Read Sahu Yesus 'ai so-soma'a 18 Bible Online

Yesus 'ai so-soma'a 18 - Sahu bible

Yesus 'ai so-soma'a 18

¹Togumu i'a, Paulus 'a sisoi'i tala limau Atena re 'o tagi si'a da'a toma limau Korintus.

²I'a da'a, Paulus 'o ma'u sanga ngowa'a Yahudi matengo 'ai lomanga Akwila. Unanga gena-ge 'ai 'asala toma daeraha Pontus. Unanga re 'ai were'a aro 'aḏi sapolo toma limau Korintus da'a nagara Italia ino. 'Ai were'a gena-ge mi lomanga ngo Priskila. Ananga 'aḏi sapolo toma limau Korintus ino, sababu Kaisar Klaudius 'o soma'a ngowa'a Yahudi mo-moini balasu masupu toma limau Roma. Paulus 'o tagi 'o tutumu ananga nga muḏiḏi,

³re unanga ro tegoro masiwala moi ra ananga sababu manga munara ma tero: tukanga 'a'a suyu'u.[41]

⁴Toma Sabata ma jelele gena, Paulus 'o tagi toma wala puji re unanga 'o ma'u sangoro i'a re ino, la ngowa'a Yahudi re ngowa'a Yunani 'aḏi ngaku ra Yesus.

⁵Toma 'orasa gena-ge, 'a Silas ra Timotius 'aḏi sapolo toma limau Korintus da'u Makedonia tala.[42] Sababu gena-ge, Paulus 'o pake 'ai 'orasa 'o singadolo Habari Roanga pa'i toma ngowa-ngowa'a Yahudi ḇato mangale Yesus: Unanga gena-ge 'O Kristus[43] ga'a Ma Jou'ongu Madutu sijaji pasala ḏua.

⁶Mada'a ngowa'a Yahudi ya'u lawana re ya'u je-jengere. Ḏua Paulus 'a wua 'ai pakeanga ma korou'u di'a 'i dadi didina'o rimoi si'elingi ananga manga ga'a. Unanga 'o kanau, “Na'o ni sanga katula, ninga sala masiretene; ngoi ta sela 'ari giama. Mulaingi nange-ne, ngoi to tagi re to singadolo Habari Roanga toma ngowa-ngowa'a Yahudi ua.”

⁷Ḏua Paulus ya'u sisoi'i tala ananga re 'o tagi ra Titus Yustus 'ai wala, 'i ma'u sebanga re wala puji. Unanga ngowa'a Yahudi ua, mada'a unanga ro silamo'o re siḏubuso Ma Jou'ongu Madutu.

⁸'A Krispus, wala puji ma sae'e, ananga ngale moi raḏi ngaku Ma Jou Yesus. Ngowa'a Korintus ma lelegu manga repe ḏi'i ya 'isene Habari Roanga ra Paulus, kara 'aḏi ngaku Ma Jou Yesus, ḏua 'aḏi sanga baptis.

⁹Toma lobi'i rimoi, Paulus 'o sanga tingoḏi'i. Toma tingoḏi'i ma dara Ma Jou'ongu Madutu 'o kanau, “No mojongo awa re no masiogoro awa!

¹⁰Matengo i'a mai ua 'o 'a'a cira ra ngana, sababu Ngoi to mete'e ngana tau-taunu. Ngana na singadolo tau-taunu Habari Roanga gena-ge, la ngowa'a repe toma limau nena-ne ḏuanga i'a 'aḏi dadi Ngoi 'ari ngowa-ngowa'a.”

¹¹Sababu gena-ge, Paulus nyengara 'o tegoro toma limau Korintus ma di'ara musungu rimoi re ma jule, re 'o doto'o Ma Jou'ongu Madutu 'ai demo toma ngowa'a Korintus.

¹²Wakutu Galio 'o dadi gubernur toma daeraha Akhaya, ngowa-ngowa'a Yahudi 'aḏi marimoi 'aḏi lawana Paulus re 'u sitalaḏi ra gubernur gena-ge.

¹³Ananga 'aḏi kalaki, “Unanga nena-ne ga'a 'o baja ngowa'a repe, la 'aḏi silamo'o re siḏubuso Ma Jou'ongu Madutu 'i ma'u rapu ra Musa 'ai hukumu!”

¹⁴Paulus sa'i 'o sangoro mada'a Galio 'o kanau, “Hei, ngowa-ngowa'a Yahudi! Na'o ni kalaki Paulus mangale 'o 'a'a 'ori i'a ma jira bolo 'o mete'e ua Kaisar 'ai pareta, nyengara ngoi ta 'isene re ta dawongo ngini ninga da'awa.

¹⁵Mada'a nena-ne pa'i ni rubutu mangale demo-demo re lomanga-lomanga raninga hukumu ḇato. Dadi ngini masiretene masidiai tala. Ngoi ua!”

¹⁶Ḏua Galio 'o soma'a sordado ya'u dusu'u sisupu ananga.

¹⁷Ngowa-ngowa'a gena-ge 'aḏi cako'o re 'aḏi ca'olo 'a Sostenes toma juruhakimi ma biono. Sostenes gena-ge 'o wala puji ma sae'e. Mada'a Galio 'a sibarekene i'a mai ua.

¹⁸Paulus 'o tegoro ma di'ara moju toma limau Korintus. Pasala i'a, 'o masilo-loasa toma ngowa-ngowa'a ngaku Yesus toma limau gena-ge, la 'o tagi toma daeraha Siria. Dadi, unanga 'o tagi ma'u mete'e ra Akwila re ngo Priskila toma limau Kengkrea. Ngadolo limau gena-ge, Paulus 'a pululu 'ai sae'e sababu 'o majaji ḏua ra Ma Jou'ongu Madutu. Gena ḏua, unanga re Akwila re ngo Priskila, ananga gena-ge 'aḏi sidete toma daeraha Siria.

¹⁹Wakutu ananga 'aḏi 'uci toma limau Efesus, Paulus sisoi'i tala 'a Akwila re ngo Priskila. Unanga 'o osama toma wala puji re 'aḏi ma'u sangoro i'a re ino toma ngowa'a Yahudi toma ngi'i gena-ge.

²⁰Ananga gena-ge 'aḏi golo'o unanga tegoro lebe ti'ara i'a ra ananga mada'a unanga 'o oḏu'u.

²¹Mada'a wakutu unanga sa'i 'o tagi 'o kanau, “Na'o Ma Jou'ongu Madutu nyengara, ngoi to sapolo 'ane moju.” Unanga 'o kanau togumu i'a, 'o mabalene toma oti re 'o sidete sisoi'i tala limau Efesus.

²²Wakutu unanga 'o ngadolo toma limau Kaisarea, unanga 'o tagi toma limau Yerusalem 'a singadolo 'ai tabea toma jama'ata gena-ge. Ḏua unanga 'a dowanga 'ai ḏo-ḏagi toma limau Antiokhia.

²³Unanga 'o tegoro toma limau Antiokhia ma di'ara i'a, kara 'o tutumu daeraha Galilea re Frigia. Toma daeraha-daeraha gena-ge 'o site'e ngowa-ngowa'a ngaku Yesus manga ngo-ngaku.

²⁴Ma 'orasa gena-ge, ngowa'a Yahudi matengo 'o sapolo toma limau Efesus. Unanga gena-ge 'ai lomanga 'a Apolos re 'ai 'asala toma limau Aleksandria. Unanga gena-ge 'o kanau 'o pahe masala re 'ai wo-waro lai repe mangale Boku 'Ofi-'Ofi.

²⁵Unanga ngowa'a 'aḏi sidoto'o ḏua mangale Yesus ḏi'i. Re kalaha unanga 'o waro nyangu mo-moini mangale Yesus, unanga gena-ge pa'i 'o waro mangale sanga baptis ra Yohanes, unanga 'o siajele rai 'akala re sinyingara ma roanga masala re 'o doto'o mode-mode'e mangale Yesus.

²⁶Unanga mulaingi 'o singadolo Habari Roanga mangale Yesus toma wala puji kama mojongo ua. Wakutu ngo Priskila re 'a Akwila 'aḏi 'isene 'ai do-doto'o, ananga 'aḏi gasa unanga tamanga wala. Toma wala gena-ge, ananga 'aḏi sitarangi ra Apolos mangale Ma Jou'ongu Madutu 'ai ngo'omo di'a sisalamata ngowa-ngowa'a sababu manga ngo-ngaku ra Ma Jou Yesus.

²⁷Ḏua Apolos mau tagi toma limau Akhaya sababu toma limau gena-ge rema ngowa-ngowa'a ngaku Yesus. Ngowa-ngowa'a ngaku Yesus toma limau Efesus 'aḏi maroanga, ḏua 'aḏi lefo surata, la ananga toma limau Akhaya 'aḏi waro re 'aḏi dawongo unanga. Wakutu Apolos 'o ngadolo i'a toma Akhaya, unanga 'o ma'u rubutu mode-mode'e ngowa-ngowa'a Yahudi toma ngowa'a repe manga biono mada'a ananga 'aḏi nga'unu unanga ua. Unanga 'o pula'a bukiti ra ananga 'o 'oro bu-bula'a—bu-bula'a toma Boku 'Ofi-'Ofi mangale Yesus gena-ge 'O Kristus. Ioronongoḏu ngo-ngaku rimoi gena-ge, ga'a 'aḏi ngaku Yesus sababu Ma Jou'ongu Madutu 'ai mura re dadalara, 'aḏi basono 'a Apolos ya'u riono.