Read Sahu Yohanes 10 Bible Online

Yohanes 10 - Sahu bible

Yohanes 10

¹“Ni ngaku mode-mode'e 'Ari demo-demo nena-ne: Ngowa'a matengo ga'a 'o osama toma doba ma karunga 'a mete'e ma ngalana ua, mada'a 'o pere mete'e ngo'omo lelegu; unanga gena-ge ngowa'a to-tori'i re ngowa'a ra-rabasa.

²Mada'a ngowa'a ga'a 'aḏi osama mete'e karunga ma ngalana, unanga gena-ge 'o doba ma sowohi.

³Ngalana ma ja-jaga 'a welanga ngalana di'a unanga re doba-doba 'i mete'e unanga 'ai iḏingi sababu enanga ya nana'o. Unanga gena-ge 'a 'aro'o enanga ma lomanga rimoi-rimoi re 'a gasa enanga sisupu.

⁴Wakutu unanga 'o gasa doba-doba mo-moini gena-ge sisupu, unanga 'o tagi sisiḏa toma doba ma biono re doba-doba 'i mete'e unanga, sababu enanga ya nana'o unanga 'ai iḏingi.

⁵Mada'a enanga 'i mete'e yoḏu'u ngowa'a lelegu, enanga 'i wiḏi toma ngowa'a gena-ge, sababu 'i nana'o ua ngowa'a lelegu 'ai iḏingi.”

⁶Yesus 'a sijarita 'ade-'ade gena-ge ra ananga, mada'a ananga ya sahe ua, 'oru ga'a Unanga 'ai maksudu.

⁷Sababu gena-ge, Yesus 'o kanau soi moi moju, “Ni ngaku mode-mode'e 'Ari demo-demo nena-ne: Ngoi nena-ne karunga ma ngalana di'a doba-doba.

⁸Ngowa'a mo-moini raḏi sapolo siḏa ra Ngoi, ananga gena-ge ngowa'a to-tori'i re ngowa'a ra-rabasa, mada'a doba-doba ya 'isene ua ananga manga iḏingi.

⁹Ngoi nena-ne karunga ma ngalana. 'A guna ḇato 'o osama sababu 'o ngaku Ngoi, unanga ḏuanga i'a 'o sanga salamata. Unanga gena-ge ma tero sa'olo doba ga'a supu re osama re 'i sanga ngo-ngoromo.

¹⁰To-tori'i 'aḏi sapolo pa'i 'aḏi tori'i, 'aḏi sisengene re 'aḏi singiranga ḇato. Mada'a Ngoi nena-ne to sapolo, la manusia nyengara 'aḏi sanga 'ahu ga'a 'i romanga reo Ma Jou'ongu Madutu 'ai barakati.

¹¹Ngoi nena-ne Sowohi ma La-La. Sowohi ma La-La sidoa'a 'ai 'ahu di'a sisalamata doba-doba.

¹²Ngowa'a ga'a pa'i sanga sewa sijaga 'o doba, ananga dadi sowohi ua re doba-doba ma dutu ua. Dadi na'o serigala 'i sapolo, ananga 'aḏi wiḏi sisoi'i tala doba-doba. Re serigala ya cako'o singadolo doba-doba gena-ge matai are.

¹³Ngowa'a sewa gena-ge 'o wiḏi sababu unanga 'o munara pa'i disa pipisi, unanga 'a kalesanga ua doba-doba gena-ge.

¹⁴Ngoi nena-ne Sowohi ma La-La. Ngoi to nana'o 'Ari doba-doba re enanga ri nana'o Ngoi,

¹⁵ma tero sa'olo 'Ari Ḇaḇa 'o nana'o Ngoi re Ngoi to nana'o 'Ari Ḇaḇa. Re Ngoi ta sidoa'a 'Ari 'ahu di'a sisalamata 'Ari doba-doba.

¹⁶'Age doba-doba ma lelegu ḏi'i ga'a enanga 'i osama toma karunga gena-ge nyangu. Enanga ḏi'i balasu Ta gasa ino, re enanga ya 'isene Ngoi 'ari iḏingi. Dadi enanga mo-moini 'i dadi toropo moi, re pa'i Ngoi matengo ḇato To dadi sowohi di'a mo-moini.

¹⁷'Ari Ḇaḇa ro dadalara Ngoi, sababu Ngoi to sidoa'a 'Ari 'ahu, la Ngoi dadunu to sanga 'Ari 'ahu moju.

¹⁸Matengo i'a mai ua nga'unu ya 'oro 'Ari 'ahu. Ngoi ta sidoa'a 'Ari 'ahu 'i mete'e 'Ari mau masiretene. Ngoi rari kuasa di'a ta sidoa'a 'Ari 'ahu, re Rari kuasa dadunu To 'ahu moju. Parenta gena-ge 'Ari Ḇaḇa ro sipula'a ra Ngoi.”

¹⁹Sababu Yesus 'o kanau so'o gena-ge, ngowa-ngowa'a Yahudi dadunu 'aḏi ma'u tolabe moju matengo re matengo.

²⁰Ngowa'a repe 'aḏi kanau, “Unanga roh ma jira 'U dungosama! Unanga 'o pona! 'Oru ngini 'isene Unanga?”

²¹Mada'a 'age ḏi'i ngowa'a lelegu ga'a 'aḏi kanau, “Ngowa'a matengo ga'a 'o roh ma jira 'U dungosama 'o kanau so'o gena ua. Nyengara 'o roh ma jira 'i si-la ngowa'a hafu, dadi nyengara 'o oḏi'i?!”

²²Toma limau Yerusalem ngowa'a 'aḏi 'a'a laya di'a wangere lamo'o wakutu ananga 'aḏi 'elingi tabisi Ma Jou'ongu Madutu 'ai Wala. 'Orasa gena-ge 'orasa 'alo-'alo.

²³Yesus 'o tagi toma gandaria silomanga Salomo 'ai gandaria, ra Ma Jou'ongu Madutu 'ai Wala ma soana.

²⁴Wakutu ngowa'a Yahudi 'aḏi sapolo malomu ananga 'aḏi sigoloḏi Unanga re 'aḏi kanau, “Singadolo ngau ngana no sieanga i'a ngomi minga 'akala re sinyingara 'i ogoro ua? Nange-ne no sitarangi ra ngomi: Ngana nena-ne, mode-mode'e 'O Kristus, bolo ua?”

²⁵Yesus 'a sangoro, “Ngoi reto kanau ḏua ra ngini mada'a ngini ni ngaku ua. 'Ari ga'a hera-heranga Ngoi reta si'a'a rari Ḇaḇa 'ai kuasa, gena-ge 'i sibukiti mangale Ngoi nena-ne 'a guna.

²⁶Mada'a ngini ngaku ua, sababu ngini ni osama Tari doba ma nyo-nyoimi ua.

²⁷'Ari doba-doba ya 'isene 'Ari iḏingi. Ngoi ta nana'o enanga re enanga 'i mete'e Ngoi.

²⁸Ngoi to pula'a 'ahu kasingado-ngadolo i'a ra ananga, re kasingado-ngadolo i'a ananga kama binasa ua. Ananga Tari giama ma sata re matengo i'a mai ua nga'unu 'u ra-rabasa.

²⁹'Ari Ḇaḇa ro pula'a ananga ra Ngoi, re 'Ai kuasa ma pari cua. Matengo i'a mai ua nga'unu 'o ra-rabasa ananga Tari Ḇaḇa 'ai giama ma sata.

³⁰Ngoi re 'Ari Ḇaḇa, ngomi gena-ge rimoi.”

³¹Ḏua ngowa'a Yahudi dadunu 'aḏi 'oro maḏi-maḏi moju di'a 'aḏi poini 'a Yesus.

³²Mada'a Yesus 'o kanau ra ananga, “Ngini rini oḏi'i Ngoi 'ari ga'a hera-heranga ma repe, ga'a 'Ari Ḇaḇa 'o soma'a Ngoi ta si'a'a. Dadi ngini mau ni poini Ngoi reo maḏi di'a 'Ari ga'a hera-heranga 'oru?”

³³Ngowa'a Yahudi 'aḏi sangoro, “Ngomi mau mi poini ua Ngana reo maḏi sababu 'Ani ga'a hera-heranga, mada'a sababu Ngana no si'u'u ua Ma Jou'ongu Madutu. Kalaha Ngana nena-ne pa'i manusia ḇato, No kanau Ngana Ma Jou'ongu Madutu.”

³⁴Ḏua Yesus 'o sangoro ra ananga, “Na waro ua ra Musa 'ai hukumu 'i silefo mangale ngowa'a Yahudi manga bi-biri'i so'o ne: ‘Ma Jou'ongu Madutu ro kanau ngini nena-ne ma tero sa'olo jou'ongu-jou'ongu’?!

³⁵Ngene wa waro mangale 'oru ga'a ri silefo toma Boku 'Ofi-'Ofi 'i siḏagi kasingado-ngadolo i'a. Dadi 'ua re 'au wali Ma Jou'ongu Madutu 'o si'aro'o ngowa'a Yahudi manga bi-biri'i gena-ge ‘jou'ongu’, ananga pa'i raḏi dawongo ḇato Unanga 'ai demo.

³⁶Momongolo ua, Ngoi nena-ne, Ma Jou'ongu Madutu masiretene 'o siwola i'a Ngoi re Unanga 'o 'utusu Ngoi di'a to sapolo toma dungia nena-ne. Dadi, i'a sa'olo ngini kanau Ngoi to si'u'u ua Ma Jou'ongu Madutu, sababu Ngoi to kanau, ‘Ngoi Ma Jou'ongu Madutu 'ai Ngowa'a Nau'u’?!

³⁷Na'o Ngoi to siḏagi ua munara ga'a tari Ḇaḇa, ni ngaku Ngoi awa.

³⁸Kalaha ngini ni ngaku ua 'Ari demo mangale Ngoi 'a guna, ni ngaku Ngoi sababu Ngoi to 'a'a ga'a hera-heranga ga'a Tari Ḇaḇa ino. Na'o so'o gena ngini na waro re na sahe mangale 'Ari Ḇaḇa 'o marimoi ra Ngoi re Ngoi to marimoi Tari Ḇaḇa.”

³⁹Wakutu ananga 'aḏi isene gena-ge, ananga dadunu 'aḏi makutale moju cako'o 'a Yesus, mada'a 'aḏi nga'unu ua.

⁴⁰Yesus 'o ḏibo da'a Ḇanyo Yordan kaci moi. Toma ngi'i ga'a ma mulaingi 'a Yohanes ro baptis ngowa'a. Toma ngi'i gena-ge Unanga 'o tegoro,

⁴¹re ngowa'a manga repe 'aḏi sapolo ra Unanga re 'aḏi kanau, “Kalaha Yohanes kai ga'a hera-heranga ua, mada'a mo-moini ga'a unanga 'o kanau mangale Yesus nena-ne 'i banari.”

⁴²Dadi ngowa'a manga repe toma ngi'i gena-ge ananga 'aḏi ngaku Yesus.