Read Sahu Yesus 'ai so-soma'a 16 Bible Online

Yesus 'ai so-soma'a 16 - Sahu bible

Yesus 'ai so-soma'a 16

¹Paulus toma limau Derbe 'a dowanga 'ai ḏo-ḏagi toma limau Listra. 'Age ngowa'a matengo, 'ai lomanga Timotius, unanga ngowa'a ngaku Yesus. Unanga 'ai ngina ngowa'a Yahudi re mo ngaku Yesus ḏua, mada'a 'ai ḇaḇa ngowa'a Yunani.

²Ngowa-ngowa'a ngaku Yesus toma limau Listra re Ikonium manga sigolona, ananga 'aḏi waro Timotius ge ngowa'a la-la.

³Paulus 'o mau Timotius mamete'e ra unanga ḏi'i. Dadi Paulus 'u suna unanga. Paulus 'o 'a'a so'o gena, sababu ngowa'a Yahudi mo-moini ru waro Timotius 'ai ḇaḇa ge ngowa'a Yunani.

⁴Wakutu ananga 'aḏi osama toma limau-limau, ananga ya siajele hali ga'a ya siputusu ḏua ra Yesus 'ai so-soma'a re jama'ata ma bi-biri'i toma limau Yerusalem, la manga ioronongoḏu ngo-ngaku rimoi ya mete'e manga 'atoranga gena-ge.

⁵Ḏua ananga manga ngo-ngaku lebe te'e, re wange moi-wange moi ngowa'a ngaku Yesus 'aḏi matai dogo ganapu repe.

⁶Ma Ngagara 'Ofi-'Ofi simaha ua Paulus re 'a Silas 'aḏi singadolo Habari Roanga toma daeraha Asia. Dadi ananga 'aḏi dowanga manga ḏo-ḏagi toma daeraha Frigia re Galatia.

⁷Wakutu 'aḏi ngadolo toma daeraha Misia ma bati, ananga tai'i 'aḏi osama toma daeraha Bitinia, mada'a Ma Ngagara 'Ofi-'Ofi ra Yesus ya'u simaha ua ananga 'aḏi si'a.

⁸Dadi ananga 'aḏi tola'a i'a ḇato toma daeraha Misia, 'aḏi tagi i'a toma limau Troas.

⁹Toma limau gena-ge, ma lobi'i tala Paulus 'o sanga tingoḏi'i. Tai tingoḏi'i ma dara 'o oḏi'i ngowa'a toma daeraha Makedonia matengo 'o made-de'oso tai biono re 'o maḏigaro'o ra Paulus, “Sapolo ino toma daeraha Makedonia di'a no riono ngomi!”

¹⁰Paulus 'o sanga tingoḏi'i pasala i'a, ngomi re mi masidiai di'a mi tagi toma daeraha Makedonia. Sababu ngomi mi mafakati pasala ḏua Ma Jou'ongu Madutu 'o soma'a ngomi mi singadolo Habari Roanga da'a ra ananga.

¹¹Ngomi masisoi'i tala limau Troas re mi sidete si'a toma pulo Samotrake re ma ḇiḇini i'a mi tagi toma limau Neapolis.

¹²Toma limau gena-ge, ngomi mi tagi toma limau Filipi ga'a lai lamo'o toma daeraha Makedonia re 'i osama Roma manga pamarenta. Toma ngi'i gena-ge ngomi mi tegoro wangere muḏuo i'a.

¹³Toma Sabata ma wangere, ngomi mi tagi toma ḇanyo ma 'uḏu palisi'i i'a toma limau ma ngalana lamo'o ma ḏuḏunu. Ngomi mi waro toma ḇanyo ma 'uḏu gena-ge ngowa'a Yahudi manga ngi'i di'a manyiata. Ḏua ngomi mi tegoro tala re mi ma'u kanau toma we-were'a—we-were'a ga'a 'aḏi malomu toma ngi'i gena-ge.

¹⁴'Age rema ngowa'a matengo mo mawu'unu 'ami bu-bu'unu ḇa'a ungu tamanga sigolona. 'Ami lomanga ngo Lidia mi 'asala toma limau Tiatira ino re munanga mo silamo'o re siḏubuso Ma Jou'ongu Madutu. Ma Jou'ongu Madutu 'o siwelanga 'ami 'akala re sinyingara singadolo munanga mo dawongo 'a Paulus 'ai do-doto'o.

¹⁵Ngo Lidia re 'ami ngitu re ngale mo-moini 'aḏi sanga baptis, kara munanga mo saele re mo kanau, “Na'o ngini ni ngaku ngoi mode-mode'e to dadi ngowa'a ngaku Yesus, ino ni matuḏu tari wala.” Ḏua munanga mo simau-mau singadolo ngomi mamete'e 'ami go-golo'o.

¹⁶Wakutu ngomi mi tagi toma manyiata ma ngi'i, ngomi ma'u sanga mosolese budaka matengo ga'a 'o roh ma jira mi dungosama sa'olo ngowa'a mai-maisi singadolo munanga nga'unu oḏi'i ngowa'a manga 'ahu toma biono i'a. Munanga gena-ge mo si'utungu masala di'a 'ami tuanga-tuanga.

¹⁷Munanga gena-ge mo mete'e Paulus re ngomi tau-taunu, re mo maboa-boa'a, “Ngowa-ngowa'a nena-ne Ma Jou'ongu Madutu toma Gau'u 'Ai falalomu. Ananga 'aḏi sapolo 'aḏi siajele ra ngini ngo'omo di'a ngini sanga salamata!”

¹⁸Ma wangere ma jelele i'a, munanga gena-ge mo maboa-boa'a so'o gena ḇato. Paulus 'ai 'akala ḇanyo mai ri moini ḏua kara 'o magelelo ra munanga 'o kanau, “Rema Jou Yesus Kristus 'ai lomanga, ngoi to soma'a roh ma jira no supu ra munanga nena-ne!” Toma 'orasa gena-ge ḏua, roh ma jira 'i supu re sisoi'i tala munanga.

¹⁹Wakutu 'ami tuanga-tuanga 'aḏi basono tala sanga pipisi riwara, ananga 'aḏi cako'o Paulus re 'a Silas re 'aḏi gasa ananga nga muḏiḏi toma limau ma sigolona, la ya'u sikalaki.

²⁰Ananga 'aḏi sitalaḏi Paulus re 'a Silas toma Roma ma pamarenta re 'aḏi kanau, “Ananga nena-ne ngowa'a Yahudi 'aḏi 'a'a kaco tananga limau ma dara.

²¹Ananga 'aḏi sidoto'o manga 'adata 'i ma'u rapu ra ngene ngowa'a Roma nanga 'atoranga. Dadi, ngene wa mete'e awa ananga manga 'adata!”

²²Ngowa'a repe 'aḏi kalaki Paulus re 'a Silas toma Roma manga pamarenta ma biono. Ḏua ananga gena-ge 'aḏi soma'a sordado-sordado ya 'acingi Paulus re 'a Silas manga juba tamanga lese re ya'u ca'olo.

²³Paulus re 'a Silas sanga ca'olo pasala i'a, kara ya'u singosama toma bui ma dara. Bui ma sae'e gena-ge 'o sanga parenta, “Paulus re 'a Silas gena-ge, balasu na'u jaga la-la ino.”

²⁴Sababu gena-ge, unanga 'aḏi singosama Paulus re 'a Silas toma bui ma kamara toma ma dara madutu. Toma ngi'i gena-ge 'a Paulus re 'a Silas manga rou sanga lara.

²⁵Toma 'utu golona i'a Paulus re 'a Silas 'aḏi manyiata re 'aḏi manyanyi 'aḏi puji re silamo'o Ma Jou'ongu Madutu re ngowa-ngowa'a ma lelegu toma bui ma dara ḏi'i ya 'isene.

²⁶Kage-kage wusu 'i dadi siḏi masala singadolo bui ma bangini mai elala. Dadi bui ma ngalana mo-moini 'i matai welanga re 'o lara ma rate matai palasara.

²⁷Wakutu bui ma sae'e 'o momi'i, unanga 'o oḏi'i bui ma ngalana ri matai welanga. Ḏua unanga 'a onoso 'ai samaranga mau masisengene sababu unanga 'o ta'ajiri ngowa-ngowa'a mo-moini toma bui ma dara gena-ge raḏi wiḏi.

²⁸Mada'a Paulus 'o poa'a 'a siduga-duga, “No masise-sengene awa! Ngomi mo-moini 'ane-ne moju!”

²⁹Bui ma sae'e gena-ge 'o golo'o 'oboro re 'o lalara osama kamara ma dara gena-ge. Unanga 'o mojongo masala singadolo 'o terewete re 'o mapagara 'ai biono tala ra Paulus re 'a Silas manga biono.

³⁰Ḏua unanga 'o supu re ya'u gasa Paulus re 'a Silas, kara 'o kanau, “Tuanga-tuanga, ngoi balasu to 'a'a 'oru, la ngoi to sanga salamata?”

³¹Paulus re 'a Silas ya sangoro, “Na'o no ngaku Ma Jou Yesus ngana no salamata, ngana re 'ani ngitu re ngale.”

³²Ḏua Paulus re 'a Silas ya singadolo habari mangale Ma Jou Yesus; bae 'o bui ma sae'e re bae tai ngitu re ngale mo-moini.

³³Ma lobi'i gena-ge ḏua 'utu golona i'a, bui ma sae'e 'o gasa Paulus re 'a Silas toma ngi'i ma lelegu re ya'u soso'o manga nyaboto. Gena ḏua, unanga re 'ai ngitu re ngale, ananga 'aḏi sanga baptis.

³⁴Pasala i'a, unanga 'o gasa Paulus re 'a Silas tai wala re 'o pula'a oromo. Bui ma sae'e 'o maroanga masala sababu unanga rai ngitu ngale, ananga raḏi ngaku Ma Jou'ongu Madutu.

³⁵Ma ḇiḇini i'a, Roma manga pamarenta 'aḏi soma'a manga 'opsir 'aḏi tagi toma bui ma sae'e, ya singadolo parenta, “Sisupu Paulus re 'a Silas!”

³⁶Bui ma sae'e 'o siajele ra Paulus, “Tuanga-tuanga, Roma ma pamarenta 'aḏi parenta ngoi to sisupu ngini. Sababu gena-ge, ni supu re ni maḏibo reninga salamata!”

³⁷Mada'a Paulus 'o kanau i'a toma 'opsir gena-ge, “Ngomi ḏi'i ngowa'a Roma. I'a sa'olo ni sijuruhakimi nyangu, si-siḏa ni ca'olo ngomi toma ngowa'a repe manga biono, re Roma ma pamarenta 'aḏi singosama ngomi toma bui? Ḏua nena-ne ananga 'aḏi sisupu ngomi sigo-gogoro! Ngomi mi oḏu'u! Soma'a ananga 'aḏi sapolo ino masiretene, kara sisupu ngomi.”

³⁸Opsir gena-ge ya singadolo Paulus 'ai go-golo'o toma Roma ma pamarenta. Wakutu Roma ma pamarenta ya waro Paulus re 'a Silas ge ngowa'a Roma ḏi'i, ananga 'aḏi mojongo sababu ya mete'e ua Roma ma hukumu.

³⁹Ḏua ananga 'aḏi sapolo re 'aḏi golo'o ma'afu ra Paulus re 'a Silas. Gena ḏua, ananga 'aḏi sisupu Paulus re 'a Silas toma bui gena-ge re 'aḏi golo'o ra ananga 'aḏi supu toma limau gena-ge.

⁴⁰Paulus re 'a Silas ya sisoi'i tala bui gena-ge re 'aḏi tagi ra ngo Lidia 'ami wala. I'a da'a, ananga 'aḏi ma'u sanga toma ngowa-ngowa'a ngaku Yesus re 'aḏi pula'a duga re domolo ra ananga. Gena ḏua, Paulus re 'a Silas 'aḏi sisoi'i tala limau gena-ge.