Read Sahu Lukas 21 Bible Online

Lukas 21 - Sahu bible

Lukas 21

¹Ra Ma Jou'ongu Madutu 'ai Wala, Yesus 'o oḏi'i ngowa'a rema-enanga 'aḏi singosama manga jou-jou toma jou-jou ma burua.

²Unanga 'o oḏi'i ḏi'i we-were'a balo matengo ngowa'a ma dinga'unu ua mo singosama 'ami jou-jou pipisi tamḇaga ngai ḏiḏi.

³Ḏua Yesus 'o kanau, “Ni ngaku mode-mode'e 'Ari demo-demo nena-ne: Balo nena-ne mo singosama 'ami jou-jou lebe lamo'o i'a reo ananga mo-moini manga jou-jou.

⁴Sababu ananga mo-moini 'aḏi pula'a ra ananga manga 'ori i'a rana pai-pai'i. Mada'a we-were'a balo nena-ne kalaha ngowa'a ma dinga'unu ua, 'ami jou-jou masimoini 'oru ga'a rema enanga ra munanga tami 'ahu ma dara.”

⁵'Age rema ngowa'a nga muḏuo i'a 'aḏi sitoro Ma Jou'ongu Madutu 'ai Wala. Ananga 'aḏi kanau mangale Ma Jou'ongu Madutu 'ai Wala lai rousu madutu, sababu ya si'a'a reo maḏi ma ro-rousu re sipake ḏi'i 'ori i'a rana ga'a sipula'a ḏua di'a manga jou-jou ra Ma Jou'ongu Madutu. Dadi Yesus 'o kanau ra ananga,

⁶“Maha toma 'orasa rimoi, mo-moini ga'a ngini na oḏi'i nena-ne ḏuanga i'a 'i ruba singadolo maḏi rimoi i'a moi ua, 'age 'i ma'u fato re maḏi ma lelegu.”

⁷Ananga gena-ge 'aḏi sano ra Yesus, “Guru, ngau gena-ge enanga 'i dadi? Rema didina'o 'oru na'o enanga ma 'orasa 'i ngadolo?”

⁸Yesus 'o kanau, “Ma'istiari ino, awa-awa ngowa'a 'aḏi sihaga ngini. 'Age rema ngowa'a manga repe 'aḏi sapolo 'aḏi pake Ngoi 'ari lomanga, re 'aḏi kanau, ‘Ngoi nena-ne 'O Kristus’ re ‘Ma 'orasa 'i ngadolo ḏua.’ Mada'a awa ngini ni mete'e ananga.

⁹Mojongo awa ḏi'i, na'o ni 'isene habari mangale parangi re rusu. Mo-moini gena-ge enanga 'i dadi siḏa. Mada'a enanga gena-ge 'i dadi didina'o rimoi ua mangale kiamata ma 'orasa 'i ngadolo ḏua.”

¹⁰Yesus 'o dowanga 'ai demo 'o kanau, “Bangsa rimoi ma'u parangi bangsa lelegu, re nagara rimoi ma'u parangi nagara lelegu.

¹¹Toma ngi'i le'a ḇato 'o wusu enanga 'i dadi lai siḏi, 'orasa sawini re 'orasa si-siḏi, toma diwanga 'i dadi didina'o heranga ga'a ya'u mojongo lai siḏi.

¹²Mada'a mo-moini gena-ge 'i dadi nyangu, siḏa-siḏa ngini ngowa'a nu'u cako'o re nu'u sisikisa. Ngini ḏuanga i'a ngowa'a nu'u sijuruhakimi toma wala-wala puji, kara singosama toma bui. Re ngini ngowa'a nu'u sitalaḏi toma 'olana-'olana re ngowa'a la-lamo'o sababu ngini Ngoi 'ari me-mete'e.

¹³Gena-ge 'i dadi donga rimoi di'a ni singadolo Habari Roanga ra Ma Jou'ongu Madutu tala.

¹⁴Sababu gena-ge, site'e tala ninga 'akala re sinyingara, la ngini ni dodato awa 'oru ga'a ni kanau di'a ni riono ninga diri

¹⁵Ngoi masiretene tini riono re To pula'a 'Ari demo-demo re 'akala soro'unu singadolo ninga lawana matengo ua 'aḏi rubutu re 'aḏi lawana ninga demo.

¹⁶Ngowa'a mo-moini ḏuanga 'aḏi emono ngini sababu ni dadi Ngoi 'ari me-mete'e: Ninga ḇaḇa re ngina masiretene, ninga ioro re nongoḏu, ninga rera moi, ninga ḏagilomu sabi, ananga 'aḏi sipula'a taninga lawana. Re taninga sigolona 'age mamuni'a ananga ya'u sisengene.

¹⁸Mada'a ninga utu toma sae'e, ma ngai moi i'a mai ua enanga 'i iranga.

¹⁹Na'o ngini ninga ngo-ngaku kama elala ua, ngini ḏuanga i'a ni sanga 'ahu kasingado-ngadolo i'a.

²⁰Wakutu ngini ni oḏi'i sordado-sordado 'aḏi sigoloḏi limau Yerusalem, ngini ni waro mangale limau gena-ge ti'ara riwara enanga 'i wejere.

²¹Toma 'orasa gena-ge, ngowa'a ga'a 'aḏi tegoro toma daeraha Yudea balasu 'aḏi wiḏi toma kie. Ananga ga'a 'aḏi tegoro toma limau ma dara balasu 'aḏi wiḏi sisoi'i tala limau, re ananga ga'a toma limau ma ḏuḏunu 'aḏi osama awa toma limau ma dara.

²²Sababu toma 'orasa gena-ge Ma Jou'ongu Madutu 'a singe-ngeta'a 'ai hukumu, la gena-ge 'i dadi ma tero sa'olo silefo pasala ḏua toma Boku 'Ofi-'Ofi ma dara.

²³Toma 'orasa gena-ge, we-were'a—we-were'a remanga lese re ngina-ngina ga'a 'aḏi sisusu moju manga ngowa kiau, ananga gena-ge manga 'ahu kangela masala! Daeraha Israel ma ngowa'a ḏuanga i'a sanga sangisara lai siḏi, re Ma Jou'ongu Madutu ḏuanga i'a 'a singe-ngeta'a 'Ai hukumu ra ananga gena-ge.

²⁴Ananga ḏuanga i'a ngowa'a ya'u sisengene sanga samaranga re 'age ḏi'i rema ananga ḏuanga i'a ngowa'a ya'u gasa toma bangsa lelegu, ananga mo-moini sa'olo manga dawana. Re ngowa-ngowa'a ga'a nana'o ua Ma Jou'ongu Madutu, ananga ḏuanga i'a 'aḏi sisikisa limau Yerusalem manga manusia singadolo Ma Jou'ongu Madutu 'a sitantukanga ma 'orasa gena-ge 'i togumu.

²⁵Maha ḏuanga i'a 'i waiti didina'o heranga toma wangere ma la'o, ngara re mumuḏungu. Toma dungia, bangsa-bangsa 'aḏi matai mojongo re waro gogare riwara sababu 'aḏi 'isene momoku toma ngoloto ma rurusu.

²⁶Manusia ḏuanga i'a 'aḏi mojongo lai siḏi singadolo 'aḏi basono beberete sababu 'aḏi 'isene 'oru ga'a ḏuanga i'a 'i dadi toma dungia sitabi donga nena-ne. Sababu kuasa-kuasa toma ngawa-ngawa ri dadi kaco madutu.

²⁷Toma 'orasa gena-ge Ngoi, Manusia ma Ngowa'a Nau'u, dadunu to sapolo moju da'u diwanga tala to osama toma kakamo ma dara Rari kuasa re Rari mulia lamo'o.

²⁸Ngini na site'e ninga 'akala re sinyingara re na tede ninga sae'e na'o mo-moini gena-ge mulaingi 'i dadi sababu ti'ara riwara ngini ni sanga salamata.”

²⁹Ḏua Yesus 'o pula'a 'ade-'ade ra ananga so'o ne: “Totoho la-la do-doto'o mangale ate 'ara re ate 'oru ḇato.

³⁰Ngini ni waro 'orasa ngogoro sa'i ri sapolo na'o ate ma j̱imutu ri supu.

³¹So'o gena ḏi'i na'o ngini ni oḏi'i 'oru ga'a Ngoi ta siajele ḏua enanga 'i dadi, ngini na waro mangale Ma Jou'ongu Madutu 'ai Pareta sa'i ri ngadolo.

³²Ni ngaku mode-mode'e 'Ari demo-demo nena-ne: Wakutu enanga gena-ge 'i dadi, ngowa'a ga'a 'aḏi 'ahu toma 'orasa nena-ne, 'aḏi sengene mo-moini nyangu.

³³Diwanga re dungia ḏuanga i'a 'i iranga, mada'a Ngoi 'ari demo-demo 'i iranga ua kasingado-ngadolo i'a.

³⁴Ni ma'istiari! Awa ngini pa'i ni cufala 'a'a laya re ni ma'eto-'etolo, bolo pa'i ni mafikiri ninga 'ahu ḇato, singadolo kage-kage ma 'orasa gena-ge 'i ngadolo re ngini ni siwaro i'a ua.

³⁵Sababu 'orasa gena-ge enanga 'i sapolo di'a manusia mo-moini toma dungia nena-ne ma dara ma tero sa'olo soto 'i sado toma jojoḏi.

³⁶Ni ma'istiari ino re ni manyiata tau-taunu, la ngini nga'unu ni tahana susa re sangisara ga'a ḏuanga i'a enanga 'i dadi singadolo ngini nyengara talaḏi ra Ngoi, Manusia ma Ngowa'a Nau'u, kama mojongo ua.”

³⁷Wange moi-wange moi, Yesus 'o doto'o ra Ma Jou'ongu Madutu 'ai Wala, re lobi'i Unanga 'o tagi re 'o otu toma Polono Zaitun.

³⁸Wange moi-wange moi da-daini i'a moju, ngowa'a matai sapolo ra Ma Jou'ongu Madutu 'ai Wala di'a 'aḏi 'isene Yesus 'o doto'o.