Read Sahu Lukas 23 Bible Online

Lukas 23 - Sahu bible

Lukas 23

¹Ngowa'a mo-moini toma Mahkamah 'Agama gena-ge ananga 'aḏi made'oso, kara 'aḏi gasa 'a Yesus sitalaḏi ra gubernur Pilatus.

²I'a da'a, ananga mulaingi 'U kalaki 'a Yesus. Ananga 'aḏi kanau, “Ngomi sanga Unanga nena-ne, 'o sihaga ngowa'a kawasa: Unanga 'o kanau fangu balastengi awa ra Kaisar, re 'o aje ḏi'i, Unanga 'O Kristus re 'Olana.”

³Ḏua 'a Pilatus 'o sano ra Yesus, “Ngana nena-ne, mode-mode'e Yahudi manga 'olana bolo ua?” Yesus 'a sangoro, “Tero mode'e sa'olo ngana no kanau.”

⁴Ḏua 'a Pilatus 'o kanau toma 'imam-'imam ma sae'e re toma ngowa'a kawasa, “Ngoi ta sanga 'Ai sala rimoi i'a mai ua di'a to singe-ngeta'a hukumu ra Unanga.”

⁵Mada'a ananga ganapu 'aḏi simau-mau re 'aḏi kanau ra Pilatus, “Unanga 'ai do-doto'o 'o sihaga ngowa'a toma daeraha Yudea mo-moini. Mulaingi toma daeraha Galilea singadolo 'orasa nange-ne ri ngadolo 'ane-ne, toma Yerusalem.”

⁶Wakutu gubernur Pilatus 'a 'isene so'o gena, 'o sano, “Unanga nena-ne ngowa'a Galilea?”

⁷Ananga 'aḏi sangoro, “Tero mode'e, Unanga gena-ge ngowa'a Galilea.” Wakutu Pilatus 'o 'isene mangale 'a Yesus 'ai 'asala toma daeraha toma 'Olana Herodes 'ai pareta ma dara, unanga 'o siḏingoto 'a Yesus ra Herodes. Toma 'orasa gena-ge 'a Herodes 'o tegoro toma limau Yerusalem.

⁸'A Herodes 'o maroanga madutu, wakutu 'o ma'u sanga ra Yesus, sababu ma di'ara ḏua unanga 'o 'isene habari mangale 'a Yesus 'o 'a'a ga'a hera-heranga. Sababu gena-ge, unanga mau 'o ma'u sanga ra Yesus. Herodes 'o mau oḏi'i Yesus 'o 'a'a ga'a hera-heranga rimoi la unanga 'a sakisi.

⁹Sababu gena-ge 'a Herodes 'a singadolo 'ai so-sano ma repe ra Yesus, mada'a Yesus kama sangoro i'a mai ua unanga 'ai so-sano gena-ge.

¹⁰'Imam-'imam ma sae'e re guru-guru 'agama 'aḏi talaḏi ḏi'i re 'aḏi singadolo manga da'awa lebe ḏubuso mangale Yesus ra Herodes.

¹¹Herodes re 'ai sordado 'aḏi je-jengere re siḇi-ḇisa re 'aḏi sipake pakeanga kabasarana ra Yesus, kara 'U siḏingoto Unanga dadunu 'o siḏibo ra Pilatus moju.

¹²'Au nga'ene Herodes re Pilatus 'aḏi ma'u sabi ḏuḏunu, mada'a wangere nange-ne ananga raḏi dadi ma'u ḏagilomu.

¹³Pilatus ya'u lomu 'imam-'imam ma sae'e, Yahudi manga bi-biri'i re ngowa'a kawasa.

¹⁴Unanga 'o kanau ra ananga mo-moini, “Ngini gasa ino Unanga nena-ne ra ngoi re ni da'awa Unanga: Ngini ni aje Unanga 'o sihaga ngowa'a kawasa, la ananga gena-ge mau 'aḏi lawana Roma manga pamarenta. Ngini masiretene ni oḏi'i ḏua, ngoi reto niusu ḏua Unanga mada'a ngoi ta sanga 'ai sala rimoi i'a mai ua ma tero sa'olo ninga da'awa mo-moini gena-ge.

¹⁵So'o gena-ge, 'a Herodes ḏi'i 'a sanga Unanga 'ai sala ua, dadi dadunu 'o siḏingoto Unanga ra ngoi. Unanga nena-ne 'o 'a'a 'ori i'a kama rapu ua. Dadi Unanga nena-ne patasa ua di'a Ngoi to singe-ngeta'a hukumu sengene.

¹⁶Sababu gena-ge, ngasamoi ngoi to soma'a sordado 'aḏi ca'olo Unanga, kara 'aḏi sieanga Unanga.” [

¹⁷Pilatus 'o kanau so'o gena, sababu ri dadi biasa ḏua, balasu sibebasa 'o ngowa'a bui matengo na'o 'o Paskah ma Wangere.]

¹⁸Ngowa'a kawasa ga'a 'aḏi malomu toma ngi'i gena-ge, 'aḏi poa'a, “Sisengene Unanga! Sibebasa 'a Barabas!” (

¹⁹Wakutu gena-ge 'a Barabas toma bui ma dara, sababu unanga 'o mete'e 'a'a kaco toma limau gena-ge re 'o sisengene ngowa'a.)

²⁰Pilatus mau 'o sibebasa 'a Yesus. Sababu gena-ge, unanga 'o kanau toma ngowa'a kawasa soi moi moju.

²¹Mada'a ananga 'aḏi poa'a, “Sisalib Unanga! Sisalib Unanga!”

²²Ma soi ro'ange 'a Pilatus 'o kanau ra ananga, “Unanga 'ai sala 'oru? Ngoi ta sanga Unanga 'ai sala rimoi i'a mai ua! Dadi Unanga nena-ne patasa ua di'a Ngoi to singe-ngeta'a hukumu sengene. Sababu gena-ge, ngasamoi ngoi to soma'a sordado 'aḏi ca'olo Unanga kara to sieanga.”

²³Mada'a ananga ganapu 'aḏi poa'a siduga-duga Yesus balasu sanga salib. Ma ḏo-ḏogumu tala ananga manga maksudu 'i parasaja ua.

²⁴Dadi 'a Pilatus 'o singe-ngeta'a hukumu sengene ra Yesus, 'a mete'e ngowa'a kawasa manga mau,

²⁵re 'o sibebasa Barabas, ngowa'a bui matengo ga'a 'o 'a'a kaco re 'o sisengene ngowa'a. Pilatus 'o 'a'a so'o gena di'a sisanangi ngowa'a kawasa manga 'akala re sinyingara. Togumu i'a, unanga 'o sipula'a Yesus toma sordado-sordado, la ananga 'aḏi sisalib Unanga 'i mete'e ngowa'a kawasa manga mau.

²⁶Dadi sordado-sordado Roma 'aḏi gasa 'a Yesus toma limau Yerusalem ma ḏuḏunu. Toma ḏo-ḏagi ma dara 'aḏi ma'u sanga ngowa'a matengo 'ai lomanga 'a Simon. Unanga da'a limau Kirene ino 'o tagi osama toma limau Yerusalem. Ananga 'u tahana re 'u simau-mau 'u sidoiti 'a Yesus 'ai salib, 'a gasa tu-tuu'u ra Yesus 'ai ḏuḏunu.

²⁷Ngowa'a kawasa 'aḏi tagi tu-tuu'u ra Yesus 'ai ḏuḏunu. Ra ananga manga sigolona 'age rema we-were'a—we-were'a ananga 'aḏi rerese ma gaḏi.

²⁸Mada'a Yesus 'o magelelo tatamo toma ḏuḏunu re 'o kanau ra ananga, “Hei, we-were'a Yerusalem, ni gaḏi Ngoi awa, ni magaḏi tala ngini masiretene re ninga ngowa-ngowa'a!

²⁹Sababu ḏuanga i'a ma 'orasa 'i ngadolo na'o ngowa'a 'aḏi kanau, ‘Bara'utungu madutu, we-were'a kami lese ua, kama sanga ngowa'a ua re kama susu ngowa kiau ua!’

³⁰Toma 'orasa gena-ge, Ngowa'a ḏuanga i'a 'aḏi kanau toma kie-kie, ‘Pe-pe'ara ngomi!’ Re toma sau-sau, ‘Jujumu ngomi!’ ”

³¹“Sababu na'o ananga ya 'a'a so'o nena-ne ra Ngoi ga'a ma tero sa'olo ate 'ahu-'ahu moju, lebe cira i'a ḏi'i ananga ya 'a'a toma ngowa'a baraḏosa ga'a ma tero sa'olo ate ma sengene!”

³²Sordado-sordado 'aḏi gasa ḏi'i ngowa'a lelegu nga muḏiḏi, ananga gena-ge ngowa'a ma jira, di'a hukumu sisengene mamete'e rea Yesus.

³³Wakutu 'aḏi ngadolo toma ngi'i ma lomanga “Ḏoḏowi”,[42] sordado-sordado Roma 'aḏi sisalib 'a Yesus re ngowa'a ma jira nga muḏiḏi gena-ge ya'u sisalib ḏi'i: matengo Tai kuwiḏa re matengo Tai kuḇali.

³⁴Ḏua Yesus 'o manyiata, “Baba, singi-ngiranga manga ḏosa, sababu 'oru ga'a ananga ya 'a'a 'i mete'e tamanga waro ua ma dara.” Gena ḏua, sordado-sordado 'aḏi 'a'a loterei, la 'a guna 'o sanga Unanga 'ai pakeanga.

³⁵Ngowa'a kawasa 'aḏi matai sapolo toma ngi'i gena-ge di'a uningi 'a Yesus. Yahudi manga bi-biri'i 'aḏi je-jengere Unanga, re 'aḏi kanau, “Na'o Unanga mode-mode'e 'O Kristus ga'a Ma Jou'ongu Madutu 'o cumutu ḏua, tai'i i'a nange-ne Unanga masiretene 'a sisalamata 'Ai diri ma tero sa'olo 'O sisalamata ngowa'a ma lelegu.”

³⁶Sordado-sordado ḏi'i 'aḏi je-jengere Unanga. Ananga 'aḏi sapolo di'a 'aḏi pula'a 'anggur ko-kowi'i ra Unanga re

³⁷ananga 'aḏi kanau, “Na'o Ngana ngowa'a Yahudi manga 'Olana, no sisalamata 'Ani diri masiretene!”

³⁸Tai sae'e ma re'u toma salib co-cori ma tubu, sordado 'aḏi sipaku i'a papanga 'i silefo Mahkamah 'Agama manga da'awa ra Unanga ma betongo so'o ne: “UNANGA NENA-NE, NGOWA'A YAHUDI MANGA 'OLANA.”

³⁹Ngowa'a ma jira nga muḏiḏi gena-ge ga'a sanga salib simete'e ra Yesus, matengo 'o je-jengere re 'o kanau, “Na'o Ngana 'O Kristus, na sisalamata 'Ani diri masiretene re sisalamata ngomi ḏi'i!”

⁴⁰Mada'a matengo ḏi'i 'u ḇangata unanga ga'a 'o je-jengere Yesus, “Ngana no mojongo Ma Jou'ongu Madutu ua! Ngana sanga hukumu sengene mamete'e ra Unanga.

⁴¹Pa'i ngene nga muḏiḏi ḇato patasa wo sanga hukumu sengene mete'e ngene nanga ga'a. Mada'a Unanga 'ai sala ceka'a i'a mai ua!”

⁴²Ḏua unanga gena-ge 'o kanau, “Yesus no 'elingi ngoi wakutu no sapolo sa'olo 'olana.”

⁴³Yesus 'o kanau ra unanga, “No ngaku mode-mode'e 'Ari demo-demo nena-ne: Wangere nange-ne, ngana no mamete'e ra Ngoi toma Firdaus.”

⁴⁴Wakutu ḏa ca'olo nyagi moi re romoḏiḏi wangere 'olona tala, wangere ma la'o 'i taḏusu, re daeraha gena-ge mo-moini 'i dadi hafu-hafu singadolo ca'olo ro'ange wangere so'o ne'o.

⁴⁵Ngalana ma da-daku kole-kole ra Ma Jou'ongu Madutu 'ai Wala ma dara, enanga 'i raca kaci ḏiḏi, da'u ngadolo dau.

⁴⁶Ḏua Yesus 'o poa'a 'a siduga-duga, “Baba, Tani giama ma dara Ngoi ta sidoa'a 'Ari nyawa.” Gena ḏua, Unanga 'ai sangagara 'i togumu.

⁴⁷Sordado ma sae'e 'o oḏi'i 'oru ga'a 'i dadi ḏua, unanga 'o puji re silamo'o Ma Jou'ongu Madutu re 'o kanau, “Mode-mode'e Unanga nena-ne ngowa'a loasa re banari!”

⁴⁸Wakutu ngowa'a repe ga'a 'aḏi sapolo uningi toma ngi'i gena-ge, 'aḏi oḏi'i mo-moini ga'a 'i dadi ḏua, ananga mo-moini 'aḏi maḏibo ya sata manga katere, sababu manga 'akala re sinyingara ma tuduba lai siḏi.

⁴⁹Ngowa'a ga'a ma'u nana'o ra Unanga sidogo we-were'a ga'a 'aḏi mete'e Unanga da'a Galilea ino, ananga gena-ge 'aḏi made-de'oso toma giḏanga 'aḏi oḏi'i mo-moini ga'a 'i dadi ḏua.

⁵⁰'Age rema ngowa'a matengo 'ai lomanga 'a Yusuf, unanga 'ai 'asala toma limau Arimatea toma daeraha Yudea. Unanga ngowa'a la-la re ngowa'a loasa re banari, re 'o totoma Ma Jou'ongu Madutu 'ai Pareta. Unanga ḏi'i 'o osama nyo-nyoimi toma Mahkamah 'Agama mada'a 'o mete'e ua Mahkamah 'Agama manga putusanga di'a sisengene Yesus.

⁵¹

⁵²Yusuf nena-ne 'o talaḏi ra Pilatus, re 'o golo'o 'a Yesus 'ai mayeti, la unanga 'A palihara.

⁵³Gena ḏua, unanga 'a siguci Yesus 'ai mayeti toma salib. Ḏua unanga 'A sao re ḇa'a linen kara 'A gasa singosama toma kubu ma aḏu'u ga'a ngowa'a 'aḏi 'a'a toma bawata maḏi ma gagoro. Toma ngi'i gena-ge ngowa'a 'aḏi sigare mayeti matengo i'a mai nyangu.

⁵⁴Wangere gena-ge Jumata ma wangere. Wangere gena-ge wangere ma sadia di'a osama toma Sabata ma wangere. Toma 'orasa gena-ge Sabata ma wangere sa'i ri ngadolo.

⁵⁵We-were'a ga'a 'aḏi sapolo mamete'e ra Yesus da'a Galilea ino, ananga 'aḏi mete'e 'a Yusuf re 'aḏi oḏi'i kubu gena-ge, re 'aḏi oḏi'i ḏi'i sigare 'a Yesus 'ai mayeti ma duhu sa'olo.

⁵⁶Togumu i'a, ananga 'aḏi maḏibo 'aḏi sidodahe bou-bounu re rampa-rampa di'a si'ese 'a Yesus 'ai mayeti. 'O Sabata ma wangere, ananga 'aḏi matogumu 'a'a gu'uno, 'aḏi mete'e Musa 'ai hukumu.