Read Sahu Lukas 10 Bible Online

Lukas 10 - Sahu bible

Lukas 10

¹Gena ḏua, Ma Jou 'o cumutu 'Ai me-mete'e ma lelegu nga nyagi tumudingi,[23] kara ya'u sibalangu 'aḏi tagi nga muḏiḏi-nga muḏiḏi di'a 'aḏi tagi siḏa toma ngi'i-ngi'i ga'a Yesus 'o mau tutumu.

²Unanga 'o kanau ra ananga, “Ngowa-ngowa'a nena-ne ma tero sa'olo guḏa ma hasili lai lamo'o 'i 'utu'u nyangu, mada'a ngowa'a 'utu-'utu'u 'u 'aḏi repe ua. Sababu gena-ge, ngini ni golo'o toma guḏa ma dutu, la Unanga 'o siḏingoto ngowa'a 'utu-'utu'u di'a ya lomu guḏa ma hasili.

³Tagi! Ngoi to 'utusu ngini sa'olo doba toma serigala ma sigolona.

⁴Awa ni madigasa ninga papa'o, tohe, bolo tarupa ma lelegu. Taninga ḏo-ḏagi ma dara si'olona i'a awa ni matogumu di'a ni majarita madi-di'ara ra matengo i'a.

⁵Na'o ngini ni osama toma wala ḏu moi, siḏa-siḏa ni kanau, ‘Ngoi to golo'o ra Ma Jou'ongu Madutu di'a 'o pula'a 'Ai dame[24] 'i tegoro ra ngini toma wala nena-ne.’

⁶Na'o wala ma dutu gena-ge ngowa'a la-la ga'a 'o dawongo ngini, Ma Jou'ongu Madutu 'ai dame ḏuanga i'a 'i tegoro ra ananga. Mada'a na'o wala ma dutu 'o dawongo ngini ua, tantu ḏua Ma Jou'ongu Madutu 'o sibarakati ananga ua.

⁷ Na'o wala ma dutu unanga 'o dawongo ngini, ngini tegoro ra ananga gena-ge ḇato. Re 'oru wala ma dutu 'o pula'a ngo-ngoromo ra ngini, na oromo. Sababu 'a guna ḇato 'aḏi munara ananga 'aḏi patasa ya sanga manga bo-bangu. Awa ngini ni mareta-reta'a wala ḏu moi togumu ḏu moi.

⁸Na'o ngini ni sapolo toma limau rimoi i'a re limau gena-ge ma manusia ananga 'aḏi dawongo ngini toma la-la ma dara, ni oromo ngo-ngoromo 'oru ḇato ga'a ananga 'aḏi pula'a ra ngini.

⁹Toma limau-limau gena-ge ngini ni si-la ngowa'a siḏi re ni sihabari ra ananga gena-ge, ‘Tiara riwara Ma Jou'ongu Madutu 'ai Pareta 'i ngadolo.’

¹⁰Mada'a na'o ngini ni sapolo toma limau rimoi i'a, re ananga 'aḏi dawongo ngini ua, ni tagi re ni made-de'oso toma tapaka re ni kanau,

¹¹‘Limau nena-ne ma korou'u ga'a 'i pata taminga rou ma sata, ngomi ma sesara ra ngini ninga momina di'a 'i dadi nana'o rimoi ra ngini mangale Ma Jou'ongu Madutu dawongo ngini ua ḏi'i. Mada'a ngini ni 'elingi 'Ari demo nena-ne: Tiara riwara Ma Jou'ongu Madutu 'ai Pareta 'i ngadolo.’

¹²Re Ngoi to siajele ra ngini nena-ne: Toma Kiamata ma Wangere, ngowa-ngowa'a toma limau nena-ne ḏuanga i'a ngini ni sanga hukumu lebe tubuso reo ngowa-ngowa'a 'ua re 'au wali toma limau Sodom!”

¹³“Bahala ngini ngowa'a Yahudi toma limau Korasim re limau Betsaida, Ma Jou'ongu Madutu ḏuanga i'a 'o singe-ngeta'a hukumu ra ngini. Si'ade-'ade i'a Ngoi to 'a'a ga'a hera-heranga toma ngowa'a ma jira toma limau Tirus re Sidon ma tero sa'olo Ngoi ta si'a'a ḏua ra ngini ninga sigolona, tantu ḏua ananga da'a raḏi maḏibo toma ngo'omo boloto, re ananga 'aḏi mapake pakeanga si'a'a reo kaḏu re tamanga sae'e ya sidu-durono reo itomo ma korou'u.[25]

¹⁴Dadi ḏuanga i'a enanga ma 'orasa 'i ngadolo wakutu Ma Jou'ongu Madutu 'o sijuruhakimi, ngini ngowa'a Yahudi toma limau Korasim re Betsaida ḏuanga i'a ni sanga hukumu lebe tubuso reo ngowa'a Yahudi ua toma limau Tirus re Sidon.

¹⁵Re ngini ngowa'a Yahudi toma limau Kapernaum! Awa ngini ni ta'ajiri mangale Ma Jou'ongu Madutu ḏuanga i'a 'o dawongo ngini toma soroga! So'o gena ua! Mada'a Unanga 'o siupa'a ngini toma naraka!”

¹⁶Ḏua Yesus 'o kanau Tai me-mete'e, “ 'A guna ḇato 'o mete'e re 'o 'isene ngini, unanga gena-ge 'o mete'e re 'o 'isene Ngoi. 'A guna ḇato 'o dawongo ngini ua, unanga gena-ge 'o dawongo Ngoi ua re 'o dawongo ua ḏi'i Ma Jou'ongu Madutu ga'a Ro 'utusu Ngoi.”

¹⁷Yesus 'ai me-mete'e nga nyagi tumudingi ananga 'aḏi maḏibo remanga roanga re 'aḏi kanau, “Ma Jou, ngomi nga'unu dusu'u roh ma jira sababu ngomi mapake 'Ani lomanga.”

¹⁸Yesus 'a sangoro, “Ngoi to oḏi'i ḏua 'Iblisi 'i eta'a da'u diwanga tala sa'olo ḇeḇelanga.

¹⁹Ngoi to pula'a ḏua kuasa ra ngini dadi kalaha ni jo'u ngorana bolo kalajengking, ni sanga sangisara ua. Ngoi ḏi'i to pula'a ninga de-de'e di'a ni sirapo'o 'Iblisi ma kuasa singadolo matengo i'a mai ua, bolo 'ori i'a rimoi i'a mai ua sigasa ngini sanga sangisara.

²⁰Kalaha so'o gena, awa pa'i ngini ni maroanga ḇato sababu ni nga'unu dusu'u roh-roh ma jira. Jobilaha ngini ni maroanga sababu ninga lomanga 'i silefo ḏua da'u toma soroga.”

²¹Toma 'orasa gena-ge ḏi'i, Yesus 'o maroanga sababu Ma Ngagara 'Ofi-'Ofi 'U ḏegoro re 'O kanau, “Baba, Ma Jou'ongu Madutu 'o kuasa toma diwanga re dungia, Ngoi to puji re silamo'o 'Ani lomanga sababu mo-moini gena-ge Baba na gogono toma ngowa'a pahe re ngowa'a 'akala soro'unu, mada'a Baba na sijumu toma ngowa-ngowa'a ga'a manga de'oso re ḏegoro ma tero sa'olo ngowa 'olo. Ya, Baba sababu enanga gena-ge 'i sisanangi 'Ani 'akala re sinyingara.

²²'Ori i'a mo-moini, 'Ari Ḇaḇa ra sidoa'a ra Ngoi. Matengo i'a mai ua 'o nana'o Ngoi ḏuga-ḏuga pa'i 'Ari Ḇaḇa ḇato. Matengo i'a mai ua 'o nana'o 'Ari Ḇaḇa ḏuga-ḏuga pa'i Ngoi re ra guna ḇato ga'a Ngoi to siajele mangale 'Ari Ḇaḇa.”

²³Ḏua Yesus 'o magelelo Tai me-mete'e re 'o kanau pa'i ra ananga ḇato, “Ngini ni bara'utungu sababu ngini ni oḏi'i 'oru 'i dadi toma 'orasa nange-ne.

²⁴Ngoi to siajele ra ngini nena-ne: Nabi re 'olana manga repe 'ua re 'au wali, ananga 'aḏi mau ya oḏi'i ma tero sa'olo 'oru ga'a ngini ni oḏi'i nange-ne mada'a ananga ya oḏi'i ua. Ananga nyafusu ya 'isene ma tero sa'olo 'oru ga'a ngini ni 'isene nange-ne, mada'a ya 'isene ua.”

²⁵Gena ḏua, guru 'agama matengo 'o te'oso mau disa Yesus 'ai sala dadi 'o sano ra Yesus, “Guru, ngoi balasu to 'a'a sa'olo, la to sanga 'ahu kasingado-ngadolo i'a?”

²⁶Yesus 'a sangoro, “ 'Oru ga'a 'i silefo toma Boku 'Ofi-'Ofi ma dara? Na mete'e ngana 'ani 'akala ma sanga gena-ge ma ngale 'oru?”

²⁷Ngowa'a gena-ge 'a sangoro, “ ‘Dadalara Ma Jou'ongu Madutu, 'ani Jou reni 'akala re sinyingara mo-moini reninga nyawa mo-moini, reninga de-de'e mo-moini, reninga fikirana mo-moini’ re ‘Dadalara ngowa'a lelegu ma tero sa'olo no dadalara 'ani diri masiretene.’ ”

²⁸Yesus 'o kanau, “Gena-ge tero mode'e, na si'a'a so'o gena, la ḏuanga i'a no sanga 'ahu kasingado-ngadolo i'a.”

²⁹Mada'a guru 'agama gena-ge 'o oḏu'u awa-awa ngowa'a 'aḏi aje unanga 'o haga, dadi unanga 'o sano ra Yesus, “Ngoi 'ari ioronongoḏu gena-ge 'a guna ga'a ngoi balasu to dadalara ma tero sa'olo to dadalara 'ari diri masiretene?”

³⁰Yesus 'a sangoro reo pula'a 'ade-'ade, “ 'Age rema na-nau'u matengo, unanga da'u limau Yerusalem tala 'o tagi toma limau Yerikho. Toma ngo'omo ma golona ngowa'a to-tori'i 'aḏi ra-rabasa unanga 'ai 'ori i'a rana re 'ai pakeanga re 'aḏi ca'olo unanga singadolo sa'i ro sengene, kara 'u sisoi'i tala unanga 'o lu-lulu toma ngo'omo ma golona.

³¹Sidaene i'a, 'imam matengo 'o tola'a ino toma ngo'omo gena-ge. Wakutu 'imam gena-ge 'o oḏi'i ngowa'a ga'a sanga bodito gena-ge, 'imam gena-ge 'o malalo'o ngo'omo kaci moi re 'o tagi turusu.

³²So'o gena ḏi'i, ngowa'a Lewi matengo 'o tola'a ino ḏi'i toma ngo'omo gena-ge. Wakutu 'o oḏi'i ngowa'a ga'a sanga bodito nange-ge, ngowa'a Lewi gena-ge 'u sebanga i'a di'a 'u tailako. Mada'a unanga 'o masai'i re 'o malalo'o da'a ngo'omo kaci moi re 'o tagi turusu.

³³Gena ḏua, ngowa'a Samaria matengo 'o tagi mete'e ngo'omo gena-ge ḏi'i. Wakutu unanga 'o oḏi'i ngowa'a ga'a sanga bodito nange-ge, Tai 'akala re sinyingara 'i baolo dadalara toma ngowa'a gena-ge.

³⁴Dadi unanga 'o jau i'a ngowa'a ga'a sanga bodito nange-ge, kara 'u soso'o 'ai nyaboto reo 'anggur re 'u siajala reo goroho re 'a sisao reo ḇa'a. Gena ḏua, unanga 'u sibalene tai jarana, kara 'u gasa 'u situḏu toma panginapana re 'u dadanu.

³⁵Ma ḇiḇini ino, ngowa'a Samaria gena-ge 'a pula'a 'ai pipisi salaka dinar ngai ḏiḏi toma panginapana ma dutu re 'o kanau, ‘Nu sioḏi'i unanga re na'o no balajanga ma pipisi 'i ngadolo ua, maha ngoi to ḏibo, kara ta dogo.’ ”

³⁶Gena ḏua, Yesus 'a siḏo-ḏogumu 'Ai jarita re 'o sano so'o ne, “Toma ngowa'a nga ḏu'ange gena-ge mete'e 'ani 'akala ma sanga 'a guna ga'a 'o dadi 'ai ioronongoḏu toma ngowa'a ga'a sanga bodito gena-ge?”

³⁷Guru 'agama 'a sangoro, “Unanga ga'a 'o sijumu 'ai 'akala re sinyingara ma la-la toma ngowa'a ga'a sanga bodito.” Ḏua Yesus 'o kanau ra unanga gena-ge, “Dadi no tagi re na si'a'a ḏi'i!”

³⁸Gena ḏua, Yesus re 'Ai me-mete'e ananga ya dowanga manga ḏo-ḏagi re 'aḏi ngadolo toma gamu rimoi. Toma gamu gena-ge 'age rema we-were'a matengo 'ami lomanga ngo Marta mo 'aro'o tuḏu tami wala.

³⁹Munanga gena-ge re ngo Maria gia nongoḏu. Ngo Maria munanga mo tegoro co-cori ra Ma Jou Yesus 'ai rou, la mo sigi-gisene 'a Yesus 'ai do-doto'o.

⁴⁰Mada'a ngo Marta mo tasibu masala mo munara da'a toma itomo. Munanga mo i'a ra Yesus re mo kanau, “Ma Jou, i'a sa'olo nimi ḇangata ua ngo Maria sababu munanga mo sieanga i'a ngoi to munara matengo? No soma'a munanga mo mariono ngoi!”

⁴¹Ma Jou 'o kanau, “Marta, Marta ngana no dodato re no tasibu 'oru ḇato!

⁴²Momongolo ua pa'i rimoi ḇato lebe la-lamo'o: sigi-gisene 'Ari do-doto'o. Ngo Maria ma pili gena-ge dadi matengo i'a ua ya 'oro.”