Read Sahu Yohanes 16 Bible Online

Yohanes 16 - Sahu bible

Yohanes 16

¹“Mo-moini gena-ge Ngoi ta siajele ra ngini, la awa ngini ni celolo ḏuḏunu ra Ngoi.

²Ngowa'a ḏuanga i'a 'aḏi dusu'u ngini toma wala-wala puji. Ma nyonyata enanga ma 'orasa ḏuanga i'a 'i ngadolo wakutu ngowa'a ga'a 'aḏi sisengene ngini, ananga 'aḏi ta'ajiri 'aḏi siḏagi Ma Jou'ongu Madutu 'ai 'akala ma mau.

³Mada'a ananga 'aḏi 'a'a so'o gena-ge, sababu ananga 'aḏi nana'o ua 'Ari Ḇaḇa bolo Ngoi.

⁴Ma mulaingi enanga gena-ge Ngoi to siajele nyangu ra ngini sababu Ngoi to mamete'e moju ra ngini. Mada'a nange-ne Ngoi reto kanau ra ngini, la wakutu gena-ge 'i dadi ngini ni 'elingi 'oru ga'a Ngoi reto siajele ḏua ra ngini.”

⁵“Nange-ne Ngoi to tagi ra Unanga ga'a Ro 'utusu Ngoi. Mada'a matengo i'a mai ua taninga sigolona 'o sano, ‘Ngoi to tagi le'a?’

⁶Nange-ne ngini ninga 'akala re sinyingara 'i kangela, sababu Ngoi to kanau ra ngini so'o gena-ge.

⁷Mada'a ni ngaku mode-mode'e 'Ari demo-demo nena-ne: Jobilaha di'a ngini mangale Ngoi to tagi. Sababu na'o Ngoi to tagi ua, Ri-riono gena-ge 'I sapolo ra ngini ua. Mada'a, na'o Ngoi to tagi, Ngoi ḏuanga i'a to 'utusu Ri-riono gena-ge 'I sapolo ra ngini.

⁸Wakutu Enanga gena-ge 'I sapolo, Enanga ḏuanga 'I sitarangi toma ngowa-ngowa'a dungia nena-ne mangale: ananga ngowa'a baraḏosa, mada'a Ngoi mode-mode'e ngowa'a loasa re banari, re ḏi'i ananga 'aḏi sijuruhakimi Ngoi 'i banari ua.

⁹Enanga 'i sitarangi ra ananga gena-ge mangale ananga ngowa'a baraḏosa, sababu 'aḏi ngaku Ngoi ua.

¹⁰Enanga 'i sitarangi ra ananga gena-ge mangale Ngoi mode-mode'e ngowa'a loasa re banari, sababu Ngoi to tagi Tari Ḇaḇa re 'aḏi oḏi'i Ngoi riwara.

¹¹Enanga 'i sitarangi ra ananga gena-ge mangale 'aḏi sijuruhakimi Ngoi 'i banari ua, sababu 'Iblisi ga'a 'i parenta toma dungia nena-ne, ri sanga katula.

¹²Ma repe moju Ngoi mau to kanau ra ngini, mada'a nange-ne ngini ni dawongo ni nga'unu nyangu 'Ari demo.

¹³Mada'a wakutu Ma Ngagara 'Ofi-'Ofi 'i sapolo, Enanga 'i sigasa wo-waro mangale do-doto'o banari mo-moini ra Ma Jou'ongu Madutu tala. Enanga gena-ge 'I kanau ua mete'e Enanga masiretene ma mau. Mada'a Enanga pa'i 'I kanau ḇato 'oru ga'a Ri 'isene ra Ma Jou'ongu Madutu ino, re Ri siajele ra ngini 'oru ga'a 'i dadi toma biono i'a.

¹⁴'Oru ga'a Enanga ri siajele ra ngini, ma 'asala ra Ngoi. Dadi Enanga ḏuanga i'a 'i silamo'o Ngoi.

¹⁵Ba-banari mo-moini ma 'asala Tari Ḇaḇa gena-ge, re Ngoi reta waro ḏi'i. Ma sababu gena-ge Ngoi to kanau, 'oru ga'a Ma Ngagara 'Ofi-'Ofi 'i siajele ra ngini, gena-ge ma 'asala ra Ngoi.”

¹⁶“Ti'ara ua ngini ni oḏi'i Ngoi riwara. Mada'a togumu i'a ti'ara ua ḏi'i, ngini dadunu ni oḏi'i Ngoi moju.”

¹⁷Yesus 'ai me-mete'e nga muḏuo i'a 'aḏi ma'u sano matengo re matengo, “ 'Ai maksudu 'oru wakutu Unanga 'o kanau, ‘Ti'ara ua ngini ni oḏi'i Ngoi riwara. Mada'a togumu i'a ti'ara ua ḏi'i, ngini dadunu ni oḏi'i Ngoi moju.’ Re 'Ai maksudu 'oru ḏi'i wakutu 'O kanau, ‘Sababu Ngoi to tagi tari Ḇaḇa’?”

¹⁸Ananga 'aḏi sano tau-taunu, “ 'Ai maksudu 'oru wakutu Unanga 'o kanau ‘Ti'ara ua?’ Ngene wa sahe ua Unanga 'ai maksudu 'oru?”

¹⁹Yesus 'o waro ananga mau 'aḏi sano ra Unanga mangale gena-ge, dadi 'O kanau, “Ngini ni ma'u sano matengo re matengo mangale 'Ai maksudu wakutu Ngoi to kanau, ‘Enanga ti'ara ua re ngini ni oḏi'i Ngoi riwara. Mada'a enanga togumu i'a ti'ara ua ngini oḏi'i Ngoi moju.’

²⁰Ni ngaku mode-mode'e 'Ari demo-demo nena-ne: Ngini ḏuanga i'a ni rerese ma gaḏi, mada'a ngowa'a toma dungia nena-ne 'aḏi maroanga. Toma 'orasa gena-ge, ngini ni garura mada'a ḏuanga i'a garura gena-ge singali reo roanga.

²¹Na'o were'a matengo sa'i mo maḏe-ḏegoro i'a, tantu ḇato munanga ma basono tala si-siḏi madutu, sababu gena-ge biasa 'i dadi. Mada'a wakutu munanga remo sibuoro ngowa kiau, ma si-siḏi gena-ge rema sidaioranga, sababu remo maroanga ngowa kiau matengo munanga rema sibuoro toma dungia.

²²So'o gena ḏi'i di'a ngini: Nange-ne ngini nena-ne ninga 'akala re sinyingara 'i garura, mada'a Ngoi ḏuanga i'a to ma'u sanga ra ngini. Toma 'orasa gena-ge, ngini ninga 'akala re sinyingara 'i maroanga, re matengo i'a mai ua nga'unu 'a ra-rabasa roanga gena-ge taninga 'akala re sinyingara ma dara.

²³Toma 'orasa gena-ge, ngini ni sano riwara ra Ngoi mangale 'oru ḇato. Ni ngaku mode-mode'e 'Ari demo-demo nena-ne: 'Oru ḇato ngini golo'o Tari Ḇaḇa ni pake Ngoi 'ari lomanga, Unanga 'a pula'a ra ngini.

²⁴Singadolo 'orasa nange-ne ngini ni golo'o 'oru-'oru nyangu ni pake Ngoi 'ari lomanga. Mada'a ni golo'o ḇato re ḏuanga i'a ni sanga, la ngini ninga roanga 'i ti-tiai.”

²⁵“Mo-moini gena-ge Ngoi reto kanau ra ngini to pake 'ade-'ade. Mada'a ḏuanga i'a ma 'orasa 'i ngadolo Ngoi to pake 'ade-'ade riwara, mada'a to kanau sitarangi i'a ra ngini mangale 'Ari Ḇaḇa.

²⁶Toma 'orasa gena-ge, ngini ni golo'o Tari Ḇaḇa ni pake Ngoi 'ari lomanga. Ngoi to paralu ua to golo'o Tari Ḇaḇa di'a ngini,

²⁷sababu 'Ari Ḇaḇa masiretene 'o dadalara ngini. Unanga 'o dadalara ngini sababu ngini ni dadalara Ngoi, re ni ngaku mangale Ngoi to sapolo da'u Tari Ḇaḇa tala.

²⁸Ngoi 'ari 'asala Tari Ḇaḇa, re To sapolo ḏua toma dungia nena-ne. Mada'a nange-ne Ngoi ta sisoi'i tala dungia nena-ne di'a To maḏibo sie Tari Ḇaḇa.”

²⁹Ḏua Yesus 'ai me-mete'e 'aḏi kanau, “Nange-ne Jou no kanau sitarangi re no pake 'ade-'ade riwara.

³⁰Nange-ne ngomi ma waro, Jou na waro mo-moini. Dadi paralu ua di'a matengo i'a mai ua 'o sano ra Jou mangale 'oru ḇato, sababu Jou reno waro 'oru ḇato ga'a ngomi mau mi sano. Sababu gena-ge, ngomi ngaku Jou reno sapolo ra Ma Jou'ongu Madutu tala.”

³¹Yesus 'o sangoro, “Dadi nange-ne ngini ni ngaku mode-mode'e Ngoi reto sapolo ra Ma Jou'ongu Madutu tala?!

³²Mada'a ma 'orasa 'i ngadolo re nange-ne 'i ngadolo ḏua, wakutu ngini ni matai are ni maḏibo taninga wala matengo-matengo re ni sisoi'i tala Ngoi masiretene. Mada'a Ngoi to matengo ua, sababu 'Ari Ḇaḇa 'o mamete'e ra Ngoi.

³³Mo-moini gena-ge Ngoi to siajele ra ngini, la ngini ni basono tala dame taninga 'akala re sinyingara ma dara, sababu ni marimoi ra Ngoi. Toma dungia nena-ne ngini sanga sangisara. Mada'a ni site'e ninga 'akala re sinyingara: Ngoi reta singiranga dungia nena-ne ma kuasa!”