Read Sahu Yesus 'ai so-soma'a 15 Bible Online

Yesus 'ai so-soma'a 15 - Sahu bible

Yesus 'ai so-soma'a 15

¹Ngowa'a Yudea nga muḏuo i'a, 'aḏi sapolo toma limau Antiokhia re 'aḏi doto'o ngowa-ngowa'a ngaku Yesus, ananga 'aḏi siajele, “Na'o ngini ni sanga suna ua mete'e Musa 'ai hukumu, ngini sanga 'ahu kasingado-ngadolo i'a ua.”

²Paulus ra Barnabas, 'aḏi 'akoru ua re 'aḏi rubutu ananga manga do-doto'o. Ḏua ananga nga muḏiḏi re ngowa'a ngaku Yesus nga muḏuo i'a toma limau Antiokhia, ananga 'aḏi sanga cumutu tagi toma limau Yerusalem. I'a da'a, ananga ma'u 'aturu ra Yesus 'ai so-soma'a re jama'ata ma bi-biri'i mangale suna ma 'atoranga gena-ge.

³Ḏua, jama'ata Antiokhia 'aḏi singata'a ananga singadolo sisupu toma limau, kara 'aḏi tagi tutumu jama'ata-jama'ata toma daeraha Fenisia re daeraha Samaria. I'a da'a, ananga 'aḏi siajele mangale ngowa-ngowa'a Yahudi ua 'aḏi dadi ngowa'a ngaku Yesus. Ngowa-ngowa'a ya 'isene habari gena-ge 'aḏi maroanga masala.

⁴Wakutu ananga 'aḏi ngadolo toma limau Yerusalem, jama'ata re jama'ata ma bi-biri'i re 'a Yesus 'ai so-soma'a ya'u dawongo ananga remanga 'akala re sinyingara sa-sanangi. Paulus re 'a Barnabas siajele mangale ma duhu sa'olo Ma Jou'ongu Madutu 'o pake ananga di'a sidagi 'Ai munara.

⁵Mada'a 'age ngowa'a ngaku Yesus nga muḏuo i'a toma nyo-nyoimi Farisi, ananga 'aḏi te'oso re 'aḏi kanau, “Ngowa'a Yahudi ua balasu wa'u suna re 'aḏi mete'e Musa 'ai hukumu wakutu ananga gena-ge 'aḏi dadi ngowa'a ngaku Yesus.”

⁶Ḏua Yesus 'ai so-soma'a re jama'ata ma bi-biri'i 'aḏi malomu, la 'aḏi masi'aturu mangale hali gena-ge.

⁷Ti'ara masala, ananga 'aḏi ma'u 'aturu gena-ge. Ma ḏo-ḏogumu, 'a Petrus 'o te'oso re 'o kanau, “Ioronongoḏu ngo-ngaku rimoi, ngini ni waro pasala ḏua, Ma Jou'ongu Madutu 'o cumutu ngoi di'a singadolo Habari Roanga toma ngowa-ngowa'a Yahudi ua, la ananga nyengara 'aḏi 'isene re 'aḏi ngaku Yesus.

⁸Ma Jou'ongu Madutu ga'a 'A waro manusia manga 'akala re sinyingara, Unanga 'o pula'a Ma Ngagara 'Ofi-'Ofi toma ngowa-ngowa'a Yahudi ua 'i ma tero sa'olo ra ngene ḏi'i. Gena-ge 'i dadi nana'o rimoi mangale Ma Jou'ongu Madutu ya'u dawongo ananga ḏi'i.

⁹Re Unanga 'a siwola-wola ua ngene re ananga. Unanga 'a sigofi ananga manga 'akala re sinyingara ma tero ngene, sababu ananga 'aḏi ngaku Yesus ma tero ngene ḏi'i.

¹⁰Sababu gena-ge, i'a sa'olo ngini ni lawana Ma Jou'ongu Madutu 'ai 'akala ma mau! Ngini mau sipake 'atoranga gena-ge toma ngowa-ngowa'a Yahudi ua. 'Atoranga gena-ge sa'olo gina tubuso, tananga ete re dotumu moju singadolo ngene toma 'orasa nena-ne wa mete'e nga'unu ua!

¹¹Siḏibo ḏi'i, ngene wo ngaku re wo sanga 'ahu kasingado-ngadolo i'a, sababu Yesus Kristus 'ai mura re dadalara ḇato, ma tero ananga ḏi'i.”

¹²Sababu gena-ge, ananga mo-moini toma lo-lomu gena-ge 'aḏi masiogoro. Ananga 'aḏi 'isene 'a Barnabas re Paulus ya sijarita ḏi'i mangale ma duhu sa'olo Ma Jou'ongu Madutu ya'u pake ananga singadolo 'aḏi 'a'a didina'o heranga re 'ori i'a heranga-heranga toma ngowa-ngowa'a Yahudi ua.

¹³Ananga 'aḏi kanau togumu i'a, kara Yakobus 'o kanau ḏi'i, “Ioronongoḏu ngo-ngaku rimoi, na'o nyengara ni 'isene ngoi,

¹⁴'Au nange, Simon ro siajele mangale 'ua re 'au wali moju Ma Jou'ongu Madutu sijumu 'Ai dadalara toma ngowa-ngowa'a Yahudi ua. Sababu Unanga 'o cumutu ngowa'a ma lelegu toma ngowa-ngowa'a Yahudi ua manga sigolona 'aḏi dadi Unanga 'ai 'umata ga'a Unanga cumutu ḏua ḏi'i.

¹⁵Gena-ge 'i ma tero sa'olo nabi-nabi 'aḏi siajele pasala ḏua ya silefo ma betongo so'o ne:

¹⁶Ma Jou'ongu Madutu 'o kanau, ‘Pasala i'a, Ngoi to sapolo moju. Ngoi dadunu ta simomi'i 'a Daud 'ai wala[38] ga'a 'i ruba ḏua re ta sidiai, la 'i dadi te'e sa'olo ma siḏa,

¹⁷la ngowa-ngowa'a lelegu ga'a 'aḏi ngaku Yesus nyangu, ananga ḏi'i 'aḏi disa Ma Jou'ongu Madutu, re ngowa'a Yahudi ua toma bangsa ma lelegu ga'a Ta'u cumutu ḏua, mo-moini 'aḏi dadi Ngoi 'ari 'umata.’ So'o gena Ma Jou'ongu Madutu ro kanau, ḏuanga i'a 'a si'a'a mo-moini nena-ne,

¹⁸ga'a 'ua re 'au wali moju ngowa'a raḏi waro.”

¹⁹'A Yakobus dadunu 'o kanau, “Sababu gena-ge, ngoi 'ari 'akala ma sanga so'o ne: Awa ngene wo sikangela ngowa'a Yahudi ua ga'a raḏi dadi ngowa'a ngaku Yesus.

²⁰Mada'a ngene balasu wo siḏingoto surata ra ananga re wa'u siajele so'o ne: Ngo-ngoromo 'i sipula'a ḏua toma jou'ongu ma somoara, ngini na oromo awa. Haiwani-haiwani ga'a 'i tola'a ua, ngini ni oromo awa re ni ka'e ma ngaunu awa. So'o gena ḏi'i, ngini ni sudala awa.

²¹Sababu, 'ua re 'au wali moju 'a Musa 'ai hukumu ya si'isene ḏua toma limau mo-moini, wakutu ananga 'aḏi malomu toma wala puji toma Sabata ma wangere ma jelele i'a.”

²²Yesus 'ai so-soma'a, jama'ata ma bi-biri'i reo jama'ata mo-moini, ananga 'aḏi mafakati re 'aḏi cumutu nga muḏuo i'a di'a 'aḏi tagi toma Antiokhia 'aḏi mamete'e ra Paulus re 'a Barnabas. Ḏua ananga 'aḏi cumutu 'a Silas re 'a Yudas ga'a 'a si'aro'o 'ai lomanga Barsabas. Ngowa-ngowa'a ngaku Yesus toma jama'ata Yerusalem 'aḏi silamo'o ananga nga muḏiḏi.[39]

²³Yesus 'ai so-soma'a re jama'ata ma bi-biri'i, 'aḏi siḏingoto surata bela moi ra ananga nga ḏuata ma betongo so'o ne: “Ngomi mi siḏingoto minga tabea toma ngowa-ngowa'a ngaku Yesus mo-moini, ga'a ngowa'a Yahudi ua toma bangsa ma lelegu ga'a ni tegoro toma limau Antiokhia, daeraha Siria re daeraha Kilikia. Ngomi nena-ne, Yesus 'ai so-soma'a re jama'ata ma bi-biri'i, re ninga ioronongoḏu ngo-ngaku rimoi.

²⁴Ngomi mi 'isene ḏua, 'age nga muḏuo i'a taminga sigolona, 'aḏi sikangela re siruwahe ninga 'akala re sinyingara remanga do-doto'o. Mada'a ananga 'aḏi sanga watasa ua ra ngomi di'a 'aḏi 'a'a so'o gena.

²⁵Sababu gena-ge, ngomi mi ma'u 'aturu re mi 'akoru ḏua di'a cumutu nga muḏuo i'a 'aḏi sapolo ra ngini. Barnabas re 'a Paulus, ga'a ngomi ni dadalara madutu, 'aḏi tagi mamete'e ra ananga.

²⁶Barnabas re 'a Paulus, ananga nga muḏiḏi gena-ge, manga 'ahu re manga se-sengene ya sidoa'a ḏua mo-moini ra Ma Jou Yesus Kristus.

²⁷Sababu gena-ge, ngomi mi 'utusu 'a Yudas re 'a Silas 'aḏi sapolo ra ngini. Ananga masiretene ya singadolo ra ngini ya simada-madanga i'a, ma tero habari 'i silefo ḏua toma surata ma dara.

²⁸Ngomi mi mafakati mete'e Ma Ngagara 'Ofi-'Ofi ma mau, la ngini ni mete'e awa 'atoranga tubuso. Mada'a ngini ni mete'e 'atoranga ne ḇato:

²⁹Ngini ni oromo awa ngo-ngoromo ga'a 'i sipula'a ḏua toma jou'ongu ma somoara, ka'e ma ngaunu awa, ni oromo awa haiwani tola'a ua re ni sudala awa. Na'o ngini ni mete'e 'atoranga gena-ge, ngini ni 'a'a 'ori i'a la-la. Ngadolo nena-ne si, murasa ma la!”

³⁰Togumu i'a, ananga 'aḏi masilo-loasa, ananga ga'a sanga 'utusu nange-ge 'aḏi tagi toma limau Antiokhia. I'a da'a, ananga ya'u lomu jama'ata mo-moini re pula'a surata gena-ge.

³¹Wakutu ananga ya baca ma surata gena-ge, ananga 'aḏi basono sanangi sababu surata gena-ge ma dara 'i site'e manga 'akala re sinyingara.

³²Yudas re 'a Silas, ananga ge nabi ḏi'i, 'aḏi makanau ma di'ara toma ngowa-ngowa'a ngaku Yesus toma limau Antiokhia. Ananga 'aḏi pula'a duga re domolo re ya'u site'e manga 'akala re sinyingara.

³³Yudas re 'a Silas 'aḏi tegoro toma limau Antiokhia ma di'ara ino. Gena ḏua, ngowa-ngowa'a ngaku Yesus toma limau Antiokhia 'aḏi siḏibo ḏi'i ananga nga muḏiḏi. Ngowa-ngowa'a gena-ge 'aḏi golo'o ya siḏingoto ananga manga tabea toma ngowa-ngowa'a ga'a 'aḏi 'utusu ananga nga muḏiḏi gena-ge. [

³⁴Mada'a Silas 'a siputusu tala unanga 'o tegoro moju toma limau Antiokhia.]

³⁵Paulus re 'a Barnabas 'aḏi tegoro ma di'ara moju toma limau Antiokhia. Ngowa-ngowa'a ngaku Yesus manga repe mamete'e rea Paulus re 'a Barnabas, ananga 'aḏi singadolo habari mangale Ma Jou Yesus.

³⁶Pasala i'a, Paulus 'o kanau ra Barnabas, “Ino ngene wo maḏibo, wo tutumu jama'ata toma limau-limau ga'a ngene wo singadolo habari mangale Ma Jou Yesus pasala ḏua, la wa waro ananga manga ngo-ngaku ma duhu sa'olo.”

³⁷Barnabas mau 'o gasa 'a Yohanes ga'a si'aro'o Markus,

³⁸mada'a 'a Paulus 'o oḏu'u sababu toma munara nga'ene, unanga 'o mete'e riwara, 'o sisoi'i tala ananga toma daeraha Pamfilia.

³⁹Ḏua 'a Paulus re Barnabas 'aḏi ma'u rubutu. singadolo ma ḏo-ḏogumu tala 'aḏi ma'u eanga. Barnabas 'o gasa 'a Yohanes Markus re 'aḏi sidete toma pulo Siprus.

⁴⁰Mada'a Paulus 'o cumutu 'a Silas. Jama'ata toma limau gena-ge 'aḏi sidoa'a ananga ra Ma Jou'ongu Madutu 'ai mura re dadalara, kara ananga 'aḏi sisoi'i tala limau Antiokhia.

⁴¹Ananga 'aḏi tagi sigoloḏi daeraha Siria re daeraha Kilikia, 'aḏi tutumu ngowa'a ngaku Yesus toma jama'ata-jama'ata re 'aḏi site'e ananga gena-ge manga ngo-ngaku.