Read Sahu Lukas 14 Bible Online

Lukas 14 - Sahu bible

Lukas 14

¹Toma 'orasa rimoi Sabata ma wangere, Yesus 'o tagi oromo toma ngowa'a Farisi matengo 'ai wala. Unanga gena-ge 'o sayanga ma jingi'i. Toma ngi'i gena-ge, guru-guru 'agama re ngowa-ngowa'a Farisi 'aḏi tailako Unanga mode-mode'e.

²'Age rema ngowa'a matengo 'o si-siḏi bere-bere, 'ai rou re 'ai giama 'i robo-roboso. Unanga gena-ge 'o sapolo ra Yesus.

³Ḏua Yesus 'o sano toma guru-guru 'agama re ngowa-ngowa'a Farisi, “Mete'e nanga 'agama ma hukumu, yoḏu'u bolo nyengara ngene wo si-la ngowa'a siḏi toma Sabata ma wangere?”

⁴Guru-guru 'agama re ngowa-ngowa'a Farisi 'aḏi masiogoro. Ḏua Yesus 'a siteru 'Ai giama toma ngowa'a siḏi gena-ge, ḏua ro la. Togumu i'a Yesus 'o soma'a ngowa'a gena-ge 'o tagi.

⁵Yesus 'o kanau ra ananga, “Na'o taninga sigolona 'age rema ngowa'a matengo i'a ninga ngowa'a nau'u, bolo ninga sapi 'i eta'a toma sumu ma dara toma Sabata ma wangere. Capati na iḏala sisupu ninga ngowa'a, bolo ninga sapi gena-ge toma wangere gena-ge ḏua bolo ua?”

⁶Mada'a matengo i'a mai ua 'a sangoro Yesus 'ai so-sano gena-ge.

⁷Yesus 'o oḏi'i 'age ioronongoḏu 'aḏi tegoro mabili toma sayanga ma jingi'i. Sababu gena-ge, Unanga 'o pula'a 'ade-'ade nena-ne ra ananga mo-moini.

⁸“Awa ni tegoro mabili toma ngi'i di'a sayanga ma jingi'i na'o ni sanga saele toma molo'ara ma laya. Sababu awa-awa 'age ngowa'a lelegu ḏi'i ga'a lebe lamo'o i'a ra ngana sanga saele ḏi'i.

⁹Na'o so'o gena, wala ma dutu ga'a 'o saele ngini nga muḏiḏi, 'o sebanga i'a ra ngana 'o kanau, ‘Ma'afu, ngi'i nena-ne ta sidodahe di'a ioronongoḏu ngowa'a la-lamo'o.’ Dadi rani mara'a no made'oso, no tagi no maḏegoro toma ngi'i da'a dudunu madutu.

¹⁰Sababu gena-ge, ngini ni mabili ngi'i da'a toma dudunu madutu na'o ni sanga saele, la wala ma dutu na'o 'o sapolo 'o kanau ra ngana, ‘Wolo, ino no tegoro toma ngi'i 'ane-ne ga'a lebe rousu.’ Duhu so'o gena, wala ma dutu 'o silamo'o ngana toma mandan.

¹¹Sababu 'a guna ḇato 'o sihie 'ai diri, unanga gena-ge ḏuanga i'a Ma Jou'ongu Madutu 'u siholo. Mada'a 'a guna ḇato 'o maholo 'ai diri, unanga gena-ge ḏuanga i'a Ma Jou'ongu Madutu 'u sihie.”

¹²Ḏua Yesus 'o kanau toma wala ma dutu, “Wakutu ngana no saele ngowa'a di'a 'omo wangere 'olona, bolo 'omo lobi'i, no saele awa 'ani ḏagilomu bolo 'ani ioro re nongoḏu, bolo 'ani herapongo, bolo 'ani wala sebanga ga'a ngowa'a rema-enanga. Sababu ḏuanga i'a ananga 'aḏi saele ngana ḏi'i. Ga'a so'o gena-ge ananga nga'unu ya balasa.

¹³Dadi wakutu ngana no 'a'a laya rimoi i'a, no saele ngowa'a ma dinga'unu ua, ngowa'a ḇolo, ngowa'a ceg̱u re ngowa'a hafu.

¹⁴Na'o ngana 'a'a so'o gena ḏuanga i'a ngana no bara'utungu. Sababu ngowa'a gena-ge ya balasa nga'unu ua ngana 'ani la. Mada'a ngana 'ani la, ḏuanga i'a Ma Jou'ongu Madutu 'a balasa wakutu ngowa'a loasa re banari dadunu 'aḏi 'ahu moju toma ngowa'a senge-sengene manga sigolona.”

¹⁵Wakutu ngowa'a matengo tamanga sigolona ga'a 'o oromo mamete'e rea Yesus 'o 'isene 'a Yesus 'ai demo-demo gena-ge, unanga 'o kanau, “Bara'utungu madutu, ngowa'a ga'a ḏuanga i'a 'o oromo mamete'e ra Ma Jou'ongu Madutu Tai pareta ma dara!”

¹⁶Mada'a Yesus 'o kanau toma ngowa'a gena-ge, “Toma 'orasa rimoi, 'age rema ngowa'a matengo 'o 'a'a laya lamo'o re 'o saele ngowa'a manga repe.

¹⁷Wakutu laya gena-ge ma 'orasa sa'i mulaingi, ngowa'a gena-ge 'o soma'a 'ai falalomu matengo 'o tagi toma ngowa'a ga'a unanga 'o saele nange-ge re 'o kanau, ‘Ino ni sapolo toma laya nena-ne sababu mo-moini 'i ḏu-ḏuanga ḏua!’

¹⁸Mada'a ananga mo-moini, matengo re matengo 'aḏi golo'o ma'afu. Ma mulaingi unanga 'o golo'o ma'afu toma falalomu ga'a saele unanga, ‘Ngoi aro to tibo 'o tana'a ḇotu moi re paralu ta tutumu tana'a gena-ge. Dadi sima'afu ngoi.’

¹⁹Matengo ḏi'i 'o golo'o ma'afu, ‘Ngoi aro to tibo sapi sabi romotoa re to mau ta sitai'i ta sipajeko sapi-sapi gena-ge. Dadi sima'afu ngoi.’

²⁰Matengo moju 'o golo'o ma'afu, ‘Ngoi aro to molo'ara. Sababu gena-ge ngoi to sapolo sa'olo ua.’

²¹Falalomu gena-ge 'o maḏibo, re 'o siajele tai Tuanga. Ḏua ma tuanga gena-ge 'o ruta madutu, re 'o soma'a tai falalomu gena-ge, ‘Capati no tagi toma tapaka reo lurungu-lurungu toma limau ma dara, no gasa ino 'o ngowa'a ma dinga'unu ua, ngowa'a hafu, ngowa'a ceg̱u re ngowa'a ḇolo.’

²²Togumu i'a, falalomu gena-ge 'o kanau, ‘Tuanga 'ani pareta reta siḏagi, mada'a 'o ngi'i ma repe moju.’

²³Ḏua ma tuanga 'o kanau, ‘No tagi toma tapaka re lurungu-lurungu toma limau ma dudunu, no simau-mau ananga 'aḏi sapolo, la siromanga ngi'i tari wala nena-ne.

²⁴Ngoi to siajele ra ngana nena-ne: Ioronongoḏu ga'a ngoi ta'u saele ḏua, matengo i'a mai ua 'a tabea ngo-ngoromo tari laya nena-ne!’ ”

²⁵Yesus 'o tagi mamete'e reo ngowa'a repe re 'o magelelo toma ḏuḏunu 'o kanau ra ananga,

²⁶“Na'o ngowa'a matengo i'a 'o mau mete'e Ngoi, mada'a lebe dadalara 'ai ngina, ḇaḇa, were'a, ngowa-ngowa'a, ioro re nongoḏu, re sidogo ḏi'i 'ai diri masiretene, unanga 'o dadi Ngoi 'ari me-mete'e yoḏu'u.

²⁷'A guna ḇato 'o oḏu'u doiti 'ai salib re 'o mete'e Ngoi, unanga 'o dadi Ngoi 'ari me-mete'e yoḏu'u, sababu unanga 'o oḏu'u sanga susa re sangisara.

²⁸Si'ade-'ade i'a na'o 'age matengo taninga sigolona, mau 'o side'oso menara. Tantu ḇato unanga tegoro 'a roimi enanga ma ijana, la 'a waro 'ai pipisi 'i ngadolo bolo ua di'a 'a simomi'i menara gena-ge singadolo 'i ḏuanga.

²⁹Sababu na'o 'ai pipisi 'i ngadolo ua re siḏuanga yoḏu'u mada'a unanga 'o 'a'a menara ma bangini ḏua dadi ngowa'a mo-moini 'aḏi oḏi'i re 'aḏi nye-nyelo'o unanga 'ai munara.

³⁰Ḏua ananga 'aḏi kanau, ‘Cih! Ngowa'a ne, pa'i 'o 'a'a menara ma bangini ḇato, mada'a 'a siḏuanga nga'unu ua!’

³¹Si'ade-'ade i'a 'olana matengo rai sordado nga cala nyagi moi, mau 'o parangi reo 'olana ma lelegu rai sordado nga cala nyagi romoḏiḏi. Tantu ḏua 'olana gena-ge 'o tegoro takasiri siḏa: unanga lebe te'e bolo ua di'a 'o talaḏi 'ai lawana gena-ge.

³²Na'o 'a siwaro tala unanga 'o te'e ua, tantu ḇato wakutu 'ai lawana toma giḏanga moju, unanga ro siḏingoto 'ai so-soma'a di'a golo'o mau dame ḇato.”

³³Ma ḏo-ḏogumu tala Yesus 'o kanau, “So'o gena ḏi'i ra ngini. Na'o matengo i'a 'o oḏu'u sieanga 'ai 'ori i'a rana re 'o oḏu'u sieanga dungia ma nyafusu, unanga gena-ge 'o dadi Ngoi 'ari me-mete'e yoḏu'u.”

³⁴G̱asi 'i la-la. Mada'a na'o enanga 'i rasa riwara, sanga ua ni siḏibo moju enanga ma rasa.

³⁵Enanga ma faeda ri cua, bae di'a guḏa bolo di'a 'o pupuku. Dadi pa'i rewa upa'a. Na'o reninga ngau'u, ni 'isene la-la!