Read Sahu Yesus 'ai so-soma'a 28 Bible Online

Yesus 'ai so-soma'a 28 - Sahu bible

Yesus 'ai so-soma'a 28

¹Ngomi mo-moini mi 'uci rema salamata toma ngi'i gena-ge, kara mawaro pulo gena-ge ma lomanga Malta.

²Pulo gena-ge ma dutu, ananga manga seri'i re go-gasa lai rousu masala. Ananga 'aḏi dawongo ngomi remanga 'akala re sinyingara sa-sanangi re 'aḏi 'a'a u'u di'a ngomi, la mi marasu'u sababu ri besa'a re 'i 'alo.

³Paulus 'o 'oro ate re 'a dogo 'a siteru toma u'u gena-ge. Masiwaro ua cuku'u ngai moi masupu toma ate ma dara sababu u'u ma sa-sau'u. Ḏua cuku'u gena-ge ya tubu'u 'a Paulus 'ai giama.

⁴Wakutu pulo ma dutu ya oḏi'i cuku'u gena-ge 'i ko-kole ra Paulus 'ai giama, ananga 'aḏi makanau matengo re matengo, “Unanga nena-ne ga'a sisengene ngowa'a, sababu kalaha unanga ro salamata toma bahaya ngoloto, Dewi Keadilan munanga mo sieanga unanga 'o 'ahu ua.”

⁵Mada'a 'a Paulus 'a siwale ma cuku'u toma u'u, 'ai giama kama nyaboto ua re 'a basono 'i si-siḏi ceka'a i'a mai ua.

⁶Ananga manga 'akala ma sanga, ngasamoi 'ai giama 'i roboso bolo kage-kage 'o masiruba 'o sengene, mada'a 'aḏi mado-doma ma di'ara 'i dadi 'oru rimoi ua. Ḏua ananga manga fikirana ri lulubara, ananga 'aḏi makanau Paulus ne ḏa 'o dewa.

⁷Ngowa'a la-lamo'o matengo 'ai lomanga Publius, unanga rai tana'a ḇotu moi, kiḏanga ua toma ngi'i gena-ge. Unanga gena-ge 'o dadi gubernur toma pulo gena-ge re 'ai 'akala re sinyingara 'i rousu masala. Unanga 'o dawongo ngomi tuḏu ra unanga 'ai wala ma di'ara wangere ro'ange re unanga 'o de-de'oso ngomi.

⁸Toma 'orasa gena-ge, Publius 'ai ḇaḇa 'o gagama re 'ai po'olo si-siḏi. 'A Paulus 'o osama tai kamara re 'o manyiata, kara 'a siteru 'ai giama ra unanga gena-ge, ḏua 'o la.

⁹Sababu gena-ge, ngowa'a siḏi mo-moini toma pulo gena-ge ya 'isene re 'aḏi matai sapolo, kara Paulus ya'u si-la.

¹⁰Ananga 'aḏi pula'a 'ori i'a ma repe sababu mau 'aḏi silamo'o ngomi. Ḏua wakutu ngomi sa'i mi sidete, ananga matai gasa 'oru ḇato ga'a ngomi mi paralu toma kapala taminga ḏo-ḏagi ma dara.

¹¹Ngomi mi tegoro ma di'ara ngara ro'ange toma ngi'i gena-ge togumu i'a, mi mabalene toma kapala re mi masisoi'i tala pulo gena-ge. Kapala gena-ge toma Aleksandria ino re enanga 'i matapu 'orasa momoku re 'orasa 'alo-'alo toma pulo gena-ge. Kapala gena-ge ya sigabara toma remanga Dewa Sasalanga Kastor re Poluks (Seus 'ai ngowa'a sasalanga).

¹²Ngomi mi ngadolo toma limau Sirakusa re mi matuḏu ma di'ara wangere ro'ange.

¹³Toma limau gena-ge, ngomi sidete mete'e ngoloto ma 'uḏu re mi ngadolo toma limau Regium. Ma ḇiḇini ino, kore sara 'i hoa singadolo pa'i wange ḏiḏi ḇato ngomi remi ngadolo toma limau Putioli.

¹⁴Toma ngi'i gena-ge, ngomi ma'u sanga ngowa'a ngaku Yesus nga muḏuo i'a. Ananga 'aḏi golo'o ngomi mi tegoro ra ananga ma di'ara migu rimoi, kara mi tagi toma limau Roma.

¹⁵Nanga ioronongoḏu ngo-ngaku rimoi toma limau Roma ya 'isene minga habari mi sapolo. Dadi ananga 'aḏi sapolo totoma ngomi toma ngi'i ma lomanga Pasara Apius re toma ngi'i ma lomanga Pasanggrahan Ro'ange ḏi'i. Wakutu Paulus ma'u sanga ra ananga unanga 'a sibere ie 'ai murasa ma la ra Ma Jou'ongu Madutu re 'ai 'akala re sinyingara sanga babata.

¹⁶Wakutu ngomi ngadolo toma limau Roma, Paulus ananga 'aḏi siwola i'a matengo, la unanga 'o tegoro toma wala ḏu moi reo sordado matengo 'u jaga-jaga.

¹⁷Toma wangere ro'ange palisi'i i'a, Paulus 'o 'aro'o re ya'u lomu ngowa'a Yahudi manga bi-biri'i. Toma lo-lomu gena-ge ma dara unanga 'o kanau ra ananga, “Ioronongoḏu ngowa'a Yahudi! Ngoi to 'a'a sala ua ra ngene nanga bangsa re ngoi ta sito'u-to'u nyangu nanga 'adata re 'atoranga tananga ete re dotumu moju. Kalaha so'o gena, ananga ri cako'o ngoi toma limau Yerusalem re sipula'a toma ngowa-ngowa'a Roma.

¹⁸Ananga gena-ge ri sano re ri disa waro ngoi, mada'a ya sanga kari sala ua. Dadi ananga mau 'aḏi sibebasa ngoi, sababu ngoi to 'a'a sala ua ga'a ngoi to sanga hukumu sengene.

¹⁹Mada'a ngowa-ngowa'a Yahudi ri lawana gena-ge. Dadi ngoi ta gasa 'ari hali toma Kaisar Roma, la sijuruhakimi ngoi. Kalaha ngoi to 'a'a so'o gena, ta sisala ua ngene nanga bangsa.

²⁰Ma sababu gena-ge, ngoi to golo'o ngene mo-moini wo ma'u sanga, la wo maja-jarita. Ananga ri rate ngoi sababu ngoi to singadolo mangale 'a Yesus.”

²¹Ḏua ananga 'aḏi kanau ra unanga, “Ngomi mi sanga surata ngai moi i'a mai nyangu toma daeraha Yudea re ngowa'a matengo i'a mai nyangu 'aḏi gasa habari mangale ngana bolo siajele mangale 'ani lomanga ma jira.

²²Mada'a ngomi ḏi'i mau ma waro mangale ngana 'ani ngo-ngaku, sababu ngomi mo-moini ma 'isene re mawaro 'ani do-doto'o ge ngowa'a ya sije-jengere.”

²³Ḏua Paulus re ananga ya sitantukanga toma wangere rimoi ananga ma'u sanga. Toma wangere gena-ge, ngowa'a repe matai sapolo ra Paulus 'ai ngi'i. Da-daini i'a moju singadolo wangere so'o ne'o, Paulus 'a singadolo re 'a sitarangi ra ananga mangale Ma Jou'ongu Madutu 'ai Pareta. Unanga 'o pake 'a Musa re nabi-nabi manga boku ma bu-bula'a, la ananga 'aḏi ngaku Yesus sa'olo 'O Mesias.

²⁴Mamuni'a 'aḏi ngaku ga'a 'oru Paulus siajele ḏua, mada'a mamuni'a ya ngaku ua.

²⁵Ananga 'aḏi ma'u tolabe re ma'u pia'olo re 'aḏi sisoi'i tala ngi'i gena-ge sababu Paulus dadunu 'o kanau ra ananga, “Tero mode'e, Ma Ngagara 'Ofi-'Ofi 'i siajele ra nabi Yesaya di'a ngini ninga ete re dotumu moju!

²⁶Ma Jou'ongu Madutu 'ai iḏingi so'o ne: ‘Ni tagi re ni siajele toma bangsa nena-ne: Ananga ya 'isene tau-taunu mada'a ananga ya sahe ua; ananga ya oḏi'i tau-taunu mada'a ananga ya sahe ua ma maksudu.

²⁷Sababu bangsa nena-ne manga 'akala re sinyingara lai te'e, manga ngau'u ri popongolo, re manga la'o ri ruutu. Gena-ge 'i dadi, la remanga la'o ya oḏi'i ua, remanga ngau'u ya 'isene ua, remanga 'akala re sinyingara ya sahe ua, Dadi awa ananga 'aḏi ḏibo ra Ngoi, la 'aḏi dawongo 'Ari salamata.’ ”

²⁸Ma ḏo-ḏogumu tala 'a Paulus 'o kanau, “Sababu gena-ge ioronongoḏu ngowa'a Yahudi, ngini balasu na waro mangale habari mangale salamata ra Ma Jou'ongu Madutu ino, nange-ne singadolo toma ngowa-ngowa'a Yahudi ua re ḏuanga i'a ananga ya mete'e.” [

²⁹'A Paulus 'o kanau so'o gena togumu i'a, ngowa-ngowa'a Yahudi ya sisoi'i tala ngi'i gena-ge raḏi ma'u tolabe matengo re matengo.]

³⁰Toma musungu romoḏiḏi ma dara, Paulus 'o sewa wala toma limau Roma re 'o tegoro toma wala gena-ge. Unanga 'o sanangi masala na'o 'a guna ḇato 'u dalawi'i.

³¹Unanga 'o singadolo kama mojongo ua mangale Ma Jou'ongu Madutu 'ai Pareta re mangale Ma Jou Yesus Kristus. Re Paulus 'a si'a'a 'ai munara gena-ge kama sanga dola'aku ua.