Read Sahu Yohanes 13 Bible Online

Yohanes 13 - Sahu bible

Yohanes 13

¹Wakutu Paskah ma Wangere ma laya sa'i ri ngadolo, Yesus 'a waro mangale 'ai 'orasa 'i ngadolo di'a Unanga 'a sisoi'i tala dungia nena-ne re 'O maḏibo Tai Ḇaḇa. Unanga 'o dadalara 'Ai me-mete'e, re 'o dadalara ti-tiai ananga gena-ge singadolo 'Ai 'ahu ma ḏo-ḏogumu.

²Toma lobi'i gena-ge, Yesus re 'Ai me-mete'e ananga 'aḏi oromo mamete'e. 'Iblisi ri osama ra Yudas 'ai 'akala re sinyingara. Unanga gena-ge 'a Simon Iskariot 'ai ngowa'a nau'u. Dadi unanga mau 'o sipula'a Yesus Tai lawana.

³Yesus ro waro mangale 'ai Ḇaḇa ro pula'a kuasa mo-moini ra Unanga. Unanga 'a waro ḏi'i mangale Unanga ro sapolo ra Ma Jou'ongu Madutu tala, re ḏuanga i'a 'o maḏibo ie ḏi'i ra Ma Jou'ongu Madutu.

⁴Sababu gena-ge, Unanga 'o made'oso 'a woi'i 'ai juba re 'a piri'u 'ai golona reo handuk.

⁵Gena ḏua, Unanga 'o 'oro ḇanyo 'a sibala toma bokolo, kara mulaingi 'a soso'o 'Ai me-mete'e manga rou, re 'a sidudungu Rai handuk ga'a 'a piri'u Tai golona.

⁶Unanga 'o ngadolo ra Simon Petrus re Simon Petrus 'o kanau, “Ma Jou mau na soso'o ngoi nena-ne 'ari rou?!”

⁷Yesus 'a sangoro, “Nange-ne ngana na sahe nyangu 'oru ga'a Ngoi ta si'a'a, mada'a ḏuanga i'a ngana na sahe.”

⁸Petrus 'o kanau ra Yesus, “Ua Ma Jou, na soso'o awa ngoi nena-ne 'ari rou!” Mada'a Yesus 'a sangoro, “Na'o Ngoi ta soso'o 'ani rou ua, ngana no marimoi ua ra Ngoi.”

⁹Simon Petrus 'o kanau, “Ma Jou, na'o so'o gena, awa pa'i 'ari rou, mada'a 'ari giama re 'ari sae'e ḏi'i!”

¹⁰Yesus 'o kanau ra Petrus, “Ngowa'a matengo ga'a 'o ma'ori'i unanga ro 'ofi mo-moini, pa'i 'ai rou ḇato balasu sigofi moju, ma lelegu paralu sigofi riwara. Ngini rini 'ofi, mada'a mo-moini ua!” (

¹¹Yesus ra waro, 'a guna ḏuanga i'a 'o sipula'a Unanga Tai lawana. Sababu gena-ge, Unanga 'o kanau, “Ngini rini 'ofi, mada'a mo-moini ua.”)

¹²Wakutu Yesus 'o soso'o ananga manga rou togumu i'a, Unanga dadunu 'a pake 'ai juba, kara 'O majoreke re 'o kanau ra ananga, “Ngini na sahe bolo ua 'oru ga'a Ngoi reta si'a'a?!

¹³Ngini ni si'aro'o Ngoi ‘ninga Guru’, re ‘ninga Jou’, gena-ge 'i banari.

¹⁴Na'o Ngoi sa'olo ninga Jou, re ninga Guru, reto soso'o ninga rou, ngini ḏi'i balasu ni ma'u soso'o ninga rou matengo re matengo.

¹⁵Ngoi reta sijumu nana'o rimoi gena-ge ra ngini, la ngini ḏi'i ni si'a'a sa'olo Ngoi ta si'a'a ra ngini.

¹⁶Ni ngaku mode-mode'e 'Ari demo-demo nena-ne: Budaka matengo 'o lebe la-lamo'o i'a ua reo tuanga. Re so-soma'a matengo lebe la-lamo'o i'a ua reo matengo ga'a 'u 'utusu unanga.

¹⁷Dadi nange-ne ngini rena waro 'Ari do-doto'o gena-ge. Sababu gena-ge na'o ngini na si'a'a, ngini ni sanga barakati ra Ma Jou'ongu Madutu tala.

¹⁸Barakati gena-ge ga'a Ngoi reto siajele ra ngini, gena-ge di'a ngini mo-moini ua. Ngoi ta waro 'a guna rana ga'a Ngoi reto cumutu. Mada'a 'oru ga'a 'i silefo toma Boku 'Ofi-'Ofi balasu 'i dadi: ‘Matengo ga'a oromo mamete'e ra Ngoi, unanga gena-ge ḏuanga i'a 'o dadi 'Ari lawana.’

¹⁹Gena-ge 'i dadi nyangu, mada'a nange-ne Ngoi to siajele ra ngini, la wakutu 'i dadi, ngini ni ngaku mangale ‘Ngoi nena-ne Unanga ga'a 'o 'ahu kasingado-ngadolo i'a.’

²⁰Ni ngaku mode-mode'e 'Ari demo-demo nena-ne: 'A guna ḇato 'o dawongo ngowa'a matengo ga'a Ngoi to 'utusu, unanga gena-ge 'o dawongo Ngoi. Re 'a guna ga'a 'o dawongo Ngoi, 'o dawongo ḏi'i Unanga ga'a Ro 'utusu Ngoi.”

²¹Yesus 'o kanau so'o gena togumu i'a, 'Ai 'akala re sinyingara 'i kangela re 'o kanau, “Ni ngaku mode-mode'e 'Ari demo-demo nena-ne: 'age rema ngowa'a matengo taninga sigolona ga'a ḏuanga i'a 'o sipula'a Ngoi Tari lawana.”

²²Yesus 'ai me-mete'e matai heranga, re 'aḏi ma'u tatamo matengo re matengo, sababu ya waro ua 'a guna ga'a Yesus 'ai maksudu.

²³Yesus 'ai me-mete'e matengo ga'a Unanga 'o dadalara madutu, 'o majoreke ra Yesus 'ai gumuḏu'u.

²⁴Simon Petrus 'o pula'a kode ra unanga gena-ge re Simon 'o kanau ra unanga, “Sano ra Yesus, 'a guna ga'a Unanga 'ai maksudu?”

²⁵Ḏua unanga gena-ge 'o masebanga i'a ra Yesus, re 'o sano, “Ma Jou, 'a guna unanga gena-ge?”

²⁶Yesus 'a sangoro, “Ngowa'a matengo ga'a Ngoi to pula'a roti re ta sitono toma moku togumu i'a, gena-ge unanga. Ḏua Yesus 'o 'oro roti ma jule re 'A tono toma sawo'o, kara 'O pula'a ra Yudas, Simon Iskariot 'ai ngowa'a nau'u.”

²⁷Yudas 'a dawongo roti palisi i'a, 'Iblisi 'i dungosama tai 'akala re sinyingara ma dara. Ḏua Yesus 'o kanau ra unanga: “ 'Oru ga'a ngana mau na si'a'a, si'a'a capati i'a.”

²⁸Mada'a ananga ga'a 'aḏi majoreke oromo toma ngi'i gena-ge, matengo i'a mai ua ya sahe, i'a sa'olo Yesus ro kanau so'o gena ra Yudas.

²⁹Mamuni'a 'aḏi ta'ajiri Yesus 'o soma'a Yudas 'o tibo 'ori i'a ga'a 'i paralu di'a laya, bolo 'o pula'a pipisi toma ngowa'a ma dinga'unu ua, sababu 'a Yudas 'o dadi manga pipisi ma gu-gu'u.

³⁰Yudas 'a dawongo roti gena-ge togumu i'a, unanga ro supu, 'orasa gena-ge 'i lobi'i ḏua.

³¹Yudas 'o supu palisi i'a, Yesus 'o kanau, “Nange-ne ngowa'a 'aḏi silamo'o Manusia ma Ngowa'a Nau'u. Re ḏi'i ngowa'a 'aḏi silamo'o Ma Jou'ongu Madutu sababu 'oru ga'a 'i dadi ra Ngoi.

³²Na'o ngowa'a 'aḏi silamo'o Ma Jou'ongu Madutu sababu 'oru ga'a 'i dadi ra Ngoi, Ma Jou'ongu Madutu masiretene 'o sijumu toma manusia mangale 'Ai Ngowa'a Nau'u 'Ai kuasa ma pari cua. Re Unanga 'a si'a'a capati so'o gena-ge.

³³'Ari ngowa-ngowa'a ga'a tini dadalara, Ngoi to tegoro taninga sigolona 'i ti'ara riwara. Ngini ḏuanga i'a ni disa Ngoi, mada'a ma tero sa'olo Ngoi reto kanau toma ngowa'a Yahudi manga bi-biri'i, so'o gena ḏi'i nange-ne Ngoi to siajele ra ngini nena-ne: Ngi'i ga'a Ngoi to tagi, ngini ni sapolo yoḏu'u.

³⁴Ngoi to pula'a ra ngini parenta ma su-sungi: Ni ma'u dadalara matengo re matengo. Ngini balasu ni ma'u dadalara matengo re matengo, ma tero sa'olo Ngoi tini dadalara ngini ḏua.

³⁵Na'o ngini matengo re matengo ni ma'u dadalara, ngowa'a mo-moini ḏuanga i'a ya waro mangale ngini Ngoi 'ari me-mete'e.”

³⁶Simon Petrus 'o sano ra Yesus, “Ma Jou, mau no tagi le'a?” Yesus 'a sangoro, “Nange-ne, toma ngi'i Ngoi to tagi, ngana no mete'e Ngoi yoḏu'u. Mada'a ngana ḏuanga i'a no mete'e Ngoi.”

³⁷Petrus 'o sano, “Ma Jou i'a sa'olo nange-ne ngoi to mete'e yoḏu'u? Ngoi to ḏu-ḏuanga ḏua to sengene di'a Ma Jou.”

³⁸Yesus 'a sangoro, “Mode-mode'e ngana no ḏu-ḏuanga ḏua no sengene di'a Ngoi?! No ngaku mode-mode'e 'Ari demo-demo nena-ne: namo 'i solene nyangu, ngana no soloto Ngoi soi ro'ange ḏua!”