Read Sahu Lukas 17 Bible Online

Lukas 17 - Sahu bible

Lukas 17

¹Yesus 'o kanau Tai me-mete'e, “Tantu ḏua 'ori i'a rimoi sigasa ngowa'a 'aḏi eta'a toma ḏosa, mada'a bahala 'a guna ḇato 'ai ga'a sigasa ngowa'a ma lelegu di'a eta'a toma ḏosa!

²Jobilaha maḏi la-lamo'o 'i siḏobe tai camala, kara siupa'a unanga toma ngoloto reo unanga 'ai ga'a 'i sigasa ngowa'a ma pake ua ga'a ngaku Ngoi, 'o eta'a toma ḏosa.

³Sababu gena-ge, ngini ni ma'istiari. Na'o 'ani ioronongoḏu 'o 'a'a ḏosa ra ngana, ḇangata unanga. Na'o 'ani ioronongoḏu gena-ge 'o maḏibo toma ngo'omo boloto, si'apongo unanga.

⁴Na'o 'ani ioronongoḏu gena-ge 'o 'a'a ḏosa ra ngana, wange moi sou tumudingi re 'o sapolo tau-taunu sou tumudingi ḏi'i ra ngana re 'o kanau, ‘Ngoi to golo'o ma'afu,’ na si'apongo unanga.”

⁵Yesus 'ai so-soma'a 'aḏi kanau ra Ma Jou, “Ma Jou na site'e minga ngo-ngaku.”

⁶Ma Jou 'a sangoro, “Na'o ngini ninga ngo-ngaku ma lamo'o sa'olo gisisi lai ceka'a ma moi ngai moi, ngini nga'unu ni kanau i'a toma ate 'ara, ‘Mawoi'i toma ngi'i gena-ge re malage toma ngoloto,’ tantu ḏua ate gena-ge 'i mete'e ninga parenta.”

⁷“Si'ade-'ade i'a taninga sigolona 'age rema ngowa'a matengo rai budaka ga'a 'o mapajeko toma guḏa bolo 'o jaga doba. Wakutu 'ai budaka gena-ge 'o ḏibo toma wala, sanga ua ngana no kanau ra unanga gena-ge, ‘Capati ino re no oromo!’

⁸Tantu ḏua, ngana no kanau, ‘Na ḏu-ḏuanga i'a ngoi 'ari ngo-ngoromo, no ngali 'ani pakeanga la-la, re no de-de'oso ngoi singadolo ngoi to oromo togumu ḏua, kara ngana no oromo ḏi'i.’

⁹Paralu ua no sitoro budaka gena-ge, sababu unanga pa'i 'a mete'e 'ai tuanga ma parenta ḇato.

¹⁰So'o gena ḏi'i ngini, na'o ngini 'a'a Ngoi 'ari parenta mo-moini ḏua, ni kanau ‘Ngomi pa'i budaka ḇato, ngomi pa'i mi 'a'a 'oru ga'a 'i dadi ngomi minga munara.’ ”

¹¹Wakutu Yesus 'o tagi toma limau Yerusalem 'o tola'a i'a daeraha Samaria re daeraha Galilea ma bati.

¹²Wakutu Unanga 'o osama toma gamu rimoi, 'age rema ngowa'a si-siḏi 'eno'o[33] nga nyagi moi 'aḏi made-de'oso toma giḏanga mau ma'u sanga ra Yesus.

¹³Ananga 'aḏi madigaro'o siduga-duga, “Yesus, Tuanga, no sijumu 'Ani 'akala re sinyingara ma la-la ra ngomi!”

¹⁴Yesus 'o oḏi'i ananga so'o gena, ḏua 'o kanau, “Ni tagi toma 'imam-'imam, golo'o ananga ya oḏi'i ninga lese.” Dadi ananga 'aḏi tagi re tamanga ḏo-ḏagi ma dara, ananga manga si-siḏi ri iranga.

¹⁵'Age matengo toma ngowa'a si-siḏi 'eno'o gena-ge nga nyagi moi manga sigolona, wakutu unanga 'o mabasono tala 'ai si-siḏi ri iranga, unanga 'o maḏibo rai roanga re monere 'o puji re silamo'o Ma Jou'ongu Madutu rai iḏingi 'a siduga-duga.

¹⁶Unanga 'o mapagara 'ai biono tala ra Yesus 'ai rou, re 'o pula'a murasa ma la. Unanga gena-ge ngowa'a Samaria.

¹⁷Ḏua Yesus 'o kanau, “Ngoi ta'u si-la ngowa'a nga nyagi moi, nga siworo ananga le'a?

¹⁸I'a sa'olo pa'i unanga matengo ḇato 'o maḏibo di'a 'o pula'a 'ai murasa ma la ra Ma Jou'ongu Madutu! Sidogo ḏi'i unanga nena-ne, ngowa'a Yahudi ua!”

¹⁹Ḏua Yesus 'o kanau toma ngowa'a gena-ge, “Te'oso re no tagi, sababu ngana no ngaku Ngoi, ngana reno la.”

²⁰Toma wangere rimoi, Ngowa'a Farisi nga muḏuo i'a 'aḏi sano ra Yesus, “Ngau Ma Jou'ongu Madutu 'ai Pareta 'i sapolo?” Yesus 'a sangoro, “Ngowa'a 'aḏi oḏi'i ua Ma Jou'ongu Madutu 'ai Pareta 'i sapolo sababu 'i sapolo ua reo didina'o-didina'o ga'a nyengara 'aḏi oḏi'i.

²¹Ngowa'a 'aḏi kanau yoḏu'u, ‘Enanga nanga 'ane!’ bolo ‘Enanga nanga da'a!’ Sababu Ma Jou'ongu Madutu 'ai Pareta 'i tegoro ra ngini ninga 'akala re sinyingara ma dara.”[34]

²²Ḏua Unanga 'o kanau Tai me-mete'e, “Ḏuanga i'a ma 'orasa 'i sapolo na'o ngini mau ni oḏi'i Ngoi, Manusia ma Ngowa'a Nau'u, mada'a ni oḏi'i yoḏu'u.

²³Maha ngowa'a ḏuanga i'a 'aḏi kanau ra ngini, ‘Oḏi'i Unanga 'ane’ bolo ‘Oḏi'i Unanga da'a.’ Mada'a ni tagi mete'e awa!

²⁴Ngoi, Manusia ma Ngowa'a Nau'u ḏuanga i'a to sapolo moju ma tero sa'olo ḇeḇelanga 'i cawi-cawi da'u diwanga tala, re ma lalaki dai dere ngadolo dina dere.

²⁵Mada'a siḏa-siḏa, Ngoi balasu to basono sangisara toma ngowa-ngowa'a 'orasa nena-ne ga'a 'aḏi oḏu'u dawongo Ngoi.

²⁶Wakutu Ngoi, Manusia ma Ngowa'a Nau'u dadunu to sapolo moju, gena-ge ma tero sa'olo 'oru 'i dadi toma 'orasa nabi Nuh 'ua re 'au wali.

²⁷Toma 'orasa nabi Nuh, ngowa'a 'aḏi oromo re 'aḏi ka'e, ananga 'aḏi ma'u molo'ara singadolo ma wangere 'a Nuh 'o osama toma kapala ma dara re ngu'uisi sapolo singadolo ngowa'a mo-moini matai sengene.

²⁸So'o gena ḏi'i, 'orasa 'a Lot. Ngowa'a 'aḏi oromo re 'aḏi ka'e, matibo re mawu'unu, ngowa'a 'aḏi maso'ana re side'oso wala.

²⁹Mada'a wangere gena-ge 'i ngadolo 'a Lot 'o supu toma limau Sodom, 'o u'u re walira 'i 'uci da'u diwanga tala singadolo ananga mo-moini 'aḏi sengene.

³⁰So'o gena ḏi'i, toma wangere Ngoi, Manusia ma Ngowa'a Nau'u, dadunu to sapolo moju.

³¹Ma wangere gena-ge, ngowa'a da'u toma wala teru, 'uci awa di'a 'o 'oro 'ori i'a rana tai wala ma dara! So'o gena-ge ḏi'i, ngowa'a toma guḏa, maḏibo awa tai wala!

³²'Elingi, 'oru ga'a 'i dadi ḏua ra Lot 'ai were'a.

³³'A guna ḇato 'o kadiarata pa'i 'ahu toma dungia nena-ne ḇato, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o ḏu-ḏuanga ḏua di'a 'o sengene sababu mete'e Ngoi, unanga gena-ge ḏuanga i'a 'o sanga 'ahu kasingado-ngadolo i'a.

³⁴Ngoi to siajele ra ngini nena-ne: Lobi'i gena-ge, 'age rema ngowa'a nga muḏiḏi 'aḏi otu ma dederu moi: Matengo ga'a 'o mete'e Ngoi 'o sanga salamata mada'a matengo ḏi'i 'o mete'e Ngoi ua 'o sanga salamata ua.

³⁵We-were'a nga muḏiḏi 'aḏi mamete'e gulinga gandum: Matengo ga'a mo mete'e Ngoi mo sanga salamata mada'a matengo ḏi'i mo mete'e Ngoi ua mo sanga salamata ua. [

³⁶Na-nau'u nga muḏiḏi 'aḏi munara toma guḏa: Matengo ga'a 'o mete'e Ngoi 'o sanga salamata mada'a matengo ḏi'i 'o mete'e Ngoi ua 'o sanga salamata ua.]”

³⁷Yesus 'ai me-mete'e 'aḏi sano, “Ma Jou, gena-ge 'i dadi le'a i'a?” Yesus 'a sangoro, “Ngowa'a mo-moini ḏuanga i'a 'aḏi waro ma ngi'i gena-ge. Gena-ge ma tero sa'olo ngowa'a 'aḏi waro ngi'i le'a ḇato rema mayeti, sababu 'aḏi oḏi'i 'age rema namo-namo ga'a 'i 'omo-'omo mayeti.”