Read Sahu Lukas 20 Bible Online

Lukas 20 - Sahu bible

Lukas 20

¹Toma wangere rimoi Yesus 'o doto'o re 'o singadolo Habari Roanga ra Ma Jou'ongu Madutu ino toma ngowa-ngowa'a ra Ma Jou'ongu Madutu 'ai Wala ma soana. 'Imam-'imam ma sae'e re guru-guru 'agama re Yahudi manga sae'e, ananga 'aḏi sapolo ḏi'i.

²Ananga 'aḏi sano ra Yesus, “No sanga kuasa le'a ino re 'a guna 'o pula'a kuasa ra Ngana singadolo nga'unu no 'a'a mo-moini so'o nena-ne?”

³Yesus 'a sangoro, “Ngoi mau to sano ḏi'i ra ngini. Ngini ni siajele ra Ngoi.

⁴'A Yohanes tukanga baptis, unanga gena-ge 'o sanga 'ai kuasa ra guna ino? Ra Ma Jou'ongu Madutu bolo toma manusia ino?”

⁵Ḏua ananga mulaingi 'aḏi ma'u kanau, “Na'o ngene wo sangoro, ‘ 'A Yohanes gena-ge 'o sanga kuasa ra Ma Jou'ongu Madutu ino,’ ḏua Unanga 'o sano, ‘Na'o so'o gena-ge, i'a sa'olo ngini ni ngaku Unanga ua?’

⁶Mada'a na'o ngene wo sangoro, ‘Unanga 'o sanga kuasa toma manusia,’ ngowa'a mo-moini 'aḏi poini ngene reo maḏi, sababu ananga 'aḏi ngaku Yohanes gena-ge 'o nabi.”

⁷Dadi ananga 'aḏi sangoro, “Ngomi ma waro ua.”

⁸Ḏua Yesus 'o kanau ra ananga, “Na'o so'o gena, Ngoi mai ta siajele ua ra ngini mangale Ngoi to sanga kuasa ra guna ino singadolo nga'unu ta si'a'a mo-moini gena-ge.”

⁹Yesus 'o kanau ḏi'i toma ngowa-ngowa'a gena-ge reo 'ade-'ade rimoi so'o ne: “ 'Age matengo 'o otomo 'anggur tai guḏa ḇotu moi. Unanga gena-ge 'o sisewa toma ngowa-ngowa'a munara toma guḏa, kara 'o tagi lai ti'ara.

¹⁰Wakutu ma 'orasa 'utu'u enanga 'i ngadolo, guḏa ma dutu 'o siḏingoto 'ai budaka matengo 'o tagi toma ngowa-ngowa'a munara toma guḏa di'a ya 'oro 'ai balangu. Mada'a ngowa-ngowa'a munara toma guḏa 'u ca'olo 'ai budaka gena-ge, kara 'aḏi soma'a maḏibo ma nga-ngawere.

¹¹Ḏua guḏa ma dutu dadunu 'o siḏingoto 'ai budaka ma lelegu matengo 'o tagi toma ngowa-ngowa'a munara toma guḏa. Mada'a ananga gena-ge 'u ca'olo ḏi'i re 'aḏi sipula'a mara'a, kara 'aḏi soma'a maḏibo ma nga-ngawere.

¹²Togumu i'a, guḏa ma dutu 'o siḏingoto 'ai budaka ma soi ro'ange matengo 'o tagi toma ngowa-ngowa'a munara toma guḏa. Mada'a ananga gena-ge 'u ca'olo singadolo nyabo-nyaboto kara 'aḏi siwale unanga toma guḏa ma di'anga.

¹³Ma ḏo-ḏogumu tala guḏa ma dutu 'o kanau, ‘Ngoi balasu to 'a'a 'oru moju? Ngoi ḏuanga i'a to siḏingoto 'ari ngowa'a nau'u ga'a ta dadalara. Tantu ḏua, ananga 'aḏi silamo'o unanga!’

¹⁴Mada'a wakutu ngowa-ngowa'a munara toma guḏa 'aḏi oḏi'i guḏa ma dutu 'ai ngowa'a nau'u 'o sapolo, ananga 'aḏi ma'u kanau matengo re matengo, ‘Unanga nena-ne 'o warisi ma gu-gu'u. Ino ngene wu sisengene unanga, la ngene wa sanga 'ai warisi.’

¹⁵Ananga 'aḏi taba-taba'a unanga toma guḏa ma di'anga, kara 'u sisengene.” Ḏua Yesus 'o sano, “Wakutu guḏa ma dutu gena-ge 'o sapolo toma guḏa unanga 'o 'a'a 'oru tai ngowa-ngowa'a munara toma guḏa gena-ge?!

¹⁶Tantu ḏua, Unanga 'o sapolo re ya'u sisengene ngowa-ngowa'a munara toma guḏa gena-ge, re 'o pula'a 'ai guḏa 'anggur toma ngowa-ngowa'a munara toma guḏa ma lelegu.” Wakutu ngowa'a gena-ge ya 'isene so'o gena 'aḏi kanau ra Yesus, “Awa 'i dadi so'o gena-ge!”

¹⁷Yesus 'o tatamo i'a ngowa'a gena-ge re 'o kanau, “Na'o so'o gena, bu-bula'a ga'a 'i silefo toma Boku 'Ofi-'Ofi ma dara mangale 'oru? ‘Maḏi ga'a wala ma tukanga-tukanga ya upa'a, ma nyonyata maḏi gena-ge ri dadi maḏi ma re'u i'a di'a wala ma bangini.’

¹⁸Ngowa'a mo-moini 'aḏi eta'a toma maḏi gena-ge, ananga raḏi wejere rotu-rotu, re 'a guna ḇato ga'a maḏi gena-ge 'u pe-pe'ara, unanga 'o wejere singadolo 'o dadi korou'u.”

¹⁹Guru-guru 'agama re 'imam-'imam ma sae'e ya waro 'ade-'ade gena-ge Yesus 'o kanau mangale ananga. Sababu gena-ge, ananga 'aḏi disa ngo'omo, la cako'o 'a Yesus toma 'orasa gena-ge ḏua, mada'a 'aḏi mojongo ngowa'a kawasa.

²⁰Dadi 'aḏi disa donga gasa 'i rousu i'a. Ananga 'aḏi siḏingoto mata-mata ga'a 'aḏi masa-sakala matuhu ma tero sa'olo ngowa'a la-la di'a disa Yesus 'ai sala, la ananga 'aḏi sitalaḏi Yesus ra gubernur Pilatus.

²¹Mata-mata gena-ge 'aḏi kanau ra Yesus, “Guru, ngomi waro Jou 'ani demo re 'ani do-doto'o 'i banari re No mete'e ua 'a guna ḇato 'ai mau, mada'a no doto'o ma duhu sa'olo di'a ngowa'a balasu 'aḏi 'ahu mete'e Ma Jou'ongu Madutu 'ai 'akala ma mau.

²²Na'o so'o gena Jou no siajele ra ngomi: Mete'e nanga 'agama ma 'atoranga, ngene balasu wo fangu balastengi ra Kaisar bolo ua?”

²³Mada'a Yesus 'a waro ananga manga 'akala re sinyingara ma jira. Sababu gena-ge, Unanga 'o kanau,

²⁴“Tai'i na sibaiti ra Ngoi pipisi salaka ngai moi. 'A guna 'ai biono re 'ai lomanga?” Ananga ya sangoro, “Kaisar.”

²⁵Yesus 'o kanau ra ananga, “Na'o so'o gena, ta Kaisar pula'a di'a Kaisar re ta Ma Jou'ongu Madutu, pula'a di'a Ma Jou'ongu Madutu.”

²⁶Ananga ya sanga ua Yesus 'ai sala toma ngowa'a repe manga biono. Ananga pa'i 'aḏi masiogoro ḇato, sababu ananga 'aḏi heranga Unanga 'ai sa-sangoro.

²⁷Ngowa'a Saduki nga muḏuo i'a 'aḏi sapolo ra Yesus. (Ngowa'a Saduki 'aḏi ngaku ua ngowa'a dadunu 'aḏi 'ahu toma ngowa'a senge-sengene manga sigolona.) Ananga gena-ge 'aḏi sano ra Unanga.

²⁸“Guru, 'a Musa 'o lefo hukumu di'a ngene so'o ne: Na'o nau'u matengo 'o sengene kai ngowa'a ua; 'ai ioro bolo 'ai nongoḏu balasu 'a molo'ara balo gena-ge, la ngowa'a sengene nange-ge 'ai ju'uda 'i iranga awa.

²⁹'I dadi ḏua, toma ngowa'a nau'u gena-ge, gia nongoḏu nga tumudingi. Ma ioro ro molo'ara re 'o sengene kai ngowa'a ua.

³⁰Gena ḏua, ma nongoḏu 'a molo'ara ma ioro 'ai balo, mada'a singadolo unanga 'o sengene kai ngowa'a ua ḏi'i.

³¹Gena-ge 'i dadi ḏi'i tai no-nongoḏu tala ma reta-reta'a singadolo nga tumudingi.

³²Ma ḏo-ḏogumu tala were'a gena-ge mo sengene ḏi'i.

³³Sababu gena-ge toma 'orasa ngowa'a senge-sengene dadunu 'aḏi 'ahu moju, we-were'a gena-ge 'a guna 'ai were'a? Sababu munanga ma'u molo'ara mo-moini ananga nga tumudingi!”

³⁴Yesus 'a sangoro, “Ngowa-ngowa'a 'ahu toma dungia nena-ne biasa 'aḏi ma'u molo'ara.

³⁵Mada'a toma dungia su-sungi so'o gena-ge ua. Ma Jou'ongu Madutu ḏuanga i'a 'o dadunu si'ahu moju ngowa'a ga'a patasa ra Unanga 'ai momina. Ananga gena-ge kama ma'u molo'ara ua.

³⁶Ananga manga 'ahu ma tero sa'olo mala'ekata ma 'ahu, ananga kama sengene ua. Ananga gena-ge Ma Jou'ongu Madutu 'ai ngowa-ngowa'a, sababu Ma Jou'ongu Madutu 'o si'ahu moju ananga gena-ge toma ngowa'a senge-sengene manga ngi'i.

³⁷'A Musa 'o sijumu mangale ngowa'a sengene ḏua, ḏuanga i'a dadunu 'ahu moju. Sababu toma carita mangale 'o goroa 'i leja-lejanga toma dara unanga 'o siajele mangale Ma Jou gena-ge sa'olo, ‘Ma Jou'ongu Madutu ga'a Abraham, Ishak re Yakub 'aḏi silamo'o re siḏubuso.’

³⁸Ngowa'a sengene 'aḏi silamo'o re siḏubuso yoḏu'u Ma Jou'ongu Madutu, pa'i ngowa'a 'ahu-'ahu ḇato nyengara 'aḏi silamo'o re siḏubuso Unanga.”[39]

³⁹Guru 'agama nga muḏuo i'a 'aḏi kanau, “Guru 'ani sa-sangoro ne lai rousu madutu.”

⁴⁰Sababu gena-ge, ananga raḏi mojongo 'aḏi sano 'oru ḇato ra Yesus.

⁴¹Yesus 'o sano ra ananga, “I'a sa'olo ngene wo kanau 'O Kristus 'Olana Daud 'ai ju'uda?

⁴²Momongolo ua toma boku Mazmur ma dara, 'a 'Olana Daud 'o kanau: ‘Ma Jou'ongu Madutu 'o kanau Tari Jou: [40] No tegoro Tari giama ma kuwiḏa i'a

⁴³singadolo Ngoi ta 'a'a 'Ani lawa-lawana 'aḏi ta'aloko ra Jou.’

⁴⁴Dadi na'o 'O Kristus gena-ge 'a 'Olana Daud 'ai ju'uda, i'a sa'olo 'Olana Daud 'o si'aro'o 'O Kristus gena-ge 'ai Jou?”

⁴⁵Toma 'orasa gena-ge 'a Yesus 'o kanau Tai me-mete'e re ngowa'a repe 'aḏi 'isene ḏi'i, Unanga 'o kanau,

⁴⁶“Ma'istiari ino taninga guru-guru 'agama. Ananga 'aḏi nyanyaḏi tagi-tagi mapake juba kiḏanga, re 'aḏi nyanyaḏi ḏi'i ngowa'a ya'u silamo'o toma pasara. Ananga 'aḏi nyanyaḏi tegoro toma biono na'o toma wala puji re toma laya-laya.

⁴⁷Ananga 'aḏi sihaga balo-balo, re ya'u ra-rabasa ananga manga 'ori i'a rana tamanga wala ma dara. Re ananga 'aḏi manyiata lai kiḏa-kiḏanga di'a ya damunu manga kajahatana. Sababu gena-ge, Ma Jou'ongu Madutu ḏuanga i'a 'o sihukumu lai tubuso madutu ra ananga!”