Read Sahu Yohanes 5 Bible Online

Yohanes 5 - Sahu bible

Yohanes 5

¹Palisi i'a Yesus 'o tagi toma limau Yerusalem di'a 'o mete'e ngowa'a Yahudi manga wangere lamo'o.

²Toma limau Yerusalem co-cori, “Ngalana Doba” 'age rema ma'ori'i ma ngi'i ga'a toma demo 'Ibrani si'aro'o Betesda, rema gandaria romotoa.

³Toma gandaria-gandaria gena-ge, 'age rema ngowa'a siḏi manga repe: ngowa'a hafu, ngowa'a cug̱a, re ngowa'a ḇolo. Ananga mo-moini 'aḏi lu-lulu re 'aḏi totoma na'o ḇanyo gena-ge 'i lupe.

⁴Sababu soi rai o'o i'a mala'ekata matengo 'o sapolo toma ngi'i gena-ge re ya silupe ma ḇanyo. Re ngowa'a siḏi matengo ga'a 'uci siḏa toma ḇanyo gena-ge wakutu ḇanyo lupe-lupe moju, unanga 'o dadi la.

⁵Toma ngi'i gena-ge rema na-nau'u matengo ga'a ro siḏi ma di'ara musungu nyagi ro'ange re tu'angere ḏua.

⁶Yesus 'o oḏi'i na-nau'u gena-ge pa'i 'o lu-lulu re ra disa waro unanga ro siḏi ma di'ara ḏua. Yesus 'o sano ra unanga gena-ge, “Ngana mau no la?”

⁷Unanga 'a sangoro, “Jou, 'age 'a guna ua di'a singosama ngoi toma ḇanyo, na'o ma ḇanyo enanga 'i lupe. Wakutu ngoi to jau i'a toma ḇanyo, ngowa'a lelegu lebe ngadolo siḏa.”

⁸Dadi Yesus 'o kanau ra unanga, “Momi'i ie, na lolo 'ani jungutu re no tagi.”

⁹Toma 'orasa gena-ge ḏua, unanga ro la, re 'a lolo 'ai jungutu re 'o tagi. Gena-ge sidaene i'a toma Sabata ma wangere.

¹⁰Sababu gena-ge, ngowa'a Yahudi manga bi-biri'i 'aḏi kanau i'a toma ngowa'a ga'a ro la gena-ge, “Wangere nange-ne Sabata ma wangere re Musa 'ai hukumu 'i wosono ngana na gasa 'ani jungutu toma wangere nena-ne!”

¹¹Ngowa'a gena-ge 'a sangoro, “Unanga ga'a 'o si-la ngoi gena-ge 'O kanau ra ngoi, ‘Na lolo 'ani jungutu re no tagi.’ ”

¹²Dadi ananga gena-ge 'aḏi sano unanga, “ 'A guna Unanga gena-ge ga'a 'o soma'a ngana na lolo 'ani jungutu re no tagi?”

¹³Mada'a ngowa'a ga'a ro la gena-ge, 'a waro ua sababu Yesus ro masicapuru toma ngowa'a repe.

¹⁴Togumu i'a, Yesus 'o ma'u sanga ngowa'a gena-ge ra Ma Jou'ongu Madutu 'ai Wala ma soana. Yesus 'o kanau ra unanga, “Nange-ne ngana reno la. Awa no 'a'a ḏosa moju, la awa na sanga ma bahala lebe tubuso i'a.”

¹⁵Gena ḏua, ngowa'a gena-ge 'o tagi re 'o masiajele toma Yahudi manga bi-biri'i mangale Yesus 'o si-la unanga.

¹⁶Sababu gena-ge, Yahudi manga bi-biri'i mulaingi 'U sikangela Yesus, sababu Unanga 'o si-la ngowa'a toma Sabata ma wangere.

¹⁷Yesus 'o kanau i'a ra ananga, “ 'Ari Ḇaḇa 'o munara tau-taunu singadolo 'orasa nange-ne, re Ngoi to munara ḏi'i.”

¹⁸Yesus 'ai demo-demo gena-ge si'a'a ngowa'a Yahudi manga bi-biri'i ganapu disa ngo'omo di'a mau sisengene Unanga. Sababu pa'i Yesus 'a mete'e ua ḇato ananga manga 'agama ma 'atoranga mangale Sabata ma wangere, mada'a Unanga masiretene ḏi'i ro kanau, Ma Jou'ongu Madutu Unanga 'ai Ḇaḇa re dadi Unanga 'a site-tero 'ai diri ma tero sa'olo Ma Jou'ongu Madutu.

¹⁹Yesus 'a sangoro ra ananga so'o ne: “Ni ngaku mode-mode'e 'Ari demo-demo nena-ne: Ngoi, Ma Jou'ongu Madutu 'ai Ngowa'a Nau'u, to 'a'a 'oru ḇato Rari kuasa masiretene yoḏu'u. Ngoi nyengara to 'a'a 'ori i'a pa'i mete'e 'oru ga'a Ngoi reto oḏi'i 'Ari Ḇaḇa ro si'a'a ḏua. Sababu 'oru ḇato 'Ari Ḇaḇa 'a si'a'a, gena-ge ḏi'i Ngoi, 'Ai Ngowa'a Nau'u, ta si'a'a.

²⁰Gena-ge 'i dadi sababu 'Ari Ḇaḇa 'o dadalara Ngoi, 'Ai Ngowa'a Nau'u, re 'o sijumu mo-moini ga'a Unanga 'a si'a'a ra Ngoi. Sidogo ḏi'i, 'Ari Ḇaḇa 'o sijumu Tai Ngowa'a Nau'u 'ori i'a lebe lamo'o i'a ḏi'i, singadolo ngini ni dadi heranga:

²¹'Ari Ḇaḇa dadunu 'o si'ahu moju ngowa'a senge-sengene, re 'O pula'a 'ahu kasingado-ngadolo i'a ra ananga. So'o gena ḏi'i Ngoi, 'Ai Ngowa'a Nau'u, To pula'a 'ahu kasingado-ngadolo i'a ra guna ḇato mete'e 'Ari mau.

²²Sidogo ḏi'i, 'Ari Ḇaḇa masiretene 'O sijuruhakimi 'a guna ua sababu 'Ai kuasa mo-moini Unanga ra sipula'a ra Ngoi, 'Ai Ngowa'a Nau'u, di'a sijuruhakimi manusia.

²³'Ari Ḇaḇa 'a si'a'a so'o gena, la ngowa'a mo-moini 'aḏi silamo'o Ngoi ma tero sa'olo ananga 'aḏi silamo'o Unanga. 'A guna ḇato ga'a silamo'o ua 'Ai Ngowa'a Nau'u, silamo'o ua ḏi'i 'Ai Ḇaḇa ga'a 'utusu ḏua Unanga gena-ge.

²⁴Ni ngaku mode-mode'e 'Ari demo-demo nena-ne: 'A guna ga'a 'a totoho mode-mode'e 'Ari demo-demo gena-ge re 'o ngaku Unanga ga'a Ro 'utusu Ngoi, unanga gena-ge 'o sanga hukumu ua mada'a 'o sanga 'ahu kasingado-ngadolo i'a. Unanga gena-ge ro malage toma ngowa'a senge-sengene ma ngi'i re ro sanga 'ahu kasingado-ngadolo i'a.

²⁵Ni ngaku mode-mode'e 'Ari demo-demo nena-ne: Ḏuanga i'a ma 'orasa 'i ngadolo - re nange-ne 'orasa gena-ge 'i ngadolo ḏua - wakutu ngowa'a ga'a ma tero sa'olo ngowa'a senge-sengene, ananga gena-ge 'aḏi 'isene Ma Jou'ongu Madutu 'ai Ngowa'a Nau'u 'ai iḏingi. Re ngowa'a ga'a ya totoho, ananga ḏuanga i'a 'aḏi 'ahu.

²⁶Ma tero sa'olo 'Ari Ḇaḇa masiretene 'o dadi 'ahu ma cimi, so'o gena ḏi'i, Ngoi, 'Ai Ngowa'a Nau'u masiretene, To dadi 'ahu ma cimi ḏi'i, sababu Unanga ro pula'a 'Ai kuasa ra Ngoi.

²⁷Re ḏi'i, Unanga ro pula'a ḏua 'Ai kuasa ra Ngoi, 'Ai Ngowa'a Nau'u, di'a sijuruhakimi manusia, sababu Ngoi Manusia Ma Ngowa'a Nau'u.

²⁸Awa ni heranga ni 'isene so'o gena-ge, sababu ḏuanga i'a ma 'orasa 'i ngadolo wakutu ngowa-ngowa'a raḏi sengene mo-moini ananga 'aḏi 'isene 'Ari iḏingi.

²⁹Ananga 'aḏi supu toma kubu ma dara ie. Ngowa'a ga'a manga de'oso re ḏegoro ri la-la, ananga 'aḏi dadunu 'ahu moju di'a sanga 'ahu kasingado-ngadolo i'a. Mada'a ngowa'a ga'a manga de'oso re ḏegoro ri cira, ananga 'aḏi dadunu 'ahu moju di'a sanga hukumu kasingado-ngadolo i'a.”

³⁰“Ngoi masiretene To 'a'a 'ori i'a mete'e 'Ari mau yoḏu'u. Ngoi pa'i to sijuruhakimi mete'e sa'olo 'Ari Ḇaḇa 'o siajele ra Ngoi. 'Ari putusanga gena-ge 'i 'adili, sababu Ngoi ta mete'e 'Ari mau masiretene ua, mada'a To mete'e 'Ari Ḇaḇa 'Ai mau, Unanga ga'a Ro 'utusu Ngoi.

³¹Na'o Ngoi to pula'a sakisi mangale 'Ari diri masiretene, sakisi gena-ge ngowa'a ya ngaku ua.

³²Mada'a 'age ngowa'a lelegu, ga'a pula'a sakisi mangale Ngoi, re Ngoi ta waro mangale sakisi gena-ge 'i banari.

³³Ngini reni 'utusu ngowa'a di'a 'aḏi sapolo ra Yohanes, re unanga ro pula'a sakisi ga'a 'i banari mangale Ngoi.

³⁴Mada'a Ngoi to paralu ua sakisi toma manusia ino. Ngoi to si'elingi ngini mangale Yohanes 'ai sakisi, la ngini ni sanga salamata.

³⁵'A Yohanes ma tero sa'olo lapuru ga'a 'i sipula'a cahaya. Ngini ni maroanga di'a ni 'isene 'ai demo-demo, mada'a pa'i ngasamoi ḇato.

³⁶Mada'a 'age sakisi ga'a lebe lamo'o i'a rea Yohanes. Gena-ge 'Ari munara ga'a Ngoi ta si'a'a nange-ne re 'Ari Ḇaḇa ro sipula'a munara gena-ge ra Ngoi di'a Ta siḏuanga. Munara gena-ge masiretene 'i pula'a sakisi mangale 'Ari Ḇaḇa Ro 'utusu Ngoi.

³⁷Re ḏi'i, 'Ari Ḇaḇa masiretene ga'a Ro 'utusu Ngoi 'O pula'a sakisi mangale Ngoi. Ngini ni 'isene ua Unanga 'ai iḏingi bolo ni oḏi'i ua Unanga 'ai rupa.

³⁸Ḏi'i 'Ai demo-demo 'i gogono ua taninga 'akala re sinyingara ma dara sababu ni ngaku Ngoi ua, Unanga 'Ai 'utusana.

³⁹Ngini ni madoto'o la-la Boku 'Ofi-'Ofi sababu ni ta'ajiri na'o ngini ni 'a'a so'o gena-ge ni sanga 'ahu kasingado-ngadolo i'a. Ma nyonyata, Boku 'Ofi-'Ofi gena-ge 'i pula'a sakisi mangale Ngoi!

⁴⁰Mada'a ngini masiretene ni oḏu'u sapolo ra Ngoi, la ni sanga 'ahu kasingado-ngadolo i'a.

⁴¹Ngoi to disa ua manusia manga puji re silamo'o,

⁴²sababu Ngoi tini nana'o ngini. Ngoi tini waro ngini ninga 'akala re sinyingara ma dara ni dadalara ua Ma Jou'ongu Madutu.

⁴³Ngoi to sapolo rari Ḇaḇa 'Ai kuasa, mada'a ngini ni dawongo Ngoi ua. Mada'a na'o ngowa'a lelegu 'aḏi sapolo remanga kuasa masiretene, ngini na'u dawongo ananga!

⁴⁴Ngini ni ma'u dawongo puji re silamo'o matengo re matengo, mada'a ni makutale ua sanga puji re silamo'o ra Ma Jou'ongu Madutu tala, ga'a Unanga pa'i matengo ḇato. Dadi sanga ua, ngini ni ngaku Ngoi.

⁴⁵Awa ni ta'ajiri Ngoi tini kalaki ra Ma Jou'ongu Madutu. Mada'a nabi Musa ḏuanga i'a nu kalaki ngini. Enanga gena-ge Musa 'ai hukumu ga'a ngini na ta'ajiri 'i nyengara sisalamata ngini.

⁴⁶Momongolo ua, 'a Musa ro lefo ḏi'i mangale Ngoi. Dadi na'o ngini ni ngaku 'a Musa 'ai demo, ngini ḏi'i ni ngaku Ngoi.

⁴⁷Mada'a ngini ni ngaku ua 'oru ga'a Musa 'a silefo ḏua. Dadi tantu ḏua, ngini ni ngaku ua ḏi'i 'oru ga'a Ngoi to siajele ra ngini!”