Read Sahu Yohanes 4 Bible Online

Yohanes 4 - Sahu bible

Yohanes 4

¹Ḏua ngowa'a Farisi ya 'isene mangale Yesus 'o baptis ngowa'a lebe repe rea Yohanes,

²(Ma nyonyata Yesus masiretene 'o baptis ua, mada'a 'Ai me-mete'e ananga gena-ge 'aḏi baptis ngowa'a.)

³Wakutu Ma Jou 'a waro mangale ngowa'a Farisi raḏi isene habari gena-ge, Unanga 'a sisoi'i tala daeraha Yudea re 'O tagi toma daeraha Galilea.

⁴Yesus 'ai ḏo-ḏagi gena-ge balasu tola'a i'a daeraha Samaria.

⁵Yesus 'o ngadolo toma limau Sikhar, daeraha Samaria. Limau gena-ge kiḏanga ua re 'o tana'a ga'a ma siḏa 'a Yakub ra sibalangu di'a 'ai ngowa'a nau'u, 'a Yusuf.

⁶Toma limau Sikhar ma ḏuḏunu, 'age Yakub 'ai sumu. Yesus 'o basono tala momoro masala Tai ḏo-ḏagi ma dara. Sababu gena-ge, Unanga 'o mangomasa toma sumu gena-ge ma gagoro. 'Orasa gena-ge ḏa ca'olo nyagi moi re romoḏiḏi.

⁷Dadi Yesus 'ai me-mete'e 'aḏi tagi di'a tibo ngo-ngoromo toma limau ma dara. Togumu i'a, we-were'a Samaria matengo mo sapolo 'onyo'o ḇanyo toma sumu gena-ge. Yesus 'o kanau i'a ra munanga, “Meme, nyengara no pula'a ḇanyo di'a ngoi ta ka'e?”

⁸

⁹We-were'a Samaria mo kanau i'a ra Yesus, “Tuanga ngowa'a Yahudi, ngoi we-were'a Samaria. Dadi i'a sa'olo Tuanga no golo'o ka'e ḇanyo ra ngoi?” (Ngowa'a Yahudi re ngowa'a Samaria 'aḏi ma'u sabi ḏuḏunu)

¹⁰Yesus 'a sangoro, “Na'o ngana na waro mangale Ma Jou'ongu Madutu 'ai bu-bula'a re Ngoi nena-ne 'a guna ga'a to golo'o ka'e ra ngana, tantu ḏua, ngana masiretene ḏuanga i'a no golo'o ka'e ḇanyo ra Ngoi, re Ngoi to pula'a ḇanyo 'ahu ra ngana.”

¹¹We-were'a gena-ge mo sangoro, “Tuanga 'ani sisiala 'i cua, re sumu nena-ne lai ngido tala. Dadi le'a ino, Tuanga no sanga ḇanyo 'ahu gena-ge?

¹²Yakub, ngomi minga ete re dotumu 'o sidodahe sumu nena-ne di'a ngomi. Unanga masiretene 'a ka'e ḇanyo nena-ne re ḏi'i 'ai ngowa-ngowa'a nau'u re 'ai haiwani. I'a sa'olo Tuanga no ta'ajiri Tuanga lebe la-lamo'o rea Yakub?!”

¹³Yesus 'o kanau, “ 'A guna 'o ka'e ḇanyo nena-ne 'ai camala dudungu moju.

¹⁴Mada'a 'a guna 'o ka'e ḇanyo ga'a Ngoi to pula'a, ananga manga camala dudungu riwara nena re si'a. Sababu ḇanyo ga'a Ngoi to pula'a gena-ge enanga 'i dadi ḇanyo ma la'o tamanga lese ma dara ga'a 'i sipula'a ḇanyo 'ahu re 'ahu kasingado-ngadolo i'a.”

¹⁵We-were'a gena-ge mo kanau, “Tuanga, no pula'a ḇanyo gena-ge, la ngoi 'ari camala kama dudungu riwara nena re si'a re to sapolo 'ane riwara di'a to 'onyo'o ḇanyo.”

¹⁶Yesus 'o kanau ra munanga, “No maḏibo re no gasa 'ani nau'u ino 'ane.”

¹⁷We-were'a gena-ge mo sangoro, “Ngoi kari nau'u ua.” Yesus 'o kanau ra munanga, “Tero mode'e.”

¹⁸Sababu ngana no molo'ara soi romotoa ḏua, re na-nau'u ga'a 'ahu marimoi ra ngana, gena-ge 'ani nau'u ua. Dadi 'ani demo 'i banari masala.

¹⁹We-were'a gena-ge mo kanau, “Nange-ne ngoi to waro Tuanga nena-ne Nabi!

²⁰Ngomi minga ete re dotumu ananga gena-ge 'aḏi silamo'o re siḏubuso Ma Jou'ongu Madutu toma kie nena-ne. Mada'a Tuanga 'ani bangsa 'aḏi kanau, pa'i ma ngi'i toma limau Yerusalem ḇato ga'a ngowa'a balasu 'aḏi silamo'o re siḏubuso Ma Jou'ongu Madutu.”

²¹Yesus 'o kanau, “No ngaku Ngoi. Ḏuanga i'a ma 'orasa 'i ngadolo wakutu ngowa'a 'aḏi silamo'o re siḏubuso Ma Jou'ongu Madutu toma ngi'i le'a ḇato; pa'i toma kie nena-ne ḇato ua bolo pa'i toma limau Yerusalem ḇato ua ḏi'i.

²²Ngini ngowa'a Samaria ni silamo'o re siḏubuso 'oru ga'a ngini masiretene na nana'o ua. Mada'a ngomi ngowa'a Yahudi mi silamo'o re siḏubuso Unanga ga'a ngomi mi nana'o, sababu ngowa'a matengo ga'a ḏuanga i'a 'o gasa salamata toma ngowa'a Yahudi manga sigolona.

²³Mada'a enanga ma 'orasa ḏuanga i'a 'i ngadolo - re nange-ne ma 'orasa gena-ge 'i ngadolo ḏua - wakutu ngowa-ngowa'a ga'a mau 'aḏi silamo'o re siḏubuso Ma Jou'ongu Madutu manga Ḇaḇa ananga gena-ge balasu 'aḏi pake Ma Ngagara 'Ofi-'Ofi re pa'i 'aḏi mete'e Ma Jou'ongu Madutu 'ai ba-banari ḇato. Sababu ananga ga'a 'aḏi silamo'o re siḏubuso so'o gena-ge 'aḏi sisanangi Ma Jou'ongu Madutu 'ai 'akala re sinyingara.

²⁴Ma Jou'ongu Madutu gena-ge Roh. Dadi 'a guna ḇato mau 'o silamo'o re siḏubuso Unanga, ananga gena-ge balasu 'o pake Ma Ngagara 'Ofi-'Ofi re pa'i mete'e Ma Jou'ongu Madutu 'ai ba-banari ḇato.”

²⁵We-were'a gena-ge mo kanau i'a ra Yesus, “Ngoi to waro 'O Mesias (ma ngale: 'O Kristus) ḏuanga i'a 'o sapolo. Wakutu 'o sapolo, Unanga ḏuanga i'a 'o sitarangi mangale 'ori i'a mo-moini ra ngene.”

²⁶Yesus 'a sangoro, “Ngoi nena-ne Unanga ga'a to ka-kanau ra ngana.”

²⁷Toma 'orasa gena-ge, Yesus 'ai me-mete'e 'aḏi ḏibo re 'aḏi heranga sababu 'aḏi sanga i'a Yesus 'o ma'u kanau reo we-were'a Samaria gena-ge. Mada'a matengo i'a mai ua 'o nau'u di'a sano toma we-were'a gena-ge, “Meme no paralu 'oru?” bolo, 'o sano ra Yesus, “I'a sa'olo Tuanga no makanau reo munanga nena-ne?”

²⁸Gena ḏua, we-were'a gena-ge ma sisoi'i tala 'ami tampayanga re mo ḏibo jau-jau toma limau ma dara, re mo siajele toma ngowa-ngowa'a 'age,

²⁹“Ino ngini ni oḏi'i ngowa'a matengo ga'a 'o siajele ra ngoi mangale 'oru ḇato ga'a ngoi ta si'a'a ḏua! Ḏa Unanga gena-ge 'O Kristus!”

³⁰Ngowa-ngowa'a gena-ge 'aḏi sisoi'i tala limau re 'aḏi tagi ma'u sanga ra Yesus.

³¹Toma 'orasa gena-ge, Yesus 'ai me-mete'e 'aḏi sinyika Unanga 'o oromo. Ananga 'aḏi kanau, “Rabi[4], ino ngene wo oromo si.”

³²Mada'a Yesus 'a sangoro, “Ra Ngoi rema ngo-ngoromo ga'a ngini na waro ua.”

³³Ḏua, Yesus 'ai me-mete'e 'aḏi ma'u sano matengo re matengo, “ 'A guna gasa ngo-ngoromo di'a Yesus 'a oromo wakutu ngomi mi cua 'ane?”

³⁴Yesus 'o kanau ra ananga, “Mete'e Ma Jou'ongu Madutu ga'a Ro 'utusu Ngoi, Unanga 'ai mau re siḏuanga munara ga'a Unanga ro pula'a ra Ngoi, gena-ge Ngoi 'ari ngo-ngoromo!

³⁵Ngini ni kanau, ‘Ngara rata moju, 'orasa 'utu'u 'i ngadolo.’ Mada'a Ngoi to siajele ra ngini nena-ne: Oḏi'i gandum toma guḏa ma siḇauru i'a, enanga 'i totoma pa'i wa 'utu'u ḇato!

³⁶Nange-ne ngowa'a 'utu-'utu'u 'aḏi sanga manga ngogele. Dadi ngowa'a ga'a siare gisisi re ngowa'a 'utu-'utu'u, ananga mo-moini 'aḏi sanangi. Gena-ge ma hasili ma ngale: ngowa'a ga'a raḏi sanga 'ahu kasingado-ngadolo i'a.

³⁷Dolabololo nena-ne 'i banari, ‘Matengo i'a 'o siare gisisi re ngowa'a lelegu 'o 'utu'u.’

³⁸Ngoi to 'utusu ngini ni tagi di'a ni 'utu'u toma guḏa ga'a ngini ni munara ua. Ngowa'a lelegu raḏi munara siḏa, mada'a ngini sanga 'utungu toma ngowa'a manga galasau'u ma duduala.”

³⁹Toma limau gena-ge ngowa'a Samaria manga repe 'aḏi ngaku Yesus, sababu we-were'a nange-ge 'ami sakisi: “Unanga 'o siajele ra ngoi mangale 'oru ḇato ga'a ngoi ta si'a'a ḏua!”

⁴⁰Sababu gena-ge, ngowa-ngowa'a Samaria 'aḏi tagi ma'u sanga ra Yesus re 'aḏi golo'o Unanga di'a 'O tuḏu ra ananga. Dadi Unanga 'o tuḏu ra ananga ma di'ara wange ḏiḏi.

⁴¹Re ngowa'a manga repe moju 'aḏi ngaku Yesus, sababu ananga masiretene ya 'isene 'Ai do-doto'o.

⁴²Ḏua ananga gena-ge 'aḏi kanau i'a toma we-were'a gena-ge, “Nange-ne ngomi remi ngaku mode-mode'e mada'a pa'i sababu 'ani demo ḇato ua, mada'a sababu remi 'isene masiretene Unanga 'ai demo-demo re ngomi remi waro Unanga gena-ge Salamata ma Cimi mode-mode'e di'a dungia nena-ne.”

⁴³Palisi'i wange ḏiḏi, Unanga tagi toma daeraha Galilea.

⁴⁴'Au nga'ene, Yesus masiretene ro kanau, “Nabi matengo, ngowa'a 'u silamo'o ua tai daeraha masiretene.”

⁴⁵Mada'a wakutu Yesus 'o sapolo toma daeraha Galilea, ngowa-ngowa'a 'aḏi dawongo Unanga remanga 'akala re sinyingara sa-sanangi, sababu ananga raḏi oḏi'i Unanga 'o 'a'a ga'a hera-heranga toma limau Yerusalem wakutu ananga raḏi malomu toma Paskah ma Wangere.

⁴⁶Gena ḏua, Yesus dadunu 'o maḏibo toma limau Kana, daeraha Galilea, ngi'i ga'a Unanga ro si'a'a ḇanyo 'i dadi 'anggur. 'Age toma limau Kapernaum pegawe kadato matengo 'ai ngowa'a nau'u siḏi lai siḏi.

⁴⁷Wakutu unanga gena-ge 'o 'isene Yesus ro sapolo toma daeraha Galilea da'a Yudea ino, unanga 'o tagi ra Yesus re 'o maḏigaro'o ra Unanga, la Unanga 'o tagi toma limau Kapernaum di'a si-la 'ai ngowa'a nau'u ga'a sa'i 'o sengene.

⁴⁸Yesus 'o kanau i'a toma pegawe kadato gena-ge, “Na'o ngini ni oḏi'i nyangu didina'o heranga re 'ori i'a hera-heranga, ngini ni ngaku ua!”

⁴⁹Pegawe kadato gena-ge 'o kanau ra Yesus, “Tuanga, capati no tagi, 'ari ngowa'a nau'u sa'i 'o sengene.”

⁵⁰Yesus 'o kanau ra unanga, “Tagi ḇato 'ani ngowa'a nau'u ro la.” Unanga gena-ge 'o ngaku mode-mode'e Yesus 'ai demo-demo, dadi 'o tagi maḏibo.

⁵¹Toma ḏo-ḏagi ma dara moju, pegawe kadato gena-ge 'ai falalomu-falalomu 'aḏi sapolo ma'u sanga ra unanga re 'aḏi siajele ra unanga mangale 'ai ngowa'a nau'u ga'a 'o siḏi ro la.

⁵²Ḏua unanga 'o sano tai falalomu-falalomu gena-ge, ca'olo muḏuo 'ari ngowa'a nau'u ro la. Ananga ya sangoro, “ 'Au nyigo wangere 'olona ḏa ca'olo rimoi, 'ai gagama ri iranga.”

⁵³Ḏua unanga, ma ḇaḇa 'a si'elingi ie, 'au nyigo toma 'orasa ḏa ca'olo rimoi, Yesus 'o kanau ra unanga, “ 'Ani ngowa'a ro la.” Dadi mulaingi 'orasa gena-ge re si'a, unanga re 'ai ngitu re ngale, ananga mo-moini 'aḏi ngaku Yesus.

⁵⁴Gena-ge didina'o heranga ma soi ḏiḏi ga'a Yesus 'a si'a'a toma daeraha Galilea wakutu Unanga 'o maḏibo da'a daeraha Yudea ino.