Read Sahu Yohanes 12 Bible Online

Yohanes 12 - Sahu bible

Yohanes 12

¹Wangere rarama moju, kara Paskah ma Wangere 'i ngadolo, Yesus 'o tagi toma gamu Betania, Lazarus 'ai gamu. Lazarus ga'a Yesus dadunu 'u si'ahu moju.

²Ananga 'aḏi 'a'a laya di'a silamo'o Yesus. Re 'a Lazarus rai ioronongoḏu 'aḏi majoreke oromo mamete'e ra Unanga. Re ngo Marta mo de-de'oso ananga.

³Ḏua ngo Maria mo gasa 'ami bo-bounu narwastu ḏa litere ma jule ma ijana lai hali madutu, munanga masiba-ba'ala ra Yesus 'ai rou, re masi'ese 'Ai rou remi utu, singadolo wala ma dara mo-moini gena-ge 'i romanga reo bounu.

⁴Mada'a ngowa'a matengo ra Yesus 'ai me-mete'e ga'a ḏuanga i'a 'o sipula'a Yesus Tai lawana, Yudas Iskariot 'o kanau,

⁵“I'a sa'olo bo-bounu ma ijana ma hali enanga, na wu'unu ḇato, re ma pipisi ni sipula'a toma ngowa'a ma dinga'unu ua? Bo-bounu ma ijana gena-ge pipisi salaka latu ro'ange.”

⁶Yudas 'o kanau so'o gena sababu unanga ngowa'a to-tori'i re soi rai o'o i'a unanga 'o tori'i pipisi toma kas, ga'a unanga 'a gu'u. Unanga 'o sioḏi'i ua ngowa'a ma dinga'unu ua!

⁷Mada'a Yesus 'o sangoro, “Sieanga i'a ḇato we-were'a gena-ge! Munanga mo 'a'a so'o gena-ge di'a 'Ari palihara ma wangere.

⁸Ngowa'a ma dinga'unu ua 'age ra ngini tau-taunu, mada'a Ngoi to ti'ara ua ra ngini.”

⁹Ngowa'a Yahudi manga repe 'aḏi 'isene habari mangale Yesus da'a toma gamu Betania. Dadi ananga matai sapolo pa'i manga maksudu mau oḏi'i Yesus ḇato ua, mada'a 'aḏi mau oḏi'i 'a Lazarus ḏi'i ga'a Yesus dadunu 'u si'ahu moju tai sengene.

¹⁰Dadi, 'imam-'imam ma sae'e 'aḏi mafakati di'a sisengene ḏi'i 'a Lazarus,

¹¹sababu unanga gena-ge, ngowa'a Yahudi manga repe 'aḏi ngaku Yesus.

¹²Ma ḇiḇini ino, ngowa'a repe ga'a raḏi sapolo toma limau Yerusalem di'a silamo'o Paskah ma Wangere, ananga 'aḏi 'isene habari Yesus toma ḏo-ḏagi ma dara mau sapolo toma Limau Yerusalem ḏi'i.

¹³Dadi ananga 'aḏi 'oro ate palem ma so'a re 'aḏi tagi supu limau gena-ge di'a ma'u sanga Unanga. Ananga gena-ge 'aḏi poa'a tau-taunu: “Puji re silamo'o Ma Jou'ongu Madutu! Sibarakati Unanga ga'a sapolo rea Ma Jou'ongu Madutu 'ai lomanga. Sibarakati Israel manga 'Olana!”

¹⁴Yesus 'o bau keledai ma ngowa re 'a palene. Gena-ge ma tero sa'olo ri silefo toma Boku 'Ofi-'Ofi ma dara so'o ne:

¹⁵“Mojongo awa, ngowa-ngowa'a toma limau Yerusalem; Oḏi'i ninga 'Olana 'o sapolo, Unanga 'o mabalene toma keledai ra-ramasa ie!”

¹⁶Toma 'orasa gena-ge, Yesus 'ai me-mete'e ya sahe mo-moini nyangu. Mada'a wakutu Yesus ro sengene re simulia togumu i'a, ananga gena-ge 'aḏi si'elingi ie 'oru ga'a ri dadi ḏua ra Unanga toma wangere gena-ge, ma tero sa'olo 'oru ga'a ri silefo toma Boku 'Ofi-'Ofi ma dara.

¹⁷Ngowa-ngowa'a repe ga'a ya sisakisi tala mangale Yesus 'o dadunu si'ahu moju 'a Lazarus toma kubu ma dara ie, ananga ya sijarita kama togumu ua.

¹⁸Sababu gena-ge, ngowa'a manga repe matai tagi ma'u sanga ra Yesus, sababu ananga ya 'isene Yesus 'a 'a'a ga'a hera-heranga gena-ge.

¹⁹Dadi Ngowa-ngowa'a Farisi 'aḏi ma'u kanau matengo re matengo, “Ngene wo dola'aku Unanga yoḏu'u. Oḏi'i ḇato, ngowa'a toma dungia sitabi donga matai mete'e Unanga!”

²⁰Ngowa'a repe ga'a 'aḏi tagi toma limau Yerusalem di'a Paskah ma Wangere ma laya, 'age ḏi'i rema ngowa'a Yunani nga muḏuo i'a tamanga sigolona.

²¹Ananga 'aḏi ma'u sanga ra Filipus re 'aḏi golo'o, “Tuanga, na'o nyengara gari'a ngomi ma'u sanga ra Yesus.” (Filipus 'ai 'asala toma gamu Betsaida, daeraha Galilea ino.)

²²Filipus 'o tagi re 'o siajele manga go-golo'o ra Andreas, kara ananga nga muḏiḏi ya siajele ra Yesus.

²³Yesus 'o kanau i'a ra ananga, “Ma 'orasa 'i ngadolo ḏua di'a ngowa'a 'aḏi silamo'o Ngoi, Manusia ma Ngowa'a Nau'u.

²⁴Ni ngaku mode-mode'e 'Ari demo-demo nena-ne: 'Ari lese ma tero sa'olo gandum ma moi'i ngai moi. Na'o gandum ma moi'i ngai moi ngowa'a ya so'ana ua re jujumu ua reo tana'a, enanga gena-ge nena-ne re si'a ngai moi ḇato. Mada'a na'o wa so'ana, enanga togumu i'a ma hasili 'i lai repe.

²⁵Toma dungia nena-ne, 'a guna ḇato 'o dadalara pa'i 'ai 'ahu toma dungia nena-ne ḇato, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o lebe dadalara Ngoi reo 'ai 'ahu toma dungia nena-ne, unanga gena-ge ḏuanga i'a 'o sanga 'ahu kasingado-ngadolo i'a.

²⁶'A guna ḇato mau dadi 'Ari falalomu, ngowa'a gena-ge balasu 'o mete'e Ngoi, la 'Ari falalomu gena-ge 'o mamete'e ra Ngoi toma ngi'i le'a ḇato Ngoi to tagi. Re 'Ari Ḇaḇa 'o silamo'o falalomu gena-ge.”

²⁷“Nange-ne 'Ari 'akala re sinyingara 'i kangela singadolo ta waro ua 'oru ga'a to kanau Tari Ḇaḇa? Na'o mete'e 'Ari 'akala re sinyingara, Ngoi to kanau so'o ne: ‘Baba silalo'o sangisara ra Ngoi ga'a ḏuanga i'a 'i ngadolo!’ Mada'a ma sababu gena-ge Ngoi reto sapolo toma dungia nena-ne!

²⁸Dadi Ngoi to kanau so'o ne: ‘Baba, no simulia 'Ani lomanga!’ ” Ḏua iḏingi da'u diwanga tala ma betongo so'o ne: “Ngoi reta simulia re dadunu Ta simulia moju.”

²⁹Iḏingi gena-ge ngowa'a repe ya 'isene, ananga 'aḏi kanau, “Gena-ge 'o murasa.” Mada'a ma lelegu 'aḏi kanau, “Mala'ekata ro kanau ra Unanga!”

³⁰Yesus 'o kanau ra ananga, “Iḏingi gena-ge di'a Ngoi ua, mada'a di'a ngini.

³¹Nange-ne ma 'orasa 'i ngadolo ḏua di'a sijuruhakimi ngowa'a mo-moini toma dungia nena-ne. Nange-ne Ngoi to dusu'u 'Iblisi ga'a kuasa toma dungia.

³²Mada'a di'a Ngoi masiretene, maha wakutu sikau'u Ngoi toma dungia nena-ne, kara Ngoi to lomu ngowa'a mo-moini ra Ngoi.”

³³Yesus 'o kanau so'o gena-ge, la ngowa'a 'aḏi waro 'Ai se-sengene ma ngo'omo.

³⁴Ngowa'a repe 'aḏi kanau i'a ra Unanga, “Mete'e Musa 'ai hukumu: 'O Kristus 'o 'ahu kasingado-ngadolo i'a. I'a sa'olo Ngana no kanau, ‘Manusia ma Ngowa'a Nau'u balasu sikau'u toma dungia nena-ne’? 'A guna nena-ne ‘Manusia ma Ngowa'a Nau'u’?”

³⁵Yesus 'a sangoro, “Tarangi gena-ge 'i tegoro ra ngini ti'ara ua. Dadi ngini balasu ni mete'e tarangi gena-ge, sababu awa-awa ngini ni osama toma hafu-hafu. Ngowa'a ga'a tagi toma hafu-hafu 'aḏi waro ngo'omo ua.

³⁶Na'o tarangi gena-ge rema enanga moju ra ngini, ngini balasu ni ngaku tarangi gena-ge, la ni dadi ngowa-ngowa'a ga'a 'ahu toma tarangi gena-ge ma dara.” Wakutu Yesus 'o kanau ra ananga togumu i'a, Unanga masiretene 'o masijumu riwara toma mandan.

³⁷Kalaha Yesus 'o 'a'a ga'a hera-heranga lai repe tamanga sigolona, ananga 'U ngaku ua moju.

³⁸Dadi 'ua re 'au wali Nabi Yesaya 'ai demo toma Boku 'Ofi-'Ofi 'i sitotomo: “Ma Jou'ongu Madutu, ngomi minga habari 'a guna 'a ngaku?! Kalaha Ma Jou'ongu Madutu 'o sijumu 'Ai kuasa toma ngowa'a repe, ananga 'aḏi dawongo ua moju minga habari!”

³⁹Ma sababu gena-ge, ananga nga'unu 'aḏi ngaku Unanga ua, sababu 'ua re 'au wali Yesaya masiretene ḏi'i ro lefo mangale Ma Jou'ongu Madutu so'o ne:

⁴⁰“Ngoi ta'u sihafu manga la'o re Ta'u site'e manga 'akala, la ananga manga la'o 'i oḏi'i ua re manga 'akala re sinyingara ya sahe ua, dadi awa ananga 'aḏi ḏibo ra Ngoi, la 'aḏi dawongo 'Ari salamata.”

⁴¹Yesaya 'o kanau so'o gena-ge sababu unanga ro oḏi'i Yesus 'ai kuasa, dadi 'o kanau mangale Unanga.

⁴²Kalaha Yesaya 'o kanau so'o gena-ge Yahudi manga bi-biri'i tamanga sigolona manga repe 'aḏi ngaku Yesus. Mada'a ananga gena-ge 'aḏi siajele ua manga ngo-ngaku toma mandan, sababu 'aḏi mojongo ngowa'a Farisi ya'u simaha ua ananga gena-ge di'a 'aḏi osama toma wala puji.

⁴³Sababu ananga lebe nyanyaḏi manusia ya'u puji re silamo'o reo Ma Jou'ongu Madutu 'o puji re silamo'o ananga gena-ge.

⁴⁴Dadi Yesus 'o kanau siduga-duga, “Ngowa'a ga'a ngaku Ngoi, ananga 'aḏi ngaku pa'i Ngoi ḇato ua, mada'a 'aḏi ngaku Unanga ḏi'i ga'a Ro 'utusu Ngoi.

⁴⁵Re ngowa'a ga'a 'aḏi oḏi'i Ngoi, ananga 'aḏi oḏi'i Unanga ḏi'i ga'a Ro 'utusu Ngoi.

⁴⁶Ngoi to sapolo toma dungia nena-ne to gasa tarangi, la ngowa'a ga'a 'aḏi ngaku Ngoi, ananga gena-ge 'aḏi 'ahu toma hafu-hafu ma dara riwara.

⁴⁷Ngowa'a ga'a 'aḏi 'isene 'Ari do-doto'o mada'a ya siḏagi ua tamanga 'ahu ma dara, Ngoi masiretene ua ta'u sihukumu. Sababu Ngoi to sapolo di'a to sihukumu ua manusia toma dungia nena-ne, mada'a di'a sisalamata ananga.

⁴⁸'A guna ḇato 'o dawongo ua re 'o mete'e ua 'Ari demo-demo, di'a unanga gena-ge 'age rema juruhakimi ḏua! 'Ari demo-demo gena-ge ga'a ta sikanau, enanga gena-ge 'i singe-ngeta'a hukumu ra unanga toma Kiamata ma Wangere.

⁴⁹Sababu Ngoi to kanau mete'e 'Ari mau masiretene ua, mada'a 'Ari Ḇaḇa ga'a Ro 'utusu Ngoi, Unanga gena-ge ro soma'a 'oru ga'a balasu ta singadolo re ta sikanau ra ngini.

⁵⁰Re Ngoi to waro 'Ari Ḇaḇa 'ai parenta gena-ge 'i sigasa toma 'ahu kasingado-ngadolo i'a. Dadi Ngoi to sikanau pa'i 'oru ḇato ga'a 'Ari Ḇaḇa ro doto'o Ngoi.”