Read Sahu Yesus 'ai so-soma'a 26 Bible Online

Yesus 'ai so-soma'a 26 - Sahu bible

Yesus 'ai so-soma'a 26

¹'Olana Agripa 'o kanau ra Paulus, “Tini sibebasa ngana na singadolo 'ani gamamu.” Dadi Paulus 'a tede 'ai giama re 'o kanau,

²“Tuanga 'Olana Agripa ga'a ngoi tini silamo'o. 'Ari 'akala re sinyingara 'i sanangi masala sababu ra Tuanga ngoi nyengara ta singadolo 'ari gamamu mangale ngowa'a Yahudi mo-moini manga da'awa ra ngoi.

³Re ḏi'i ma la-lamo'o i'a sababu 'olana na waro mo-moini ngowa'a Yahudi manga 'adata re ma'u rubutu mangale 'agama ma do-doto'o. Sababu gena-ge, ngoi to golo'o 'olana na 'isene rani 'akala ḇanyo, la ta singadolo 'ari gamamu.

⁴Ngowa'a Yahudi mo-moini ya waro ngoi to ra-ramasa ie moju, ma duhu sa'olo ngoi to 'ahu tari bangsa masiretene manga sigolona toma limau Yerusalem.

⁵Ma di'ara ḏua, ananga ya waro mangale ngoi. Na'o ananga 'aḏi nyengara ananga masiretene 'aḏi pula'a sakisi, 'au nga'ene ngoi ne to osama nyo-nyoimi toma ngowa'a Farisi re ma gu'u lai te'e minga 'agama ma 'atoranga.

⁶Re nange-ne ananga ri side-de'oso 'ane di'a ri sijuruhakimi sababu ngoi to ngaku mangale Ma Jou'ongu Madutu 'o sijaji pasala ḏua ra ngomi minga ete re dotumu mangale Unanga dadunu 'o si'ahu moju ngowa'a senge-sengene.

⁷Jaji gena-ge 'i dadi ngo-nganono di'a g̱arana nyagi moi re romoḏiḏi toma bangsa Israel wakutu ananga 'aḏi de-de'oso Ma Jou'ongu Madutu lobi'i re wangere. 'Olana ga'a ngoi to silamo'o, jaji gena-ge ngoi ta ngaku mada'a ngowa'a Yahudi ri sisala ngoi.

⁸I'a sa'olo 'ari ioronongoḏu ngowa'a Yahudi 'aḏi ngaku ua mangale Ma Jou'ongu Madutu dadunu 'o si'ahu moju ngowa'a senge-sengene?

⁹'Au nga'ene, ngoi 'ari 'akala ma sanga re ngoi 'ari munara pa'i to lawana ngowa'a ga'a 'aḏi singadolo mangale Yesus, ngowa'a Nazaret ino.

¹⁰Munara gena-ge, ngoi ta si'a'a ḏua toma limau Yerusalem. Ngoi to singosama ngowa'a ngaku Yesus manga repe toma bui, sababu ngoi to sanga surata watasa ḏua toma 'imam-'imam ma sae'e. Ngoi ḏi'i ta'u 'akoru na'o ngowa'a ngaku Yesus 'aḏi sanga hukumu sengene.

¹¹Ngoi ta'u sikisa ananga gena-ge manga repe toma wala puji ma dara, la ananga 'aḏi masoloto tamanga ngo-ngaku. 'Ari 'akala re sinyingara 'i ro'u-ro'u na'o ta'u oḏi'i ngowa'a ngaku Yesus toma ngi'i le'a ḇato singadolo ta'u kunu'i ananga toma limau le'a ḇato, ta'u disa re ta'u sanga, la ta'u sikisa ananga.”

¹²“Dadi toma 'orasa gena-ge, ngoi to tagi toma limau Damsyik to gasa surata watasa toma 'imam-'imam ma sae'e.

¹³Tuanga, tari ḏo-ḏagi ma dara, ḏa wangere 'olona tala to oḏi'i tarangi rimoi da'u diwanga tala re 'i 'erese ngoi, wangere ma la'o mai tarangi enanga. Re tarangi gena-ge 'i 'erese ngoi re ngowa-ngowa'a mamete'e ra ngoi ḏi'i.

¹⁴Ngomi mo-moini matai ruba. Gena ḏua, ngoi to 'isene iḏingi rimoi ma betongo 'i kanau ra ngoi reo demo 'Ibrani so'o ne: ‘Saulus, Saulus! I'a sa'olo ngana no sikisa Ngoi tau-taunu? Na'o no matogumu ua no lawana Ngoi, ḏuanga i'a no matuduba sababu na sanga ma sangisara masiretene.’

¹⁵Ḏua ngoi to sano, ‘Ma Jou, ngana ge 'a guna?’ Ma Jou 'a sangoro, ‘Ngoi nena-ne Yesus ga'a Ngana no sikisa.

¹⁶Momi'i re no te'oso. Ngoi to masijumu ra ngana, la tini sitede ngana no dadi Ngoi 'ari falalomu re sakisi. Ngana balasu na siajele toma ngowa'a lelegu mangale ngana no oḏi'i masiretene toma wangere nange-ne re ḏuanga i'a na siajele ḏi'i 'ori i'a ga'a Ngoi to sijumu ḏua ra ngana.

¹⁷Ngoi tini saolo toma bangsa Israel re ngowa-ngowa'a Yahudi ua manga 'akala re sinyingara ma jira. Ḏuanga i'a, Ngoi to soma'a no tagi re no singadolo Habari Roanga toma ngowa-ngowa'a Yahudi ua,

¹⁸di'a na siwelanga manga la'o, la 'aḏi supu toma hafu-hafu re 'aḏi osama toma tarangi ma dara re silalo'o ananga toma 'Iblisi ma pareta re 'aḏi osama nyo-nyoimi ra Ma Jou'ongu Madutu 'ai Pareta, la Unanga 'a singi-ngiranga manga ḏosa-ḏosa re 'aḏi dadi 'Ai 'umata ga'a Unanga 'o cumutu ḏua sababu ananga 'aḏi ngaku Ngoi.’ ”

¹⁹“Tuanga 'Olana Agripa ga'a ngoi tini silamo'o, Ma Jou'ongu Madutu 'o pula'a tingoḏi'i ḏua ra ngoi. Sababu gena-ge, ngoi to makutale ta mete'e tingoḏi'i gena-ge.

²⁰Ta gogono ua ta siajele: Ngowa-ngowa'a balasu 'aḏi maḏibo toma ngo'omo boloto re 'aḏi sidoa'a mode-mode'e manga 'ahu ra Ma Jou'ongu Madutu re 'aḏi sijumu tamanga de'oso re ḏegoro mangale ananga raḏi maḏibo mode-mode'e toma ngo'omo boloto. Ngoi ta siajele gena-ge siḏa-siḏa toma limau Damsyik. Gena ḏua, toma limau Yerusalem re toma daeraha Yudea re toma ngowa-ngowa'a Yahudi ua ḏi'i.

²¹Sababu gena-ge, ngowa'a Yahudi 'aḏi cako'o ngoi ra Ma Jou'ongu Madutu 'ai Wala ma soana re 'aḏi mau sisengene ngoi.

²²Mada'a singadolo 'orasa nange-ne Ma Jou'ongu Madutu ri saolo ngoi dadi ngoi to 'ahu moju re to pula'a sakisi toma ngowa'a repe manga biono: bae ngowa'a la-lamo'o, bae ngowa'a ma pake ua. Dadi 'oru ga'a ngoi to siajele nange-ne, gena-ge enanga 'i supu ua 'oru ga'a nabi-nabi re 'a Musa ya siajele pasala ḏua:

²³'O Kristus[47] ga'a Ma Jou'ongu Madutu 'a sijaji pasala ḏua, Unanga balasu 'a basono sangisara. Ḏua Unanga gena-ge 'O dadi ngowa'a ma mulaingi ga'a dadunu 'O 'ahu moju toma ngowa'a senge-sengene manga sigolona, la Unanga gena-ge 'o singadolo habari ma tero sa'olo tarangi toma ngowa'a mo-moini: bae ngowa'a Yahudi bae ngowa'a Yahudi ua.”

²⁴Wakutu 'a Paulus 'o ka-kanau so'o gena moju, Festus 'o kanau 'a siduga-duga, “Paulus ngana ne ḏa re no pona! Sababu ngana ne ni wo-waro pai'i woḏi.”

²⁵Paulus 'a sangoro, “Festus, ga'a ngoi tini silamo'o, ngoi to pona ua. Ngoi to siajele mo-moini gena-ge 'i supu tari fikirana ma la-la.

²⁶Mo-moini gena-ge, 'Olana Agripa masiretene na waro. Sababu gena-ge ngoi kama mojongo ua ta siajele mode-mode'e i'a ra 'olana. So'o gena ḏi'i mo-moini gena-ge 'olana na waro masiretene sababu 'i dadi toma ngowa'a kawasa manga biono.

²⁷'Olana Agripa ga'a ngoi tini silamo'o, mo-moini gena-ge nabi-nabi ya silefo pasala ḏua, no ngaku bolo ua? Ngoi ta basono 'olana no ngaku.”

²⁸Ḏua 'Olana Agripa 'o kanau ra Paulus, “Dadi ngana no ta'ajiri lai gapanga di'a no baja ngoi ḏua to dadi ngowa'a ngaku Yesus toma 'orasa nange-ne?!”

²⁹Paulus 'a sangoro, “Ma 'orasa lai caiti bolo lai ti'ara, ngoi to manyiata ra Ma Jou'ongu Madutu tau-taunu di'a 'Olana Agripa re Tuanga-tuanga mo-moini ga'a na 'isene ngoi 'ari sakisi, la ni dadi sa'olo ngoi ḏi'i — ḏuga-ḏuga ngini sanga rate ua ma tero sa'olo ngoi!”

³⁰Ma ḏo-ḏogumu tala, 'olana, gubernur, ngo Bernike re ananga mo-moini 'aḏi made'oso.

³¹Wakutu ananga raḏi supu, ananga 'aḏi makanau matengo re matengo, “Unanga nena-ne wa sanga kai sala ua dadi wo sihukumu rema hukumu sengene bolo wo sibui unanga, 'i yoḏu'u.”

³²Ḏua 'Olana Agripa 'o kanau ra Festus, “Na'o unanga 'a singadolo riwara 'ai gamamu ra Kaisar Roma, unanga nena-ne wo sisupu ḇato!”