Read Sahu Yohanes 7 Bible Online

Yohanes 7 - Sahu bible

Yohanes 7

¹Palisi i'a Yesus 'o tagi le'a ḇato toma daeraha Galilea. Unanga 'o oḏu'u tagi toma daeraha Yudea, sababu Yahudi manga bi-biri'i da'a 'aḏi mau sisengene Unanga.

²Mada'a wakutu gena-ge sa'i co-cori wangere lamo'o wakutu ngowa'a 'aḏi tegoro toma suyu'u ma 'atu ate ma so'a,

³Yesus 'ai no-nongoḏu 'aḏi kanau ra Unanga, “No sisoi'i tala ngi'i nena-ne, re tagi toma daeraha Yudea, la 'Ani me-mete'e da'a nga'unu 'aḏi oḏi'i 'Ani ga'a hera-heranga ḏi'i.

⁴Sababu matengo i'a mai ua ga'a 'o mau dadi ngowa'a la-lamo'o 'a gogono 'ai ga'a. Na'o Jou nga'unu no 'a'a ga'a hera-heranga, No tagi re No sijumu enanga gena-ge, la ngowa'a mo-moini toma dungia sitabi donga nyengara ya oḏi'i.”

⁵(Ananga 'aḏi kanau so'o gena-ge sababu 'Ai no-nongoḏu mai 'aḏi ngaku Unanga ua.)

⁶Sababu gena-ge, Yesus 'o kanau ra ananga, “Ngoi 'ari 'orasa 'i ngadolo nyangu di'a to tagi toma limau Yerusalem. Mada'a ra ngini, 'orasa 'oru ḇato ni nyengara tagi toma limau Yerusalem,

⁷sababu matengo i'a mai ua 'o emono ngini. Mada'a di'a Ngoi, ngowa'a toma dungia nena-ne raḏi emono Ngoi, sababu Ngoi to siajele ra ananga mangale manga ga'a 'i cira.

⁸Dadi ngini ni tagi masiretene toma laya gena-ge, Ngoi to tagi ua, sababu Ngoi 'ari 'orasa 'i ngadolo nyangu.”

⁹Yesus 'o kanau so'o gena-ge Tai no-nongoḏu, dadi Unanga 'o tegoro moju toma daeraha Galilea.

¹⁰Yesus 'ai no-nongoḏu 'aḏi tagi toma laya suyu'u ma 'atu ate ma so'a toma limau Yerusalem. Wakutu ananga gena-ge raḏi tagi siḏa togumu i'a, Yesus 'o siduu'u matengo, 'o masigogoro toma laya gena-ge. Dadi matengo i'a mai ua 'o waro Unanga 'o mete'e laya gena-ge.

¹¹Toma laya gena-ge, Yahudi manga bi-biri'i 'aḏi disa Unanga re 'aḏi sano-sano, “Unanga le'a?”

¹²Toma laya gena-ge ma dara, ngowa'a repe 'aḏi ma'u jujuḏu mangale Unanga. Mamuni'a 'aḏi kanau, “Unanga ngowa'a la-la.” Mada'a mamuni'a ḏi'i 'aḏi kanau, “Ua, Unanga 'o sihaga ngowa'a repe.”

¹³Mada'a matengo i'a mai ua 'o kanau sibio-biono i'a mangale Unanga sababu ananga 'aḏi mojongo Yahudi manga bi-biri'i.

¹⁴Toma laya ma si'olona i'a, Yesus 'o supu re 'O osama ra Ma Jou'ongu Madutu 'ai Wala ma soana re mulaingi 'O doto'o ngowa-ngowa'a toma ngi'i gena-ge.

¹⁵Dadi Yahudi manga bi-biri'i 'aḏi heranga masala re 'aḏi kanau, “Unanga ne kama sokola ua, mada'a 'Ai wo-waro ma repe mangale Boku 'Ofi-'Ofi!”

¹⁶Yesus 'a sangoro, “Ngoi to doto'o 'Ari do-doto'o ua, mada'a do-doto'o ra Unanga ga'a Ro 'utusu Ngoi.

¹⁷'A guna ḇato ga'a mau mete'e Ma Jou'ongu Madutu 'ai 'akala ma mau, ananga gena-ge ḏuanga i'a ya disa waro 'oru ga'a Ngoi to doto'o ma 'asala ra Ma Jou'ongu Madutu bolo ra Ngoi masiretene.

¹⁸Ngowa'a matengo ga'a 'o pula'a 'ai do-doto'o masiretene 'aḏi disa ngowa'a 'aḏi silamo'o unanga. Mada'a ngowa'a matengo ga'a 'o disa ngowa'a 'aḏi silamo'o Unanga ga'a 'U 'utusu, ngowa'a gena-ge 'o loasa re banari re kama sa-sakala ua.

¹⁹'A Musa ro pula'a Ma Jou'ongu Madutu 'ai hukumu ra ngini. Mada'a taninga sigolona matengo i'a mai ua ya mete'e hukumu gena-ge. I'a sa'olo ngini mau ni sisengene Ngoi?”

²⁰Ngowa'a repe 'aḏi kanau, “Ngana roh ma jira ni dungosama! 'A guna mau 'o sisengene Ngana?!”

²¹Yesus 'o kanau ra ananga, “Ngini ni heranga sababu Ngoi to 'a'a pa'i ga'a hera-heranga rimoi ḇato toma Sabata ma wangere.

²²Mada'a ngini masiretene ni munara toma Sabata ma Wangere wakutu ni suna ninga ngowa'a. Musa 'o pula'a 'atoranga mangale ngini balasu ni suna ninga ngowa-ngowa'a. (Ma nyonyata 'atoranga gena-ge ma 'asala ra Musa ua, mada'a ma 'asala tamanga ete re dotumu wakutu 'a Musa 'o cua moju.) Dadi sababu 'atoranga gena-ge na'o ngini balasu ni suna ninga ngowa'a toma Sabata ma wangere, ngini ni siḏagi suna ma 'atoranga toma wangere gena-ge!

²³Na'o ngini 'a'a so'o gena-ge, la ni sito'u awa 'a Musa 'ai hukumu mangale suna, i'a sa'olo ngini ni duruta Ngoi, sababu to si-la ngowa'a toma Sabata ma Wangere, la 'ai lese mo-moini enanga 'i la?

²⁴Awa ni sijuruhakimi ngowa'a sababu 'oru ga'a ni oḏi'i, mada'a balasu ni sijuruhakimi mete'e toma ba-banari ma dara.”

²⁵Ḏua ngowa'a Yerusalem nga muḏuo i'a 'aḏi kanau, “Unanga nena-ne ga'a ngowa'a bi-biri'i 'aḏi disa-disa di'a 'U sengene?

²⁶Mada'a oḏi'i Unanga 'o kanau rema bebasa toma mandan, re ngowa'a bi-biri'i matengo i'a mai ua 'o ḇangata Unanga. Ngene nanga bi-biri'i ḏa raḏi mawaro mangale Unanga nena-ne 'O Kristus?!

²⁷Mada'a wakutu 'O Kristus 'o sapolo, matengo i'a mai ua 'a waro 'Ai 'asala le'a ino. Mada'a ngene rewa waro Unanga nena-ne 'Ai 'asala.”

²⁸Ḏua wakutu Yesus 'o doto'o moju ra Ma Jou'ongu Madutu 'ai Wala ma soana, 'o kanau rai iḏingi 'a siduga-duga: “Ya ngini ni kanau ni waro Ngoi nena-ne 'a guna re 'Ari 'asala le'a ino! Mada'a Ngoi 'ari ta-sapolo mete'e Ngoi 'Ari mau masiretene ua. Mada'a Unanga ga'a ngene balasu wo ngaku, Unanga gena-ge Ro 'utusu Ngoi. Mada'a ngini ni nana'o ua Unanga gena-ge.

²⁹Ngoi to nana'o Unanga, sababu Ngoi 'ari 'asala ra Unanga ino re Unanga gena-ge Ro 'utusu ngoi.”

³⁰Toma 'orasa gena-ge, ananga 'aḏi tai'i cako'o 'a Yesus, mada'a matengo i'a mai ua nga'unu 'o gu'u Unanga sababu 'Ai 'orasa 'i ngadolo nyangu.

³¹Ngowa'a repe tamanga sigolona ga'a 'aḏi ngaku Unanga, ananga 'aḏi kanau, “Unanga gena-ge 'O Kristus ga'a ro sapolo! Sababu Unanga nga'unu 'o 'a'a ga'a hera-heranga lebe repe.”

³²Ngowa'a Farisi nga muḏuo i'a 'aḏi 'isene ngowa'a repe 'aḏi majujuḏu mangale 'a Yesus. Dadi ngowa'a Farisi re 'imam-'imam ma sae'e ananga 'aḏi soma'a Ma Jou'ongu Madutu 'ai Wala ma ja-jaga 'aḏi tagi cako'o 'a Yesus.

³³Yesus 'o kanau toma ngowa'a repe ra Ma Jou'ongu Madutu 'ai Wala ma soana, “Pa'i ngoma moi ḇato ngoi to mamete'e ra ngini. Togumu i'a Ngoi toma ḏibo ra Unanga ga'a 'O 'utusu ngoi.

³⁴Ngini ḏuanga i'a ni disa Ngoi mada'a ni sanga Ngoi ua, sababu ra Ngoi 'ari ngi'i, ngini ni sapolo yoḏu'u.”

³⁵Ḏua ngowa'a Yahudi manga bi-biri'i 'aḏi ma'u kanau matengo re matengo, “Unanga nena-ne 'o mau tagi le'a singadolo ngene sanga unanga ua? Ḏa Unanga mau 'o tagi toma ngowa'a Yahudi ga'a 'aḏi tegoro toma ngowa'a Yunani manga nagara, re 'o doto'o ngowa'a Yunani.

³⁶'Ai maksudu 'oru wakutu Unanga 'o kanau, ‘Ngini ḏuanga i'a ni disa Unanga, mada'a ni sanga Unanga ua.’ Re ‘Ngi'i ga'a Unanga 'o tagi, ngi'i gena-ge ngini ni sapolo yoḏu'u’?”

³⁷Toma wangere ma ḏo-ḏogumu laya suyu'u ma 'atu ate ma so'a, wangere gena-ge wangere ma lamo'o, Yesus 'o made-de'oso ra Ma Jou'ongu Madutu 'ai Wala ma soana, re 'o kanau rai iḏingi 'a siduga-duga: “Ngowa'a ga'a manga camala 'i dudungu, balasu 'aḏi sapolo ra Ngoi di'a 'aḏi ka'e!

³⁸Gena-ge ma tero sa'olo ri silefo toma Boku 'Ofi-'Ofi so'o ne: ‘ 'A guna ḇato 'o ngaku Ngoi, tai 'akala re sinyingara ma dara 'i waloro ḇanyo sigasa toma 'ahu.’ ”

³⁹Yesus 'ai demo-demo so'o gena-ge mangale Ma Ngagara 'Ofi-'Ofi wakutu ngowa'a ga'a raḏi ngaku Unanga, ḏuanga i'a ya dawongo. Toma 'orasa gena-ge Ma Ngagara 'Ofi-'Ofi 'i sipula'a nyangu, sababu Yesus 'o sanga mulia nyangu.

⁴⁰Ngowa'a repe 'aḏi 'isene Yesus 'ai demo so'o gena-ge, re tamanga sigolona 'age mamuni'a 'aḏi kanau, “Tantu ḏua, Unanga nena-ne Nabi gena-ge ga'a Ma Jou'ongu Madutu 'o sijaji 'ua re 'au wali.”

⁴¹Mamuni'a 'aḏi kanau, “Unanga nena-ne 'O Kristus.” Mada'a mamuni'a 'aḏi kanau, “ 'Ah sanga ua, 'O Kristus 'o sapolo toma Galilea ino!

⁴²Toma Boku 'Ofi-'Ofi ma dara 'i silefo mangale 'O Kristus ra 'Olana Daud 'ai ju'uda, re 'O sapolo toma gamu Betlehem, 'Olana Daud 'ai ji'o re gamu.”

⁴³Dadi ananga 'aḏi ma'u lawana mangale Yesus.

⁴⁴Mamuni'a mau 'aḏi cako'o Unanga, mada'a matengo i'a mai ua 'aḏi gare giama ra Unanga.

⁴⁵Ma ḏo-ḏogumu, Ma Jou'ongu Madutu 'ai Wala ma ja-jaga ga'a 'aḏi sanga soma'a tagi cako'o Yesus, ananga 'aḏi maḏibo. 'Imam-'imam ma sae'e re ngowa-ngowa'a Farisi 'aḏi sano ra ananga, “I'a sa'olo ni cako'o re ni gasa ino Unanga ua?”

⁴⁶Ananga gena-ge 'aḏi sangoro, “Ngomi mi sanga nyangu ngowa'a matengo ga'a 'o kanau sa'olo Unanga.”

⁴⁷Ngowa-ngowa'a Farisi 'aḏi kanau, “ 'Oru ngini ḏi'i Unanga nu'u sihaga?!

⁴⁸Matengo i'a mai ua tananga bi-biri'i bolo ngowa'a Farisi raḏi ngaku Unanga!

⁴⁹Mada'a pa'i ngowa'a haga ma repe ḇato 'aḏi ngaku Unanga sababu ananga gena-ge 'aḏi waro ua 'a Musa 'ai hukumu. Dadi ananga ḏuanga i'a 'aḏi sanga hukumu ra Ma Jou'ongu Madutu!”

⁵⁰'Age rema ngowa'a matengo toma ngowa'a Farisi manga sigolona, 'ai lomanga 'a Nikodemus, unanga ro lawi'i ra Yesus soi moi. Unanga 'o kanau toma ngowa'a Farisi ma lelegu,

⁵¹“Mete'e Musa 'ai hukumu, ngene wo singe-ngeta'a hukumu yoḏu'u ra matengo i'a, na'o 'ai gamamu wa 'isene nyangu re 'ai ga'a wa parikisa nyangu.”

⁵²Ananga gena-ge 'aḏi sangoro, “ 'Oru ngana ngowa'a Galilea ḏi'i?! Disa waro ḇato toma Boku 'Ofi-'Ofi re ngana na sanga waro mangale nabi matengo i'a mai ua, 'ai 'asala toma Galilea ino!” [

⁵³Togumu i'a ananga mo-moini 'aḏi matai ḏibo tamanga wala masiretene.