Read Sahu Lukas 7 Bible Online

Lukas 7 - Sahu bible

Lukas 7

¹Yesus 'o siajele hali-hali gena-ge toma ngowa'a repe togumu i'a, kara Unanga 'o tagi toma limau Kapernaum.

²I'a da'a, 'age Roma manga sordado ma sae'e, unanga 'ai budaka matengo ga'a 'o dadalara 'o siḏi sa'i 'o sengene.

³Wakutu sordado ma sae'e gena-ge 'a 'isene mangale Yesus ro sapolo toma limau Kapernaum, unanga 'o soma'a Yahudi manga sae'e 'aḏi tagi ra Unanga di'a 'aḏi golo'o Unanga 'o sapolo re si-la 'ai budaka gena-ge.

⁴Wakutu ananga 'aḏi ngadolo ra Yesus, ananga 'aḏi golo'o mode-mode'e, la Unanga 'o riono sordado ma sae'e gena-ge. Ananga 'aḏi kanau i'a ra Yesus, “Roma manga sordado ma sae'e nena-ne, ngowa'a la-la, dadi no riono unanga,

⁵sababu unanga 'o dadalara ngene nanga bangsa re unanga 'o simomi'i ḏua wala puji di'a ngomi.”

⁶Ḏua Yesus 'o tagi ma'u mete'e ra ananga. Wakutu Yesus reo co-cori i'a toma sordado ma sae'e 'ai wala, sordado ma sae'e gena-ge 'o soma'a 'ai ḏagilomu-ḏagilomu 'aḏi dola'a 'a Yesus re 'aḏi kanau, “Jou, awa no masikangela no sapolo tari wala sababu ngoi to patasa ua to dawongo Jou tari wala.

⁷Sababu gena-ge, ngoi masiretene to patasa ua talaḏi Jou. Dadi pa'i No siajele demo bale moi ḇato re 'ari budaka ro la.

⁸Sababu ngoi ḏi'i mai balasu to 'isene 'ari sae'e 'ai parenta, re 'ari aḏutala sordado-sordado ananga ḏi'i balasu 'aḏi mete'e 'ari parenta. Na'o ngoi to soma'a 'ari aḏutala matengo, ‘Tagi!’ unanga 'o tagi, re na'o ngoi to 'aro'o aḏutala ma lelegu, ‘Ino 'ane!’ unanga 'o sapolo ino. Na'o ngoi to soma'a 'ari budaka ‘No 'a'a ne!’ unanga ḏi'i 'o 'a'a.”

⁹Yesus 'o heranga wakutu 'o isene so'o gena togumu i'a. Unanga 'o magelelo re kanau i'a toma ngowa'a repe ga'a 'aḏi mete-mete'e Unanga, “Ngoi to siajele ra ngini nena-ne: Toma ngowa'a Israel manga sigolona, Ngoi to sanga matengo i'a mai nyangu, ga'a 'ai ngo-ngaku lai te'e sa'olo ngowa'a Yahudi ua nena-ne 'ai ngo-ngaku!”

¹⁰Ananga ga'a sordado ma sae'e 'o soma'a 'o dola'a Yesus gena-ge 'aḏi maḏibo toma sordado ma sae'e 'ai wala, sanga i'a budaka ga'a 'o siḏi gena-ge ro la.

¹¹Pasala i'a ti'ara nyangu,[12] Yesus rai me-mete'e re ngowa'a repe 'aḏi tagi toma limau Nain.

¹²Wakutu Yesus 'o ngadolo toma limau ma ngalana lamo'o 'age rema ngowa'a manga repe 'aḏi singata'a mayeti toma limau ma ḏuḏunu. Mayeti gena-ge balo were'a matengo 'ami ngowa'a nau'u pa'i matengo ḇato. Limau ma manusia manga repe 'aḏi singata'a were'a balo gena-ge.

¹³Wakutu Ma Jou Yesus 'o oḏi'i were'a balo gena-ge, Tai 'akala re sinyingara 'i baolo dadalara ra munanga. Dadi Unanga 'o kanau, “Meme, no 'aḏi rawara!”

¹⁴Gena ḏua, Yesus 'o sebanga i'a mayeti ma 'usungana re 'a siteru 'Ai giama toma 'usungana gena-ge ma re'u. Dadi ananga ga'a 'aḏi do-doiti 'usungana gena-ge 'aḏi matogumu. Ḏua Yesus 'o kanau, “Hei tubaie! Ngoi to soma'a no momi'i.”

¹⁵Tubaie ga'a ro sengene nange-ge 'o momi'i madi-dirini re mulaingi 'o kanau. Ḏua Yesus 'o kanau i'a toma balo were'a gena-ge, “Meme, Ne 'ani ngowa'a tubaie.”

¹⁶Ananga mo-moini 'aḏi mojongo re mulaingi 'aḏi puji re silamo'o Ma Jou'ongu Madutu. Ananga 'aḏi kanau, “Nabi la-lamo'o matengo ro sapolo tananga sigolona. Ma Jou'ongu Madutu ro sapolo di'a riono 'Ai ngowa-ngowa'a.”

¹⁷Habari mangale Yesus 'i rera re walata toma daeraha Yudea sitabi donga re daeraha ma sebanga ḏi'i.

¹⁸Yohanes tukanga baptis, unanga gena-ge 'ai me-mete'e 'aḏi siajele ra Yohanes mo-moini ga'a Yesus 'a si'a'a pasala ḏua. Ḏua Yohanes toma bui ma dara 'o 'aro'o 'ai me-mete'e nga muḏiḏi,

¹⁹kara unanga 'o soma'a ananga 'aḏi tagi ra Ma Jou Yesus re 'aḏi sano ra Unanga ma betongo so'o ne: “Jou nena-ne ḏua ga'a no sapolo mete'e Ma Jou'ongu Madutu 'ai jaji bolo ngomi balasu mi totoma ngowa'a lelegu?”

²⁰Yohanes 'ai me-mete'e nga muḏiḏi gena-ge 'aḏi tagi ra Yesus re 'aḏi kanau, “Yohanes tukanga baptis 'o soma'a ngomi mi sano ra Jou: 'Oru Jou nena-ne ḏua matengo ga'a no sapolo mete'e Ma Jou'ongu Madutu 'ai jaji bolo ngomi balasu mi totoma ngowa'a lelegu?”

²¹Wakutu gena-ge, Yesus 'o si-la ngowa'a siḏi manga repe re 'O sisupu ngowa'a manga repe ga'a roh ma jira ya'u dungosama re 'O si-la ngowa'a hafu manga repe dadi raḏi oḏi'i.

²²Dadi Yesus 'a sangoro, “Ni maḏibo ra Yohanes re ni siajele ra unanga 'oru ga'a ngini ni oḏi'i re ni 'isene: Ngowa'a hafu 'aḏi oḏi'i, ngowa'a ḇolo 'aḏi tagi; ngowa'a si-siḏi 'eno'o[13] 'aḏi la, ngowa'a popongolo 'aḏi 'isene, ngowa'a raḏi sengene, dadunu 'aḏi 'ahu moju, re Habari Roanga ra Ma Jou'ongu Madutu ino singadolo ḏi'i toma ngowa-ngowa'a ma dinga'unu ua.

²³Bara'utungu ngowa'a ga'a manga ngo-ngaku kama elala ua ra Ngoi!”

²⁴Yohanes 'ai me-mete'e 'aḏi tagi palisi'i i'a, Yesus 'o kanau toma ngowa'a repe mangale 'a Yohanes ma betongo so'o ne: “Ngini ni tagi toma daeraha baulaco di'a ni oḏi'i 'oru? Sanga ua, ngini ni tagi oḏi'i matengo ga'a 'o sitaka-taka mangale 'ai habari ma tero sa'olo rurubu ma so'a ngai moi ga'a karawiana ya wusu!

²⁵Dadi ngini ni tagi di'a ni oḏi'i 'oru? Ngowa'a matengo ga'a mapake rousu? Sanga ua! Sababu ngowa'a ga'a mapake rousu re manga 'ahu pai-pai'i 'aḏi tegoro toma kadato.

²⁶Dadi ngini ni tagi di'a ni oḏi'i 'oru? Nabi? Tero mode'e! Sidogo ḏi'i, unanga gena-ge lebe la-lamo'o i'a reo nabi ma siḏa-siḏa i'a!

²⁷Sababu toma Boku 'Ofi-'Ofi 'age rema bu-bula'a nena-ne 'i silefo mangale 'a Yohanes ga'a Ma Jou'ongu Madutu 'o kanau so'o ne: ‘Nena-ne Ngoi 'ari so-soma'a. Ngoi ḏuanga i'a to 'utusu unanga siḏa kara Ngana, la unanga ḏuanga i'a 'a sidodahe ngo'omo di'a Ngana.’ ”

²⁸Yesus 'o dadunu kanau, “Ngoi to siajele ra ngini nena-ne: Toma dungia nena-ne matengo i'a mai ua ga'a sibuoro lebe la-lamo'o i'a rea Yohanes tukanga baptis. Mada'a mulaingi nange-ne, ngowa'a ma pake ua ga'a 'o osama nyo-nyoimi ra Ma Jou'ongu Madutu 'ai Pareta, unanga gena-ge 'o dadi ngowa'a lebe la-lamo'o i'a rea Yohanes.”

²⁹Rayata mo-moini (sidogo ngowa'a golo-golo'o balastengi) ga'a 'a Yohanes ya'u baptis, ananga gena-ge 'aḏi dawongo Yesus 'ai demo-demo mangale Yohanes 'i banari.

³⁰Mada'a ngowa'a Farisi re guru-guru 'agama 'aḏi oḏu'u 'a Yohanes ya'u baptis sababu ananga gena-ge 'aḏi dawongo ua Ma Jou'ongu Madutu 'ai 'akala ma mau di'a ananga.

³¹Ḏua Yesus dadunu 'o kanau moju, “Reo 'oru ngoi ta site-tero ngowa-ngowa'a toma 'orasa nena-ne? Ananga nena-ne ma tero sa'olo 'oru?

³²Ananga nena-ne sa'olo ngowa 'olo 'aḏi maḏegoro toma pasara toropo moi-toropo moi re 'aḏi ma'u sangoro i'a re ino ma'u ngali-ngali, ‘ Ngomi ḇisa serulingi ḏua mada'a ngini ni roje ua, ngomi mi nyanyi-nyanyi duka re balisa mada'a ngini 'aḏi ua.’

³³Ngoi 'ari maksudu: Wakutu Yohanes tukanga baptis 'o sapolo, unanga 'o puasa re oḏu'u ka'e 'anggur, re ngini nu dawongo ua re ni kanau, ‘Unanga 'o roh ma jira 'u dungosama.’

³⁴Ngoi, Manusia ma Ngowa'a Nau'u reto sapolo re To oromo re ka'e, mada'a ngini ḏi'i ni dawongo Ngoi ua re ni kanau, ‘ Oḏi'i unanga gena-ge 'O da-danata, 'O 'etolo, re Ma'u ḏagilomu reo ngowa-ngowa'a golo-golo'o balastengi re ngowa-ngowa'a baraḏosa.’

³⁵Kalaha so'o gena, Ma Jou'ongu Madutu 'ai 'akala ma soro'unu 'i waiti banari ra Ma Jou'ongu Madutu 'ai ngowa-ngowa'a ga'a raḏi dawongo Ngoi.”

³⁶Ngowa'a Farisi matengo 'ai lomanga Simon, unanga 'o saele Yesus di'a oromo ra unanga 'ai wala. Yesus 'o tagi ra Simon 'ai wala re 'o oromo ma'u mete'e ra unanga.

³⁷Toma limau gena-ge, 'age rema we-were'a matengo, munanga remo 'ahu toma ḏosa ma dara. Wakutu munanga mo 'isene Yesus 'o oromo toma ngowa'a Farisi gena-ge 'ai wala, munanga mo sapolo rami botol[14] rimoi ma dara rema bou-bounu.

³⁸Wakutu Yesus 'o majoreke tala 'o oromo, munanga mo made-de'oso tai ḏuḏunu,[15] co-cori 'Ai rou kara mo 'aḏi re 'ami 'ongoro ma side-dege ra Yesus 'ai rou. Gena ḏua, munanga ma sipii'i rami utu kara mo dume 'Ai rou re masiba-ba'ala 'ami bou-bounu nange-ge Tai rou.

³⁹Wakutu ngowa'a Farisi ga'a saele Yesus nange-ge 'o oḏi'i so'o gena, unanga 'o kanau tai 'akala re sinyingara ma dara, “Na'o Unanga nena-ne nabi Unanga 'a waro ḏua we-were'a ga'a mo cigi Unanga, munanga gena-ge ngo guna. We-were'a nena-ne mo 'ahu toma ḏosa ma dara.”

⁴⁰Ḏua Yesus 'o kanau i'a ra Simon, “ 'Age 'ori i'a rimoi i'a ngoi mau to kanau ra ngana.” Simon 'a sangoro, “Ya Guru no kanau ḇato.”

⁴¹Yesus 'o kanau, “ 'Age rema ngowa'a matengo 'a sibau 'ai pipisi toma ngowa'a nga muḏiḏi. Matengo 'o sanga pipisi salaka latu romotoa, re matengo ḏi'i 'o sanga pipisi salaka guḏi romotoa.

⁴²Ananga nga muḏiḏi ya siḏibo ya nga'unu ua pipisi salaka gena-ge mada'a manga banyatoro toma ngowa'a ga'a sipula'a bau 'a singi-ngiranga. Na 'a guna ra ananga nga muḏiḏi gena-ge ḏuanga i'a 'aḏi lebe manga dadalara ngowa'a ga'a sibau pipisi?”

⁴³Simon 'o sangoro, “Mete'e ngoi 'ari 'akala ma sanga, ngowa'a ga'a banyatoro lebe lamo'o i'a 'i singi-ngiranga ḏua.” Yesus 'o kanau, “Tero mode'e ngana.”

⁴⁴Ḏua Yesus 'o magelelo toma we-were'a gena-ge re 'O kanau ra Simon, “Ngana no oḏi'i we-were'a nena-ne? Wakutu Ngoi to sapolo tani wala, ngana no mete'e ua ngene ngowa'a Yahudi nanga 'atoranga: ngana no sidodahe ua ḇanyo di'a sisoso'o 'Ari rou. Mada'a we-were'a nena-ne munanga mo soso'o ḏua 'Ari rou rami la'o ma 'ongoro re masidudungu rami utu.

⁴⁵Ngana no mete'e ua ngene ngowa'a Yahudi nanga 'atoranga moju wakutu no 'aro'o Ngoi tani wala: ngana no dume ua 'Ari bobongolo. Mada'a we-were'a nena-ne, kama togumu ua ma dume 'Ari rou wakutu Ngoi to sapolo 'ane.

⁴⁶Ngana na siba-ba'ala ua 'ani zaitun ma goroho Tari sae'e, mada'a we-were'a nena-ne masiba-ba'ala 'ami bou-bounu Tari rou.

⁴⁷Sababu gena-ge, Ngoi to siajele ra ngini nena-ne: Mode-mode'e munanga masijumu 'ami dadalara lebe lamo'o i'a sababu Ngoi ta singi-ngiranga ḏua 'ami ḏosa-ḏosa. Na'o ngowa'a manga ḏosa pa'i ceka'a ua ya singi-ngiranga, unanga ḏuanga i'a 'ai dadalara pa'i ceka'a ua ḏi'i.”

⁴⁸Ḏua Yesus 'o kanau i'a toma we-were'a gena-ge, “ 'Ani ḏosa ta singi-ngiranga ḏua.”

⁴⁹Ngowa-ngowa'a lelegu ga'a 'aḏi oromo mamete'e rea Yesus, mulaingi 'aḏi ma'u kanau matengo re matengo, “Ngowa'a nena-ne 'a guna ga'a 'o nau'u masala 'o kanau mangale unanga nga'unu 'a singi-ngiranga ngowa'a manga ḏosa!”

⁵⁰Mada'a Yesus 'o kanau toma we-were'a gena-ge, “Sababu ngana reno ngaku Ngoi, ngana sanga salamata, no maḏibo rani dame.”