Read Sahu Yohanes 8 Bible Online

Yohanes 8 - Sahu bible

Yohanes 8

¹Mada'a Yesus 'o tagi toma Polono Zaitun.

²Ma ḇiḇini ino da-daini i'a moju, Unanga dadunu 'o tagi ra Ma Jou'ongu Madutu 'ai Wala ma soana. Ngowa'a manga repe 'aḏi sapolo ra Unanga re 'O tegoro di'a 'O doto'o.

³Toma 'orasa gena-ge, guru-guru 'agama re ngowa-ngowa'a Farisi ananga 'aḏi gasa ino ra Yesus we-were'a matengo ga'a sicako'o mo 'a'a tinikai. Ananga 'aḏi soma'a we-were'a gena-ge mo made-de'oso toma mandan,

⁴kara 'aḏi kanau ra Unanga, “Guru, we-were'a nena-ne ngomi mi sicako'o mo 'a'a tinikai.

⁵Mete'e 'a Musa 'ai hukumu, we-were'a ga'a mo 'a'a tinikai so'o gena-ge ngene balasu wo poini munanga reo maḏi singadolo mo sengene. Dadi mete'e Ngana, ngene balasu wo 'a'a 'oru?”

⁶Ananga manga so-sano ma maksudu di'a 'aḏi disa Yesus 'ai sala, la ananga 'U kalaki Unanga. Mada'a Yesus pa'i maruku ḇato re 'O lefo toma tana'a Rai rarag̱a.

⁷Wakutu ananga gena-ge 'aḏi sano tau-taunu ra Unanga reo so-sano ma tero, Unanga 'o made'oso re 'O kanau i'a ra ananga, “Ngowa'a matengo ga'a kai ḏosa ua, unanga gena-ge 'o poini siḏa reo maḏi toma we-were'a nena-ne.”

⁸Ḏua Yesus dadunu 'o maruku re 'o lefo moju toma tana'a rai rarag̱a.

⁹Wakutu ananga ya 'isene Yesus 'o kanau so'o gena, ananga mulaingi 'aḏi sisoi'i tala Yesus. Ananga 'aḏi ma tuono matengo-matengo: siḏa-siḏa ngowa'a ga'a raḏi 'umuru i'a singadolo masimo-moini tala ma jingianga Yesus masiretene re we-were'a gena-ge mo made-de'oso moju toma ngi'i gena-ge.

¹⁰Ḏua Yesus dadunu 'o made'oso moju re 'o sano i'a toma we-were'a gena-ge, “Ananga mo-moini ananga le'a? Matengo i'a mai ua ga'a mau sihukumu ngana?”

¹¹Munanga ma sangoro, “Matengo i'a mai ua, Jou.” Ḏua Yesus 'o kanau, “Ngoi ḏi'i mau tini sihukumu ngana ua. Nange-ne no tagi re awa no 'a'a tinikai moju.”][8]

¹²Ḏua Yesus 'o kanau moju toma ngowa'a repe so'o ne: “Ngoi nena-ne dungia ma tarangi, ngowa'a ga'a mete'e Ngoi ananga 'aḏi 'ahu toma hafu-hafu ma dara ua, mada'a ananga gena-ge 'aḏi sanga tarangi, la ananga nyengara 'aḏi 'ahu toma tarangi ma dara.”

¹³Ngowa-ngowa'a Farisi 'aḏi kanau ra Unanga, “Sababu Ngana no pula'a sakisi mangale 'Ani diri masiretene, ngomi ma dawongo ua 'Ani sakisi gena-ge sa'olo banari.”

¹⁴Yesus 'o sangoro, “Kalaha Ngoi to pula'a sakisi mangale 'Ari diri masiretene, enanga gena-ge 'i banari moju, sababu Ngoi ta waro le'a ino Ngoi to sapolo re le'a i'a Ngoi to tagi. Ngini waro ua le'a ino Ngoi to sapolo re le'a i'a Ngoi to tagi.

¹⁵Ngini ni sijuruhakimi ngowa'a manga hali mete'e manusia manga mau, mada'a Ngoi, matengo i'a mai ua Ta sijuruhakimi ua.

¹⁶Mada'a na'o Ngoi to sijuruhakimi ngowa'a manga hali, 'oru ga'a Ngoi to putusu gena-ge 'i 'adili. Sababu pa'i Ngoi masiretene ua To putusu, mada'a 'Ari Ḇaḇa ga'a Ro 'utusu Ngoi, 'O mamete'e ra Ngoi.

¹⁷Taninga hukumu masiretene, Musa 'a lefo so'o ne: Na'o 'age rema ngowa'a sakisi nga muḏiḏi ga'a manga demo ma tero, ngowa'a sakisi gena-ge nyengara ngowa'a ya ngaku.

¹⁸So'o gena-ge ḏi'i 'age nga muḏiḏi ga'a 'aḏi pula'a sakisi mangale Ngoi: Ngoi masiretene re 'Ari Ḇaḇa ga'a Ro 'utusu Ngoi.”

¹⁹Ḏua ngowa'a Farisi 'aḏi sano ra Unanga, “ 'Ani Ḇaḇa gena-ge Unanga le'a?” Yesus 'a sangoro, “Ngini ni nana'o Ngoi ua re ni nana'o ua ḏi'i 'Ari Ḇaḇa. Na'o ngini nana'o Ngoi, tantu ḏi'i ni nana'o 'Ari Ḇaḇa.”

²⁰Mo-moini gena-ge Yesus 'o kanau wakutu Unanga 'o doto'o ra Ma Jou'ongu Madutu 'ai Wala ma soana, Unanga tegoro co-cori toma jou-jou ma burua. Mada'a matengo i'a mai ua 'o cako'o Unanga, sababu ma 'orasa enanga 'i ngadolo nyangu.

²¹Yesus dadunu 'o kanau moju ra ananga gena-ge, “Ngoi ḏuanga i'a to tagi re ngini ḏuanga i'a ni disa Ngoi. Mada'a ngini ḏuanga i'a ni sengene taninga ḏosa-ḏosa moju. Ngi'i ga'a Ngoi to tagi, ngini gena-ge ni sapolo yoḏu'u.”

²²Ḏua Yahudi manga bi-biri'i 'aḏi ma'u kanau matengo re matengo: “Unanga 'ai maksudu 'oru: ‘Toma ngi'i ga'a Ngoi to tagi ngini ni sapolo yoḏu'u?’ Ḏa Unanga 'o masisengene!”

²³Ḏua Yesus dadunu 'o kanau moju ra ananga, “Ngini ni sapolo dau ie, mada'a Ngoi to sapolo da'u tala. Ngini toma dungia ino, mada'a Ngoi toma dungia ino ua.

²⁴Ma sababu gena-ge, Ngoi to kanau ra ngini mangale ngini ḏuanga i'a ni sengene taninga ḏosa-ḏosa moju. Na'o ngini ngaku ua, mangale ‘Ngoi nena-ne Unanga ga'a 'o 'ahu kasingado-ngadolo i'a’ mode-mode'e ngini ḏuanga i'a ni sengene taninga ḏosa-ḏosa ma dara moju.”

²⁵Ananga 'aḏi sano, “Ngana nena-ne 'a guna?” Yesus 'a sangoro, “Ngoi nena-ne ga'a reto kanau ra ngini toma mulaingi![9]

²⁶Ma repe moju 'ori i'a ga'a To mau Ta sikanau, la to sijuruhakimi ngini. Mada'a Ngoi to kanau ua Ngoi masiretene 'Ari demo, mada'a To kanau Unanga ga'a Ro 'utusu Ngoi, Unanga gena-ge 'Ai demo. Re Unanga 'ai demo 'i banari. Ngoi to siajele toma ngowa'a dungia nena-ne, 'oru ga'a Ngoi to 'isene ra Unanga ino.”

²⁷Ananga gena-ge ya sahe ua mangale 'oru ga'a Unanga siajele ra ananga mangale 'Ai Ḇaḇa.

²⁸Sababu gena-ge, Yesus 'o kanau ra ananga, “Maha ḏuanga i'a ngini ni sikau'u Ngoi, Manusia ma Ngowa'a Nau'u, kara ni waro mangale ‘Ngoi nena-ne Unanga ga'a 'o 'ahu kasingado-ngadolo i'a.’ Re ngini ḏuanga i'a ni waro mangale 'ori i'a rimoi i'a ua Ngoi ta si'a'a, mete'e Ngoi 'ari mau masiretene. Ngoi to siajele ra ngini, pa'i 'oru ḇato ga'a 'Ari Ḇaḇa 'O doto'o ra Ngoi.

²⁹Re Unanga ga'a Ro 'utusu Ngoi mamete'e ra Ngoi. Sanga ua, Unanga sieanga i'a Ngoi to matengo, sababu Ngoi ta si'a'a tau-taunu 'oru ga'a sisanangi Unanga 'ai 'akala re sinyingara.”

³⁰Yesus 'a siajele mo-moini gena-ge togumu i'a, ngowa'a manga repe 'aḏi ngaku Unanga.

³¹Gena-ge ḏua Yesus 'o kanau toma ngowa-ngowa'a Yahudi ga'a raḏi ngaku Unanga, “Na'o ngini ni 'ahu mete'e Ngoi 'ari do-doto'o, ngini mode-mode'e 'Ari me-mete'e.

³²Ḏua ngini ḏuanga i'a ni waro mode-mode'e Ma Jou'ongu Madutu 'ai ba-banari re ngini ni bebasa toma ḏosa ma kuasa.”

³³Ananga 'aḏi sangoro ra Unanga, “Ngomi nena-ne 'a Abraham 'ai ju'uda. Dadi ngomi soi moi nyangu mi dadi budaka ra guna ḇato! Dadi i'a sa'olo Ngana no kanau: ‘Ngini ḏuanga i'a sanga bebasa toma ḏosa ma kuasa’?”

³⁴Yesus 'o kanau ra ananga, “Ni ngaku mode-mode'e 'Ari demo-demo nena-ne: Ngowa'a ga'a 'a'a ḏosa, ananga gena-ge 'aḏi dadi ḏosa ma budaka.

³⁵Re ngowa'a budaka, unanga 'o sanga ngi'i tatapu ua toma tuanga 'ai ngitu re ngale. Mada'a na'o tuanga 'ai ngowa'a nau'u, tantu ḏua unanga gena-ge 'o sanga ngi'i tatapu kasingado-ngadolo i'a.

³⁶Sababu gena-ge na'o Ngoi, Manusia ma Ngowa'a Nau'u, 'O sibebasa ngini, ngini mode-mode'e ni bebasa toma ḏosa ma kuasa.

³⁷Ngoi to waro ngini nena-ne 'a Abraham 'ai ju'uda. Kalaha so'o gena-ge ngini mau sisengene Ngoi, sababu ngini dawongo ua 'Ari do-doto'o.

³⁸'Oru ga'a Ngoi ta oḏi'i Tari Ḇaḇa, gena-ge ta siajele ra ngini, mada'a ngini ni 'a'a 'oru ga'a ninga ḇaḇa nu doto'o.”

³⁹Ananga ya sangoro, “Ngomi minga ḇaḇa 'a Abraham.” Yesus 'o kanau, “Na'o ngini mode-mode'e 'a Abraham 'ai ngowa'a, tantu ḏua ngini ni 'a'a 'oru ga'a 'a Abraham 'a 'a'a.

⁴⁰Ngoi ta singadolo ra ngini 'oru ga'a 'i banari ga'a Ngoi masiretene to 'isene ra Ma Jou'ongu Madutu ino, mada'a ngini mau ni sisengene Ngoi! 'A Abraham 'o 'a'a so'o gena-ge ua.

⁴¹Ngini ni 'a'a mete'e 'oru ga'a ninga ḇaḇa masiretene 'a 'a'a.” Ananga ya sangoro, “Ngomi ngowa'a haram ua, ngomi minga Ḇaḇa pa'i matengo ḇato, gena-ge Ma Jou'ongu Madutu masiretene.”

⁴²Ḏua Yesus 'o kanau ra ananga, “Na'o mode-mode'e Ma Jou'ongu Madutu ngini ninga Ḇaḇa, ngini ni dadalara Ngoi, sababu Ngoi reto sapolo ra Ma Jou'ongu Madutu ino re nange-ne Ngoi 'ane. Ngoi reto sapolo mete'e Ngoi 'ari 'akala ma mau masiretene ua, mada'a Unanga ga'a Ro 'utusu Ngoi, Unanga gena-ge 'Ai 'akala ma mau.

⁴³Ma sababu 'oru ngini ni sahe ua 'oru ga'a Ngoi to kanau ra ngini?! Sababu ngini pa'i 'isene 'Ari do-doto'o mada'a ni dawongo ua.

⁴⁴Ngini ninga ḇaḇa 'Iblisi, re ngini mau ni mete'e 'Iblisi ma mau. Toma ma mulaingi singadolo nange-ne, 'Iblisi 'i mau sisengene ngowa'a. Soi moi nyangu 'Iblisi 'i kanau 'oru ga'a 'i banari. Sababu ba-banari 'i tegoro ua toma 'Iblisi. Wakutu enanga 'i kanau sa-sakala, gena-ge biasa ḏua, sababu enanga sa-sakala re sa-sakala mo-moini ma cimi.

⁴⁵Dadi sababu Ngoi to siajele 'oru ga'a 'i banari, ngini ni ngaku Ngoi ua!

⁴⁶'Age 'a guna taninga sigolona ga'a 'a sibukiti mangale Ngoi to 'a'a ḏosa?! Na'o Ngoi to siajele 'oru ga'a 'i banari, i'a sa'olo ngini ni ngaku Ngoi ua?!

⁴⁷Ngowa'a ga'a manga 'asala ra Ma Jou'ongu Madutu ino, 'aḏi 'isene re mete'e Unanga 'ai demo. Mada'a ngini ninga 'asala ra Ma Jou'ongu Madutu ino ua. Sababu gena-ge ngini ni oḏu'u 'isene 'Ari demo.”

⁴⁸Ngowa'a Yahudi 'aḏi sangoro i'a ra Unanga, “Tero mode'e 'oru ga'a ngomi kanau: ‘Ngana ngowa'a Samaria re roh ma jira Ni dungosama’!”[10]

⁴⁹Yesus 'o kanau ra ananga, “Ngoi roh ma jira ri dungosama ua. Ngoi to silamo'o 'Ari Ḇaḇa, mada'a ngini ni je-jengere Ngoi.

⁵⁰Ngoi to disa ua ngowa'a di'a 'aḏi silamo'o 'ari diri. Mada'a 'age rema ngowa'a matengo Unanga 'o disa di'a ngowa'a ga'a 'aḏi silamo'o Ngoi. Unanga gena-ge 'O sijuruhakimi 'oru ga'a Ngoi to kanau 'i banari bolo ua.

⁵¹Ni ngaku mode-mode'e 'Ari demo-demo nena-ne: 'A guna ḇato ga'a 'o mete'e 'Ari demo, unanga kama sengene ua mada'a 'o 'ahu kasingado-ngadolo i'a.”

⁵²Ḏua ngowa'a Yahudi 'aḏi kanau ra Yesus, “Nange-ne ngomi ma waro ngana ne roh ma jira ni dungosama. Abraham masiretene ro sengene so'o gena-ge ḏi'i nabi-nabi mo-moini raḏi sengene. Dadi i'a sa'olo No kanau, ‘Na'o 'a guna ḇato 'o mete'e 'Ani demo, unanga kama sengene ua?’

⁵³Abraham masiretene ro sengene, re nabi mo-moini raḏi sengene. Ngana nena-ne 'a guna?! Sanga ua, ngana lebe la-lamo'o reo ngomi minga ḇaḇa Abraham!”

⁵⁴Yesus 'o sangoro, “Na'o Ngoi to silamo'o 'Ari diri, gena-ge ma faeda 'i cua. Mada'a 'Ari Ḇaḇa, Unanga gena-ge 'o silamo'o Ngoi. Unanga gena-ge ga'a ngini ni kanau: ‘Unanga ninga Jou'ongu Madutu.’

⁵⁵Kalaha ngini ni nana'o Unanga gena-ge ua, Ngoi tu nana'o. Na'o Ngoi to kanau Tu nana'o Unanga ua, Ngoi to dadi ngowa'a sa-sakala ma tero sa'olo ngini. Mada'a Ngoi tu nana'o Unanga re To mete'e 'Ai demo-demo.

⁵⁶Ninga ḇaḇa 'a Abraham 'o mau oḏi'i 'Ari ta-sapolo re maroanga mangale gena-ge. Ma nyonyata unanga 'o maroanga sababu 'o oḏi'i 'Ari ta-sapolo.”

⁵⁷Ḏua ngowa'a Yahudi 'aḏi kanau ra Unanga, “ 'Ani 'umuru ngadolo nyagi romotoa nyangu. I'a sa'olo no kanau reno oḏi'i 'a Abraham?!”

⁵⁸Yesus 'o sangoro, “Ni ngaku mode-mode'e 'Ari demo-demo nena-ne: Ngoi to kanau ra ngini, sibuoro 'a Abraham nyangu, Ngoi 'age ḏua.”

⁵⁹Gena ḏua, ngowa'a Yahudi 'aḏi 'oro maḏi di'a 'aḏi poini Unanga, mada'a Unanga 'o magogono, kara 'o sisoi'i tala Ma Jou'ongu Madutu 'ai Wala ma soana.