau, “Awa ngini ni simaha ua unanga sababu matengo ua nga'unu 'a'a ga'a hera-heranga terongo 'Ari lomanga re 'o kanau 'ori i'a ma jira mangale Ngoi.

⁴⁰Sababu 'a guna ḇato 'o malawana ngene ua, unanga gena-ge marimoi ra ngene.

⁴¹Ni ngaku mode-mode'e 'Ari demo-demo nena-ne: 'A guna ḇato 'o pula'a ngini ka'e pa'i ḇanyo ḇato sababu ngini mete'e Kristus, ḏuanga i'a mode-mode'e 'u sanga manga ngogele ra Ma Jou'ongu Madutu.”

⁴²“Mada'a na'o 'a guna ḇato 'o sigasa ngowa-ngowa'a ma pake ua ma tero sa'olo ngowa 'olo nena-ne, singadolo ananga 'aḏi ngaku Ngoi riwara, Ma Jou'ongu Madutu 'o sihukumu unanga gena-ge lebe tubuso i'a. Jobilaha maḏi la-lamo'o 'i siḏobe tai camala, kara siupa'a unanga toma ngoloto.

⁴³Na'o ngini ninga giama kaci moi 'i sigasa ngini ni madaga'a ḏosa; ni tola'a giama gena-ge! Jobilaha, reninga giama pa'i kaci moi ḇato ni 'ahu ra Ma Jou'ongu Madutu, reo reninga giama kaci ḏiḏi ni osama toma naraka ma dara ga'a u'u malejanga kama sora riwara. [

⁴⁴I'a da'a no sanga sangisara kama togumu ua.]

⁴⁵Re Na'o ngini ninga rou kaci moi 'i sigasa ngini ni madaga'a ḏosa; ni tola'a rou gena-ge! Jobilaha, reninga rou pa'i kaci moi ḇato ni 'ahu ra Ma Jou'ongu Madutu, reo reninga rou kaci ḏiḏi sanga upa'a toma naraka ma dara. [

⁴⁶I'a da'a no sanga sangisara kama togumu riwara.]

⁴⁷Re ngini ninga la'o kaci moi 'i sigasa ngini ni madaga'a ḏosa, ni cuḇulenge 'o la'o gena-ge! Jobilaha, ngini ni osama nyo-nyoimi ra Ma Jou'ongu Madutu 'ai Pareta reninga la'o kaci moi ḇato, reo reninga la'o kaci ḏiḏi ni osama toma naraka ma dara.

⁴⁸I'a da'a no sanga sangisara kama togumu riwara.

⁴⁹Ngowa'a ga'a sanga sangisara sababu mete'e Ngoi ḏuanga i'a 'o dadi 'ofi-'ofi ra Ma Jou'ongu Madutu ma tero sa'olo ninga jou-jou 'i dadi 'ofi-'ofi ra Ma Jou'ongu Madutu na'o sigare g̱asi.

⁵⁰G̱asi 'i la-la, mada'a na'o enanga 'i rasa riwara. Sanga ua, 'i dadunu rasa moju? Ngini balasu ni dadi sa'olo g̱asi: ni 'ahu ma'u 'aro'o la matengo re matengo.”