Read Sahu Lukas 19 Bible Online

Lukas 19 - Sahu bible

Lukas 19

¹Wakutu Yesus 'o ngadolo toma limau Yerikho Unanga 'o tagi tau-taunu 'a tola'a i'a limau gena-ge.

²Toma limau gena-ge 'age rema ngowa'a matengo ga'a golo-golo'o balastengi ma sae'e, unanga gena-ge ngowa'a rema-enanga re 'ai lomanga Zakheus.

³Zakheus mau 'o oḏi'i 'a Yesus mada'a sababu ngowa'a repe woḏi re unanga lao ḇoko'o, unanga 'o oḏi'i Yesus yoḏu'u.

⁴Dadi unanga lalara siḏa toma ngowa'a repe manga biono, kara 'o mabere toma ate 'ara ḏu moi, la unanga nga'unu 'o oḏi'i Yesus na'o Yesus 'o tola'a ino.

⁵Wakutu Yesus 'o ngadolo toma ate gena-ge, Yesus 'o tatamo ie re 'o kanau, “Zakheus, no 'uci capati sababu toma wangere nange-ne Ngoi balasu to tuḏu ra ngana 'ani wala.”

⁶Zakheus jau-jau 'o 'uci re 'o dawongo Yesus rai roanga tai wala.

⁷Ngowa'a mo-moini 'aḏi oḏi'i so'o gena, ananga 'aḏi kuḏubungu re 'aḏi kanau, “Cih, Unanga 'o tagi tuḏu toma ngowa'a baraḏosa manga wala!”

⁸Toma wala gena-ge Zakheus 'o te'oso kanau i'a ra Ma Jou, “Ma Jou, 'ari 'ori i'a rana kaci moi ta sipula'a toma ngowa'a ma dinga'unu ua re ra guna ḇato ga'a ngoi ta'u sihaga ḏuanga i'a ta siḏibo ra ananga ta sidu'o soi rata!”

⁹Ḏua Yesus 'o kanau, “Toma wangere nange-ne, ngana re 'ani were'a re 'ani ngowa-ngowa'a, Ma Jou'ongu Madutu 'o sisalamata ngini mo-moini sababu ngana ḏi'i mode-mode'e 'ani 'asala ra Abraham ino.

¹⁰Ngoi, Manusia ma Ngowa'a Nau'u to sapolo di'a To disa re To sisalamata ngowa'a ga'a 'aḏi iranga ngo'omo.”

¹¹Wakutu ngowa'a repe 'aḏi 'isene Yesus 'ai jarita, Unanga 'a sidowanga reo pula'a 'ade-'ade sababu Unanga 'o co-cori toma limau Yerusalem re ngowa'a repe 'aḏi ta'ajiri Ma Jou'ongu Madutu ti'ara riwara 'o sapolo 'o parenta sa'olo 'Olana toma dungia.

¹²Sababu gena-ge, Yesus 'o kanau, “ 'Age rema ngowa'a matengo unanga gena-ge 'o 'olana 'ai ngowa'a re danongo. Unanga 'ai 'ulungu 'o tagi toma daeraha toma giḏanga di'a ananga 'u sitede dadi 'olana. Pasala i'a unanga 'o maḏibo.

¹³Unanga 'o tagi nyangu, 'o 'aro'o 'ai budaka nga nyagi moi re 'o pula'a matengo re matengo pipisi guraci ngai moi. Unanga 'o kanau, ‘Ngoi to cua 'ane, ngini matengo re matengo na sikololo pipisi nena-ne.’ [36]

¹⁴Mada'a daeraha gena-ge ma manusia 'aḏi emono 'olana 'ai ngowa re danongo gena-ge. Palisi'i i'a, unanga ro tagi re 'a sisoi'i tala daeraha gena-ge, la 'o dadi 'olana. Ananga gena-ge 'aḏi 'utusu so-soma'a tagi di'a 'aḏi kanau, ‘Ngomi mi oḏu'u unanga gena-ge 'o dadi minga 'olana.’

¹⁵Mada'a 'olana 'ai ngowa re danongo matengo gena-ge ngowa'a 'aḏi sitede 'o dadi 'olana. Togumu i'a unanga 'o maḏibo tai daeraha masiretene re 'o 'aro'o 'ai budaka gena-ge di'a talaḏi ra unanga, la 'a waro ananga manga 'utungu sa'olo.

¹⁶Budaka ma nyo-nyoimi rimoi, unanga 'o kanau, ‘Tuanga, pipisi guraci ga'a no pula'a, ngoi ta sikololo ta sanga ma 'utungu guḏi moi.’

¹⁷'Ai tuanga 'o kanau, ‘Rousu masala, ngana budaka ma la-la. Sababu ngana reno dadi ngowa'a cufala rema 'ori i'a i'a pa'i ceka'a ua, ngoi to pula'a watasa ra ngana no parenta limau nyagi moi.’

¹⁸Budaka ma nyo-nyoimi romoḏiḏi 'o sapolo re 'o kanau, ‘Tuanga, pipisi guraci ga'a no pula'a ra ngoi, ta sikololo ta sanga ma 'utungu ngai romotoa.’

¹⁹Tuanga gena-ge 'o kanau ra unanga, ‘Ngoi to pula'a watasa ra ngana no parenta limau romotoa.’

²⁰Budaka ma lelegu ḏi'i 'o sapolo re 'o kanau, ‘Tuanga, ne 'ani pipisi guraci ga'a no pula'a ra ngoi. Ngoi ta sao tari tuala re ta gogono.

²¹Ngoi to mojongo Tuanga sababu 'ani 'akala re sinyingara lai te'e. Ngana no 'oro 'oru ga'a 'ani 'ori i'a ua, re ngana no 'utu'u 'oru ga'a no so'ana ua.’

²²Tuanga gena-ge 'o kanau, ‘Ngana budaka ma jira. Ngoi tini hukumu ngana mete'e ngana 'ani demo. Ngana no aje Ngoi 'ari 'akala re sinyingara lai te'e: Ngoi to 'oro 'oru ga'a ta Ngoi ua, re Ngoi to 'utu'u 'oru ga'a Ngoi to so'ana ua.

²³Na'o so'o gena, i'a sa'olo pipisi gena ngana na siosama ua toma bank, la wakutu to ḏibo Ngoi ta 'oro pipisi gena-ge re ta sanga enanga ma rete!’

²⁴Gena ḏua, unanga gena-ge 'o kanau toma ngowa-ngowa'a ga'a made-de'oso toma ngi'i gena-ge, ‘ 'Oro pipisi ra unanga gena-ge re pula'a toma budaka ga'a sanga ma 'utungu guḏi moi nange-ge.’

²⁵Mada'a ananga 'aḏi kanau, ‘Tuanga, unanga ro sanga guḏi moi ḏua!’

²⁶Unanga gena-ge 'o sangoro, ‘Ngoi to siajele ra ngini nena-ne: 'A guna ḇato ga'a ro sanga repe, Ngoi ḏuanga ta sidogo ḏi'i. Mada'a 'a guna ḇato 'o sanga ua; 'oru ḇato, kalaha unanga ra sanga pa'i ceka'a ua ḇato, gena-ge ḏi'i mai sanga 'oro![37]

²⁷Gasa ino so'o nena-ne ḏua ngoi 'ari lawana ga'a 'aḏi oḏu'u Ngoi to dadi ananga manga 'olana. Sisengene ananga mo-moini ra Ngoi 'ari biono.’ ”

²⁸Yesus 'o kanau mo-moini gena-ge togumu i'a, Unanga ya'u sisoi'i tala ananga re 'o tagi si'a toma limau Yerusalem.

²⁹Wakutu co-cori toma limau Betfage re limau Betania, toma Polono Zaitun, Unanga 'o soma'a 'Ai me-mete'e nga muḏiḏi 'aḏi tagi siḏa.

³⁰Yesus 'o kanau ra ananga gena-ge, “Ngini ni tagi siḏa toma gamu da'a taninga biono. Wakutu ni osama toma gamu gena-ge, i'a da'a ngini ni oḏi'i keledai ma ngowa rimoi ngowa'a ya sipiri'u i'a. Keledai gena-ge, soi moi i'a mai nyangu ngowa'a ya palene, na pasala ma gumi re na gasa ino 'ane.

³¹Na'o matengo i'a 'o sano ra ngini, ‘I'a sa'olo na pasala keledai ma ngowa gena-ge?’ ni sangoro, ‘Ma Jou[38] 'a paralu.’ ”

³²Yesus 'ai me-mete'e nga muḏiḏi ga'a Unanga ya'u soma'a, ananga 'aḏi tagi. Ananga ya sanga i'a 'i ma tero sa'olo Yesus 'o kanau ra ananga.

³³Wakutu ananga ya pasala keledai ma ngowa gena-ge, keledai ma dutu 'o sano, “I'a sa'olo ngini na pasala?”

³⁴Ananga ya sangoro, “Ma Jou 'a paralu.”

³⁵Gena ḏua, ananga 'aḏi gasa keledai ma ngowa ra Yesus re ya siwangini manga juba toma keledai ma ngowa ma dudunu re 'aḏi gola'a Yesus sibalene toma keledai ma ngowa gena-ge.

³⁶Wakutu Unanga 'o mabalene ḏua re keledai ma ngowa gena-ge 'i tagi, 'age rema ngowa-ngowa'a ya woi'i manga juba re ya sisela toma ngo'omo.

³⁷Wakutu Yesus sa'i 'uci-'uci ngo'omo toma Polono Zaitun, co-cori toma limau Yerusalem, 'Ai me-mete'e mo-moini 'aḏi poa'a remanga roanga re 'aḏi puji re silamo'o Ma Jou'ongu Madutu re 'aḏi pula'a manga murasa ma la ra Ma Jou'ongu Madutu, sababu ga'a hera-heranga mo-moini ga'a ananga masiretene ya oḏi'i ḏua.

³⁸Ananga 'aḏi kanau, “Sibarakati 'Olana ga'a sapolo rea Ma Jou'ongu Madutu 'ai lomanga! Dame toma soroga re simulia Ma Jou'ongu Madutu toma Gau'u!”

³⁹Toma ngowa'a repe manga sigolona, 'age rema ngowa'a Farisi nga muḏuo i'a 'aḏi kanau ra Yesus, “Guru no ḇangata 'Ani me-mete'e, la 'aḏi masiogoro!”

⁴⁰Yesus 'a sangoro, “Ngoi to siajele ra ngini nena-ne: Na'o ananga 'aḏi masiogoro, maḏi-maḏi nena-ne enanga ḏuanga i'a 'i poa'a siduga-duga.”

⁴¹Wakutu Yesus 'o co-cori limau Yerusalem re oḏi'i limau gena-ge, Unanga 'a gaḏi

⁴²re 'o kanau, “Koḏu'u ngowa-ngowa'a toma limau Yerusalem. Na'o ngini na waro wangere nange-ne 'a guna 'o sapolo ra ngini di'a 'o gasa dame! Mada'a nange-ne ngini na sahe ua mangale dame gena-ge.

⁴³Ḏuanga i'a ma 'orasa 'i ngadolo na'o ninga lawana 'aḏi sapolo sigoloḏi ngini re 'aḏi 'a'a da-daku toma limau nena-ne. Ananga ḏuanga i'a 'aḏi parangi ngini re 'aḏi sida-dara ngini toma limau ma ḇuḇuku rata.

⁴⁴Ananga ḏuanga i'a 'aḏi siwejere limau Yerusalem re 'aḏi sisengene limau ma manusia mo-moini, re ya sieanga i'a ua maḏi rimoi i'a ya sifato toma enanga ma ngi'i. Enanga nena-ne 'i dadi, sababu ngini ni dawongo ua Ma Jou wakutu Unanga 'o sapolo di'a sisalamata ngini!”

⁴⁵Yesus 'o osama ra Ma Jou'ongu Madutu 'ai Wala re mulaingi 'O dusu'u ngowa'a 'aḏi mawu'unu toma ngi'i gena-ge.

⁴⁶Unanga 'o kanau, “ 'Ua re 'au wali 'i silefo pasala ḏua toma Boku 'Ofi-'Ofi ma dara ma betongo so'o ne: ‘Ma Jou'ongu Madutu 'o kanau: 'Ari wala ḏuanga i'a sidadi manyiata ma wala.’ Mada'a ngini ni si'a'a ngowa'a to-tori'i manga ngi'i.”

⁴⁷Wange moi-wange moi Yesus 'o doto'o ngowa'a ra Ma Jou'ongu Madutu 'ai Wala. Mada'a 'imam-'imam ma sae'e, guru-guru 'agama, re Yahudi manga bi-biri'i, ananga 'aḏi mau sisengene Unanga.

⁴⁸Mada'a ananga ya sanga ma donga ua, sababu ngowa'a repe ya 'isene 'Ai do-doto'o tau-taunu remanga 'akala re sinyingara ya daene.