Read Sahu Yesus 'ai so-soma'a 13 Bible Online

Yesus 'ai so-soma'a 13 - Sahu bible

Yesus 'ai so-soma'a 13

¹Toma 'orasa gena-ge toma Jama'ata Antiokhia ma sigolona, 'age rema nabi-nabi re guru-guru: 'a Barnabas, 'a Simeon ga'a si'aro'o Niger[35] 'a Lukius da'a limau Kirene ino, 'a Menahem — 'Olana Herodes 'ai nongoḏu 'angoto — re 'a Saulus.

²Wakutu ananga 'aḏi silamo'o re siḏubuso Ma Jou'ongu Madutu re 'aḏi puasa, Ma Ngagara 'Ofi-'Ofi ya'u sigaraki manga 'akala re sinyingara, “Cumutu re siwola i'a 'a Barnabas re 'a Saulus di'a Ngoi, la ananga 'aḏi 'a'a munara ma'u mete'e sa'olo Ngoi ta sifato pasala ḏua.”

³Pasala i'a, ananga 'aḏi puasa re 'aḏi manyiata, ya siteru manga giama ra Barnabas re 'a Saulus tamanga sae'e ma re'u re ya'u 'utusu.

⁴Ma Ngagara 'Ofi-'Ofi 'i sigaraki Barnabas re 'a Saulus manga 'akala re sinyingara 'aḏi tagi toma pulo Siprus. Dadi, ananga 'aḏi tagi toma limau Seleukia, kara 'aḏi sidete i'a da'a toma pulo Siprus.

⁵Wakutu ananga 'aḏi ngadolo toma limau Salamis toma pulo Siprus, ananga 'aḏi singadolo Habari Roanga toma ngowa'a Yahudi manga wala-wala puji re 'a Yohanes Markus ya'u riono ananga manga munara tau-taunu.

⁶Toma limau Salamis papolo wangere ma la'o, ananga 'aḏi tagi re 'aḏi tuḏu-tuḏu toma limau mo-moini singadolo toma limau Pafos papolo wangere ma soḏu. I'a da'a, ananga 'aḏi ma'u sanga ngowa'a Yahudi matengo, 'ai lomanga Bar Yesus.[36] Unanga gena-ge 'o 'a'a sarati re 'o matuhu sa'olo nabi.

⁷Sergius Paulus 'o pahe madutu re 'o dadi gubernur toma pulo gena-ge re Bar Yesus gubernur gena-ge 'ai ḏagilomu cori. Unanga 'o 'aro'o 'a Barnabas re 'a Saulus sababu 'o mau 'isene Habari Roanga.

⁸Mada'a 'a Barnabas re 'a Saulus 'aḏi sanga dola'aku ra Elimas ga'a 'a'a sarati gena-ge — Bar Yesus re Elimas, unanga gena-ge ḏua: Elimas 'ai lomanga toma demo Yunani. Unanga 'o mau dola'aku gubernur 'o ngaku awa Ma Jou Yesus.

⁹Mada'a 'a Saulus — ga'a si'aro'o 'a Paulus — Ma Ngagara 'Ofi-'Ofi 'u ḏegoro singadolo unanga 'o tatamo toma ngowa'a sarati gena-ge,

¹⁰Ḏua 'o kanau, “Hai, ngowa'a ga'a sihaga ngowa'a, 'o 'Iblisi ma so-soma'a. I'a sa'olo na lawana 'ori i'a ma la-la! I'a sa'olo, no matogumu ua no dola'aku Ma Jou'ongu Madutu 'ai maksudu di'a sisalamata ngowa'a!

¹¹Nange-ne, Ma Jou'ongu Madutu 'o sihukumu ngana! No dadi hafu, singadolo no oḏi'i ua wangere ma la'o toma wangere muḏuo ma dara!” Toma 'orasa gena-ge ḏua, 'a Elimas 'o mabasono sa'olo sairamu ya damunu 'ai la'o, singadolo 'o mapaha-paha disa ngowa'a 'u tuda unanga.

¹²Wakutu gubernur 'o oḏi'i so'o gena-ge, unanga 'o ngaku Ma Jou Yesus. Re unanga 'o heranga masala mangale Paulus 'ai do-doto'o mangale Ma Jou Yesus.

¹³Da'a limau Pafos ino, Paulus re 'ai ḏagilomu-ḏagilomu, ananga 'aḏi sidete toma limau Perga toma daeraha Pamfilia. Toma limau gena-ge, 'a Yohanes Markus ya'u soi'i tala ananga, re 'o maḏibo toma limau Yerusalem.

¹⁴Da'a toma limau Perga, Paulus re 'ai ḏagilomu-ḏagilomu 'aḏi tagi toma limau Antiokhia toma daeraha Pisidia. Toma Sabata ma wangere, ananga 'aḏi osama re 'aḏi tegoro toma wala puji.

¹⁵Pasala i'a ngowa-ngowa'a 'aḏi baca 'a Musa 'ai boku re nabi-nabi manga boku, wala puji ma bi-biri'i 'aḏi soma'a ngowa'a 'aḏi sano i'a re 'aḏi kanau ra Paulus re 'ai ḏagilomu-ḏagilomu, “Ioronongoḏu ngowa'a Yahudi, na'o ni nyengara singadolo ḇato ninga duga re domolo.”

¹⁶Paulus 'o te'oso re 'a tede 'ai giama 'o kanau, “Ioronongoḏu ngowa'a Israel re ngowa'a Yahudi ua ga'a ni silamo'o re mojongo Ma Jou'ongu Madutu, ni 'isene ngoi:

¹⁷Ma Jou'ongu Madutu ga'a ngene ngowa'a Israel wo silamo'o re siḏubuso, Unanga gena-ge 'o cumutu pasala ḏua nanga ete re dotumu re 'O sidadi Israel bangsa la-lamo'o. Toma 'orasa gena-ge, ngowa'a Israel 'aḏi tegoro toma Mesir sa'olo ngowa'a tagi-tagi ino. Ḏua Ma Jou'ongu Madutu 'ai kuasa ma lamo'o ya'u sisupu ananga toma Mesir.

¹⁸Kalaha ananga 'aḏi mete'e ua 'Ai 'akala ma mau, Ma Jou'ongu Madutu 'o sidodai 'Ai mura re dadalara ra ananga toma ngi'i dongi-dongi ma di'ara musungu nyagi rata ma dara.

¹⁹Unanga 'a siiranga bangsa tumudingi toma nagara Kana'an re 'a sibalangu nagara gena-ge di'a ngowa'a Israel manga warisi.

²⁰Mo-moini gena-ge ma di'ara musungu latu rata re nyagi romotoa. Nagara Kana'an ya sibalangu pasala i'a, Ma Jou'ongu Madutu 'o pula'a bi-biri'i—bi-biri'i ra ananga. Bi-biri'i ma ḏo-ḏogumu Nabi Samuel.

²¹Gena ḏua, ananga 'aḏi golo'o 'olana matengo. Ma Jou'ongu Madutu 'o pula'a ra ananga 'a Saul, Kis 'ai ngowa'a nau'u toma suku Benyamin ino, la 'o dadi sa'olo ananga manga 'olana. Unanga 'o dadi ananga manga 'olana ma di'ara musungu nyagi rata.

²²Pasala i'a Ma Jou'ongu Madutu 'o siguci 'a Saul, Unanga 'o sitede 'a Daud 'o dadi Israel manga 'olana. Ma Jou'ongu Madutu 'a siajele pasala ḏua mangale unanga gena-ge, ‘Ngoi to oḏi'i masiretene ḏua 'a Daud, Isai 'ai ngowa'a nau'u, unanga gena-ge 'a sisanangi 'Ari 'akala re sinyingara, re ḏuanga i'a 'a siḏagi 'Ari 'akala ma mau.’

²³Ra Daud 'ai ju'uda, Ma Jou'ongu Madutu 'a sitatapu Matengo, unanga gena-ge ḏuanga i'a 'o dadi Salamata ma Cimi di'a bangsa Israel sababu Ma Jou'ongu Madutu 'a sijaji pasala ḏua. Yesus gena-ge 'O Salamata ma Cimi.

²⁴Yesus 'a siḏagi 'ai munara nyangu, Yohanes ro singadolo toma ngowa'a Israel mangale ananga balasu 'aḏi maḏibo toma ngo'omo boloto re balasu sanga baptis.

²⁵Sa'i Yohanes 'a siḏo-ḏogumu 'ai munara, unanga 'o sano i'a ra ananga, ‘Ngoi nena-ne 'a guna? Ngoi ne, Unanga ua ga'a ngini ni totoma. Na 'elingi, ngoi togumu i'a kara Unanga 'o sapolo, ta gasa 'Ai tarupa mai patasa ua.’

²⁶Ioronongoḏu Abraham 'ai ju'uda re ngowa'a Yahudi ua ga'a ni silamo'o re mojongo Ma Jou'ongu Madutu. Ma Jou'ongu Madutu Ro siḏingoto habari salamata ra ngene,

²⁷sababu ngowa-ngowa'a ga'a 'aḏi tegoro toma limau Yerusalem re ananga manga bi-biri'i, ananga mo-moini gena-ge 'aḏi nana'o nyangu Yesus gena-ge sa'olo Salamata ma Cimi. Re ananga ya sahe ua nabi-nabi manga do-doto'o ga'a siajele toma Sabata ma wangere ma jelele i'a. Sababu gena-ge ananga 'aḏi singe-ngeta'a hukumu sengene ra Yesus. Gena-ge 'i dadi ma tero sa'olo nabi-nabi 'aḏi siajele pasala ḏua:

²⁸Ananga 'aḏi disa ngo'omo, la 'aḏi singe-ngeta'a hukumu sengene ra Unanga. Mada'a kalaha ya sanga ua, ananga 'aḏi gasa Unanga ra Pilatus, la 'aḏi golo'o ngowa'a 'U sisengene Unanga.

²⁹Wakutu ananga 'aḏi si'a'a mo-moini mangale nabi-nabi 'aḏi silefo pasala ḏua, ananga 'U siguci 'Ai mayeti toma salib re 'U sigare toma kubu ma aḏu'u ma dara.

³⁰Mada'a Ma Jou'ongu Madutu dadunu 'u si'ahu moju Unanga toma ngowa'a senge-sengene manga sigolona.

³¹Pasala i'a, toma wangere muḏuo ma dara, Yesus 'o masijumu Tai me-mete'e ga'a ma'u mete'e unanga tagi da'a daeraha Galilea ino toma limau Yerusalem. Ananga gena-ge ḏua, 'aḏi dadi 'Ai sakisi toma bangsa Israel.

³²Sababu gena-ge, ngomi mi siajele Habari Roanga ra ngini ga'a Ma Jou'ongu Madutu 'a sijaji pasala ḏua tananga ete re dotumu: Ma Jou'ongu Madutu 'o 'utusu Salamata ma Cimi di'a 'O sisalamata ngowa-ngowa'a.

³³Unanga 'a si'a'a pasala ḏua di'a ngene, nanga ete re dotumu manga ju'uda, wakutu Unanga dadunu 'u si'ahu moju Yesus toma ngowa'a senge-sengene manga sigolona. Sa'olo toma boku Mazmur ma soi romoḏiḏi 'age 'i silefo so'o ne: ‘Ngana nena-ne 'Ari Ngowa'a Nau'u; toma wangere nange-ne Ngoi to dadi 'Ani Ḇaḇa.’

³⁴Ma Jou'ongu Madutu dadunu 'U si'ahu moju Unanga toma ngowa'a senge-sengene manga sigolona. Mulaingi nange-ne re si'a, Unanga 'o basono sengene riwara. Gena-ge 'i ma tero sa'olo Ma Jou'ongu Madutu 'o sijaji toma ngowa-ngowa'a Israel ga'a nabi Yesaya 'a siajele, ‘Ngoi to sipula'a jaji mode-mode'e ra ngini, ga'a 'i ma tero sa'olo jaji ra Daud.’

³⁵Ma sababu gena-ge toma bu-bula'a lelegu, Daud 'o siajele ra Ma Jou'ongu Madutu mangale 'O Mesias, ‘Unanga 'a sieanga i'a ua 'Ai Ngowa'a 'Ofi-'Ofi 'o wejere toma kubu ma dara.’

³⁶Wakutu Daud 'a si'a'a pasala ḏua mete'e Ma Jou'ongu Madutu 'ai 'akala ma mau, unanga ro sengene re 'u otomo sisebanga tai ete re dotumu re 'ai mayeti ri wejere ḏua.

³⁷Mada'a Yesus 'ai maiyeti 'i wejere ua sababu Ma Jou'ongu Madutu dadunu 'U si'ahu moju toma ngowa'a senge-sengene manga sigolona.

³⁸Sababu gena-ge ioronongoḏu ngowa'a Yahudi, ngini balasu na waro 'oru ga'a Yesus 'a si'a'a gena-ge 'i dadi habari mangale Ma Jou'ongu Madutu nga'unu 'o singi-ngiranga ninga ḏosa-ḏosa.

³⁹Na'o ngowa'a 'aḏi ngaku Yesus, ananga gena-ge 'aḏi dadi ngowa'a kamanga sala ua ra Ma Jou'ongu Madutu 'ai momina. Mada'a na'o ngowa-ngowa'a 'aḏi mete'e ḏua Ma Jou'ongu Madutu 'ai parenta ga'a 'a Musa 'a siajele taninga ete re dotumu, ngowa'a gena-ge 'aḏi dadi yoḏu'u ngowa'a kamanga sala ua Tai momina.

⁴⁰Sababu gena-ge, ngini balasu ni totoho la-la! Awa-awa 'i dadi ra ngini sa'olo nabi-nabi 'aḏi siajele pasala ḏua:

⁴¹'Isene la-la, ngini ga'a ni sipula'a mara'a Ma Jou'ongu Madutu! ‘Ngini gena-ge ni heranga, ḏuanga i'a ni sengene. Sababu toma 'orasa ne Ngoi ta si'a'a 'ori i'a i'a. Re kalaha 'age rema ngowa'a 'aḏi siajele tau-taunu ra ngini, ngini ni ngaku ua.’ ”

⁴²Wakutu 'a Paulus re 'a Barnabas 'aḏi sisoi'i tala wala puji gena-ge, ngowa-ngowa'a toma wala puji 'aḏi golo'o Sabata ma wangere toma biono i'a, Paulus re 'a Barnabas dadunu 'aḏi sapolo, la ya dowanga manga do-doto'o gena-ge.

⁴³Gena ḏua, ngowa'a repe 'aḏi supu toma wala puji ino, ananga 'aḏi mete'e 'a Paulus re 'a Barnabas. Ngowa'a gena-ge ngowa'a Yahudi re ḏi'i ngowa'a Yahudi ua ga'a 'aḏi osama nyo-nyoimi Yahudi manga 'agama. 'A Paulus re 'a Barnabas 'aḏi babata ananga, la 'aḏi macako'o namo-namoto ra Ma Jou'ongu Madutu 'ai mura re dadalara.

⁴⁴Sabata ma wangere toma biono, ngowa-ngowa'a repe toma limau gena-ge 'aḏi sapolo di'a ya 'isene Ma Jou 'ai demo.

⁴⁵Wakutu ngowa'a Yahudi 'aḏi oḏi'i ngowa'a kawasa, ananga manga 'akala re sinyingara 'i go-goḏi masala. Sababu gena-ge, ananga 'aḏi je-jengere 'a Paulus re 'aḏi lawana unanga 'ai demo mo-moini.

⁴⁶Mada'a 'a Paulus re 'a Barnabas ganapu 'aḏi nau'u re 'aḏi kanau ya sitaḇela'a i'a ra ananga. Ananga 'aḏi kanau, “Ma Jou'ongu Madutu 'ai demo balasu 'i singadolo ra ngini siḏa. Mada'a, ngini ni dawongo ua re ngini masiretene ni sitantukanga tala ni patasa ua di'a sanga 'ahu kasingado-ngadolo i'a. Dadi, ngomi nena-ne mi tagi re mi singadolo Habari Roanga toma ngowa-ngowa'a Yahudi ua.

⁴⁷Sababu Ma Jou'ongu Madutu 'o soma'a ngomi re Unanga 'o kanau: ‘Ngoi ta sitatapu pasala ḏua, ngana balasu no dadi ma tero sa'olo lapuru ma tarangi di'a ngowa-ngowa'a Yahudi ua, la ananga toma dungia sitabi donga ḏuanga i'a sanga 'ahu kasingado-ngadolo i'a.’ ”

⁴⁸Wakutu ngowa-ngowa'a Yahudi ua ya 'isene demo-demo gena-ge, manga 'akala re sinyingara 'i sanangi masala, kara 'aḏi silamo'o Ma Jou'ongu Madutu 'ai lomanga. Re Ma Jou'ongu Madutu 'a sitatapu pasala ḏua ngowa-ngowa'a ga'a 'aḏi sanga 'ahu kasingado-ngadolo i'a, ananga gena-ge 'aḏi ngaku Yesus.

⁴⁹Ma Jou 'ai demo 'i rera re walata toma daeraha gena-ge mo-moini.

⁵⁰Mada'a ngowa-ngowa'a Yahudi 'aḏi baja ngowa'a la-lamo'o re ngowa'a la-lamo'o manga we-were'a ga'a 'aḏi silamo'o re mojongo Ma Jou'ongu Madutu toma limau gena-ge, la 'aḏi lawana 'a Paulus re 'a Barnabas singadolo ngowa-ngowa'a gena-ge 'aḏi bo-bosono. Sababu gena-ge, ngowa'a Yahudi ya'u dusu'u ananga nga muḏiḏi toma daeraha gena-ge.

⁵¹Ḏua Yesus 'ai so-soma'a ya sesara manga rou ma korou'u ra ananga manga biono, 'i dadi didina'o rimoi kara 'aḏi sisoi'i tala limau Ikonium.

⁵²Ngowa-ngowa'a ngaku Yesus toma limau Antiokhia, ananga 'aḏi maroanga masala re Ma Ngagara 'Ofi-'Ofi ya'u ḏegoro.