Read Sahu Lukas 24 Bible Online

Lukas 24 - Sahu bible

Lukas 24

¹Da-daini i'a moju toma Migu ma wangere, we-were'a gena-ge 'aḏi tagi toma kubu re 'aḏi gasa rampa-rampa ga'a ananga ya sidodahe pasala ḏua.

²'Aḏi ngadolo toma kubu ya sanga i'a kubu ma da-damunu maḏi ri lulu ie.

³Ḏua ananga 'aḏi osama toma kubu ma dara, mada'a ya sanga ua Ma Jou Yesus 'ai mayeti.

⁴Ananga 'aḏi made-de'oso toma ngi'i gena-ge re ya waro manga gogare riwara, kage-kage ngowa'a nga muḏiḏi raḏi made-de'oso toma we-were'a manga gumuḏu re ananga manga pakeanga 'i ciḏo-ciḏoto.

⁵We-were'a gena-ge 'aḏi mojongo lai siḏi, ḏua 'aḏi maḏipolono manga biono ngadolo toma tana'a toma ngowa'a nga muḏiḏi gena-ge. Ananga gena-ge 'aḏi kanau toma we-were'a gena-ge, “I'a sa'olo ngini disa ngowa'a 'ahu toma ngowa'a senge-sengene manga sigolona!

⁶Unanga ro cua 'ane-ne, Unanga ro dadunu 'o 'ahu moju. Ni 'elingi 'oru ga'a Unanga 'o kanau pasala ḏua ra ngini wakutu Unanga toma Galilea

⁷mangale Manusia ma Ngowa'a Nau'u ḏuanga i'a sipula'a toma ngowa'a baraḏosa re 'U sisalib, kara toma wangere ma soi ro'ange, Unanga dadunu 'o 'ahu moju.”

⁸Dadi we-were'a gena-ge ananga ya si'elingi ie mangale Yesus 'ai demo-demo.

⁹Wakutu ananga 'aḏi maḏibo da'a kubu ino, ananga ya sijarita ra Yesus 'ai so-soma'a nga nyagi moi re matengo re 'Ai me-mete'e lelegu mo-moini ga'a 'i dadi pasala ḏua.

¹⁰We-were'a—we-were'a ga'a 'aḏi sijarita gena-ge ra Yesus 'ai so-soma'a, ananga gena-ge: ngo Maria Magdalena, ngo Yohana, re ngo Maria 'a Yakobus 'ai ngina, re we-were'a ma lelegu ḏi'i ga'a 'aḏi ma'u mete'e.

¹¹Mada'a Yesus 'ai me-mete'e ananga 'aḏi ta'ajiri we-were'a gena-ge 'aḏi jarita 'ori i'a ma faeda 'i cua. Dadi ananga ya ngaku ua.

¹²Mada'a Petrus 'o te'oso re jau-jau 'o lalara si'a toma kubu, i'a da'a unanga 'o maruku re 'a tatamo kubu ma dara. Unanga 'a oḏi'i 'age pa'i ḇa'a linen. Petrus 'o heranga masala, ḏua ro maḏibo re madibanga tau-taunu tai 'akala re sinyingara ma dara 'oru ga'a 'i dadi pasala ḏua.

¹³Toma wangere gena-ge ḏi'i, Yesus 'ai me-mete'e nga muḏiḏi 'aḏi tagi toma gamu rimoi ma lomanga Emaus. Toma limau Yerusalem tagi toma gamu Emaus ma giḏanga ḏa kilo nyagi moi re rimoi.

¹⁴Toma ḏo-ḏagi ma dara ananga 'aḏi ma'u kanau mangale mo-moini 'oru ga'a 'i dadi pasala ḏua.

¹⁵Wakutu ananga 'aḏi ma'u kanau re ma'u sano i'a re ino, Yesus masiretene 'o sebanga i'a re tagi mamete'e ra ananga.

¹⁶Ananga 'aḏi oḏi'i Yesus, mada'a 'age 'ori i'a rimoi i'a ma tero sa'olo ngowa'a ya piri'u manga la'o reo ḇa'a, singadolo ananga 'aḏi nana'o Unanga ua.

¹⁷Ḏua Yesus 'o sano, “Ngini ni makanau mangale 'oru toma ngo'omo ma golona?” Ananga 'aḏi matogumu tala remanga 'akala re sinyingara kangela 'i waiti tamanga biono.

¹⁸Ḏua matengo 'ai lomanga Kleopas 'o sano ra Yesus, “Pa'i Jou matengo ḇato ngowa'a sa-sapolo ino toma limau Yerusalem ga'a na waro ua 'oru ga'a 'i dadi pasala ḏua!”

¹⁹Yesus 'o sano, “ 'Oru 'i dadi ḏua?” Ananga ya sangoro, “ 'Oru ga'a 'i dadi ḏua ra Yesus, ngowa'a Nazaret ino. Unanga gena-ge 'o Nabi. 'Ai demo re 'Ai ga'a rema kuasa — bae ra Ma Jou'ongu Madutu 'ai momina bae ḏi'i toma manusia mo-moini manga momina.

²⁰Mada'a 'imam-'imam ma sae'e re Yahudi manga bi-biri'i 'aḏi sipula'a unanga di'a sihukumu sengene re ananga 'U sisalib Unanga!

²¹Momongolo ua ngomi masinganono Unanga nga'unu 'o sibebasa Israel tamanga lawana! Unanga ro sengene, singadolo nange-ne toma wangere ma soi ro'ange ḏua.

²²Sidogo ḏi'i, we-were'a nga muḏuo i'a tananga sigolona ananga 'aḏi sikage ngomi: Da-daini i'a moju, ananga raḏi tagi toma kubu.

²³Mada'a i'a da'a, ananga ya sanga ua Yesus 'ai mayeti. Ḏua 'aḏi maḏibo ino ra ngomi re 'aḏi siajele ananga 'aḏi oḏi'i mala'ekata-mala'ekata. Re mala'ekata-mala'ekata gena-ge 'i siajele mangale Yesus dadunu 'o 'ahu moju.

²⁴Ḏua nga muḏuo i'a taminga sigolona, ananga ya 'isene so'o gena jau-jau 'aḏi tagi ḏi'i toma kubu gena-ge re ya sanga i'a ma tero sa'olo we-were'a ya siajele, mada'a ananga 'aḏi oḏi'i Yesus ua.”

²⁵Ḏua Yesus 'o kanau i'a ra ananga, “Ngini mode-mode'e ni haga! Ni ngaku nyangu moju mangale 'oru ga'a nabi-nabi ya lefo ḏua 'ua re 'au wali!

²⁶Tantu ḏua, 'O Kristus balasu 'a basono ma sangisara kara nga'unu 'o osama Tai mulia.”

²⁷Gena ḏua, Yesus 'a sitarangi ra ananga 'oru ga'a silefo ḏua toma Boku 'Ofi-'Ofi ma dara mangale Unanga masiretene; mulaingi ra Musa 'ai boku-boku re nabi-nabi mo-moini manga boku.

²⁸Wakutu gena ananga sa'i ri co-cori osama toma gamu Emaus, Yesus 'o 'a'a sa'olo 'o mau tagi turusu.

²⁹Mada'a ananga 'aḏi baḏu re 'aḏi kanau ra Unanga, “No otu ra ngomi, sababu sa'i 'i lobi'i re sa'i 'i hafu-hafu.” Dadi Yesus 'o osama marimoi ra ananga.

³⁰Wakutu ananga 'aḏi tegoro oromo, Yesus 'a 'oro ma roti re 'O sibere ie murasa ma la ra Ma Jou'ongu Madutu, kara 'A poti-poti ma roti re 'O pula'a ra ananga.

³¹Toma 'orasa gena-ge, ananga aro 'aḏi waro mangale Unanga gena-ge 'a Yesus - enanga 'i ma tero sa'olo manga la'o ma bi-biri'u ri woi'i. Mada'a kage-kage Unanga ro iranga tamanga sigolona.

³²Ananga 'aḏi makanau matengo re matengo, “Tero mode'e Unanga nena-ne Yesus sababu tananga 'akala re sinyingara ma dara basono tala ma roanga 'i ro'u-ro'u, wakutu Unanga 'o kanau ra ngene toma ngo'omo ma golona moju, re 'A sitarangi Boku 'Ofi-'Ofi ma dara ra ngene!”

³³Toma 'orasa gena-ge ḏua ananga te'oso re 'aḏi tagi maḏibo toma limau Yerusalem. I'a da'a, ananga gena-ge 'aḏi ma'u sanga Yesus 'ai me-mete'e nga nyagi moi re matengo re 'Ai me-mete'e ma lelegu, ananga 'aḏi malomu.

³⁴Ḏua ananga ga'a 'aḏi malomu gena-ge 'aḏi kanau, “Tero mode'e, Ma Jou ro dadunu 'o 'ahu moju! Unanga ro masibaiti ra Simon!”

³⁵Yesus 'ai me-mete'e nga muḏiḏi waro 'aḏi sapolo re ya sijarita ḏi'i 'oru ga'a ananga 'aḏi oḏi'i re 'aḏi basono toma ngo'omo ma golona, singadolo ananga 'aḏi waro Unanga gena-ge Yesus wakutu 'A poti-poti roti toma wala.

³⁶Wakutu ananga 'aḏi maja-jarita moju, kage-kage Yesus masiretene 'O made-de'oso tamanga sigolona, re 'O kanau, “Dame ra ngini mo-moini.”

³⁷Ananga 'aḏi kage re matai mojongo sababu 'aḏi ta'ajiri Unanga 'o ca'ata.

³⁸Mada'a Yesus 'o kanau, “I'a sa'olo ngini ni mojongo? I'a sa'olo ninga 'akala re sinyingara ma dara wawaḏu?

³⁹Oḏi'i 'Ari giama re 'Ari rou ma nyaboto. Nena-ne Ngoi ḏua! Ni cigi re ni tailako, sababu ca'ata ma la-la'eme re ma obongo 'i cua, ma tero Ngoi ua ga'a ngini masiretene rini oḏi'i.”

⁴⁰Gena ḏua, Yesus 'o sijumu 'Ai giama re rou ma nyaboto ra ananga.

⁴¹Kalaha ananga 'aḏi maroanga siḏi woḏi re heranga, ananga 'aḏi ngaku nyangu moju. Sababu gena-ge, Yesus 'o sano ra ananga, “ 'Age reninga ngo-ngoromo?”

⁴²Ananga 'aḏi pula'a nyao'o osumu poti moi ra Unanga.

⁴³Yesus 'a 'oro nyao'o gena-ge, re 'a oromo ra ananga manga biono.

⁴⁴Togumu i'a, Unanga 'o kanau ra ananga, “Wakutu Ngoi to marimoi ra ngini moju, Ngoi ta siajele ḏua ra ngini: Mo-moini mangale Ngoi ga'a 'i silefo ḏua ra Musa re toma nabi-nabi manga boku re toma Mazmur ma dara; gena-ge balasu 'i dadi.”

⁴⁵Ḏua Yesus 'a welanga ananga manga fikirana, la ya sahe Boku 'Ofi-'Ofi ma dara.

⁴⁶Unanga 'o kanau ra ananga, “Toma Boku 'Ofi-'Ofi ma dara 'i silefo mangale 'O Kristus balasu basono sangisara, re sengene re toma wangere ma soi ro'ange Unanga dadunu 'o 'ahu moju.

⁴⁷Re ngowa-ngowa'a ḏuanga i'a 'aḏi singadolo habari rea Kristus gena-ge 'ai kuasa toma suku-suku mangale manusia balasu 'aḏi maḏibo toma ngo'omo boloto, la Ma Jou'ongu Madutu 'a singi-ngiranga manga ḏosa. Habari nena-ne balasu sirera re siwalata mulaingi toma limau Yerusalem singadolo toma dungia sitabi donga.

⁴⁸Ngini nena-ne ni dadi 'ari sakisi ga'a 'ori i'a mo-moini ri dadi pasala ḏua.

⁴⁹Ngoi masiretene ḏuanga i'a to siḏingoto Ma Ngagara 'Ofi-'Ofi ra ngini ga'a Ma Jou'ongu Madutu 'o sijaji 'ua re 'au wali. Mada'a ngini balasu ni totoma toma limau Yerusalem singadolo kuasa ra Ma Jou'ongu Madutu 'i sapolo tala ra ngini di'a site'e ngini.”

⁵⁰Togumu i'a, Yesus 'o gasa ananga tagi toma limau ma ḏuḏunu ngadolo toma gamu Betania. Toma ngi'i gena-ge Unanga 'a tede 'Ai giama re 'O sibarakati ananga.

⁵¹Wakutu Yesus 'o sibarakati ananga moju, Unanga 'o sisoi'i tala ananga Ro pere sie toma soroga.[43]

⁵²Ananga 'aḏi maḏipolono silamo'o re siḏubuso Unanga. Gena ḏua, 'aḏi maḏibo toma limau Yerusalem remanga 'akala re sinyingara ma roanga masala

⁵³re ananga 'aḏi puji re silamo'o Ma Jou'ongu Madutu tau-taunu ra Ma Jou'ongu Madutu 'ai Wala.