Read Sahu Lukas 2 Bible Online

Lukas 2 - Sahu bible

Lukas 2

¹Wakutu sibuoro 'a Yohanes pasala i'a, Kaisar Agustus 'o sisupu 'ai parenta, la ngowa'a mo-moini toma Roma ma pareta matengo re matengo 'aḏi silefo manga lomanga.

²Lefo lomanga nena-ne 'i si'a'a waro ma mulaingi wakutu 'a Kirenius 'o dadi gubernur toma daeraha Siria.

³Toma 'orasa gena-ge, ngowa'a mo-moini matai ḏibo tamanga limau masiretene di'a silefo manga lomanga.

⁴'A Yusuf 'o sisoi'i tala limau Nazaret toma daeraha Galilea re ngo Maria unanga 'ai ga-ganau mo mete'e, toma 'orasa gena-ge munanga rami lese ḏua. Ananga 'aḏi tagi toma daeraha Yudea toma limau Betlehem, 'Olana Daud 'ai dola'a ututu ma ngi'i. Yusuf balasu 'a silefo 'ai lomanga toma limau Betlehem sababu unanga 'ai 'asala ra 'Olana Daud ino.

⁵

⁶Wakutu ananga toma limau Betlehem moju ngo Maria mi 'orasa maḏe-ḏegoro i'a ri ngadolo.

⁷Munanga mo sibuoro ngowa'a nau'u matengo ngowa ma jomolo, 'u sao reo ḇa'a kara 'u sigare toma haiwani ma ngo-ngoromo ma ngi'i, sababu 'aḏi sanga ngi'i riwara di'a 'aḏi masiḏingoto.

⁸Toma utu gena-ge, 'age sowohi-sowohi 'aḏi dadanu manga doba toma daeraha rurubu.

⁹Kage-kage, Ma Jou'ongu Madutu 'ai mala'ekata matengo 'i masibaiti ra ananga re cahaya ra Ma Jou'ongu Madutu ino 'i 'erese ananga singadolo ananga matai mojongo.

¹⁰Mada'a mala'ekata gena-ge 'o kanau, “Mojongo awa! Sababu ngoi to sapolo to singadolo habari la-la ra ngini. Habari nena-ne ḏuanga i'a 'i gasa roanga masala toma ngowa'a mo-moini:

¹¹Wangere nange-ne toma limau ga'a 'Olana Daud 'ai dola'a ututu ma ngi'i, sibuoro ḏua ninga Salamata ma Cimi, Unanga gena-ge 'O Kristus, Ma Jou.

¹²Ma didina'o nena-ne mangale ma demo 'i banari: Ngini ḏuanga i'a ni tagi re sanga i'a ngowa kiau matengo 'u sao reo ḇa'a re 'u sigare toma haiwani ma ngo-ngoromo ma ngi'i.”

¹³Kage-kage mala'ekata matengo 'o mamete'e reo mala'ekata lelegu ma repe, ananga 'aḏi puji re silamo'o Ma Jou'ongu Madutu, 'aḏi kanau,

¹⁴“Puji re silamo'o Ma Jou'ongu Madutu toma soroga, re dame toma dungia toma manusia ga'a Ma Jou'ongu Madutu ya'u sanangi.”

¹⁵Togumu i'a mala'ekata-mala'ekata gena-ge ya sisoi'i tala re 'aḏi maḏibo toma soroga, kara sowohi-sowohi 'aḏi makanau matengo re matengo, “Ino, ngene wo si'a toma Betlehem, la wo oḏi'i 'oru ga'a 'i dadi ḏua ma tero sa'olo Ma Jou'ongu Madutu 'o siajele ḏua ra ngene.”

¹⁶Dadi ananga jau-jau 'aḏi tagi ḏua re 'aḏi sanga i'a ngo Maria, 'a Yusuf re ngowa kiau gena-ge ya sigare toma haiwani ma ngo-ngoromo ma ngi'i.

¹⁷Wakutu sowohi-sowohi gena-ge 'aḏi oḏi'i ngowa kiau gena-ge ḏua ya sijarita mangale 'oru ga'a mala'ekata 'o siajele ra ananga pasala ḏua

¹⁸singadolo ngowa'a mo-moini matai heranga ya 'isene sowohi-sowohi manga jarita.

¹⁹Mada'a wakutu ngo Maria ma 'isene i'a so'o gena, munanga pa'i magogono tami 'akala re sinyingara ma dara ḇato.

²⁰Gena ḏua, sowohi-sowohi 'aḏi maḏibo i'a toma daeraha rurubu, re 'aḏi puji re silamo'o re simulia Ma Jou'ongu Madutu, sababu 'oru ga'a ya 'isene re ya oḏi'i mode-mode'e ma tero sa'olo ga'a mala'ekata ro siajele ra ananga pasala ḏua.

²¹Wakutu ngowa kiau gena-ge 'Ai 'umuru wangere tu'angere, ananga 'U suna re 'U silomanga Yesus. Lomanga gena-ge ga'a mala'ekata ro siajele siḏa wakutu ma ngina ngo Maria 'ami po'olo tegoro nyangu.

²²Ma 'orasa enanga 'i ngadolo 'a Yusuf re ngo Maria ya siḏagi Yahudi manga 'atoranga di'a sigofi manga lese 'i mete'e Musa 'ai hukumu. Dadi ananga 'aḏi gasa ngowa kiau gena-ge toma limau Yerusalem di'a sidoa'a ra Ma Jou'ongu Madutu.

²³Sababu ra Ma Jou'ongu Madutu 'ai Hukumu toma boku ma dara 'i silefo so'o ne: “Ngowa'a nau'u ma jomolo mo-moini balasu sidoa'a ra Ma Jou'ongu Madutu.”

²⁴Re ananga 'aḏi gasa manga jou-jou namo dara sabi moi bolo namo pombo ma ngowa romoḏiḏi mete'e 'oru ga'a 'i silefo ḏua ra Ma Jou'ongu Madutu 'ai Hukumu gena-ge.

²⁵'Orasa gena-ge toma limau Yerusalem 'age rema ngowa'a matengo 'ai lomanga Simeon, ngowa'a loasa re banari ga'a 'o 'ahu di'a sisanangi Ma Jou'ongu Madutu 'ai 'akala re sinyingara re Ma Ngagara 'Ofi-'Ofi 'i nyanyasele unanga. Unanga gena-ge 'o totoma Ma Jou'ongu Madutu 'o sisalamata 'Ai ngowa-ngowa'a Israel enanga ma 'orasa.

²⁶Ma Ngagara 'Ofi-'Ofi gena-ge 'i siajele ra unanga pasala ḏua mangale na'o unanga 'o oḏi'i 'O Kristus nyangu, Unanga gena-ge ga'a Ma Jou'ongu Madutu 'o sijaji 'ua re 'au wali, unanga 'o sengene nyangu.

²⁷Toma 'orasa gena-ge, Ma Ngagara 'Ofi-'Ofi 'i sigaraki Simeon 'ai 'akala re sinyingara singadolo 'o osama ra Ma Jou'ongu Madutu 'ai Wala ma soana. Toma 'orasa gena-ge ḏi'i, wakutu 'a Yesus 'o ki-kiau moju 'a Yusuf re ngo Maria 'aḏi gasa unanga re 'aḏi osama ra Ma Jou'ongu Madutu 'ai Wala ma soana, la ya mete'e Musa 'ai hukumu.

²⁸Simeon 'o toti'i ngowa kiau gena-ge re 'o puji re silamo'o Ma Jou'ongu Madutu. Unanga 'o kanau,

²⁹“Ma Jou'ongu Madutu 'ani jaji enanga 'i sitotomo. Nange-ne ḏua, ngoi ga'a 'Ani budaka,[3] na siḏo-ḏogumu 'ari co'ongu.

³⁰Sababu 'ari la'o masiretene ri oḏi'i Salamata ma Cimi ra Ma Jou'ongu Madutu ino,

³¹Unanga gena-ge ga'a Ma Jou'ongu Madutu 'o sidodahe pasala ḏua di'a ngowa'a mo-moini.

³²Salamata ma Cimi gena-ge sa'olo tarangi rimoi ga'a sitarangi ngo'omo di'a ngowa'a Yahudi ua, la ananga nga'unu 'aḏi sapolo ra Ma Jou'ongu Madutu. Tarangi gena-ge 'i gasa lomanga gau'u toma ngowa'a Israel, 'Ani ngowa-ngowa'a.”

³³Wakutu ma ḇaḇa re ma ngina ('a Yusuf re ngo Maria) ya 'isene 'a Simeon 'o kanau mangale ngowa kiau gena-ge, ananga 'aḏi heranga.

³⁴Ḏua Simeon sibarakati ananga re 'o kanau i'a ra ngo Maria, “Ngowa kiau nena-ne Ma Jou'ongu Madutu ro cumutu ḏua di'a sihukumu re sisalamata ngowa'a repe toma Israel re 'O dadi didina'o rimoi ra Ma Jou'ongu Madutu ino mada'a Unanga ḏuanga i'a ngowa'a repe 'U lawana,

³⁵singadolo 'O sisupu ananga manga 'ulungu ma jira tamanga 'akala re sinyingara ma dara. Mada'a, Maria, 'ani 'akala ḏuanga i'a sanga kangela ma tero sa'olo siruju reo golowa mango-mangono.”

³⁶'Age ḏi'i rema nabi we-were'a matengo munanga remo piri'i ḏua, 'ami lomanga ngo Hana, 'a Fanuel 'ai ngowa'a were'a, ra Asyer 'ai ju'uda ino. Nabi we-were'a gena-ge mo molo'ara musungu tumudingi, ḏua 'ami nau'u 'o sengene.

³⁷Dadi munanga remo balo re nange-ne 'ami 'umuru musungu nyagi tu'angere re rata ḏua. Lobi'i re wangere, munanga ma sidaioranga ua mo sapolo ra Ma Jou'ongu Madutu 'ai Wala di'a mo manyiata re mo puasa.

³⁸Toma 'orasa gena-ge, munanga ḏi'i mo sapolo, mo pula'a murasa ma la ra Ma Jou'ongu Madutu re mo siajele mangale ngowa kiau gena-ge toma ngowa'a mo-moini ga'a totoma enanga ma 'orasa Ma Jou'ongu Madutu 'o sibebasa ngowa'a Israel tamanga lawana.

³⁹'A Yusuf re ngo Maria ya si'a'a ḏua 'ori i'a mo-moini mete'e Ma Jou'ongu Madutu 'ai Hukumu. Gena ḏua, ananga 'aḏi maḏibo toma limau Nazaret, toma daeraha Galilea.

⁴⁰Ngowa 'olo gena-ge ganapu lamo'o re te'e, Unanga 'ai 'akala soro'unu re Ma Jou'ongu Madutu 'o sibarakati Unanga.

⁴¹Ma musungu ma jelele i'a 'a Yusuf re ngo Maria 'aḏi tagi toma limau Yerusalem di'a 'aḏi silamo'o Paskah ma Wangere.

⁴²Wakutu Yesus 'ai 'umuru musungu nyagi moi re romoḏiḏi, 'o mete'e Yusuf re Maria, ananga 'aḏi tagi di'a silamo'o Paskah ma Wangere sa'olo biasa.

⁴³Wangere gena-ge palisi'i i'a, ananga 'aḏi maḏibo mada'a Yesus masiretene unanga maḏibo nyangu, 'o tegoro moju toma limau Yerusalem. Mada'a Yusuf re Maria ya waro ua.

⁴⁴Ananga 'aḏi ta'ajiri Unanga ro mamete'e reo ngowa'a repe. Tamanga ḏo-ḏagi wange moi ma dara pasala i'a, ananga 'aḏi disa Unanga tamanga ioro re nongoḏu re ḏagilomu sabi manga sigolona.

⁴⁵Mada'a 'aḏi sanga Unanga ua. Dadi ananga 'aḏi maḏibo i'a moju toma limau Yerusalem, la 'aḏi disa unanga.

⁴⁶Ananga 'aḏi disa ma di'ara wange ro'ange, kara 'aḏi sanga Unanga ra Ma Jou'ongu Madutu 'ai Wala ma soana. Unanga 'o tegoro 'O sigi-gisene re 'O sano toma guru-guru 'agama.

⁴⁷Ngowa'a mo-moini 'aḏi matai heranga ga'a 'aḏi 'isene Unanga 'o kanau. Sababu Unanga ngowa 'olo moju, mada'a 'Ai 'akala lai soro'unu singadolo 'Ai sa-sangoro kama rapu ua.

⁴⁸'A Yusuf re ngo Maria masiretene 'aḏi heranga wakutu 'aḏi sanga Unanga toma ngi'i gena-ge. 'Ai ngina mo kanau i'a ra Unanga, “I'a sa'olo no 'a'a ngomi so'o gena-ge? 'Ani ḇaḇa re 'Ani ngina, ngomi minga 'akala kangela masala mi disa Ngana!”

⁴⁹Yesus 'a sangoro, “I'a sa'olo baba re meme ni disa Ngoi toma ngi'i lelegu? Baba re meme ni waro ua mangale Ngoi balasu to tegoro Tari Ḇaḇa 'ai wala?”

⁵⁰Mada'a ananga ya sahe ua Yesus 'ai sa-sangoro ma ngale.

⁵¹Togumu i'a, Yesus 'o tagi mamete'e ra ananga 'aḏi maḏibo toma limau Nazaret, re 'o mete'e manga mau. 'Ori i'a mo-moini ga'a 'i dadi gena-ge, ngo Maria ma gogono tami 'akala re sinyingara ma dara.

⁵²Yesus 'o lamo'o dere i'a, 'Ai 'akala re sinyingara ganapu soro'unu re 'O sisanangi Ma Jou'ongu Madutu re manusia manga 'akala re sinyingara.