Read Sahu Yohanes 11 Bible Online

Yohanes 11 - Sahu bible

Yohanes 11

¹'Age rema ngowa'a matengo 'ai lomanga Lazarus ga'a 'o tegoro toma gamu Betania ma wala ḏu moi re 'ai biḏanga nga muḏiḏi, ngo Maria re ngo Marta.

²(Ngo Maria gena-ge matengo ga'a mo siba-ba'ala 'ami bo-bounu ra Ma Jou 'ai rou re masipii'i rami utu.) Toma 'orasa gena-ge Lazarus 'o eta'a toma si-siḏi.

³Dadi ngo Maria re ngo Marta, ananga 'aḏi soma'a ngowa'a matengo 'o tagi re 'o sihabari ra Yesus, “Ma Jou, 'Ani ḏagilomu ga'a no dadalara, unanga 'o siḏi.”

⁴Wakutu Yesus 'a 'isene habari gena-ge, Unanga 'o kanau, “Si-siḏi gena-ge 'i sigasa toma sengene ua. Gena-ge ri dadi, la ngowa'a 'aḏi oḏi'i Ma Jou'ongu Madutu 'ai kuasa re 'aḏi silamo'o masala ḏi'i Unanga gena-ge 'Ai Ngowa'a Nau'u.”

⁵Yesus 'O dadalara ngo Marta re ngo Maria re manga iḏanga 'a Lazarus.

⁶Sababu gena-ge, wakutu Unanga 'a 'isene habari mangale 'a Lazarus 'o siḏi, Unanga 'o matahana Tai ngi'i wange ḏiḏi moju.

⁷Wange ḏiḏi pasala i'a, Yesus 'o kanau Tai me-mete'e, “Ino ngene wo maḏibo toma daeraha Yudea.”

⁸Ananga ya sangoro, “Mada'a Rabi[12], 'au ngau i'a ngowa-ngowa'a Yahudi da'a mau 'aḏi poini Jou reo maḏi singadolo no sengene, simara nange-ne Jou no mau maḏibo i'a da'a moju?!”

⁹Ḏua Yesus 'o sangoro ra ananga reo 'ade-'ade so'o ne: “Wange moi ma dara 'age jam nyagi moi re romoḏiḏi wakutu 'i tarangi. Ngowa'a ga'a 'aḏi tagi wakutu wa-wangere kama pele'e ua, sababu 'aḏi oḏi'i wangere ma la'o ma tarangi.

¹⁰Mada'a ngowa'a ga'a 'aḏi tagi wakutu lobi'i, ananga 'aḏi pele'e sababu tarangi 'i cua.”

¹¹Togumu i'a Yesus 'o kanau so'o gena-ge, Unanga dadunu 'o kanau moju, “Ngene nanga ḏagilomu 'a Lazarus, unanga 'o otu. Mada'a maha Ngoi to tagi i'a Tu simomi'i.”

¹²Yesus 'ai me-mete'e ananga 'aḏi kanau, “Ma Jou na'o Lazarus 'o otu, unanga ḏuanga i'a 'o la.”

¹³Yesus 'ai maksudu 'a Lazarus ro sengene. Mada'a ananga 'aḏi ta'ajiri Unanga 'ai maksudu mangale Lazarus 'o otu biasa.

¹⁴Sababu gena-ge, Yesus 'a sitarangi 'ai maksudu ra ananga, re 'o kanau, “Lazarus ro sengene.

¹⁵Ngoi to sanangi sababu ngoi to cua da'a ra Lazarus. Sababu 'oru ga'a 'i dadi donga rimoi di'a ngini ni ngaku Ngoi. Ino ngene wo tagi wo si'a da'a ra Lazarus.”

¹⁶Ḏua 'a Tomas, ga'a ngowa'a 'o si'aro'o unanga 'ngowa'a sasalanga, 'o kanau Tai ḏagilomu-ḏagilomu Yesus 'ai me-mete'e, “Ino, ngene wo mete'e Yesus dadi ngene wo sengene mamete'e ra Unanga.”

¹⁷Wakutu Yesus 'o ngadolo toma ngi'i gena-ge, 'a Lazarus utu rata ḏua toma kubu ma dara.

¹⁸Gamu Betania co-cori limau Yerusalem, ḏa ma giḏanga kilo ro'ange.

¹⁹Ngowa'a Yahudi manga repe 'aḏi sapolo di'a 'aḏi sihiburu ngo Marta re ngo Maria, sababu Lazarus ananga manga iḏanga ro sengene.

²⁰Wakutu ngo Marta mo 'isene Yesus ro sapolo, munanga mo supu mo ma'u sanga Unanga. Mada'a ngo Maria munanga toma wala ma dara.

²¹Marta mo kanau ra Yesus, “Ma Jou, na'o Ma Jou 'ane ḏua toma wangere gena-ge, tantu ḏua 'ari iḏanga 'o sengene ua.

²²Mada'a kalaha so'o gena, ngoi ta waro mangale wangere nange-ne, na'o Ma Jou no golo'o 'oru ḇato ra Ma Jou'ongu Madutu, Unanga No pula'a.”

²³Yesus 'o kanau i'a ra munanga, “ 'Ani iḏanga dadunu 'o 'ahu moju.”

²⁴Marta ma sangoro, “Ngoi ta waro unanga ḏuanga i'a dadunu 'o 'ahu moju toma Kiamata ma Wangere, wakutu ngowa'a senge-sengene dadunu 'aḏi 'ahu moju.”

²⁵Yesus 'o kanau i'a ra munanga, “Ngoi nena-ne dadunu to si'ahu ngowa-ngowa'a sengene, re To pula'a 'ahu ḏi'i. Kalaha ngowa-ngowa'a raḏi sengene, ananga gena-ge ga'a 'aḏi ngaku Ngoi, dadunu 'aḏi 'ahu moju.

²⁶Re 'a guna ḇato 'o 'ahu-'ahu ga'a 'o ngaku Ngoi, unanga kama sengene ua nena-ne re si'a. Ngana no ngaku bolo ua, 'oru ga'a Ta kanau?”

²⁷Marta ma sangoro, “Ya Ma Jou, ngoi to ngaku Ma Jou 'O Kristus, Ma Jou'ongu Madutu 'ai Ngowa'a Nau'u, ga'a Unanga ro sijaji di'a 'O 'utusu toma dungia nena-ne.”

²⁸Wakutu Marta mo kanau ra Yesus togumu i'a, munanga mo ḏibo, mo 'aro'o ngo Maria re mo jujuḏu ra ngo Maria, “Guru ro sapolo, Unanga 'o sano ngana.”

²⁹Wakutu Maria mo 'isene gena-ge, munanga jau-jau mo te'oso, re mo supu mau ma'u sanga ra Yesus.

³⁰Toma 'orasa gena-ge, Yesus 'o osama nyangu toma gamu Betania, Unanga toma gamu ma dudunu moju toma ngi'i ga'a ngo Marta mo ma'u sanga re mo jarita ra Unanga.

³¹Wakutu ngowa-ngowa'a Yahudi ga'a sihiburu ngo Maria toma wala ma dara, 'aḏi oḏi'i ngo Maria mo supu ca-capati, ananga 'aḏi tagi tu-tuu'u ra munanga 'ami dudunu, sababu ananga 'aḏi ta'ajiri, ngo Maria mo tagi toma kubu di'a mo rerese ma gaḏi.

³²Wakutu ngo Maria mo ma'u sanga ra Yesus, munanga mo maḏipolono ra Yesus 'ai biono re mo kanau, “Ma Jou, na'o Ma Jou 'ane ḏua, tantu ḏua 'ari iḏanga, 'a Lazarus, 'o sengene ua.”

³³Yesus 'ai 'akala re sinyingara 'i kangela wakutu Unanga 'o oḏi'i ngo Maria mo rerese ma gaḏi. Mada'a Unanga 'ai ruta 'i momoto sababu ngowa-ngowa'a Yahudi ga'a 'aḏi siduu'u ngo Maria, ananga mai 'aḏi rerese ma gaḏi ḏi'i.

³⁴Ḏua Yesus 'o sano ra ananga, “Ngini ni sigare 'ai mayeti le'a?” Ananga ya sangoro, “Ma Jou, ino re No oḏi'i.”

³⁵Yesus 'ai 'ongoro turono.

³⁶Ḏua ngowa-ngowa'a Yahudi 'aḏi kanau, “Oḏi'i Unanga 'o dadalara madutu 'a Lazarus!”

³⁷Mada'a mamuni'a tamanga sigolona 'age 'aḏi kanau, “Ngowa'a hafu matengo, Unanga 'o si-la. I'a sa'olo Unanga 'o si-la 'a Lazarus ua, la 'o sengene awa?”

³⁸Sababu gena-ge, Yesus 'ai ruta 'i momoto moju, Unanga re ananga mo-moini 'aḏi tagi toma kubu ma aḏu'u ga'a ananga 'o sigare 'a Lazarus 'ai mayeti. Kubu ma aḏu'u gena-ge sidamunu reo maḏi lamo'o.

³⁹Yesus 'o kanau ra ananga, “Na silage maḏi gena-ge.” Mada'a 'a Lazarus 'ai biḏanga ngo Marta mo kanau, “Ma Jou, wangere rata ḏua, unanga toma kubu ma dara, dadi ro bounu.”

⁴⁰Yesus 'o kanau ra ngo Marta, “Ngoi reto kanau ra ngana, na'o no ngaku, ngana ḏuanga i'a no oḏi'i kuasa lamo'o ra Ma Jou'ongu Madutu tala.”

⁴¹Dadi ananga ya silage ma maḏi kubu ma da-damunu. Gena ḏua, Yesus 'o talaḏi ie diwanga re 'O kanau: “Murasa ma la Baba, sababu Baba rena dawongo ḏua 'Ari go-golo'o.

⁴²Ngoi to waro Baba na 'isene tau-taunu 'Ari go-golo'o, mada'a Ngoi to kanau so'o gena-ge nange-ne di'a ngowa-ngowa'a ga'a ananga ya oḏi'i, la 'aḏi ngaku Baba reno 'utusu Ngoi.”

⁴³Wakutu Yesus 'o kanau so'o gena-ge togumu i'a, Unanga dadunu 'o kanau ḏi'i 'a siduga-duga: “Lazarus, no supu ino!”

⁴⁴Lazarus ga'a ro sengene, unanga 'o supu, 'ai giama re 'ai rou 'i piri'u reo ḇa'a, re 'ai biono mai rema sa-sao. Yesus 'o kanau ra ananga, “Ni woi'i 'ai rou re 'ai giama ma bi-biri'u re 'ai biono ma sa-sao, la unanga 'o tagi re oḏi'i bebasa.”

⁴⁵Sababu gena-ge, ngowa'a Yahudi manga repe ga'a 'aḏi tutumu ngo Maria ananga gena-ge 'aḏi ngaku Yesus, wakutu ananga ya oḏi'i Unanga gena-ge dadunu 'o si'ahu moju 'a Lazarus.

⁴⁶Mada'a 'age mamuni'a tamanga sigolona 'aḏi tagi siajele toma ngowa'a Farisi re ya siajele 'oru ga'a Yesus ro 'a'a ḏua.

⁴⁷Sababu gena-ge ngowa-ngowa'a Farisi, 'imam-'imam ma sae'e re 'agama ma bi-biri'i lelegu ga'a osama nyo-nyoimi toma Mahkamah 'Agama, ananga 'aḏi malomu re 'aḏi ma'u sano, “Ngene balasu wo 'a'a sa'olo toma Unanga gena-ge? Unanga ro 'a'a ga'a hera-heranga ma repe.

⁴⁸Na'o ngene wo sieanga unanga gena-ge, marai ngowa'a mo-moini 'aḏi ngaku Unanga! Ma ḏo-ḏogumu tala, Roma manga sordado ḏuanga i'a 'aḏi sapolo ya sijira ngene bangsa Yahudi re Ma Jou'ongu Madutu ga'a ngene wo silamo'o re siḏubuso, Unanga 'ai Wala.”

⁴⁹Tamanga sigolona 'age rema ngowa'a matengo 'ai lomanga Kayafas 'o dadi 'imam 'agung toma musungu gena-ge, unanga gena-ge 'o kanau, “Ngini ni waro 'oru ua!

⁵⁰Ngini ni ma'insafu ua mangale di'a ngowa'a repe manga la, lebe bae wo sisengene Unanga matengo, awa-awa ngene nanga bangsa 'i dadi cira.”

⁵¹Kayafas 'o kanau so'o gena-ge mete'e unanga 'ai 'akala ma mau ua, mada'a mete'e Ma Jou'ongu Madutu 'ai 'akala ma mau. Unanga 'o dadi 'imam 'agung toma musungu gena-ge, re 'o nubuata mangale ḏuanga i'a Yesus 'o sengene di'a ngowa'a Yahudi.

⁵²Re pa'i ngowa'a Yahudi ḇato ua, mada'a di'a silomu re sirimoi Ma Jou'ongu Madutu 'ai ngowa-ngowa'a ga'a ma'u are.

⁵³Mulaingi toma wangere gena-ge ngowa'a Yahudi manga bi-biri'i 'aḏi mafakati di'a sisengene Unanga.

⁵⁴Sababu gena-ge, Yesus 'o talaḏi ua toma mandan ngowa-ngowa'a Yahudi. Unanga 'o sisoi'i tala daeraha Yudea, kara 'o tagi toma limau Efraim co-cori daeraha baulaco. Toma ngi'i gena-ge, Yesus re 'Ai me-mete'e 'aḏi tegoro.

⁵⁵Toma 'orasa gena-ge ngowa'a Yahudi manga wangere Paskah ri co-cori. Dadi ngowa-ngowa'a repe toma gamu-gamu 'aḏi tagi toma limau Yerusalem di'a 'aḏi mete'e manga 'atoranga ya si'ofi manga diri, wakutu Paskah ma Wangere 'i ngadolo nyangu.

⁵⁶Ananga gena-ge 'aḏi disa Yesus tau-taunu. Re wakutu 'aḏi malomu ra Ma Jou'ongu Madutu 'ai Wala ma soana, ananga 'aḏi ma'u kanau matengo re matengo, “Ninga 'akala ma sanga sa'olo? Toma Paskah ma Wangere ma laya, Unanga ḏa 'O sapolo ua?!”

⁵⁷Ananga 'aḏi kanau so'o gena, sababu 'imam-'imam ma sae'e re ngowa'a Farisi ananga 'aḏi sisupu manga parenta mangale ngowa-ngowa'a ga'a ya waro Yesus 'ai ngi'i, balasu ya siajele, la ananga 'U cako'o.