Read Sahu Yohanes 18 Bible Online

Yohanes 18 - Sahu bible

Yohanes 18

¹Wakutu Yesus 'o manyiata togumu i'a, Unanga re 'Ai me-mete'e 'aḏi tagi 'aḏi masala i'a toma ḇanyo Kidron kaci moi. Toma ngi'i gena-ge, ananga 'aḏi osama toma guḏa zaitun ḇotu moi.

²Yudas ga'a ḏuanga i'a 'o sipula'a Yesus rai lawana, unanga ḏi'i 'a waro ngi'i gena-ge. Sababu soi rai o'o i'a Yesus re 'Ai me-mete'e, ananga ga'a 'aḏi malomu toma ngi'i gena-ge.

³Dadi Yudas 'o sapolo toma guḏa gena-ge. Unanga gena-ge 'o gasa sordado-sordado Roma regu rimoi re Ma Jou'ongu Madutu 'ai Wala ma ja-jaga nga muḏuo i'a. Ananga gena-ge 'aḏi gasa dare, lantera re 'oboro. Re ananga gena-ge, 'imam-'imam ma sae'e re ngowa-ngowa'a Farisi ya'u 'utusu.

⁴Yesus 'a waro mo-moini 'oru ga'a ngasamoi 'i dadi ra Unanga. Dadi Unanga 'o sisoi'i tala ngi'i gena-ge 'o ma'u sanga ra ananga, kara 'o sano, “Ngini ni disa 'a guna?”

⁵Ananga ya sangoro, “Yesus ngowa'a Nazaret.” Yesus 'o kanau, “Ngoi nena-ne Unanga.” (Re Yudas ga'a gasa ananga gena-ge toma ngi'i gena-ge, unanga 'o made-de'oso ra ananga.)

⁶Wakutu Yesus 'o kanau, “Ngoi nena-ne Unanga,” ananga 'aḏi madorusu re 'aḏi ruba ie toma tana'a.

⁷Soi moi moju Yesus dadunu 'o sano ra ananga, “Ngini ni disa 'a guna?” Ananga ya sangoro, “Yesus ngowa'a Nazaret.”

⁸Yesus 'o sangoro, “Ngoi reto kanau ḏua, ‘Ngoi nena-ne Unanga.’ Re na'o ngini ni disa Ngoi ḇato, ni sieanga i'a 'Ari me-mete'e 'aḏi tagi.”

⁹Wakutu Yesus 'o kanau so'o gena, Unanga 'o sitotomo 'oru ga'a Unanga 'o manyiata 'au nga'ene: “Baba, ngowa-ngowa'a ga'a Baba no sidoa'a ra Ngoi, matengo i'a mai ua ananga 'aḏi iranga.”

¹⁰Ḏua Simon Petrus 'a tuono 'ai samaranga, kara 'o cafa 'a 'imam 'agung 'ai budaka 'ai ngau'u ma kuwiḏa singadolo tola'a. (Budaka gena-ge 'ai lomanga Malkus.)

¹¹Ḏua Yesus 'o kanau i'a ra Petrus, “Dadunu na singosama 'ani samaranga toma sarungu. Ngana no ta'ajiri mangale Ngoi to oḏu'u sanga sangisara ga'a 'Ari Ḇaḇa 'a sitantukanga ḏua Ngoi balasu ta sanga?!”

¹²Ḏua sordado-sordado Roma regu rimoi re manga sae'e re ḏi'i Ma Jou'ongu Madutu 'ai Wala ma ja-jaga, ananga 'aḏi cako'o 'a Yesus re 'U piri'u.

¹³Siḏa-siḏa ananga 'U gasa sitalaḏi ra Hanas, Kayafas 'ai dedono na-nau'u. Toma musungu gena-ge, Kayafas 'o dadi 'imam 'agung.

¹⁴Kayafas gena-ge ngowa'a ga'a pula'a duga re domolo toma ngowa-ngowa'a Yahudi manga bi-biri'i: “Jobilaha ngowa'a matengo 'o sengene di'a ngowa'a repe.”

¹⁵Simon Petrus re Yesus 'ai me-mete'e matengo, ananga 'aḏi mete'e tu-tuu'u ra Yesus. Sababu 'imam 'agung ro nana'o Yesus 'ai me-mete'e ma lelegu unanga 'o osama mamete'e ra Yesus toma 'imam 'agung 'ai wala ma soana.

¹⁶Mada'a Petrus balasu 'o totoma toma ngalana ma ḏuḏunu. Ḏua Yesus 'ai me-mete'e ma lelegu gena-ge, unanga 'o supu reo makanau toma we-were'a ga'a ngalana ma ja-jaga, kara munanga mo singosama 'a Petrus toma dara.

¹⁷We-were'a ngalana ma ja-jaga mo sano i'a ra Petrus, “Hei ngana ḏi'i Unanga nena-ne 'Ai me-mete'e?” Petrus 'a sangoro, “Ngoi ua.”

¹⁸Utu gena-ge 'alo. Dadi budaka-budaka re ngowa-ngowa'a ja-jaga, ananga 'aḏi 'a'a u'u reo konu'u. Gena ḏua, ananga 'aḏi marasu'u re 'aḏi made-de'oso sigoloḏi u'u gena-ge. Petrus 'o masebanga i'a ra ananga toma u'u, la 'o marasu'u ḏi'i mamete'e ra ananga.

¹⁹'Imam 'agung 'o sano ra Yesus mangale 'Ai me-mete'e re 'Ai do-doto'o.

²⁰Yesus 'o sangoro, “Ngoi to kanau toma mandan. Ngoi to doto'o tau-taunu toma wala-wala puji re ra Ma Jou'ongu Madutu 'ai Wala ma soana, ngi'i ngowa'a Yahudi 'aḏi malomu, soi moi nyangu Ngoi to kanau 'ori i'a Ta go-gogono.

²¹Dadi i'a sa'olo ngana no sano ra Ngoi moju? No sano ḇato ra ananga ga'a ya 'isene 'Ari do-doto'o. Tantu ḏua ananga ya waro 'oru ga'a Ngoi to kanau!”

²²Wakutu Yesus 'o kanau so'o gena, 'imam 'agung 'ai ngowa'a ja-jaga matengo 'U sata Yesus re 'o kanau, “No nau'u masala No kanau so'o gena-ge toma 'imam 'agung!”

²³Yesus 'a sangoro, “Na'o Ngoi 'ari demo bale moi 'i rapu, nange-ne na siajele 'Ari rapu 'oru! Mada'a na'o 'oru ga'a Ngoi to kanau 'i banari, i'a sa'olo no sata Ngoi?”

²⁴Gena ḏua, Hanas 'o soma'a ananga 'aḏi gasa Yesus ga'a 'ai giama 'i pi-piri'u moju, ra Kayafas 'imam 'agung.

²⁵Simon Petrus 'o made-de'oso 'o marasu'u moju toma ngi'i gena-ge, 'age ngowa-ngowa'a 'aḏi sano, “ 'Oru ngana nena-ne ḏi'i Yesus 'ai me-mete'e?” Mada'a Petrus 'o masoloto, “Ngoi ua!”

²⁶'Age rema 'imam 'agung 'ai budaka matengo. Unanga gena-ge 'ai ioro re nongoḏu ngowa'a matengo ga'a Petrus 'a cafa 'ai ngau'u ma kuwiḏa. Unanga gena-ge, 'o kanau, “Ngoi to oḏi'i 'au nange-ne ngana ḏi'i no mamete'e ra Yesus toma guḏa zaitun!”

²⁷Mada'a Petrus 'o masoloto moju. Toma 'orasa gena-ge namo 'i solene.

²⁸Da-daini i'a moju ananga raḏi 'oro 'a Yesus ra Kayafas 'ai wala, kara 'U gasa Unanga ra gubernur Roma 'ai kadato. Ngowa-ngowa'a Yahudi manga bi-biri'i masiretene 'aḏi osama ua toma kadato ma dara, la awa manga diri 'i faja mete'e 'agama ma 'atoranga, sababu ananga mau 'aḏi mete'e oromo toma Paskah ma Wangere ma laya.

²⁹Sababu gena-ge, Governor Pilatus 'o supu re 'o sano ra ananga, “Ngini ninga da'awa 'oru ra Unanga nena-ne?”

³⁰Ananga ya sangoro, “Na'o Unanga kai sala ua, ngomi mi gasa ua ra Tuanga!”

³¹Ḏua Pilatus 'o kanau ra ananga, “Nu 'oro re nu gasa Unanga, la nu sijuruhakimi Unanga mete'e ngini ninga hukumu masiretene.” Mada'a ngowa'a Yahudi manga bi-biri'i 'aḏi sangoro, “Ngomi mi sihukumu sengene ngowa'a yoḏu'u.”

³²(Enanga 'i dadi so'o gena-ge, la sitotomo 'oru ga'a Yesus ro kanau ḏua, mangale Unanga 'ai se-sengene ma ngo'omo.)

³³Pilatus dadunu 'o osama tai Kadato ma dara re 'o 'aro'o Yesus, kara 'o sano, “Ngana ngowa'a Yahudi manga 'Olana bolo ua?”

³⁴Yesus 'o sangoro, “Mete'e 'ani 'akala ma sanga masiretene bolo ngowa'a lelegu 'aḏi siajele ra ngana mangale Ngoi?”

³⁵Pilatus 'o sangoro, “Ngoi ngowa'a Yahudi ua! Ngowa'a Yahudi 'Ani bangsa masiretene, ananga re 'imam-'imam ma sae'e ḏi'i, ananga gena-ge 'aḏi gasa Ngana ra ngoi. 'Oru ga'a Ngana reno 'a'a?”

³⁶Yesus 'o kanau, “Ngoi 'ari pareta ma 'asala toma dungia nena-ne ua. Sababu na'o ma 'asala toma dungia nena-ne, Ngoi 'ari ngowa-ngowa'a 'aḏi sapolo lawana, la ngowa'a Yahudi manga bi-biri'i 'aḏi cako'o Ngoi ua. Mada'a mode-mode'e Ngoi 'ari pareta ma 'asala toma dungia nena-ne ua.”

³⁷Ḏua Pilatus dadunu sano moju, “Na'o so'o gena, Ngana nena-ne 'olana?” Yesus 'o sangoro, “Ngana masiretene no aje, Ngoi nena-ne 'Olana, re 'ani demo 'i banari. 'Ari ngina sibuoro Ngoi re ngoi to sapolo toma dungia nena-ne, di'a maksudu rimoi ḇato: di'a To pula'a sakisi mangale 'ori i'a ga'a ba-banari. Ngowa'a mo-moini ga'a 'aḏi disa ba-banari, ananga gena-ge 'aḏi mete'e Ngoi 'ari do-doto'o.”

³⁸Pilatus 'o sano, “Ba-banari gena-ge 'oru?!” Gena ḏua, unanga dadunu 'o supu re 'o kanau toma ngowa-ngowa'a Yahudi, “Ngoi ta sanga Unanga 'ai sala rimoi i'a mai ua.

³⁹Mada'a mete'e ngini ninga 'atoranga wakutu Paskah ma Wangere, ngoi to sibebasa matengo toma bui. Dadi na'o ngini ni mau, ngoi nyengara to sibebasa Unanga, ngowa'a Yahudi manga 'olana?”

⁴⁰Ananga ya sangoro ya siduga-duga, “Sibebasa Unanga awa, sibebasa 'a Barabas!” (Barabas gena-ge unanga 'o lawana Roma ma pareta.)