Read Sahu Yohanes 3 Bible Online

Yohanes 3 - Sahu bible

Yohanes 3

¹'Age rema ngowa'a matengo 'ai lomanga Nikodemus. Unanga gena-ge ngowa'a Farisi re 'o osama nyo-nyoimi toma Mahkamah 'Agama.

²Toma utu moi 'o sapolo ra Yesus re 'o kanau, “Rabi,[2] ngoi to waro Jou guru ga'a Ma Jou'ongu Madutu 'U 'utusu. Sababu matengo i'a mai ua nga'unu 'o 'a'a ga'a hera-heranga ma tero sa'olo Jou, na'o Ma Jou'ongu Madutu 'o mamete'e ra unanga ua.”

³Yesus 'a sangoro, “No ngaku mode-mode'e 'Ari demo-demo nena-ne: Na'o ngowa'a matengo i'a dadunu sibuoro ua, unanga 'o osama nyo-nyoimi yoḏu'u ra Ma Jou'ongu Madutu 'ai Pareta.”

⁴Nikodemus 'o kanau, “Ma duhu sa'olo ngowa'a ga'a ro bi-biri'i 'ai ngina dadunu mu sibuoro moju?! Sanga ua, unanga 'o osama tai ngina mi po'olo, kara dadunu mu sibuoro moju!”

⁵Yesus 'a sangoro: “No ngaku mode-mode'e 'Ari demo-demo nena-ne: Na'o matengo i'a mau 'o osama nyo-nyoimi ra Ma Jou'ongu Madutu 'ai Pareta, unanga gena-ge balasu dadunu sibuoro moju. Enanga gena-ge 'i dadi sababu Ma Ngagara 'Ofi-'Ofi ma kuasa re 'i sijumu wakutu ananga 'aḏi sanga baptis.

⁶Manusia mo-moini manga ngina ya'u sibuoro. Mada'a 'ahu su-sungi tananga nyawa, Ma Ngagara 'Ofi-'Ofi ya sibuoro.

⁷No heranga awa na'o Ngoi to kanau so'o ne: ‘Ngini mo-moini balasu dadunu sibuoro moju.’

⁸Si'ade-'ade: Karawiana 'i hoa le'a ḇato, mete'e enanga ma mau. Ngene wa 'isene ma rurusu, mada'a 'i sapolo le'a ino wa waro ua, re 'i tagi le'a i'a ngene wa waro ua ḏi'i. So'o gena ḏi'i, matengo i'a ga'a Ma Ngagara 'Ofi-'Ofi ma kuasa 'u sibuoro.”

⁹Ḏua Nikodemus 'o sano, “Ma duhu sa'olo enanga gena-ge 'i dadi?”

¹⁰Yesus 'a sangoro, “Ngana nena-ne no dadi guru toma bangsa Israel, i'a sa'olo ngana na waro ua?!

¹¹No ngaku mode-mode'e 'Ari demo-demo nena-ne: Ngomi kanau pa'i mangale 'oru ga'a Ngomi ma waro, re mi pula'a sakisi pa'i mangale 'oru ga'a ngomi rema oḏi'i. Mada'a ngini ni dawongo ua ngomi minga sakisi.

¹²Ngini ni ngaku ua na'o Ngoi to sijarita ra ngini, mangale 'oru ga'a ri dadi toma dungia nena-ne. Dadi, na'o Ngoi to sijarita ra ngini mangale 'ori i'a ga'a 'i dadi toma soroga, tantu ḏua ngini ni ngaku ua ḏi'i!

¹³Matengo i'a mai nyangu ro pere da'u toma soroga. Pa'i Ngoi, Manusia ma Ngowa'a Nau'u, ga'a reto 'uci ḏua toma dungia, To waro 'oru 'i dadi toma soroga.

¹⁴'Ua re 'au wali toma daeraha baulaco, 'a Musa 'o sibere cuku'u tamḇaga toma ate jule moi, la ngowa-ngowa'a ga'a cuku'u-cuku'u ya'u tubu'u nyengara 'aḏi dadi la, sababu 'aḏi oḏi'i cuku'u tamḇaga gena-ge. So'o gena ḏi'i, Manusia ma Ngowa'a Nau'u balasu 'o sibere toma salib,

¹⁵la ngowa'a mo-moini ga'a 'aḏi ngaku Unanga, 'aḏi sanga 'ahu kasingado-ngadolo i'a.”

¹⁶Ma Jou'ongu Madutu 'o dadalara manusia toma dungia ma tero so'o ne: Unanga ro 'utusu 'Ai Ngowa'a Nau'u pa'i matengo, la 'a guna ḇato 'o ngaku 'Ai Ngowa'a Nau'u gena-ge, 'o iranga ua kasingado-ngadolo i'a, mada'a 'o sanga 'ahu kasingado-ngadolo i'a.

¹⁷Sababu Ma Jou'ongu Madutu 'o 'utusu 'Ai Ngowa'a Nau'u di'a sihukumu ua manusia toma dungia nena-ne, mada'a di'a sisalamata ananga gena-ge.

¹⁸'A guna ḇato 'o ngaku Ma Jou'ongu Madutu 'ai Ngowa'a Nau'u, Ma Jou'ongu Madutu ḏuanga i'a 'u sihukumu ua. Mada'a 'a guna ḇato 'o ngaku ua Ma Jou'ongu Madutu 'ai Ngowa'a Nau'u, unanga pa'i totoma ḇato di'a Ma Jou'ongu Madutu 'u sihukumu, sababu unanga gena-ge 'o ngaku ua Ma Jou'ongu Madutu 'ai Ngowa'a Nau'u, pa'i matengo.

¹⁹Yesus ro sapolo 'o gasa tarangi toma dungia nena-ne, mada'a manusia lebe sanangi hafu-hafu reo tarangi, sababu ananga manga ga'a ma jira. Sababu gena-ge, Ma Jou'ongu Madutu 'o sijuruhakimi manusia

²⁰Ngowa'a mo-moini ga'a 'aḏi 'a'a kajahatana ananga 'aḏi emono tarangi. Re ananga gena-ge 'aḏi oḏu'u sapolo toma tarangi, la manga ga'a ma jira gena-ge, ngowa'a ya oḏi'i awa.

²¹Mada'a 'a guna ḇato ga'a 'o 'ahu mete'e Ma Jou'ongu Madutu 'ai ba-banari, unanga 'o sapolo toma tarangi, la ngowa'a nyengara 'aḏi oḏi'i unanga gena-ge 'o mete'e mode-mode'e Ma Jou'ongu Madutu 'ai 'akala ma mau.

²²Palisi i'a Yesus re 'Ai me-mete'e, ananga 'aḏi tagi toma daeraha Yudea. Yesus 'o tegoro ma di'ara wange muḏuo i'a re Unanga 'o baptis ngowa'a toma ngi'i gena-ge.

²³Wakutu 'a Yohanes 'o osama bui nyangu, Unanga 'o baptis ngowa'a toma limau Ainon, kiḏanga ua toma limau Salim, sababu ngi'i gena-ge ma ḇanyo lai repe. Ngowa-ngowa'a matai sapolo ra unanga re unanga ya'u baptis ananga.

²⁵'A Yohanes 'ai me-mete'e nga muḏuo i'a 'aḏi ma'u tolabe reo ngowa'a Yahudi mangale sigofi mete'e 'agama ma 'atoranga, la 'aḏi najis ua.

²⁶'A Yohanes 'ai me-mete'e gena-ge, ananga 'aḏi sapolo ra Yohanes re 'aḏi kanau, “Rabi,[3] ngana no 'elingi bolo ua?! 'Age rema ngowa'a matengo ga'a mamete'e ra ngana da'a Ḇanyo Yordan kaci moi ga'a ngana no sijumu ra ngomi 'au nga'ene?! Unanga nange-ne 'O baptis ngowa'a ḏi'i re ngowa'a manga repe 'aḏi sapolo ra Unanga!”

²⁷Yohanes 'a sangoro: “Mo-moini ga'a manusia ya sanga, enanga gena-ge ma 'asala ra Ma Jou'ongu Madutu tala.

²⁸Ngini masiretene rena 'isene 'oru ga'a ngoi to kanau, ‘Ngoi nena-ne 'O Kristus ua, mada'a Ma Jou'ongu Madutu 'o 'utusu ngoi to siḏa ra Unanga.’

²⁹Geri molo'ara we-were'a gena-ge di'a geri molo'ara na-nau'u. Geri molo'ara na-nau'u 'ai ḏagilomu pa'i totoma re 'o 'isene di'a unanga 'ai sapolo. Unanga gena-ge 'o maroanga na'o 'o 'isene geri molo'ara na-nau'u 'ai iḏingi. Ngoi nena-ne ma tero sa'olo geri molo'ara na-nau'u 'ai ḏagilomu. Sababu gena-ge, ngoi 'ari roanga 'i ti-tiai sababu 'oru ga'a ngini reni siajele ra ngoi.

³⁰Unanga balasu 'o dadi ngowa'a lebe la-lamo'o, mada'a ngoi balasu to dadi ngowa'a lebe mapake ua.”

³¹Unanga ngowa'a matengo ga'a 'o sapolo da'u soroga tala, lebe la-lamo'o reo ngowa'a mo-moini. Mada'a matengo ga'a 'ai 'asala toma dungia nena-ne pa'i manusia ḇato, re 'o siajele dungia ma ngale-ngale. Mada'a ngowa'a matengo ga'a 'o sapolo da'u soroga tala lebe la-lamo'o reo ngowa'a mo-moini.

³²Unanga 'o kanau mangale 'oru ga'a Unanga ra oḏi'i re Ra 'isene, mada'a matengo i'a mai ua ya ngaku Unanga 'ai sakisi.

³³Mada'a 'a guna ḇato ga'a 'a dawongo Unanga 'ai sakisi, ananga 'aḏi 'akoru mangale Ma Jou'ongu Madutu 'ai demo-demo 'i banari.

³⁴Sababu ngowa'a matengo ga'a Ma Jou'ongu Madutu 'o 'utusu Unanga gena-ge 'a singadolo Ma Jou'ongu Madutu 'ai demo-demo. Re Ma Jou'ongu Madutu 'o siromanga Unanga reo Ma Ngagara 'Ofi-'Ofi.

³⁵Ma Jou'ongu Madutu 'o dadalara 'Ai Ngowa'a Nau'u re 'O pula'a mo-moini ḏua 'Ai kuasa.

³⁶'A guna ga'a ngaku Ma Jou'ongu Madutu 'ai Ngowa'a Nau'u, unanga 'o sanga 'ahu kasingado-ngadolo i'a. Mada'a 'a guna ga'a 'o ngaku ua, unanga 'o sanga ua 'ahu kasingado-ngadolo i'a, mada'a ḏuanga i'a 'o sanga hukumu kasingado-ngadolo i'a.