Read Sahu Yohanes 21 Bible Online

Yohanes 21 - Sahu bible

Yohanes 21

¹Togumu i'a, Yesus 'o masijumu soi moi moju Tai me-mete'e toma talaga Tiberias.

²Toma 'orasa gena-ge, Simon Petrus, Tomas (ga'a si'aro'o Ngowa'a Sa-salanga), Natanael toma limau Kana ino daeraha Galilea, 'a Zebedeus 'ai ngowa'a nau'u nga muḏiḏi re Yesus 'ai me-mete'e ma lelegu nga muḏiḏi, ananga mo-moini gena-ge 'aḏi malomu.

³Simon Petrus 'o kanau ra Yesus 'ai me-mete'e ma lelegu, “Ngoi to tagi disa nyao'o.” Ananga gena-ge ya sangoro, “Ngomi mi mete'e ḏi'i.” Dadi ananga mo-moini 'aḏi mabalene toma oti re 'aḏi disa nyao'o. Mada'a utu moi siwangere ananga kama sanga 'oru rimoi mai ua.

⁴Da-daini i'a ma wangere sa'i ri pilata, ananga 'aḏi oḏi'i ngowa'a matengo 'o made-de'oso toma talaga ma 'uḏu, mada'a ananga 'aḏi waro ua, gena-ge Yesus.

⁵Yesus 'o sano i'a ra ananga, “ 'Ari ḏagilomu, ngini ni kate bolo moa?” Ananga ya sangoro, “Moa!”

⁶Yesus 'o kanau ra ananga, “Na upa'a ninga j̱ala taninga oti ma kuwiḏa i'a, la ni sanga nyao'o.” Dadi ananga ya upa'a manga j̱ala mete'e sa'olo Yesus 'o siajele ra ananga. Ḏua ananga ya nga'unu ua ya taba'a j̱ala gena-ge, sababu nyao'o repe woḏi.

⁷Ḏua Yesus 'ai me-mete'e matengo ga'a Unanga 'o dadalara, 'o kanau ra Petrus, “Unanga gena-ge Ma Jou!” Wakutu Simon Petrus 'a 'isene, “Unanga gena-ge Ma Jou,” unanga jau-jau 'o pake 'ai juba 'a sipiri'u tai golona (sababu 'au nange unanga 'a woi'i 'ai baju) kara 'o masipoini toma ḇanyo.

⁸Yesus 'ai me-mete'e ma lelegu ananga 'aḏi amono sisa talaga ma 'uḏu 'aḏi siduu'u 'a Petrus re ya taba'a manga j̱ala 'i romanga reo nyao'o. Ananga 'aḏi kiḏanga ua toma talaga ma 'uḏu ma giḏanga ḏa metere latu moi.

⁹Wakutu ananga 'aḏi 'uci tamanga oti ino, ananga 'aḏi oḏi'i 'age rema nyao'o 'osumu toma u'u ga'a 'i si'a'a reo konu'u, re 'o roti ḏi'i.

¹⁰Yesus 'o kanau ra ananga, “Ino ni gasa nyao'o ngai muḏuo i'a ga'a aro na sanga.”

¹¹Dadi Simon Petrus dadunu 'o mabalene toma oti, kara 'a taba'a manga j̱ala. Re j̱ala gena-ge 'i romanga reo nyao'o ma pa-pako: ma ngai latu moi re nyagi romotoa re ngai ro'ange. Kalaha so'o gena-ge, manga j̱ala 'i 'acingi ua.

¹²Yesus 'o kanau ra ananga, “Ino ngene wo oromo.” Matengo i'a mai ua 'aḏi sano, “ 'A guna nena-ne?” Sababu ananga 'aḏi waro Unanga nena-ne Ma Jou.

¹³Ḏua Yesus 'o masebanga i'a ra ananga re 'O 'oro roti, kara 'O pula'a ra ananga. Re ḏi'i, Unanga 'o 'oro nyao'o, kara 'O pula'a ra ananga.

¹⁴Dadi Yesus 'o masijumu ma soi ro'ange Unanga dadunu ro 'ahu moju toma ngowa'a senge-sengene manga sigolona.

¹⁵Ananga 'aḏi oromo togumu i'a, Yesus 'o sano ra Simon Petrus, “Simon, Yohanes 'ai ngowa'a nau'u,[13] Ngana no dadalara Ngoi lebe lamo'o i'a reo 'Ari me-mete'e ma lelegu 'aḏi dadalara Ngoi?” Unanga 'a sangoro, “Ya, Ma Jou reno waro mangale ngoi to dadalara Ma Jou.” Ḏua Yesus 'o kanau, “Na kadiarata 'Ari doba-doba.”

¹⁶Yesus 'o sano ma soi ḏiḏi ra unanga gena-ge, “Simon, Yohanes 'ai ngowa'a nau'u, ngana no dadalara Ngoi mode-mode'e?” Unanga 'a sangoro, “Ya Ma Jou reno waro mangale ngoi to dadalara Ma Jou.” Yesus 'o kanau, “Na kadiarata 'Ari doba-doba.”

¹⁷Yesus 'o sano ma soi ro'ange ra unanga gena-ge, “Simon, Yohanes 'ai ngowa'a nau'u, ngana no dadalara Ngoi mode-mode'e?” Petrus 'ai 'akala re sinyingara 'i kangela sababu Yesus 'o sano soi ro'ange, na'o unanga 'o dadalara Yesus mode-mode'e. Petrus dadunu 'o sangoro, “Ma Jou reno waro 'ori i'a mo-moini, Ma Jou rena waro mangale ngoi to dadalara Ma Jou.” Yesus 'o kanau, “Na kadiarata 'Ari doba-doba.”

¹⁸Yesus mau 'a sijumu ra Petrus mangale ḏuanga i'a Petrus 'ai se-sengene ma ngo'omo ga'a 'i silamo'o Ma Jou'ongu Madutu. Dadi Yesus 'o kanau, “No ngaku mode-mode'e 'Ari demo-demo nena-ne: Wakutu ngana no ra-ramasa ie moju, ngana no 'a'a bolo no mau 'oru ḇato mete'e 'ani 'akala re sinyingara ma mau. Mada'a na'o ngana reno piri'i, na sipula'a 'ani giama di'a ngowa'a lelegu ya piri'u, kara 'aḏi gasa ngana toma ngi'i ga'a na nyanyaḏi ua. Kalaha no sanga sangisara 'oru ḇato, ngana balasu mete'e Ngoi.”

²⁰Petrus 'o magelelo tai ḏuḏunu, unanga 'o oḏi'i Yesus 'ai me-mete'e ga'a 'o dadalara 'o tagi tuu'u ra ananga. (Wakutu ananga 'aḏi oromo Paskah, unanga gena-ge ro majoreke ra Yesus 'ai gumuḏu'u re 'o sano ra Unanga, “Ma Jou, 'a guna ga'a sipula'a Ma Jou Tani lawana?”)

²¹Wakutu Petrus 'o oḏi'i unanga gena-ge, Petrus 'o sano ra Yesus, “Ma Jou sa'olo reo unanga nena-ne?”

²²Yesus 'o sangoro, “Na'o Ngoi to mau unanga 'o 'ahu singadolo Ngoi dadunu to sapolo moju, gena-ge ngana 'ani 'urusana ua. Pa'i ngana no mete'e Ngoi ḇato.”

²³Sababu gena-ge habari nena-ne 'i rera re walata Tai me-mete'e manga sigolona mangale unanga gena-ge kama sengene ua. Momongolo ua Yesus 'o kanau so'o gena ua. Unanga 'o kanau, “Na'o Ngoi to mau unanga 'o 'ahu singadolo Ngoi dadunu to sapolo moju, gena-ge ngana 'ani 'urusana ua.”

²⁴Unanga[14] me-mete'e ga'a 'o pula'a sakisi mangale 'ori i'a mo-moini gena-ge ga'a unanga ra lefo toma boku nena-ne ma dara. Re ngene wa waro 'ai sakisi gena-ge 'i banari.

²⁵'Age ma repe moju ma lelegu ga'a Yesus 'a si'a'a. Na'o mo-moini gena-ge 'i silefo toma boku-boku, ngoi to fikiri dungia nena-ne 'i nga'unu ua gogono boku-boku gena-ge, sababu 'i repe woḏi.