Read Sahu Lukas 8 Bible Online

Lukas 8 - Sahu bible

Lukas 8

¹Ma 'orasa ti'ara ua, Yesus 'o tagi toma limau-limau re 'o gamu-gamu di'a singadolo Habari Roanga mangale Ma Jou'ongu Madutu 'ai Pareta. Re 'Ai me-mete'e nga nyagi moi re nga muḏiḏi mete'e Unanga.

²We-were'a nga muḏuo i'a 'aḏi mete'e ḏi'i 'a Yesus. Unanga 'o dusu'u roh-roh ma jira ra ananga bolo si-la ḏua manga si-siḏi. Ra ananga manga sigolona 'age rema ngowa'a matengo 'ami lomanga ngo Maria, ga'a si'aro'o ḏi'i ngo Magdalena (munanga nena-ne Yesus 'a dusu'u 'ami roh ma jira tumudingi).

³Re ngo Yohana 'a Khuza 'ai were'a. Khuza, unanga 'o dadi 'Olana Herodes 'ai ngale ma sae'e. Ngo Susana re ma repe ḏi'i we-were'a lelegu. We-were'a gena-ge ananga madigasa pipisi masiretene di'a 'aḏi riono 'a Yesus re 'Ai me-mete'e.

⁴Ngowa-ngowa'a toma limau-limau 'aḏi matai sapolo ra Yesus. Wakutu ngowa'a repe raḏi malomu, Yesus 'o carita 'ade-'ade rimoi ra ananga so'o ne:

⁵“ 'Age rema ngowa'a 'a'a guḏa matengo 'o tagi di'a 'a siare 'ai gisisi. Wakutu unanga 'a siare, 'age rema gisisi mamuni'a 'i eta'a toma ngo'omo ma 'uḏu. Ḏua ngowa'a ya jo'u re ḏi'i namo ya tubu'u simoini gisisi gena-ge.

⁶'Age ḏi'i 'i eta'a toma tana'a maḏi-maḏi. Ma gisisi gena-ge 'i konyo mada'a 'i ngonono sababu ma tana'a lai nginara.

⁷'Age mamuni'a ḏi'i 'i eta'a toma rurubu dodowo'o ma golona, gisisi re rurubu dodowo'o gena-ge 'i konyo mamete'e, mada'a ma rurubu dodowo'o ya pilatu gisisi ma go-gonyo singadolo gisisi 'i sengene.

⁸Mada'a 'age mamuni'a ḏi'i 'i eta'a toma tana'a ma la-la'eme, enanga 'i konyo rema go-gonyo lai rousu, 'i supu ma hasili ngai moi ma sowo'o latu moi.” Yesus 'a carita 'ade-'ade gena-ge togumu i'a 'O kanau siduga, “Na'o reninga ngau'u, ni 'isene la-la!”

⁹Yesus 'ai me-mete'e 'aḏi sano ra Yesus ma maksudu 'oru 'ade-'ade gena-ge?

¹⁰Ḏua Yesus 'a sangoro, “Ngini reni sanga cocatu di'a ni sahe 'ori i'a go-gogono mangale Ma Jou'ongu Madutu 'ai Pareta. Mada'a ngowa'a ma lelegu ga'a ngaku Ngoi ua wa'u doto'o reo 'ade-'ade, la kalaha ananga nga'unu 'aḏi oḏi'i, ananga ya sahe ua 'oru ga'a 'i dadi, re kalaha ananga ya 'isene, ananga ya sahe ua ma maksudu.”

¹¹“ 'Ade-'ade nena-ne ma ngale so'o ne: Gisisi gena-ge Ma Jou'ongu Madutu 'ai habari.

¹²Gisisi 'i eta'a toma ngo'omo ma 'uḏu ma tero sa'olo ngowa'a 'aḏi 'isene habari gena-ge mada'a 'Iblisi 'i sapolo ya ra-rabasa 'Ai habari gena-ge tamanga 'akala re sinyingara ma dara, la ananga 'aḏi ngaku awa re 'aḏi sanga salamata ua.

¹³Gisisi ga'a 'i eta'a toma tana'a maḏi-maḏi, gena-ge ma tero sa'olo ngowa'a 'aḏi 'isene habari gena-ge, jau-jau ya dawongo remanga roanga tamanga 'akala re sinyingara. Mada'a tamanga 'akala re sinyingara ma dara habari gena-ge 'i utu'u ua. Dadi ananga 'aḏi ngaku habari gena-ge pa'i ngoma moi ḇato, ananga 'aḏi celolo ḏuḏunu i'a wakutu 'aḏi sanga bo-baja.

¹⁴Gisisi 'i eta'a toma rurubu dodowo'o ma golona, ma tero sa'olo ngowa'a 'aḏi 'isene habari gena-ge, mada'a 'aḏi dodato mangale manga 'ahu, ananga 'aḏi mau manga 'ahu pai-pai'i re tamanga 'akala re sinyingara ma dara, manga nyafusu lai lamo'o ḏi'i dadi ananga 'aḏi basono manga 'ahu 'i peletoro singadolo ananga 'aḏi mete'e riwara Ma Jou'ongu Madutu 'ai habari gena-ge. Dadi ananga ma tero sa'olo go-gahu ma sowo'o tu'unisi.

¹⁵Gisisi 'i eta'a toma tana'a ma la-la'eme, gena-ge ma tero sa'olo ngowa'a 'aḏi 'isene habari gena-ge ya dawongo re ya gogono tamanga 'akala re sinyingara lai rousu re 'i banari. Ananga 'aḏi matahana singadolo sisupu ma sowo'o.

¹⁶Matengo i'a mai ua tagala 'o poci, kara 'a damunu reo tampayanga bolo 'a sigare toma jingi'i ma 'aḏu. Mada'a 'a siteru toma poci ma ngi'i, la ngowa'a ga'a osama nga'unu ya oḏi'i ma tarangi.

¹⁷Sababu 'oru ḇato ga'a 'i go-gogono nange-ne, ḏuanga i'a 'i supu, re 'oru ḇato ga'a 'i rahasia nange-ne, ḏuanga i'a 'i waiti re ngowa'a ya sahe.

¹⁸Sababu gena-ge, 'isene re ni totoho la-la ino. Sababu 'a guna ḇato ro sanga wo-waro mangale 'ori i'a go-gogono, Ma Jou'ongu Madutu 'a sidogo ḏi'i wo-waro gena-ge. Mada'a 'a guna ḇato 'o sanga wo-waro ua mangale 'ori i'a go-gogono, 'oru ḇato kalaha unanga 'a ta'ajiri ra 'oro wo-waro pa'i ceka'a ua ḇato, gena-ge Ma Jou'ongu Madutu 'a 'oro ḏi'i.”

¹⁹Yesus 'ai ngina re 'Ai no-nongoḏu 'aḏi sapolo ra Unanga. Mada'a ananga 'aḏi sebanga i'a ra Unanga 'i yoḏu'u sababu ngowa'a repe woḏi.

²⁰Ḏua 'age rema ngowa'a matengo 'o kanau ra Yesus, “Baba, 'Ani ngina re 'Ani no-nongoḏu da'a toma ḏuḏunu, 'aḏi mau ma'u sanga ra Jou.”

²¹Mada'a Yesus 'o sangoro ra ananga, “Ngowa-ngowa'a ga'a ya 'isene Ma Jou'ongu Madutu 'ai demo, re ya si'a'a, ananga gena-ge Ngoi 'ari ngina re 'Ari ioro re nongoḏu.”

²²Toma wangere rimoi, Yesus re 'Ai me-mete'e 'aḏi palene oti. Unanga 'o kanau i'a ra ananga, “Ino, ngene wo si'a da'a talaga kaci moi.” Ḏua ananga 'aḏi sidete.

²³Wakutu ananga 'aḏi sidete Yesus 'o otu. Kage-kage rato 'i sapolo, momoku 'i baolo 'o oti ḇanyo ya dungosama singadolo sa'i jala re ananga toma bahala ma dara.

²⁴Yesus 'ai me-mete'e 'U tamanga Unanga, ananga 'aḏi tuduba, “Tuanga, Tuanga, ngene sanga bahala re ti'ara ua wo jala!” Dadi Yesus 'o momi'i, kara 'a ḇangata rato re momoku. Gena ḏua, rato re momoku 'i togumu re talaga gena-ge ri ogo-ogoro i'a.

²⁵Ḏua Unanga 'o kanau ra ananga, “I'a sa'olo ni ngaku Ngoi ua?” Ananga 'aḏi heranga re 'aḏi matai mojongo re 'aḏi ma'u kanau matengo re matengo, “Unanga nena-ne 'o dadi 'oru! Singadolo rato re momoku ya mete'e Unanga 'ai parenta!”

²⁶Yesus rai me-mete'e 'aḏi sidete turusu singadolo toma daeraha Gerasa, talaga Galilea ma kaci moi.

²⁷'Age rema ngowa'a matengo ga'a roh ma jira 'u dungosama da'a toma limau ino. Ma di'ara ḏua unanga gena-ge kai pakeanga ua re 'o tegoro ua tai wala mada'a unanga pa'i 'o tegoro toma kubu ma aḏu'u. Ma jelele ḏua roh ma jira 'u dungosama. Re kalaha ngowa'a 'aḏi jaga-jaga unanga re 'ai rou re 'ai giama ya rate, nga'unu 'a tola'a sababu roh ma jira 'u ḏegoro kara gasa unanga toma ngi'i ga-garura. Wakutu Yesus waro 'o 'uci toma oti, ngowa'a gena-ge 'o jau i'a Unanga. Wakutu 'o oḏi'i 'a Yesus, unanga 'o poa'a kara 'o mapagara 'ai biono tala ra Unanga. Yesus 'o parenta roh ma jira 'i supu toma ngowa'a gena-ge, kara ngowa'a gena-ge 'o kanau, “Yesus, Ma Jou'ongu Madutu toma Gau'u 'ai Ngowa'a Nau'u! Rini 'a'a 'oru ngoi? Ngoi to maḏigaro'o, awa no sijira ngoi!”

²⁸

²⁹

³⁰Yesus 'o sano toma ngowa'a nena-ne, “ 'Ani lomanga 'a guna?” “'Ari lomanga 'a Legion.” Unanga gena-ge 'a sangoro so'o gena sababu ra unanga 'ai lese roh ma jira ma repe 'u dungosama.

³¹Roh-roh ma jira 'i maḏigaro'o ra Yesus awa dusu'u enanga sieta'a toma maut ma ngabanga.[16]

³²Co-cori toma ngi'i gena, 'age rema soto duo-duono rimoi 'i disa oromo toma sau ma gagoro. Roh-roh ma jira gena-ge 'i maḏigaro'o ra Yesus nga'unu gari'a Unanga 'o pula'a watasa, la enanga 'i osama toma soto-soto gena-ge. Ḏua Yesus 'o nyengara.

³³Dadi roh-roh ma jira gena-ge 'i supu toma ngowa'a gena-ge, kara 'i mangosama toma soto. Soto mo-moini 'i masija'olo wiḏi toma bawata ma 'uḏu re 'i maḏupaka toma talaga ma dara singadolo ri jala mo-moini.

³⁴Wakutu sowohi-sowohi soto ya oḏi'i 'oru ri dadi pasala ḏua, ananga 'aḏi lalara sihabari toma limau re toma gamu ma sebanga.

³⁵Ḏua ngowa'a 'aḏi matai supu 'aḏi oḏi'i 'oru ri dadi pasala ḏua. Ananga gena-ge 'aḏi sapolo ra Yesus re 'aḏi sanga i'a ngowa'a ga'a roh ma jira 'u dungosama, ri masupu ra unanga re 'o madi-dirini co-cori ra Yesus 'ai rou. Unanga ro mapake pakeanga, re 'ai fikirana ri ḏibo la-la, singadolo ananga matai mojongo.

³⁶Ananga ga'a oḏi'i 'oru ri dadi pasala ḏua 'aḏi sijarita mangale ngowa'a ga'a roh ma jira 'u dungosama 'au nga'ene, nange-ne ro la.

³⁷Dadi ngowa-ngowa'a toma daeraha Gerasa, ananga mo-moini 'aḏi mojongo, ananga 'aḏi maḏigaro'o ra Yesus nga'unu gari'a 'o sisoi'i tala ḇato ngi'i nena-ne. Dadi Yesus 'o mabalene toma oti re 'o maḏibo toma talaga Galilea ma kaci moi.

³⁸Ngowa'a ga'a roh ma jira 'u ḏegoro riwara gena-ge 'o golo'o ra Yesus na'o nyengara gari'a unanga 'o mete'e Yesus. Mada'a Yesus 'o soma'a unanga 'o tagi re 'O kanau,

³⁹“No maḏibo re no singadolo 'oru ga'a Ma Jou'ongu Madutu 'o 'a'a ḏua ra ngana.” Ḏua unanga 'o tagi 'a sihabari toma limau sitabi donga, 'oru ga'a Yesus ro 'a'a ḏua ra unanga.

⁴⁰Wakutu Yesus 'o maḏibo da'a kaci moi toma talaga ma 'uḏu, ngowa'a repe 'aḏi dawongo Unanga remanga roanga sababu 'aḏi totoma tau-taunu Unanga.

⁴¹Ḏua sapolo ḏi'i matengo 'ai lomanga 'a Yairus. Unanga gena-ge 'o dadi wala puji ma sae'e. Unanga 'o maḏipolono ra Yesus re 'o maḏigaro'o na'o nyengara gari'a Yesus no sapolo ra ngoi 'ari wala.

⁴²Sababu 'ari ngowa'a were'a pa'i munanga matengo 'ami 'umuru musungu nyagi moi re romoḏiḏi sa'i mo sengene. Wakutu Yesus 'o tagi ra Yairus 'ai wala, ngowa'a repe masala 'u gowolo Unanga toma biono re ḏuḏunu, kuwiḏa re kuḇali singadolo ananga ma'u tu-tuḏu.

⁴³Toma ngowa'a repe manga sigolona, 'age rema we-were'a matengo mo siḏi 'ami ngaunu 'i pa'ala ma di'ara musungu nyagi moi re romoḏiḏi. Re 'ami 'ori i'a rana mai mawu'unu rema moini di'a 'ami sou'u ma bo-bangu toma dotere.[17] Mada'a matengo i'a mai ua nga'unu si-la munanga.

⁴⁴We-were'a gena-ge mo masebanga i'a ra Yesus 'ai ḏuḏunu, kara ma cigi 'a Yesus 'ai juba ma dere. Toma 'orasa gena-ge ḏua 'ami ngaunu 'i pa'ala riwara.

⁴⁵Yesus 'o sano, “ 'A guna 'o cigi Ngoi?” Ananga mo-moini 'aḏi masoloto. Ḏua Petrus 'o kanau, “Tuanga, ngowa'a manga repe masala 'aḏi sigoloḏi, re ma'u tutuḏu.”

⁴⁶Yesus 'o kanau, “Mada'a 'age rema ngowa'a matengo 'o cigi ngoi. Ngoi ta waro, sababu Ngoi 'ari de-de'e 'i supu.”

⁴⁷We-were'a gena-ge mo ma'insafu mangale mi ga'a nange-ge ngowa'a ya waro. Dadi munanga mo sapolo rami terewete, re mo maḏipolono ra Yesus. Ḏua munanga mo masijarita toma mandan, i'a sa'olo munanga mo cigi 'a Yesus 'ai juba re 'orasa gena-ge ḏua 'ami si-siḏi ri la.

⁴⁸Yesus 'o kanau ra munanga, “ 'Ari ngowa'a, sababu ngana no ngaku Ngoi, ngana reno la, no tagi rani dame.”

⁴⁹Wakutu Yesus 'o ka-kanau moju, 'a Yairus 'ai so-soma'a matengo 'o sapolo da'a ra Yairus 'ai wala ino. Unanga 'o kanau ra Yairus, “Tuanga 'ani ngowa'a were'a remo sengene, no sikangela Guru rawara.”

⁵⁰Yesus 'a 'isene i'a so'o gena, kara Unanga 'o kanau ra Yairus, “Mojongo awa, ngaku ḇato ḏuanga i'a 'ani ngowa'a mo la.”

⁵¹Wakutu ananga 'aḏi ngadolo ra Yairus 'ai wala, Yesus 'o simaha ua ananga matengo i'a 'aḏi osama mamete'e ra Unanga, ḏuga-ḏuga Petrus, Yohanes, Yakobus, re ngowa'a ga'a mo siḏi 'ami ḇaḇa rami ngina.

⁵²Ngowa'a mo-moini ya rerese ma gaḏi, sababu ngowa 'olo were'a gena-ge remo sengene. Mada'a Yesus 'o kanau, “Ni 'aḏi awa, munanga mo sengene ua, mada'a munanga pa'i mo otu ḇato!” (Yesus 'o waro ḏua ngowa 'olo were'a gena-ge remo sengene.)

⁵³Ananga 'aḏi nye-nyelo'o 'a Yesus, sababu ananga 'aḏi waro ngowa 'olo were'a gena-ge remo sengene.

⁵⁴Togumu i'a, Yesus 'a gu'u ngowa 'olo were'a gena-ge 'ami giama re 'o kanau, “Ngowa 'olo, no momi'i.”

⁵⁵'Ami nyawa ri ḏibo re mo momi'i. Togumu i'a Yesus 'o soma'a ananga 'aḏi pula'a munanga mo oromo.

⁵⁶Ngowa 'olo were'a 'ami ḇaḇa re 'ami ngina 'aḏi heranga masala. Mada'a Yesus 'o simaha ua ananga 'aḏi sihabari 'oru 'i dadi gena-ge ra guna ḇato.