Read Sahu Lukas 13 Bible Online

Lukas 13 - Sahu bible

Lukas 13

¹Toma 'orasa gena-ge, 'age rema ngowa'a 'aḏi siajele ra Yesus mangale sordado-sordado 'aḏi sisengene ngowa'a Galilea nga muḏuo i'a wakutu ananga 'aḏi tola'a manga haiwani di'a jou-jou ra Ma Jou'ongu Madutu. Sordado-sordado gena-ge 'aḏi mete'e 'a Pilatus 'ai parenta.

²Yesus 'o kanau ra ananga so'o ne, “Dadi ngini ta'ajiri ngowa-ngowa'a ga'a sanga sengene, ananga gena-ge manga ḏosa lebe lamo'o i'a reo ngowa'a Galilea ma lelegu mo-moini singadolo ananga sanga sengene ma duhu so'o gena?

³So'o gena ua! Mada'a Ngoi to siajele ra ngini nena-ne: Na'o ngini ni maḏibo toma ngo'omo boloto ua, ngini mo-moini ḏi'i ḏuanga i'a ni sanga sengene kasingado-ngadolo i'a.

⁴Tantu ḏua, ngini ni 'elingi moju 'age rema ngowa'a nga nyagi moi re nga tu'angere 'aḏi sengene toma Siloam sababu wala kau'u 'i ru'ata ya'u be-be'ara. Ngini ni ta'ajiri ananga gena-ge manga ḏosa lebe lamo'o i'a reo ngowa'a lelegu mo-moini ga'a 'aḏi tegoro toma limau Yerusalem?

⁵So'o gena ua! Soi moi moju ngoi to kanau ra ngini. Na'o ngini ni maḏibo toma ngo'omo boloto ua, ngini mo-moini ḏi'i ḏuanga i'a ni sanga sengene kasingado-ngadolo i'a.”

⁶Togumu i'a, Yesus 'o siajele ra ananga 'ade-'ade rimoi: “Matengo rai guḏa 'anggur 'age rema ate 'ara ḏu moi. Toma wangere rimoi unanga 'o tagi mau 'oro ate 'ara ma sowo'o mada'a ate gena-ge kama sowo'o ua.

⁷Dadi guḏa 'anggur ma dutu 'o kanau i'a tai guḏa 'anggur ma ja-jaga matengo, ‘Oḏi'i, musungu ro'ange ma dara ngoi to sapolo mau ta 'oro ate 'ara ma sowo'o mada'a kama sowo'o ua. Na tawele ḇato ate nena-ne, pa'i simoini tana'a ma gaji ḇato!’

⁸Mada'a guḏa 'anggur ma ja-jaga unanga 'a sangoro, ‘Tuanga, eanga i'a enanga 'i 'ahu musungu rimoi si. Maha ngoi ta patu ma tana'a ta sigoloḏi, kara ta sigare pupuku.

⁹Wari'a si, musungu toma biono enanga 'i sowo'o. Na'o gena-ge mai 'i sowo'o ua, Tuanga no soma'a ta tawele.’ ”

¹⁰Toma Sabata ma wangere rimoi, Yesus 'o doto'o ngowa'a toma wala puji.

¹¹Tamanga sigolona, 'age rema we-were'a matengo ga'a mo siḏi ma di'ara musungu nyagi moi re tu'angere ḏua, sababu roh ma jira mi dungosama. We-were'a nena-ne mo pukutu, dadi mo te'oso boloto yoḏu'u.

¹²Wakutu Yesus 'o oḏi'i munanga, unanga 'o kanau i'a, “Meme, 'ani si-siḏi ri cua.”

¹³Re Yesus 'a siteru 'Ai giama toma we-were'a gena-ge. Toma 'orasa gena-ge ḏua, munanga nga'unu mo te'oso boloto. Ḏua munanga mo puji re silamo'o Ma Jou'ongu Madutu.

¹⁴Wala puji ma sae'e 'o ruta, sababu Yesus 'o si-la ngowa'a siḏi toma Sabata ma wangere. Dadi unanga 'o kanau toma ngowa-ngowa'a, “ 'Age toma wangere rarama ma dara di'a ni munara, dadi sapolo toma wangere-wangere gena-ge di'a ni si-la; awa toma Sabata ma wangere!”

¹⁵Ma Jou 'a sangoro, “Hei ngini, ngowa'a munafiki! Ngowa'a mo-moini sisupu manga haiwani sapi, bolo jarana toma karunga di'a ya gasa ya sika'e ḇanyo toma Sabata ma wangere ḏi'i.

¹⁶Nah, nange-ne 'age rema we-were'a matengo munanga 'ami 'asala ra Abraham ino, 'Iblisi 'i agutu munanga ma di'ara musungu nyagi moi re tu'angere ḏua. 'I rapu 'oru, na'o wa pasala ma bi-biri'u toma Sabata ma wangere!”

¹⁷Wakutu Yesus 'o kanau so'o gena ngowa-ngowa'a ga'a lawana Unanga ananga 'aḏi mara'a. Mada'a wakutu ngowa-ngowa'a lelegu 'aḏi oḏi'i Yesus 'o 'a'a ga'a hera-heranga gena-ge, ananga mo-moini manga 'akala re sinyingara 'i sanangi.

¹⁸Ḏua Yesus 'o sano, “Ma Jou'ongu Madutu 'ai Pareta ma tero sa'olo 'oru! Ngoi ta site-tero reo 'ade-'ade 'oru!

¹⁹Enanga site-tero sa'olo gisisi ma moi'i ngai moi lai 'alusu madutu ga'a ngowa'a ya otomo tai guḏa. Pasala i'a gisisi gena-ge 'i konyo re 'i ramasa 'i dadi ate ḏu moi singadolo namo toma diwanga mo-moini 'i matai sapolo 'i maderana re 'i 'a'a ma ngi'i toma uma-umanga.”

²⁰“Soi moi moju Yesus 'o sano, Ma Jou'ongu Madutu 'ai Pareta ma tero sa'olo 'oru! Ngoi ta site-tero reo 'ade-'ade 'oru!

²¹Enanga site-tero sa'olo ragi. We-were'a matengo mo 'oro ragi kara masicapuru reo tarigu litere nyagi rata singadolo enanga mo-moini 'i ramasa.”

²²Yesus 'o tagi toma limau Yerusalem. Tai ḏo-ḏagi ma dara Unanga 'o tuḏu toma limau-limau re gamu-gamu di'a 'o doto'o ngowa-ngowa'a.

²³Ḏua ngowa'a matengo 'o sano ra Yesus, “Jou, pa'i mamuni'a ḇato ḏuanga i'a sanga salamata?” Yesus 'a sangoro,

²⁴“Ni makutale ni osama mete'e ngalana ga'a 'i peletoro. Sababu Ngoi to siajele ra ngini nena-ne: 'Age rema ngowa'a manga repe ḏuanga i'a 'aḏi makutale 'aḏi osama, mada'a sanga osama ua.

²⁵Wakutu wala ma dutu 'o momi'i re 'a kuci wala ma ngalana, re ngini ni made-de'oso toma wala ma soana re ni tolo-tolo'o ngalana re ni kanau, ‘Tuanga, welanga ngalana di'a ngomi.’ Tuanga gena-ge ḏuanga i'a 'a sangoro, ‘Ngoi tunu nana'o ngini ua bolo ngini le'a ino!’

²⁶Ngini ḏuanga i'a na sangoro, ‘Ngomi mi oromo re mi ka'e ma'u mete-mete'e ḏua ra Tuanga, re Tuanga ḏi'i no doto'o ngomi taminga limau!’

²⁷Mada'a Tuanga gena-ge dadunu 'o kanau, ‘Ngoi tini nana'o ua bolo ngini le'a ino! Ni malage 'ane ngowa'a ga'a ni 'a'a kajahatana!’

²⁸Ngini ḏuanga i'a ni oḏi'i 'a Abraham, Ishak re 'a Yakub, re nabi-nabi mo-moini ra Ma Jou'ongu Madutu 'ai dungia su-sungi ma dara. Mada'a ngini ḏuanga i'a ni doiti ma sangisara re ni rerese ma gaḏi, sababu ngini masiretene sanga dusu'u ni supu toma dungia su-sungi gena-ge!

²⁹Ḏuanga i'a ngowa'a Yahudi ua matai sapolo da'a wangere ma la'o ino, toma wangere ma soḏu isa, toma kore sara ino, toma kore mie ino. Ananga mo-moini 'aḏi oromo ra Ma Jou'ongu Madutu 'ai dungia su-sungi ma dara.

³⁰Mode-mode'e 'age rema ngowa'a ga'a ngowa'a mapake ua ga'a ḏuanga i'a 'aḏi dadi ngowa'a la-lamo'o. Re ngowa'a ga'a ngowa'a la-lamo'o ga'a ḏuanga i'a 'aḏi dadi ngowa'a mapake ua.”

³¹Toma 'orasa gena-ge ḏi'i, ngowa-ngowa'a Farisi nga muḏuo i'a 'aḏi sapolo ra Yesus re 'aḏi kanau, “No tegoro 'ane awa, tagi no malage ngi'i lelegu, sababu 'a Herodes mau 'o sisengene Jou.”

³²Yesus 'o sangoro, “Tagi na sihabari ra Herodes, unanga gena-ge ga'a sihaga ngowa'a. ‘Wangere nange-ne bolo da-daini, Ngoi ḏuanga i'a to sisupu roh ma jira, re to si-la ngowa'a siḏi. Mada'a toma wangere ma soi ro'ange Ngoi ḏuanga i'a ta siḏuanga 'Ari munara.’

³³Kalaha so'o gena, Ngoi balasu ta dowanga 'ari ḏo-ḏagi toma wangere nange-ne, da-daini re ḏiḏingi. Sababu 'i rousu ua ananga 'aḏi sisengene nabi matengo toma limau ma lelegu, balasu toma limau Yerusalem!

³⁴Yerusalem, Yerusalem! Ngini, ngowa'a Yerusalem ga'a 'aḏi sisengene nabi-nabi re ni poini reo maḏi Ma Jou'ongu Madutu 'ai 'utusana singadolo 'aḏi sengene! Soi muḏuo i'a ḏua, Ngoi mau tini saolo ngini ma tero sa'olo namo ma ngina ya worongo ma ngowa-ngowa toma kalatu'u ma 'aḏu, mada'a ngini ni oḏu'u!

³⁵Ni 'isene la-la ino: Ma Jou'ongu Madutu ḏuanga i'a 'o sieanga i'a Unanga 'ai Wala ne. Re Ngoi to siajele ra ngini nena-ne: Mulaingi nange-ne re si'a ngini ḏuanga i'a ni oḏi'i Ngoi riwara singadolo ngini ni kanau, ‘Sibarakati Unanga ga'a 'o sapolo rea Ma Jou'ongu Madutu 'ai lomanga.’ ”