Read Sahu Yohanes 15 Bible Online

Yohanes 15 - Sahu bible

Yohanes 15

¹Yesus 'o kanau, “Ngoi nena-ne 'anggur ma lese lamo'o mode-mode'e, re 'Ari Ḇaḇa Unanga guḏa ma dutu.

²'Anggur ma umanga mo-moini ra Ngoi ga'a 'i sowo'o ua, wa tola'a. Re ma umanga mo-moini ga'a rema sowo'o, wa silagara, la 'i dadi 'ofi kara ma sowo'o ganapu repe.

³Ngini reni 'ofi sababu ngini reni dawongo 'Ari do-doto'o.

⁴Ngini balasu ni marimoi tau-taunu ra Ngoi, re Ngoi to marimoi ra ngini. Pa'i ma umanga ḇato kama 'anggur ma lese lamo'o ua 'i sowo'o yoḏu'u, enanga balasu 'i marimoi toma 'anggur ma lese lamo'o. So'o gena ḏi'i, ngini nga'unu ni sowo'o pa'i na'o ni marimoi ra Ngoi ḇato.

⁵Ngoi nena-ne 'anggur ma lese lamo'o re ngini enanga ma umanga-umanga. 'A guna ḇato ga'a marimoi ra Ngoi re Ngoi ḏi'i marimoi ra unanga, 'ai sowo'o 'i repe. Sababu na'o ni marimoi ua ra Ngoi, ngini ni 'a'a 'ori i'a i'a yoḏu'u.

⁶Na'o 'a guna ḇato ga'a marimoi ua ra Ngoi, unanga gena-ge ma tero sa'olo 'anggur ma umanga ga'a ri tola'a, kara 'i dadi ngonono. 'Anggur ma umanga gena-ge, ngowa'a ya lomu kara ya upa'a toma u'u re enanga 'i ro'u.

⁷Na'o ngini marimoi tau-taunu ra Ngoi re 'Ari do-doto'o ni gogono tau-taunu taninga 'akala re sinyingara ma dara, ni golo'o 'oru ḇato Tari Ḇaḇa, tantu ḏua Unanga nu pula'a ra ngini.

⁸Na'o ngini ninga sowo'o lai repe, 'Ari Ḇaḇa ngowa'a 'U silamo'o re ngini mode-mode'e ni dadi 'Ari me-mete'e.

⁹Ma tero 'ari Ḇaḇa ro dadalara Ngoi, so'o gena ḏi'i Ngoi reto dadalara ngini. Ngini balasu ni marimoi tau-taunu ra Ngoi, la ngini ni basono tala 'Ari dadalara tau-taunu.

¹⁰Na'o ngini ni mete'e 'Ari parenta, ngini ni marimoi ra Ngoi tau-taunu re ni basono tala 'Ari dadalara. Gena-ge ma tero Ngoi reto mete'e 'Ari Ḇaḇa 'Ai parenta re To marimoi ra Unanga, re dadi Ngoi to basono tala 'Ai dadalara tau-taunu.

¹¹Ngoi ta siajele mo-moini gena-ge ra ngini, la ngini sanga 'Ari roanga taninga 'akala re sinyingara ma dara, re ḏi'i ninga roanga 'i dadi ti-tiai.

¹²Ngoi 'ari parenta nena-ne: Ngini balasu ni ma'u dadalara matengo re matengo, ma tero Ngoi tini dadalara ngini.

¹³Dadalara ga'a lai lamo'o so'o ne: Matengo i'a ga'a 'o dadalara 'ai ḏagilomu, singadolo 'o sipula'a 'ai 'ahu, la 'ai ḏagilomu 'o 'ahu.

¹⁴Na'o ngini ni siḏagi 'Ari parenta taninga 'ahu, ngini ni dadi 'Ari ḏagilomu.

¹⁵Ngoi to si'aro'o ngini 'Ari budaka riwara, sababu budaka ya waro ua manga tuanga 'ai munara. Siḏibo ḏi'i ngini, Ngoi tini si'aro'o ḏagilomu, sababu 'oru ḇato ga'a Ngoi reto 'isene tari Ḇaḇa, reta siajele ḏua ra ngini.

¹⁶Ngini nena-ne ni cumutu Ngoi ua. Siḏibo ḏi'i, Ngoi nena-ne reto cumutu ngini ḏua, re Tini 'utusu ni tagi, la ninga sowo'o lai repe, re enanga gena-ge sowo'o kasingado-ngadolo i'a. Dadi 'oru ḇato ga'a ngini golo'o Tari Ḇaḇa ni pake 'Ari lomanga, ngini ḏuanga i'a ni sanga.

¹⁷'Ari parenta nena-ne: Ni ma'u dadalara matengo re matengo.”

¹⁸“Na'o ngowa-ngowa'a ga'a toma dungia nena-ne 'aḏi emono ngini, 'elingi, ananga gena-ge raḏi emono Ngoi lebe siḏa.

¹⁹Na'o ngini ni marimoi toma ngowa-ngowa'a ga'a toma dungia nena-ne, tantu ḏua ananga gena-ge 'aḏi dadalara ngini sa'olo manga ngowa-ngowa'a masiretene. Mada'a Ngoi reto cumutu ngini ḏua re siwola i'a tamanga sigolona. Sababu gena-ge, ananga gena-ge 'aḏi emono ngini.

²⁰'Elingi 'oru ga'a Ngoi reto kanau ḏua ra ngini: Budaka 'o lebe la-lamo'o i'a ua reo tuanga. Ngowa'a raḏi sisikisa Ngoi ḏua, ananga ḏuanga i'a 'aḏi sisikisa ngini ḏi'i. Na'o ananga ya mete'e 'Ari do-doto'o, tantu ḏua ananga ḏuanga i'a ya mete'e ḏi'i ngini ninga do-doto'o.

²¹Mo-moini gena-ge ananga ḏuanga i'a ya si'a'a ra ngini, sababu ngini Ngoi 'ari me-mete'e. Re ḏi'i sababu ananga 'aḏi nana'o ua Unanga ga'a Ro 'utusu Ngoi.

²²Na'o Ngoi to sapolo ua re to siajele ua mo-moini gena-ge ra ananga gena-ge, ananga kamanga sala ua sababu kamanga donga ua di'a 'aḏi mete'e 'Ari do-doto'o re 'aḏi ngaku Ngoi. Mada'a nange-ne ananga raḏi kanau yoḏu'u mangale ananga kamanga sala ua, sababu ananga raḏi isene 'Ari do-doto'o mada'a ya ngaku ua.

²³'A guna ḇato ga'a emono Ngoi, unanga ḏi'i 'o emono 'Ari Ḇaḇa.

²⁴Na'o Ngoi to 'a'a ua ga'a hera-heranga tamanga sigolona ga'a matengo i'a mai ua 'o si'a'a yoḏu'u, ananga kamanga sala ua, sababu kamanga donga ua di'a 'aḏi oḏi'i 'Ari ga'a hera-heranga re 'aḏi ngaku Ngoi. Mada'a nange-ne, ananga gena-ge raḏi oḏi'i 'Ari ga'a hera-heranga gena-ge, mada'a ananga raḏi emono Ngoi re raḏi emono 'Ari Ḇaḇa ḏi'i.

²⁵Mada'a enanga gena-ge ri dadi, la demo ga'a 'i silefo ra Musa 'ai hukumu 'i sitotomo: ‘Ananga 'aḏi emono Ngoi kama 'alasana ua.’

²⁶Ri-riono ḏuanga i'a 'i sapolo ga'a Ngoi ḏuanga i'a Ta 'utusu da'u Rari Ḇaḇa tala. Enanga gena-ge Ma Ngagara 'Ofi-'Ofi ga'a 'I sitarangi mangale ba-banari Tari Ḇaḇa tala. Wakutu Enanga gena-ge 'I sapolo ḏua, Enanga 'I pula'a sakisi mangale Ngoi.

²⁷Re ngini mo-moini ḏi'i balasu ni pula'a sakisi mangale Ngoi, sababu ma mulaingi i'a moju ngini reni mamete'e ra Ngoi.”