Read Sahu Lukas 11 Bible Online

Lukas 11 - Sahu bible

Lukas 11

¹Toma 'orasa rimoi, Yesus 'o manyiata toma ngi'i rimoi. Unanga 'o manyiata togumu i'a, 'Ai me-mete'e matengo 'o kanau ra Unanga, “Ma Jou, no doto'o ngomi mangale manyiata, sa'olo 'a Yohanes 'o doto'o 'Ai me-mete'e 'aḏi manyiata.”

²Ḏua Yesus 'o kanau i'a ra ananga, “Wakutu ngini ni manyiata ni kanau so'o ne: ‘Baba, 'Ani lomanga ngowa'a ya silamo'o re siḏubuso, 'Ani Pareta 'i sapolo ino.

³Minga ngo-ngoromo toma wange moi-wange moi, No pula'a ino ga'a ngomi paralu,[26]

⁴Re No singi-ngiranga minga ḏosa, sababu ngomi ḏi'i mi si'apongo ngowa'a mo-moini ga'a 'a'a sala ra ngomi. Re awa No sieanga i'a ngomi mi sanga bo-baja.’ ”

⁵Yesus dadunu 'o kanau moju Tai me-mete'e, “Si'ade-'ade i'a matengo i'a ra ngini ninga sigolona toma utu golona i'a 'o tagi tai ḏagilomu ma wala, re 'o kanau, ‘Wolo no sibau 'ani roti ngai ro'ange,

⁶sababu 'ari ḏagilomu toma ḏo-ḏagi ma dara, 'o tuḏu tari wala. Mada'a ngoi 'ari ngo-ngoromo ri moini di'a to pula'a unanga 'o oromo.’

⁷Sanga ua, wala ma dutu da'a tai wala ma dara ino 'o kanau, ‘No sikangela ngoi awa. 'Ari ngalana reta kuci, sidogo ḏi'i ngoi re 'ari ngowa-ngowa'a rimi otu. Ngoi to momi'i ri yoḏu'u di'a to pula'a 'ori i'a ra ngana!’ ”

⁸“Mada'a Ngoi to siajele ra ngini nena-ne: Kalaha unanga gena-ge 'ani ḏagilomu 'o oḏu'u momi'i re 'o pula'a ua 'ori i'a ra ngana mada'a sababu ngana no mara'a ua nu golo'o,[27] tantu ḏua unanga gena-ge ḏuanga i'a 'o momi'i re 'o pula'a 'ani paralu mo-moini ra ngana.

⁹Dadi Ngoi to kanau ra ngini: Ni golo'o, ḏuanga i'a ni dawongo. Ni disa, ḏuanga i'a ni sanga. Ni tolo'o ngalana, ḏuanga i'a ya welanga.

¹⁰Sababu 'a guna ḇato ga'a 'o golo'o, ḏuanga i'a 'o dawongo. 'A guna ḇato ga'a 'o disa, ḏuanga i'a 'o sanga. Re 'a guna ḇato ga'a 'o tolo'o ngalana, ḏuanga i'a ya welanga.

¹¹Sanga ua 'age rema ḇaḇa matengo taninga sigolona, na'o 'ai ngowa'a nau'u 'o golo'o nyao'o, unanga 'o pula'a cuku'u!

¹²Bolo na'o 'ai ngowa'a 'o golo'o namo ma gosi, unanga 'o pula'a kalajengking!

¹³Kalaha ngini ngowa'a baraḏosa, ngini mai ni waro ḏi'i ni pula'a 'ori i'a ma la-la taninga ngowa-ngowa'a. Ma la-lamo'o i'a ḏi'i, ninga Ḇaḇa toma soroga! Tantu ḏua, Unanga 'o pula'a Ma Ngagara 'Ofi-'Ofi ra ananga ga'a 'aḏi golo'o ra Unanga!”

¹⁴Toma wange rimoi, Yesus 'o dusu'u roh ma jira toma ngowa'a mou matengo. Wakutu roh ma jira 'i supu ngowa'a mou gena-ge 'o kanau 'i nyengara. Ḏua ngowa'a repe 'aḏi matai heranga

¹⁵Mada'a tamanga sigolona 'age ngowa'a 'aḏi kanau, “Beelzebul, 'o Roh ma Jira ma 'Olana, 'i pula'a kuasa ra Unanga, la 'a dusu'u roh ma jira gena-ge.”

¹⁶'Age ngowa'a ma lelegu ḏi'i 'aḏi mau disa 'a Yesus 'ai sala. Ananga 'aḏi golo'o Unanga 'o 'a'a ga'a hera-heranga sa'olo bukiti rimoi mangale Unanga ro sapolo da'u ra Ma Jou'ongu Madutu tala.

¹⁷Mada'a Yesus 'a waro ananga manga fikirana. Dadi Unanga 'o kanau ra ananga, “Toma nagara rimoi, na'o ma manusia 'i palangu toropo moi-toropo moi ga'a 'aḏi ma'u parangi i'a re ino, tantu ḏua nagara gena-ge ḏuanga i'a 'i wejere. Re ngale rimoi na'o ma'u emono matengo re matengo, ngale gena-ge ḏuanga i'a 'i pinya'olo.

¹⁸So'o gena ḏi'i reo 'Iblisi ma pareta. Na'o 'Iblisi 'ane toropo moi ma'u parangi reo 'Iblisi da'a toropo moi, marai 'Iblisi ma pareta gena-ge 'i wejere. Ngini ni kanau mangale Ngoi to dusu'u roh ma jira reo Beelzebul ma kuasa.

¹⁹Na'o so'o gena, ra guna 'ai kuasa ninga me-mete'e 'aḏi dusu'u roh ma jira?![28] Sababu gena-ge, ninga me-mete'e gena-ge masiretene ya bukiti mangale ngini ni rapu!

²⁰Mada'a Ngoi to dusu'u roh ma jira rea Ma Jou'ongu Madutu 'ai kuasa. Gena-ge 'i dadi didina'o rimoi mangale Ma Jou'ongu Madutu ro mulaingi 'o parenta taninga sigolona.

²¹Na'o matengo ga'a lao te'e re 'ai dare 'i to-totomo, 'a jaga 'ai wala masiretene, 'ai 'ori i'a rana 'i salamata.

²²Mada'a na'o matengo i'a, lebe te'e ra unanga 'o parangi, ḏua unanga 'o iranga. Ngowa'a lebe te'e gena-ge 'a ra-rabasa 'ai dare, ga'a wala ma dutu 'a sitoro-toro, ḏua 'a palangu 'ai 'ori i'a rana mo-moini tai ḏagilomu-ḏagilomu.[29]

²³'A guna marimoi ra Ngoi ua, unanga gena-ge mode-mode'e 'o malawana Ngoi, re 'a guna riono Ngoi ua, unanga gena-ge mode-mode'e 'a dola'aku Ngoi 'ari munara.”

²⁴“Wakutu roh ma jira 'i supu toma ngowa'a matengo sababu sanga dusu'u, enanga 'i tagi sigoloḏi toma ngi'i-ngi'i du-dudungu di'a disa ngi'i ma ngomasa, re sababu enanga 'i sanga ua 'i kanau, ‘Ngoi ḏuanga i'a to maḏibo toma ngowa'a ga'a to supu ḏua nga'ene!’

²⁵Re wakutu enanga 'i maḏibo toma ngowa'a gena-ge 'i sanga ua Ma Ngagara 'Ofi-'Ofi 'i tegoro tai 'ahu. Ngowa'a gena-ge ma tero sa'olo wala ma dara 'i 'ofi-'ofi re 'i ḏu-ḏuanga ḏua di'a enanga dadunu 'i tegoro moju.

²⁶Sababu gena-ge enanga 'i tagi, 'i gasa ino roh ma jira tumudingi ma lelegu lebe cira i'a. Ḏua enanga 'i osama re 'i tegoro toma ngowa'a gena-ge. Ma ḏo-ḏogumu tala ngowa'a gena-ge 'ai 'ahu nange-ne lebe cira i'a reo 'ahu 'au nga'ene.”

²⁷Yesus 'o kanau so'o gena togumu i'a, we-were'a matengo toma ngowa'a repe manga sigolona, mo kanau siduga-duga ra Yesus, “Bara'utungu madutu 'Ani ngina ga'a sibuoro re ga'a sisusu Jou.”

²⁸Mada'a Yesus 'a sangoro, “Lebe bara'utungu ḏi'i ngowa'a ga'a 'aḏi 'isene Ma Jou'ongu Madutu 'ai demo re ya si'a'a.”

²⁹Wakutu ngowa'a repe 'aḏi sigoloḏi Yesus, Unanga 'o kanau, “Ngowa-ngowa'a 'orasa nange-ne, ngowa'a ma jira. Ngini ni golo'o Ngoi to 'a'a didina'o heranga mada'a rimoi i'a mai ua To pula'a ra ngini, pa'i ḏuga-ḏuga ga'a 'age ra ngini ḏua gena-ge didina'o heranga mangale nabi Yunus.

³⁰Ma tero sa'olo nabi Yunus 'o dadi ngowa'a Niniwe manga didina'o, so'o gena ḏi'i Manusia Ma Ngowa'a Nau'u 'o dadi sa'olo didina'o toma ngowa-ngowa'a 'orasa nange-ne.

³¹Toma Kiamata ma Wangere, 'olana we-were'a toma kore sara ma nagara mo momi'i re mo kalaki ngowa-ngowa'a 'orasa nange-ne. Munanga mi ḏo-ḏagi lai kiḏanga madutu, sababu mau ma 'isene 'a Salomo 'ai 'akala ma soro'unu. Kalaha 'ane-ne, nange-ne Ngoi lebe la-lamo'o i'a rea Salomo taninga sigolona, mada'a ni ngaku Ngoi ua re ni maḏibo toma ngo'omo boloto ua!

³²Toma Kiamata ma Wangere, ngowa'a Niniwe re ngowa'a 'orasa nange-ne ḏuanga i'a 'aḏi dadunu 'ahu moju. Ḏua ngowa'a Niniwe ḏuanga i'a 'aḏi kalaki ngowa-ngowa'a nange-ne. Sababu ngowa'a Niniwe ananga raḏi maḏibo toma ngo'omo boloto, wakutu ananga 'aḏi 'isene nabi Yunus 'ai habari. Kalaha 'ane-ne, nange-ne Ngoi lebe la-lamo'o i'a rea Yunus taninga sigolona, mada'a ni ngaku Ngoi ua re ni maḏibo toma ngo'omo boloto ua!

³³Matengo i'a mai ua tagala 'o poci, kara ya gogono bolo ya damunu reo tampayanga.[30] Unanga 'a siteru toma poci ma ngi'i, la ngowa'a ga'a osama nga'unu ya oḏi'i ma tarangi.

³⁴La'o gena-ge 'i dadi sa'olo lese ma lapuru. Na'o ninga la'o 'i la-la, ninga lese rimoi mo-moini 'i tarangi. Mada'a na'o ninga la'o 'i siḏi re karasa, ninga lese rimoi mo-moini 'i hafu.

³⁵Sababu gena-ge, balasu ni ma'istiari, awa-awa ninga tarangi 'i dadi hafu-hafu.

³⁶Na'o ninga lese rimoi mo-moini 'i tarangi re ceka'a i'a mai ua 'i hafu-hafu, ḏua ninga lese rimoi mo-moini 'i romanga reo tarangi, ma tero sa'olo lapuru ma tarangi ya 'erese.”

³⁷Yesus 'o doto'o togumu i'a, 'age rema ngowa'a Farisi matengo 'o saele 'a Yesus oromo ra unanga 'ai wala. Ḏua Yesus 'o tagi oromo.

³⁸Ngowa'a Farisi gena-ge 'o oḏi'i Yesus 'o mete'e 'agama ma 'atoranga ua. Unanga 'o oromo 'a soso'o siḏa ua 'Ai giama! Sababu gena-ge, ngowa'a Farisi 'o heranga.

³⁹Dadi Ma Jou 'o kanau ra unanga, “Ngini ngowa'a Farisi, ninga moku re ninga suḏe ma ḏuḏunu na soso'o 'i 'ofi madutu. Mada'a taninga 'akala re sinyingara ma dara 'i romanga reo 'ori i'a ma faja re ni nyafusu ngowa'a manga 'ori i'a rana.

⁴⁰Ngini ngowa'a haga. Ma Jou'ongu Madutu 'o 'a'a manusia nanga lese re nanga 'akala re sinyingara ḏi'i.

⁴¹Ngini ninga moku re suḏe ma dara, balasu ni pula'a toma ngowa'a ma dinga'unu ua. Na'o ninga ga'a so'o gena-ge, ngini ni dadi 'ofi-'ofi ra Ma Jou'ongu Madutu 'ai momina.

⁴²Bahala ra ngini, ngowa-ngowa'a Farisi! Ninga joro-joro ma hasili sa'olo ḇawanga kolili re rampa-rampa, gena-ge ngini na pula'a jou-jou ga'a ma balangu moi toma balangu nyagi moi ino di'a Ma Jou'ongu Madutu. Mada'a ngini ni 'adili ua toma ngowa'a lelegu re dadalara ua Ma Jou'ongu Madutu. Momongolo ua, ngini balasu ni 'adili toma ngowa'a lelegu re dadalara Ma Jou'ongu Madutu re ni sidaioranga awa ni pula'a ninga jou-jou gena-ge ra Ma Jou'ongu Madutu.

⁴³Bahala ra ngini, ngowa-ngowa'a Farisi! Toma wala puji, ngini ni nyanyaḏi tegoro toma biono re toma pasara-pasara ni nyanyaḏi ngowa-ngowa'a nu silamo'o.

⁴⁴Bahala ra ngini, ngowa-ngowa'a Farisi! Ngini ni matuhu sa'olo ngowa'a 'ofi-'ofi mada'a ninga 'akala re sinyingara ma dara 'i romanga reo 'ori i'a ma faja sa'olo kubu kama nana'o ua ma dara rema maiyeti ma wejere. Dadi ngowa'a ya waro ua re ya jo-jo'u.”

⁴⁵Guru 'agama matengo 'o kanau ra Yesus, “Guru, 'ani demo-demo gena-ge no sije-jengere ngomi ḏi'i!”

⁴⁶Yesus 'a sangoro, “Ngini guru-guru 'agama ni sanga bahala ḏi'i. Ngini ni pula'a 'atoranga ma ḏu-ḏubuso ma tero sa'olo ngini ni siteru gina-gina ma ḏu-ḏubuso toma ngowa-ngowa'a manga bele'asa ga'a kangela masala ngowa'a ya doiti. Mada'a ngini masiretene ceka'a i'a mai ua ni riono ananga ya siḏagi 'atoranga gena-ge.

⁴⁷Bahala ra ngini mo-moini. Ngini ni 'a'a nabi-nabi manga kubu mada'a ninga ete re dotumu 'ua re 'au wali masiretene ya'u sisengene!

⁴⁸Dadi ngini ni simete'e 'oru ga'a ninga ete re dotumu 'ua re 'au wali manga ga'a. Sababu mode-mode'e ananga ya'u sisengene 'o nabi-nabi re ngini ni 'a'a manga kubu.

⁴⁹Ma sababu gena-ge Ma Jou'ongu Madutu 'ai 'akala ma soro'unu ma betongo so'o ne: ‘Ngoi ḏuanga i'a to siḏingoto 'Ari nabi-nabi re 'Ari so-soma'a re mamuni'a ḏi'i taninga sigolona ya'u sisengene re ya'u sisikisa!’

⁵⁰Sababu ngini ni simete'e 'oru ga'a ninga ete re dotumu 'ua re 'au wali manga ga'a gena-ge, ngini ngowa-ngowa'a 'orasa nange-ne ni sanga hukumu ra Ma Jou'ongu Madutu sababu nabi mo-moini ninga ete re dotumu ya'u sisengene, mulaingi dungia 'i dadi.

⁵¹Mulaingi sisengene 'a Habel, singadolo 'aḏi sisengene 'a Zakaria toma jou-jou ma ngi'i ra Ma Jou'ongu Madutu 'ai Wala ma sigolona. Ngoi to siajele ra ngini nena-ne: Ngowa-ngowa'a 'orasa nange-ne ḏuanga i'a 'aḏi sanga hukumu sababu nabi-nabi gena-ge ngini re ninga ete re dotumu ananga ya'u sisengene.

⁵²Bahala ra ngini guru-guru 'agama. Ngini na gogono kuci ga'a siwelanga ngalana wo-waro mangale Ma Jou'ongu Madutu 'ai do-doto'o. Mada'a ngini masiretene ni oḏu'u osama toma dara, la ni sanga wo-waro. Sidogo ḏi'i ngini ni dola'aku ngowa'a ga'a 'aḏi mau osama toma dara la sanga wo-waro.”

⁵³Ḏua Yesus 'a sisoi'i tala ngi'i gena-ge. Toma 'orasa gena-ge guru-guru 'agama re ngowa-ngowa'a Farisi lebe dola'aku 'a Yesus. Ananga 'aḏi ga-gawolo 'a Yesus

⁵⁴re 'aḏi tailako Unanga mode-mode'e dadi na'o 'Ai demo bale moi i'a Unanga 'o kanau 'i rapu, ananga ya cako'o 'Ai demo gena-ge.