Read Sahu Yohanes 19 Bible Online

Yohanes 19 - Sahu bible

Yohanes 19

¹Ḏua Pilatus 'o soma'a 'ai sordado 'aḏi sipo Yesus.

²Re sordado gena-ge 'aḏi 'a'a lastari reo ate ma umanga ga'a dodowo'o, kara ya sigare ra Yesus 'ai sae'e. Gena ḏua, ananga 'U sipake juba ungu.

³Ḏua, ananga 'aḏi sapolo tau-taunu ra Unanga re 'aḏi kanau, “Suba, Ngana ngowa'a Yahudi manga 'olana, na'o nyengara gari'a Ngana no 'ahu kasingado-ngadolo i'a!” Gena ḏua, ananga 'aḏi sata Unanga.

⁴Pilatus dadunu 'o supu moju re 'o kanau i'a toma ngowa'a Yahudi manga repe, “Oḏi'i! Ngoi to sisupu Unanga ra ngini, la ngini ni waro mangale Ngoi to sanga Unanga kai sala ceka'a i'a mai ua.”

⁵Gena ḏua, Yesus 'o supu 'o pake Tai sae'e rema lastari dodowo'o re 'U sipake juba 'ungu. Pilatus 'o kanau i'a toma ngowa'a Yahudi manga repe, “Ni oḏi'i Unanga nena-ne!”

⁶Wakutu 'imam-'imam ma sae'e re Ma Jou'ongu Madutu 'ai Wala ma ja-jaga 'aḏi oḏi'i Yesus, ananga 'aḏi poa'a, “Sisalib Unanga! Sisalib Unanga!” Mada'a Pilatus 'o kanau ra ananga, “Ngini masiretene 'oro Unanga, re ni sisalib Unanga. Mete'e ngoi, ngoi ta sanga Unanga kai sala ceka'a i'a mai ua.”

⁷Ngowa'a Yahudi ya sangoro, “Mete'e minga hukumu, Unanga balasu sihukumu sengene sababu Unanga masiretene 'o kanau Unanga Ma Jou'ongu Madutu 'ai Ngowa'a Nau'u.”

⁸Wakutu Pilatus 'o isene manga demo so'o gena-ge, unanga 'o ganapu mojongo.

⁹Dadi Pilatus dadunu 'o osama tai Kadato re wakutu ananga dadunu siosama Yesus. Pilatus 'o sano ra Yesus, “Ngana 'ani 'asala le'a ino?” Mada'a Yesus 'o sangoro ua.

¹⁰Pilatus 'o kanau ra Yesus, “Ngana no waro bolo ua? Ngoi rari kuasa di'a sibebasa Ngana, re di'a rari kuasa di'a Tini sisalib!”

¹¹Yesus 'o sangoro, “Na'o Ma Jou'ongu Madutu 'o pula'a kuasa ua ra ngana, ngana no kuasa Ngoi yoḏu'u. Sababu gena-ge, matengo ga'a sipula'a Ngoi ra ngana, unanga 'ai ḏosa lebe lamo'o i'a.”

¹²Mulaingi gena-ge, Pilatus 'o disa ngo'omo di'a 'o sibebasa Yesus. Mada'a ngowa'a Yahudi 'aḏi poa'a tau-taunu, “Na'o ngana no sibebasa Unanga, ngana 'a Kaisar 'ai ḏagilomu ua. 'A guna ḇato 'o kanau unanga masiretene 'olana, 'o lawana Kaisar.”

¹³Wakutu Pilatus 'a 'isene ananga manga demo-demo gena-ge, unanga 'o supu re 'o tegoro toma kurusi juruhakimi ga'a si'aro'o mesele maḏi (toma demo 'Ibrani: Gabata).

¹⁴Toma 'orasa gena-ge sa'i ca'olo nyagi moi re romoḏiḏi wangere 'olona, re Paskah ma Wangere ma laya sa'i co-cori. Pilatus 'o kanau toma ngowa-ngowa'a Yahudi gena-ge, “Unanga nena-ne, ngini ninga 'olana!”

¹⁵Mada'a ananga 'aḏi poa'a, “Sisengene Unanga! Sisengene Unanga! Sisalib Unanga!” Pilatus 'o sano i'a ra ananga, “Ngini ni mau ngoi to sisalib ninga 'olana?” 'Imam-'imam ma sae'e ananga ya sangoro, “Pa'i Kaisar matengo ḇato ngomi minga 'olana!”

¹⁶Ma ḏo-ḏogumu Pilatus 'o sipula'a Yesus tai sordado di'a 'U sisalib. Dadi sordado-sordado 'aḏi 'oro Yesus, kara 'aḏi gasa di'a 'aḏi sisalib Unanga.

¹⁷Yesus masiretene 'a doiti 'Ai salib tagi toma ngi'i ga'a si'aro'o, “Ḏoḏowi ma Ngi'i” (toma demo 'Ibrani: Golgota).

¹⁸Toma ngi'i gena-ge sordado 'aḏi sisalib Yesus. Re ngowa'a nga muḏiḏi ma lelegu ḏi'i sisalib 'aḏi simete'e Yesus: matengo Tai kuḇali re matengo Tai kuwiḏa, re ananga nga muḏiḏi si'olona Yesus.

¹⁹Tai sae'e ma re'u toma salib co-cori ma tubu, sordado 'aḏi sipaku i'a papanga 'i silefo Mahkamah 'Agama ga'a Pilatus 'o soma'a silefo ma betongo so'o ne: “YESUS NGOWA'A NAZARET, NGOWA'A YAHUDI MANGA 'OLANA.”

²⁰Yesus ananga 'U salib kiḏanga ua toma limau Yerusalem singadolo ngowa'a manga repe ya baca 'oru ga'a 'i silefo gena-ge, re 'i silefo toma demo 'Ibrani, demo Latin re demo Yunani ḏi'i.

²¹'Imam-'imam ma sae'e 'aḏi kanau, “Lefo awa: ‘Ngowa'a Yahudi manga 'Olana,’ mada'a lefo ḇato, ‘Unanga nena-ne 'o kanau, Ngoi ngowa'a Yahudi manga 'Olana.’ ”

²²Mada'a Pilatus 'o kanau, “ 'Oru ga'a ngoi ta lefo ḏua, ngali 'i yoḏu'u.”

²³Sordado-Sordado gena-ge 'aḏi sisalib Yesus togumu i'a, ananga ya 'oro Yesus 'ai pakeanga, kara ya sibalangu balangu rata, la matengo-matengo 'aḏi sanga balangu moi. Gena ḏua, ananga ya 'oro ḏi'i Yesus 'ai juba, enanga kama dini ua da'u situwaḏi.

²⁴Sordado gena-ge 'aḏi makanau matengo re matengo, “'Ai juba nena-ne ngene wa tola'a awa, ino ngene wo 'a'a loterei, la ngasamoi 'i eta'a ra guna.” Gena-ge 'i dadi 'i sitotomo 'oru ga'a 'i silefo pasala ḏua toma Boku 'Ofi-'Ofi so'o ne: “Ananga ya sibalangu 'Ari pakeanga. Re 'Ari juba 'aḏi 'a'a loterei.” Dadi sordado gena-ge ananga ya si'a'a so'o gena-ge.

²⁵Co-cori Yesus 'ai salib, 'age rema we-were'a nga muḏuo i'a 'aḏi made-de'oso: Yesus 'ai ngina, re 'Ai ngina 'ami nongoḏu, Maria 'a Klopas 'ai were'a, re ngo Maria Magdalena.

²⁶Wakutu Yesus 'o oḏi'i 'Ai ngina re 'Ai me-mete'e ga'a Unanga ya'u dadalara, ananga gena-ge 'aḏi made-de'oso toma ngi'i gena-ge, Unanga 'o kanau i'a Tai ngina, “Ngina, nena-ne 'ani ngowa'a nau'u.”

²⁷Re Yesus 'o kanau i'a Tai me-mete'e matengo, “Munanga nena-ne ngana 'ani ngina.” Dadi mulaingi nange-ne re si'a Yesus 'ai me-mete'e matengo gena-ge 'o dawongo Yesus 'ai ngina tai wala.

²⁸Gena ḏua, Yesus ra waro mangale mo-moini gena-ge 'i ḏu-ḏuanga ḏua re la mo-moini 'oru ga'a 'i silefo ḏua toma Boku 'Ofi-'Ofi ri sitotomo, Unanga 'o kanau, “Ngoi 'Ari camala dudungu.”

²⁹Toma ngi'i gena-ge, 'age rema sawo'o rimoi ma dara 'anggur ko-kowi'i. Ananga 'aḏi 'oro bunga karang ya tono toma 'anggur ko-kowi'i re ya sitopo'o toma hisop ma umanga, kara ya situbo ie ra Yesus 'ai 'uḏu ma betu'u di'a Unanga 'a cono'o.

³⁰Yesus 'a ḇowisi ma 'anggur gena-ge togumu i'a, Unanga 'o kanau, “Togumu ḏua!” Gena ḏua, Unanga 'a ruku tala 'Ai sae'e re 'Ai sangagara 'i togumu.

³¹'Orasa gena-ge co-cori Sabata ma wangere. Toma wangere gena-ge ngowa'a Yahudi manga bi-biri'i 'aḏi oḏu'u ngowa'a ga'a sengene toma salib, manga mayeti 'i ko-kole toma salib moju. Sidogo ḏi'i Sabata ma wangere nena-ne lebe lamo'o i'a reo Sabata ma lelegu. Sababu gena-ge, ngowa-ngowa'a Yahudi manga bi-biri'i 'aḏi sapolo golo'o ra Pilatus di'a ya sirapo'o ngowa-ngowa'a ga'a sanga salib manga unisi ma obongo, la 'aḏi sengene capati kara siguci toma salib.

³²Dadi sordado-sordado gena-ge 'aḏi tagi re sirapo'o ngowa'a nga muḏiḏi manga unisi ma obongo ga'a 'aḏi sisalib mamete'e ra Yesus; matengo togumu matengo.

³³Wakutu ananga 'aḏi ngadolo ra Yesus, 'aḏi oḏi'i Yesus ro sengene, dadi ya rapo'o 'Ai unisi ma obongo riwara.

³⁴Mada'a sordado matengo 'a ruju Yesus 'ai gagoro reo kalawi singadolo Yesus 'ai ngaunu 'i 'uisi capuru reo ḇanyo.

³⁵Unanga masiretene ga'a 'o oḏi'i gena-ge 'i dadi, unanga gena-ge 'o pula'a sakisi, la ngini ni ngaku. Unanga 'ai sakisi gena-ge 'i banari, sababu unanga 'a waro 'oru ga'a ra oḏi'i, gena-ge ri dadi.

³⁶Enanga 'i dadi, la 'oru ga'a 'i silefo pasala ḏua toma Boku 'Ofi-'Ofi ma dara 'i sitotomo: “ 'Ai obongo ngai moi mai ua 'i rapo'o.”

³⁷Toma Boku 'Ofi-'Ofi ma dara 'i silefo pasala ḏua ḏi'i so'o ne: “Ananga ḏuanga i'a 'aḏi tatamo ie Unanga ga'a ananga raḏi siruju reo kalawi.”

³⁸Pasala i'a Yusuf ngowa'a Arimatea sapolo golo'o watasa ra Pilatus di'a 'a 'oro Yesus 'ai mayeti. (Yusuf gena-ge unanga ḏi'i osama nyo-nyoimi ra Yesus 'ai me-mete'e mada'a sigo-gogono, sababu unanga 'o mojongo ngowa'a Yahudi manga ngowa'a bi-biri'i). 'A Pilatus 'o pula'a watasa ra Yusuf, dadi unanga 'a 'oro Yesus 'ai mayeti.

³⁹Nikodemus ga'a ma siḏa wakutu lobi'i 'o sapolo ra Yesus, unanga 'o tagi mamete'e ra Yusuf. Nikodemus 'o gasa mur re gaharu sicapuru, ma ḏubuso ḏa kilo nyagi ro'ange.

⁴⁰Ananga nga muḏiḏi ya 'oro Yesus 'ai mayeti, kara ya sao reo ḇa'a linen re ya sigo-gori'i reo bo-bounu mete'e sa'olo Yahudi manga 'adata di'a palihara.

⁴¹Toma ngi'i Yesus sanga salib 'age guḏa ḇotu moi rema kubu ma aḏu'u su-sungi, ga'a ngowa'a ya sigare matengo i'a mai nyangu.

⁴²Sababu kubu ma aḏu'u gena-ge lai cori, re co-cori ḏi'i Sabata ma wangere, Yesus ananga 'U sigare toma ngi'i gena-ge.