Read Sahu Yohanes 9 Bible Online

Yohanes 9 - Sahu bible

Yohanes 9

¹Wakutu Yesus 'o tagi i'a, Unanga 'o oḏi'i ngowa'a hafu matengo masinge-ngeta'a da'u tala.

²Unanga 'ai me-mete'e 'aḏi sano ra Unanga, “Rabi,[11] i'a sa'olo ngowa'a nena-ne 'o hafu singe-ngeta'a da'u tala moju? Unanga 'ai ḏosa bolo 'ai ḇaḇa re ngina manga ḏosa?”

³Yesus 'a sangoro, “Unanga 'o hafu ma sababu unanga masiretene 'ai ḏosa bolo 'ai ḇaḇa re ngina manga ḏosa ua. Mada'a gena-ge 'i dadi, la ngowa'a ya oḏi'i re waro mangale Ma Jou'ongu Madutu 'ai kuasa 'i waiti ra unanga.

⁴Wakutu rema wangere moju, ngene balasu wa si'a'a Unanga 'ai munara ga'a Ro 'utusu Ngoi. Sababu 'orasa lobi'i 'i ngadolo ḏua, matengo i'a mai ua nga'unu munara.

⁵Wakutu Ngoi to 'ahu moju toma dungia nena-ne, Ngoi nena-ne dungia ma tarangi.”

⁶Wakutu Yesus 'o kanau so'o gena togumu i'a, Unanga 'o obi'i toma tana'a re 'ai obi'i 'a sicapuru reo tana'a, kara 'a siḇiasa toma ngowa hafu 'ai la'o.

⁷Re Unanga 'o kanau i'a toma ngowa'a hafu gena-ge, “No tagi re no maloca'a toma ḇanyo Siloam” (Siloam ma ngale: Sanga 'utusu). Dadi unanga 'o tagi 'o maloca'a. Wakutu unanga 'o maḏibo ino, unanga nyengara 'o oḏi'i.

⁸'Ai wala-wala sebanga re ngowa'a lelegu ga'a biasa oḏi'i unanga tegoro golo-golo'o, ananga 'aḏi sano, “ 'Oru unanga nena-ne ḏua, ngowa'a ga'a biasa tegoro golo-golo'o?!”

⁹'Age ngowa'a mamuni'a ga'a 'aḏi kanau, “Gena-ge unanga ḏua.” Mada'a 'age ḏi'i ga'a 'aḏi kanau, “Ua, sa'i ma tero ra unanga.” Mada'a unanga masiretene 'o kanau, “Ngoi nena-ne unanga.”

¹⁰Ananga 'aḏi sano ra unanga, “Ma sababu sa'olo singadolo ngana nyengara no oḏi'i?”

¹¹Unanga 'o sangoro, “Ngowa'a matengo ga'a 'ai lomanga Yesus, Unanga 'o 'a'a pece, 'A siḇiasa tari la'o re 'O kanau ra ngoi, ‘No tagi re no maloca'a toma ḇanyo Siloam.’ Ngoi to tagi re to maloca'a. Gena ḏua, ngoi nyengara to oḏi'i.”

¹²Ananga 'aḏi sano ra unanga, “Ngowa'a matengo gena-ge Unanga le'a?” Unanga 'a sangoro, “Ngoi to waro ua.”

¹³Yesus 'o 'a'a pece, kara 'O si-la ngowa'a hafu, gena-ge Unanga 'a 'a'a toma Sabata ma wangere. Sababu gena-ge, ananga 'aḏi gasa i'a ngowa'a hafu gena-ge, ga'a 'ai la'o ri la, toma ngowa-ngowa'a Farisi.

¹⁵Ḏua ngowa-ngowa'a Farisi 'aḏi sano ra unanga gena-ge, “Ma sababu sa'olo ngana nyengara no oḏi'i.” Unanga 'a sangoro, “Unanga 'o siḇiasa pece tari la'o, gena ḏua ngoi to maloca'a re nyengara to oḏi'i.”

¹⁶Ngowa'a Farisi nga muḏuo i'a 'aḏi kanau, “Unanga gena-ge 'ai 'asala ua ra Ma Jou'ongu Madutu tala, sababu 'o silamo'o ua Sabata ma wangere.” Mada'a ngowa'a Farisi ma lelegu ḏi'i 'aḏi kanau, “Tantu ḏua, ngowa'a baraḏosa 'a nga'unu ua 'o 'a'a didina'o heranga so'o gena-ge?” Gena ḏua, ananga mulaingi 'aḏi ma'u tolabe i'a re ino.

¹⁷Dadi, ngowa'a Farisi 'aḏi sano moju toma ngowa'a gena-ge, “Ngana 'ani 'akala ma sanga sa'olo Unanga gena-ge, Unanga ga'a si-la ngana singadolo nyengara no oḏi'i?” Unanga 'a sangoro, “Unanga gena-ge nabi.”

¹⁸Mada'a Yahudi manga bi-biri'i, ananga 'aḏi oḏu'u ngaku mangale unanga gena-ge nyangu moju 'o hafu re nange-ne nyengara 'o oḏi'i. Sababu gena-ge, ananga 'aḏi 'aro'o 'ai ḇaḇa re ngina.

¹⁹Ananga 'aḏi sano, “Ngowa'a matengo nena-ne ninga ngowa'a nau'u ga'a 'ai la'o hafu masinge-ngeta'a da'u tala moju bolo ua? I'a sa'olo nange-ne unanga nyengara ro oḏi'i?”

²⁰'Ai ḇaḇa re ngina 'aḏi sangoro, “Ngomi remi waro mode-mode'e, unanga nena-ne ngomi minga ngowa'a nau'u re unanga 'ai la'o hafu masinge-ngeta'a da'u tala moju.

²¹Mada'a ma sababu sa'olo nange-ne unanga nyengara 'o oḏi'i, ngomi masiretene ma waro ua. Re 'a guna 'a si-la 'ai la'o, gena-ge ḏi'i mai ngomi ma waro ua. Ni sano ḇato ra unanga, unanga ro tubaie ḏua. Unanga nyengara 'o sangoro di'a unanga masiretene.”

²²'Ai ḇaḇa re ngina, ananga 'aḏi kanau so'o gena-ge, sababu ananga 'aḏi mojongo ngowa'a Yahudi manga bi-biri'i: Na'o 'a guna ḇato 'o mangaku Yesus, Unanga 'O Kristus, unanga gena-ge 'o osama toma wala puji riwara.

²³Gena-ge ma sababu 'ai ḇaḇa re ngina 'aḏi kanau, “Unanga ro tubaie ḏua, dadi ni sano ḇato ra unanga.”

²⁴Ḏua ngowa'a Farisi dadunu 'aḏi 'aro'o moju ngowa'a hafu gena-ge re 'aḏi kanau ra unanga, “Ngana balasu no masisasi mangale no kanau 'ori i'a ga'a banari. Ngomi mi waro Unanga gena-ge ngowa'a baraḏosa.”

²⁵Unanga gena-ge 'a sangoro, “ 'Oru Unanga 'O baraḏosa bolo ua, ngoi ta waro ua. Mada'a pa'i rimoi ḇato ngoi ta waro: Ma siḏa ngoi to hafu, nange-ne nyengara to oḏi'i!”

²⁶Ḏua ngowa'a Farisi dadunu 'aḏi kanau moju ra unanga, “Unanga 'o 'a'a 'oru ra ngana? Ma sababu sa'olo Unanga 'o si-la ngana?”

²⁷Unanga 'a sangoro, “Ngoi to sijarita ḏua ra ngini mada'a ni oḏu'u ngaku Ngoi. I'a sa'olo nange-ne ni mau 'isene moju? Bolo ni mau ni dadi Unanga 'ai me-mete'e ḏi'i?!”

²⁸Ḏua ananga 'aḏi duruta unanga re 'aḏi kanau, “Ngana Unanga 'ai me-mete'e. Ngomi 'a Musa 'ai me-mete'e.

²⁹Ngomi ma waro mangale Ma Jou'ongu Madutu ro kanau ra Musa. Mada'a Unanga gena-ge ngomi mi waro ua 'Ai 'asala le'a ino.”

³⁰Ngowa'a ga'a ro la gena-ge 'o sangoro, “Heranga masala mangale ngini ni waro ua Unanga 'ai 'asala. Momongolo ua, Unanga ri si-la 'ari la'o singadolo ngoi nyengara to oḏi'i.

³¹Ngene wa waro, Ma Jou'ongu Madutu 'a dawongo ua ngowa'a baraḏosa manga go-golo'o. Pa'i ngowa'a ga'a 'aḏi ta'aloko ra Unanga re 'aḏi mete'e Unanga 'ai mau, ananga manga go-golo'o Ma Jou'ongu Madutu 'a dawongo.

³²Mulaingi dungia 'i dadi, wa 'isene nyangu rema ngowa'a matengo ga'a nga'unu si-la ngowa'a matengo 'ai la'o hafu masinge-ngeta'a da'u tala moju, dadi nyengara 'o oḏi'i.

³³Na'o Unanga gena-ge 'Ai 'asala ra Ma Jou'ongu Madutu tala ua, tantu ḏua Unanga nga'unu ua 'a'a so'o gena-ge.”

³⁴Ananga ya sangoro, “ 'Oru? Ngana no siromanga reo ḏosa wakutu sibuoro tala moju, nange-ne ngana no mau doto'o ngomi?!” Mulaingi gena-ge re sino ananga 'aḏi simaha ua unanga gena-ge 'o osama toma wala puji.

³⁵Wakutu Yesus 'o 'isene mangale ngowa'a Farisi 'aḏi simaha ua unanga 'o osama toma wala puji, dadi Yesus 'o disa unanga gena-ge. Wakutu Yesus 'o ma'u sanga unanga gena-ge, 'O kanau, “ 'Oru ngana no ngaku toma Manusia ma Ngowa'a Nau'u?”

³⁶Ngowa'a matengo gena-ge 'a sangoro, “Tuanga, Unanga gena-ge 'a guna? Siajele ra ngoi, la ngoi to ngaku Unanga.”

³⁷Yesus 'o kanau, “Ngana reno oḏi'i Unanga. Ma nyonyata, Unanga gena-ge nange-ne 'o kanau ra ngana.”

³⁸Ngowa'a gena-ge 'o kanau, “Ma Jou, ngoi tini ngaku.” Re unanga 'o maḏipolono tala talaḏi ra Yesus re 'o silamo'o re siḏubuso Unanga.

³⁹Yesus 'o kanau, “Ngoi to sapolo di'a To sijuruhakimi dungia nena-ne, la ngowa'a ga'a 'aḏi hafu nga'unu 'aḏi oḏi'i, re ngowa'a ga'a raḏi oḏi'i 'aḏi dadi hafu!”

⁴⁰'Age rema ngowa'a Farisi nga muḏuo i'a ga'a mamete'e rea Yesus ya 'isene Unanga 'o kanau so'o gena-ge. Dadi ananga 'aḏi sano ra Unanga, “Dadi 'Ani maksudu ngomi nena-ne mi hafu ḏi'i?”

⁴¹Yesus 'o kanau ra ananga, “Na'o ngini ni fikiri mode-mode'e ni hafu sababu ni waro ua 'oru ga'a banari, ngini ni sala ua ra Ma Jou'ongu Madutu 'ai momina. Mada'a sababu ngini ni kanau, ‘Ngomi nga'unu mi oḏi'i,’ gena-ge ma ngale: tantu ḏua ngini ni sala moju ra Ma Jou'ongu Madutu 'ai momina.”