Read Sahu Lukas 18 Bible Online

Lukas 18 - Sahu bible

Lukas 18

¹Gena ḏua, Yesus 'o jarita 'ade-'ade rimoi di'a 'o doto'o 'Ai me-mete'e, la ananga manga 'akala re sinyingara 'i rapo'o awa mada'a 'aḏi manyiata tau-taunu.

²Yesus 'o kanau, “Toma limau rimoi juruhakimi matengo ga'a 'o mojongo ua Ma Jou'ongu Madutu re 'o faduli ua 'a guna ḇato.

³Toma limau gena-ge balo we-were'a matengo munanga mo talaḏi tau-taunu toma juruhakimi gena-ge di'a mo golo'o na'o nyengara gari'a 'o riono munanga 'ami hali. Munanga mo kanau, ‘Riono ngoi to talaḏi 'ari lawana.’

⁴Ma di'ara ino, juruhakimi gena-ge 'o riono ua balo gena-ge. Mada'a ma ḏo-ḏogumu tala juruhakimi gena-ge 'o mafikiri, ‘Kalaha ngoi to mojongo ua Ma Jou'ongu Madutu re to faduli ua 'a guna ḇato,

⁵mada'a ma sababu balo gena-ge mo sapolo tau-taunu ra ngoi, jobilaha ngoi timi riono 'ami hali. Na'o so'o gena ua, munanga mo sapolo tau-taunu re mo sikangela ngoi.’ ”

⁶Ḏua Ma Jou 'o kanau, “ 'Isene la-la ino, juruhakimi ma 'adili ua 'ai demo-demo.

⁷Nah, sanga ua Ma Jou'ongu Madutu na riono ua 'ai ngowa-ngowa'a masiretene remanga hali ga'a 'aḏi maḏigaro'o ra Unanga lobi'i re wangere! Tantu ḏua Ma Jou'ongu Madutu 'a sitehe ua enanga ma 'orasa di'a 'O riono ananga!

⁸Ngoi to siajele ra ngini nena-ne: Unanga jau-jau 'o riono ananga remanga hali! Mada'a maha Ngoi, Manusia ma Ngowa'a Nau'u dadunu to sapolo moju, 'oru Ngoi to sanga moju bolo ua ngowa'a ga'a manga ngo-ngaku kama elala ua toma dungia nena-ne!”

⁹Yesus 'a sijarita ḏi'i 'ade-'ade nena-ne di'a ngowa'a ga'a 'aḏi si'aḏu-'aḏu ngowa'a lelegu, re 'aḏi matoro manga diri aje ananga ngowa'a loasa re banari.

¹⁰Yesus 'o kanau, “Ngowa'a nga muḏiḏi 'aḏi osama ra Ma Jou'ongu Madutu 'ai Wala di'a 'aḏi manyiata. Matengo ngowa'a Farisi, matengo ḏi'i ngowa'a golo-golo'o balastengi.

¹¹Ngowa'a Farisi gena-ge 'o te'oso kara 'o manyiata mangale 'ai diri masiretene, ‘Ya Ma Jou'ongu Madutu ngoi to pula'a murasa ma la, sababu ngoi to ma tero ua ngowa'a lelegu: ngowa'a ga'a tori'i, 'akala re sinyingara 'i boloto ua, tinikai bolo ma tero sa'olo ngowa'a golo-golo'o balastengi nena-ne.

¹²Ngoi to puasa migu rimoi soi ḏiḏi, re to pula'a ma balangu moi toma balangu nyagi moi ino di'a 'ari jou-jou.’

¹³Mada'a ngowa'a golo-golo'o balastengi gena-ge 'o te'oso toma giḏanga re 'ai biono talaḏi ie diwanga ua, 'a sata-sata katere re 'o kanau, ‘Ya Ma Jou'ongu Madutu no sijumu 'Ani 'akala re sinyingara ma la-la ra ngoi, ngowa'a baraḏosa!’ ”

¹⁴Yesus 'o kanau, “Ngoi to siajele ra ngini nena-ne: Wakutu ananga 'aḏi sisoi'i tala Ma Jou'ongu Madutu 'ai Wala, pa'i ngowa'a golo-golo'o balastengi ḇato Ma Jou'ongu Madutu 'o dawongo sa'olo ngowa'a loasa re banari. Sababu 'a guna ḇato 'o sihie 'ai diri, unanga Ma Jou'ongu Madutu ḏuanga i'a 'u siholo. Re 'a guna ḇato 'o maholo 'ai diri, unanga Ma Jou'ongu Madutu ḏuanga i'a 'u sihie.”

¹⁵'Age rema ngowa-ngowa'a 'aḏi gasa manga ngowa kiau ra Yesus, la Unanga 'a siteru 'Ai giama re 'O sibarakati ngowa kiau gena-ge. Wakutu Yesus 'ai me-mete'e ya oḏi'i so'o gena, ananga 'aḏi ḇangata ngowa-ngowa'a ga'a 'aḏi gasa ngowa kiau.

¹⁶Mada'a Yesus ya'u 'aro'o ngowa-ngowa'a ga'a 'aḏi gasa manga ngowa kiau gena-ge ino ra Unanga re 'o kanau Tai me-mete'e, “Sieanga i'a ḇato, ngowa-ngowa kiau nena-ne 'aḏi sigasa ino ra Ngoi. Awa ni dola'aku ananga, sababu ngowa'a ga'a 'aḏi dadi ma tero sa'olo ngowa-ngowa kiau nena-ne pa'i ananga gena-ge nyengara 'aḏi osama nyo-nyoimi ra Ma Jou'ongu Madutu 'ai Pareta.

¹⁷Ni ngaku mode-mode'e 'Ari demo-demo nena-ne: 'A guna ḇato 'o sapolo ra Ma Jou'ongu Madutu ma tero ua sa'olo ngowa kiau nena-ne, unanga 'o osama nyo-nyoimi yoḏu'u ra Ma Jou'ongu Madutu 'ai Pareta.”

¹⁸Yahudi manga bi-biri'i matengo 'o sano ra Yesus, “Guru ga'a No la madutu, ngoi balasu to 'a'a sa'olo la to sanga 'ahu kasingado-ngadolo i'a?”

¹⁹Yesus 'o sano ra unanga, “I'a sa'olo ngana no si'aro'o Ngoi to la madutu! Matengo i'a mai ua 'o la madutu, ḏuga-ḏuga Ma Jou'ongu Madutu ḇato.

²⁰Ngana na waro ḏua 'o parenta ra Ma Jou'ongu Madutu ino: ‘No tinikai awa, no sisengene ngowa'a awa, no to-tori'i awa, no sa-sakala awa, re no silamo'o 'ani ḇaḇa re ngina.’ ”

²¹Ngowa'a Yahudi gena-ge 'o sangoro, “Parenta mo-moini gena-ge ngoi ta si'a'a ḏua wakutu ngoi to ngowa 'olo i'a moju singadolo 'orasa nange-ne.”

²²Yesus 'a 'isene so'o gena re 'o kanau, “Ma jingianga rimoi moju, ngana balasu na si'a'a: Na wu'unu 'ani 'ori i'a rana mo-moini, re ma pipisi na sibalangu toma ngowa-ngowa'a ma dinga'unu ua. Dadi ngana ḏuanga i'a no sanga 'ori i'a rana mode-mode'e toma soroga. Togumu i'a no sapolo re no mete'e Ngoi.”

²³Mada'a wakutu unanga 'a 'isene Yesus 'o kanau so'o gena unanga 'ai 'akala re sinyingara 'i kangela masala, sababu unanga gena-ge ngowa'a rema-enanga madutu.

²⁴Yesus 'o oḏi'i ngowa'a gena-ge 'ai 'akala re sinyingara 'i kangela. Sababu gena-ge Unanga 'o kanau, “Kangela masala di'a ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.

²⁵Lebe gapanga 'o 'unta rimoi 'i osama toma j̱aiti ma duso'o reo ngowa'a rema-enanga 'aḏi osama nyo-nyoimi ra Ma Jou'ongu Madutu 'ai Pareta.”

²⁶Ngowa-ngowa'a ga'a 'aḏi 'isene Yesus 'o kanau so'o gena 'aḏi sano, “Na'o so'o gena, 'a guna nga'unu sanga salamata?!”

²⁷Yesus 'a sangoro, “Toma manusia 'i osama 'akala ua, mada'a ra Ma Jou'ongu Madutu, mo-moini 'i osama 'akala.”

²⁸Ḏua 'a Petrus 'o kanau, “Ngomi remi sisoi'i tala minga ngitu re ngale, la mi mete'e Jou!”

²⁹Yesus 'a sangoro, “Ni ngaku mode-mode'e 'Ari demo-demo nena-ne: 'A guna ḇato ra sisoi'i tala ḏua 'ai wala, 'ai were'a, 'ai ioro re nongoḏu, 'ai ḇaḇa re ngina, bolo 'ai ngowa-ngowa'a, sababu 'o de-de'oso Ma Jou'ongu Madutu,

³⁰unanga gena-ge toma 'orasa nange-ne ḏuanga i'a 'o sanga pai-pai'i, re toma 'orasa biono unanga 'o sanga 'ahu kasingado-ngadolo i'a.”

³¹Yesus 'o lomu pa'i 'Ai me-mete'e nga nyagi moi re nga muḏiḏi, re 'o kanau, “ 'Isene! Ngene nange-ne wo si'a toma limau Yerusalem. I'a da'a 'oru ga'a nabi-nabi ya silefo pasala ḏua mangale Ngoi, Manusia ma Ngowa'a Nau'u, enanga 'i dadi mo-moini.

³²Ngoi ḏuanga i'a sipula'a toma ngowa-ngowa'a Yahudi ua, ananga Ri nye-nyelo'o, Ri sije-jengere, re Ri obi'i 'Ari biono.

³³Ananga 'aḏi sipo re 'aḏi sisengene Ngoi. Mada'a toma wangere ma soi ro'ange, Ngoi dadunu to 'ahu moju.”

³⁴Mo-moini gena-ge Yesus 'ai me-mete'e ya sahe ua. Yesus 'ai demo-demo ma ngale 'i dadi rahasia Tai me-mete'e. Ananga ya sahe ua 'oru ga'a Yesus 'o kanau.

³⁵Wakutu Yesus toma ḏo-ḏagi ma dara sa'i ri ngadolo toma limau Yerikho, 'age rema ngowa'a hafu matengo 'o tegoro golo-golo'o toma ngo'omo ma 'uḏu.

³⁶Wakutu unanga 'o 'isene ngowa'a repe manga nyiwere, unanga 'o sano, “Rema 'oru?”

³⁷Ananga 'aḏi sangoro, “Yesus ngowa'a Nazaret 'o tola'a ino.”

³⁸Dadi ngowa'a hafu gena-ge 'o 'aro'o siduga-duga, “Yesus, 'Olana Daud 'ai ju'uda![35] No sijumu 'Ani 'akala re sinyingara ma la-la ra ngoi!”

³⁹Ngowa-ngowa'a ga'a toma biono ananga 'aḏi ḇangata unanga re soma'a unanga masiogoro. Mada'a unanga ganapu 'o 'aro'o siduga-duga, “Jou, 'Olana Daud 'ai ju'uda, Na sijumu 'Ani 'akala re sinyingara ma la-la ra ngoi!”

⁴⁰Yesus 'o matogumu tala re 'o soma'a ngowa'a 'aḏi gasa ino ngowa'a hafu gena-ge ra Unanga. Wakutu ngowa'a hafu gena-ge ro ngadolo, Yesus 'o sano,

⁴¹“ 'Ani mau 'oru Ngoi ta si'a'a?” Ngowa'a hafu gena-ge 'a sangoro, “Jou, ngoi to mau to oḏi'i”

⁴²Ḏua Yesus 'o kanau, “Na'o so'o gena, no oḏi'i! Sababu 'ani ngo-ngaku ra Ngoi, ngana no la.”

⁴³Toma 'orasa gena ḏua, unanga nyengara 'o oḏi'i kara 'o mete'e Yesus re 'ai madanga ma dara kama tola'a ua 'o puji re silamo'o Ma Jou'ongu Madutu! Wakutu ngowa'a repe ya oḏi'i so'o gena, ananga mo-moini 'aḏi puji re silamo'o Ma Jou'ongu Madutu ḏi'i.