Read Sahu Yohanes 17 Bible Online

Yohanes 17 - Sahu bible

Yohanes 17

¹Yesus 'o kanau so'o gena togumu i'a, unanga 'o talaḏi ie diwanga re 'O manyiata, “Baba nange-ne ma 'orasa ri ngadolo, simulia 'Ani Ngowa'a Nau'u, la 'Ani Ngowa'a Nau'u ḏi'i 'O simulia Baba.

²Baba reno pula'a kuasa Tani Ngowa'a Nau'u di'a 'O parenta ngowa'a mo-moini toma dungia nena-ne, la Unanga 'o pula'a 'ahu kasingado-ngadolo i'a toma ngowa'a mo-moini ga'a Reno pula'a ḏua ra Ngoi.

³'Ahu kasingado-ngadolo i'a ma ngale so'o ne: Ngowa'a 'aḏi nana'o 'Ari Ḇaḇa, 'aḏi nana'o Ngoi ḏi'i. 'Ari Ḇaḇa pa'i matengo ḇato ga'a Ma Jou'ongu Madutu mode-mode'e; re Ngoi, Yesus Kristus ga'a 'Ari Ḇaḇa Ri 'utusu.

⁴Baba, Ngoi tini simulia ḏua toma dungia nena-ne, sababu Ngoi ta siḏuanga 'Ani munara ga'a Baba no siwatasa ra Ngoi.

⁵Baba, nange-ne Ngoi to golo'o ra Baba nena-ne, No simulia Ngoi nena-ne, wakutu Ngoi dadunu to ḏibo ra Baba moju, ma tero Baba no simulia Ngoi wakutu dungia nena-ne 'i dadi nyangu.”

⁶“Baba, ngowa'a mo-moini toma dungia nena-ne ga'a Baba reno pula'a ra Ngoi, Ngoi ta siajele ra ananga gena-ge mangale Baba, la 'aḏi nana'o Baba. Ananga gena-ge 'Ani 'umata ga'a reno pula'a ra Ngoi, re raḏi mete'e 'Ani 'Idini.

⁷Nange-ne ananga raḏi waro ḏua mangale 'oru ḇato ga'a Baba reno pula'a ra Ngoi, ma 'asala ra Baba.

⁸'Ani demo ga'a Baba reno pula'a ra Ngoi, Ngoi ta siajele ḏua ra ananga. Re ananga gena-ge ya dawongo ḏua re raḏi waro mangale Ngoi mode-mode'e to sapolo ra Baba ino re ananga raḏi ngaku Baba reno 'utusu Ngoi ḏua.

⁹Ngoi to manyiata di'a ananga gena-ge. Ngoi to manyiata ua di'a ngowa'a mo-moini toma dungia nena-ne, mada'a di'a ngowa-ngowa'a ga'a Baba reno pula'a ra Ngoi, sababu ananga gena-ge Baba reno cumutu.

¹⁰Ngowa'a mo-moini ga'a ta Ngoi, gena-ge ḏi'i ta Baba. Re ngowa'a mo-moini ga'a ta Baba, gena-ge ḏi'i ta Ngoi. Re Ngoi reto sanga mulia sababu ananga gena-ge.

¹¹Nange-ne Ngoi to sapolo ra Baba, dadi Ngoi ḏuanga i'a to tegoro riwara toma dungia nena-ne, mada'a ananga 'aḏi tegoro toma dungia moju. Dadi Baba, ga'a No 'Ofi-'Ofi, No kadiarata ananga Rani kuasa. 'Ani kuasa ga'a no pula'a ra Ngoi, la Ngoi to si'a'a ananga 'aḏi marimoi ma tero Ngoi re Baba, Ngene wo marimoi.

¹²Wakutu Ngoi 'age ra ananga Ngoi nena-ne Ta'u kadiarata re Ta'u saolo Rani kuasa. Re matengo ua 'o iranga, ḏuga-ḏuga pa'i matengo ḇato, unanga gena-ge ga'a Baba reno sitantukanga ḏua di'a 'o sanga hukumu kasingado-ngadolo i'a. Gena-ge balasu 'i dadi ra unanga gena-ge, la sitotomo 'oru ga'a 'i silefo toma Boku 'Ofi-'Ofi ma dara.

¹³Nange-ne Ngoi to sapolo ra Baba. Mada'a demo mo-moini gena-ge Ngoi ta siajele ḏua wakutu Ngoi toma dungia nena-ne moju, la ananga 'aḏi basono tala maroanga ma tero Ngoi.

¹⁴Ngoi reta siajele ḏua ra ananga 'Ani demo-demo singadolo ngowa'a toma dungia nena-ne ya'u emono ananga, sababu ananga 'aḏi marimoi ua reo ngowa'a toma dungia nena-ne, ma tero Ngoi ḏi'i to marimoi ua reo ngowa'a toma dungia nena-ne.

¹⁵Ngoi to golo'o ua Baba no 'oro ananga toma dungia nena-ne, mada'a Baba no saolo ananga toma 'Iblisi ma kuasa.

¹⁶Ngoi to marimoi ua toma ngowa'a dungia nena-ne, so'o gena ḏi'i ananga 'aḏi marimoi ua toma ngowa'a dungia nena-ne.

¹⁷No pake 'Ani demo ga'a 'i banari di'a siwola i'a ananga toma ngowa'a dungia nena-ne, sa'olo 'Ani ngowa'a 'ofi-'ofi.

¹⁸Ma tero sa'olo 'Ari Baba reno 'utusu Ngoi toma dungia nena-ne, so'o gena ḏi'i Ngoi ta'u 'utusu ananga toma dungia nena-ne.

¹⁹Ngoi ta sidoa'a 'Ari 'ahu ra Baba di'a mete'e 'Ani mau, la ananga ḏi'i 'aḏi sidoa'a manga 'ahu di'a 'aḏi mete'e 'Ani mau, sababu ananga raḏi ngaku 'Ani do-doto'o ga'a 'i banari.”

²⁰“Ngoi to manyiata pa'i 'Ari me-mete'e nena-ne ḇato ua, mada'a di'a ngowa-ngowa'a ḏi'i ga'a ḏuanga i'a 'aḏi ngaku Ngoi sababu ananga nena-ne manga habari.

²¹Ngoi to golo'o ra Baba mangale ananga mo-moini gena-ge 'aḏi marimoi ma tero Baba marimoi ra Ngoi, re Ngoi to marimoi ra Baba. Na'o nyengara gari'a ananga 'aḏi marimoi ra Ngene, la ngowa'a toma dungia nena-ne ananga ḏuanga i'a 'aḏi ngaku mangale Baba reno 'utusu Ngoi.

²²Ngoi nena-ne Ta'u pula'a ḏua 'Ani mulia ra ananga ga'a Baba reno pula'a ra Ngoi, la ananga 'aḏi marimoi, ma tero Ngene wo marimoi.

²³Ngoi to marimoi ra ananga re Baba no marimoi ra Ngoi, la ananga mode-mode'e 'aḏi marimoi. Ḏua ngowa'a toma dungia ḏuanga i'a ya waro mangale Baba masiretene Reno 'utusu Ngoi, re Baba no dadalara ananga ma tero Baba no dadalara Ngoi.

²⁴Baba, Ngoi to mau ngowa'a ga'a Baba reno pula'a ra Ngoi, ananga 'aḏi mamete'e ra Ngoi toma ngi'i ga'a Ngoi 'age, la ananga ya oḏi'i 'Ari mulia. Mulia gena-ge ga'a Baba reno pula'a ḏua ra Ngoi, sababu Baba no dadalara Ngoi wakutu dungia 'i dadi nyangu.

²⁵Baba ga'a no 'adili, kalaha ngowa'a toma dungia nena-ne 'aḏi nana'o Baba ua, mada'a Ngoi to nana'o Baba. Re 'Ari me-mete'e 'aḏi waro mangale Baba reno 'utusu Ngoi.

²⁶Ngoi reta siajele ḏua mangale Baba ra ananga, re Ngoi ḏuanga i'a ta siajele tau-taunu, la ananga 'aḏi basono tala 'Ani dadalara tamanga 'akala re sinyingara ma tero Ngoi to basono tala 'Ani dadalara Tari 'akala re sinyingara re dadi Ngoi ḏi'i to tegoro tamanga 'akala re sinyingara.”