Read Sahu Yesus 'ai so-soma'a 5 Bible Online

Yesus 'ai so-soma'a 5 - Sahu bible

Yesus 'ai so-soma'a 5

¹Mada'a 'age rema na-nau'u matengo 'ai lomanga 'a Ananias. Unanga re 'ai were'a 'ami lomanga ngo Safira, 'aḏi wu'unu manga tana'a masiretene ḇotu moi.

²Tana'a gena-ge ya wu'unu, re ma ijana kaci moi ya tahana di'a ananga re kaci moi ya gasa re ya sipula'a ra Yesus 'ai so-soma'a. Ananias 'ai 'ulungu ma jira gena-ge 'aḏi ma'u waro ananga were'a nau'u.

³Ḏua 'a Petrus 'o kanau ra unanga gena-ge, “Ananias, i'a sa'olo ngana na sieanga i'a 'ani 'akala re sinyingara 'o 'Iblisi ya parenta? Wakutu ngana no masigo-gogoro na tahana tana'a ma ijana kaci moi di'a ngana, ngana no sa-sakala Ma Ngagara 'Ofi-'Ofi!

⁴Wakutu na wu'unu nyangu, tana'a gena-ge ta ngana re na wu'unu togumu i'a ma ijana mai ta ngana moju. I'a sa'olo 'ani 'akala re sinyingara ma dara 'i baolo 'ulungu ma jira so'o gena? Ngana no sa-sakala manusia ua, mada'a no sa-sakala Ma Jou'ongu Madutu.”

⁵Wakutu Ananias 'a 'isene demo gena-ge ḏua, unanga 'o ruba re 'o sengene. Ngowa'a mo-moini ya 'isene mangale gena-ge 'aḏi matai mojongo masala.

⁶Gena-ge ḏua, ngowa'a tubaie-tubaie 'aḏi sapolo re ya sao Ananias 'ai mayeti, ya gasa sisupu, kara ya palihara.

⁷Palisi'i i'a ḏa jam ro'ange i'a, 'ai were'a mo osama. Munanga ma waro ua, wakutu gena-ge 'o 'oru waro 'i dadi.

⁸Petrus 'o kanau i'a ra munanga, “Tai'i na siajele ra ngoi, ninga tana'a ga'a ngini were'a nau'u na wu'unu ma ijana ma lamo'o so'o ne?” 'A ngo Safira ma sangoro, “Mode'e ma ijana ma lamo'o so'o gena-ge.”

⁹Ḏua Petrus 'o kanau moju ra munanga, “I'a sa'olo ngini were'a nau'u ni marimoi ni tai'i Ma Ngagara 'Ofi-'Ofi? 'Isene! Ngowa'a tubaie-tubaie ga'a 'aḏi palihara 'ani nau'u aro 'aḏi maḏibo. Ananga gena-ge ḏi'i 'aḏi gasa sisupu ngana.”

¹⁰Ma 'orasa gena-ge ḏua, ngo Safira mo ruba re mo sengene ra Petrus 'ai biono. Wakutu tubaie-tubaie 'aḏi osama, ananga 'aḏi sanga i'a munanga romo sengene. Ḏua ananga ya tede 'ami mayeti sisupu, kara gasa ya palihara tami nau'u 'ai gumuḏu'u.

¹¹Dadi ngowa-ngowa'a ngaku Yesus re ngowa-ngowa'a ma lelegu, ananga mo-moini gena-ge ga'a 'aḏi 'isene mangale 'oru ga'a 'i dadi gena-ge, 'aḏi matai mojongo.

¹²Ḏua Yesus 'ai so-soma'a 'aḏi 'a'a didina'o heranga re 'ori i'a hera-heranga ma repe toma ngowa'a kawasa. Ngowa'a ngaku Yesus mo-moini, ya sirimoi manga 'akala re sinyingara 'aḏi malomu ra Ma Jou'ongu Madutu 'ai Wala toma surabi Salomo.

¹³Ngowa'a kawasa 'aḏi silamo'o mode'e ngowa-ngowa'a ngaku Yesus. Mada'a, wakutu ngowa'a ngaku Yesus 'aḏi malomu, ngowa'a ga'a 'aḏi ngaku Yesus nyangu matengo i'a mai ua 'o sapolo malomu sababu 'aḏi mojongo.

¹⁴Mada'a lebe ti'ara ganapu repe ngowa'a 'aḏi ngaku Ma Jou, bae na-nau'u re we-were'a.

¹⁵Dadi ananga 'aḏi gasa ngowa-ngowa'a siḏi re ya sigare toma dederu bolo toma jungutu sisebanga i'a toma tapaka ma 'uḏu, la wakutu 'a Petrus 'o tola'a i'a, tiaro pa'i 'ai guḏumingi ḇato ya'u nga'unu, la ananga 'aḏi la.

¹⁶Sababu gena-ge, ngowa-ngowa'a co-cori limau Yerusalem, 'aḏi matai sapolo re manga duo-duono 'aḏi gasa ngowa-ngowa'a siḏi re roh ma jira ya'u dungosama. Ngowa-ngowa'a siḏi re roh ma jira ya'u dungosama gena-ge, ananga 'aḏi la mo-moini.

¹⁷Ḏua 'imam 'agung re 'ai me-mete'e mo-moini toma ngowa'a Saduki, manga 'akala re sinyingara 'i go-goḏi ra Yesus 'ai so-soma'a, sababu ngowa'a repe 'aḏi mete'e Yesus 'ai so-soma'a.

¹⁸Ananga 'aḏi cako'o Yesus 'ai so-soma'a re ya'u singosama toma ngowa'a kawasa manga bui.

¹⁹Mada'a ma lobi'i tala, Ma Jou'ongu Madutu 'ai mala'ekata matengo 'o welanga bui ma ngalana, re ya'u gasa sisupu ananga. Mala'ekata matengo gena-ge 'o kanau ra ananga,

²⁰“Tagi, ni made-de'oso ra Ma Jou'ongu Madutu 'ai Wala ma soana, re ni siajele toma ngowa'a kawasa mangale 'ahu su-sungi.”

²¹Da-daini i'a moju, Yesus 'ai so-soma'a 'aḏi mete'e mala'ekata ma bererongo. Ananga 'aḏi tagi ra Ma Jou'ongu Madutu 'ai Wala ma soana, re 'aḏi mulaingi doto'o. Toma 'orasa gena-ge ḏi'i, 'imam 'agung re 'ai me-mete'e toma ngowa'a Saduki, ananga 'aḏi sapolo re 'aḏi 'aro'o Mahkamah 'Agama re ngowa'a Yahudi ma bi-biri'i mo-moini malomu, la 'aḏi ma'u kanau mangale Yesus 'ai so-soma'a. Ḏua ananga 'aḏi soma'a ngowa'a tagi toma bui 'aḏi gasa ino Yesus 'ai so-soma'a, la sitalaḏi ra ananga.

²²Mada'a wakutu ngowa'a ga'a 'aḏi sanga soma'a gena-ge 'aḏi ngadolo toma bui, Yesus 'ai so-soma'a raḏi cua. Ḏua ananga 'aḏi maḏibo re 'aḏi siajele toma Mahkamah 'Agama.

²³Ananga 'aḏi kanau, “Wakutu ngomi ngadolo toma bui, ngomi ma sanga 'o bui ma ngalana 'i kuci lai rousu re 'o ngowa'a jaga 'aḏi jaga-jaga toma ngalana gena-ge. Mada'a wakutu ngomi ma welanga ma ngalana, mi sanga matengo mai ua toma dara.”

²⁴Wakutu Ma Jou'ongu Madutu 'ai Wala ma ja-jaga ma sae'e re 'imam-'imam ma sae'e ya 'isene habari gena-ge, ananga ya waro ma gogare riwara mangale 'oru 'i dadi ra Yesus 'ai so-soma'a re 'aḏi mojongo, sababu ya waro ua 'oru 'i dadi ra ananga.

²⁵Ḏua, na-nau'u matengo, sapolo 'o gasa habari 'o kanau, “ 'Isene! Ngowa-ngowa'a ga'a Tuanga-Tuanga ni singosama toma bui, nange-ne raḏi doto'o ngowa'a repe ra Ma Jou'ongu Madutu 'ai Wala ma soana!”

²⁶Dadi Ma Jou'ongu Madutu 'ai Wala ma sae'e re 'ai ngowa-ngowa'a jaga 'aḏi tagi 'oro Yesus 'ai so-soma'a. Mada'a ya'u 'oro la-la, sababu 'aḏi mojongo awa-awa ngowa'a repe 'aḏi poini ananga reo maḏi.

²⁷Yesus 'ai so-soma'a ya'u gasa sitalaḏi toma Mahkamah 'Agama. Ḏua 'imam 'agung ya'u sano ananga.

²⁸Unanga 'o kanau, “Ngomi simaha ua, awa ngini ni doto'o ngowa-ngowa'a ra Yesus 'ai do-doto'o. Tai'i ngini ni oḏi'i nange-ne 'oru 'i dadi: Ninga do-doto'o toma limau Yerusalem sitabi donga re ni sikalaki ngomi mangale ngowa'a gena-ge ga'a ro sengene, ma sababu ngomi!”

²⁹Petrus re Yesus 'ai so-soma'a ma lelegu, 'aḏi sangoro, “Ngomi balasu mi mete'e Ma Jou'ongu Madutu 'ai 'akala ma mau re mi mete'e ua manusia manga 'akala ma mau. Sababu gena-ge, ngomi mi doto'o mangale Yesus,

³⁰Unanga ga'a ngini nu sisalib mada'a Ma Jou'ongu Madutu dadunu 'o si'ahu moju toma ngowa'a senge-sengene manga sigolona. Ma Jou'ongu Madutu gena-ge ga'a ngene nanga ete re dotumu 'aḏi silamo'o re siḏubuso.

³¹Ma Jou'ongu Madutu ro pula'a ra Unanga, 'O ḏe-ḏegoro re 'O kuasa lai kau'u sa'olo sae'e re 'o Salamata ma Cimi, la Ma Jou'ongu Madutu 'o riono ngowa'a Israel 'aḏi maḏibo toma ngo'omo boloto, re la Unanga 'a singi-ngiranga manga ḏosa-ḏosa.

³²Ngomi nena-ne mi dadi sakisi mangale mo-moini gena-ge. Ma Ngagara 'Ofi-'Ofi, ga'a Ma Jou'ongu Madutu 'o pula'a ḏua di'a ngowa-ngowa'a ga'a 'aḏi mete'e Unanga 'ai 'akala ma mau, 'I dadi sakisi ḏi'i mangale Yesus.”

³³Wakutu Mahkamah 'Agama ya 'isene so'o gena, ananga 'aḏi ruta masala re 'aḏi ma'u fakati ya'u sisengene Yesus 'ai so-soma'a.

³⁴Mada'a, toma Mahkamah 'Agama 'age rema ngowa'a Farisi matengo 'ai lomanga 'a Gamaliel,[12] unanga 'o dadi guru 'agama, re 'o sayanga ma jingi'i. Unanga 'o te'oso re 'o soma'a ngowa'a 'aḏi sisupu ceka'a ua Yesus 'ai so-soma'a.

³⁵Ḏua unanga 'o kanau toma Mahkamah 'Agama, “Ioronongoḏu ngowa'a Israel! Ngini ni madibanga la-la i'a mangale ḏuanga i'a ngini ni 'a'a sa'olo ra ananga nga muḏiḏi gena-ge.

³⁶Sababu ma siḏa 'i waiti ḏua ra Teudas, unanga 'o matuhu ngowa'a la-lamo'o, ḏua ḏa ngowa'a nga latu rata 'aḏi mete'e unanga. Mada'a unanga ngowa'a 'u sisengene re 'ai me-mete'e 'aḏi matai are.

³⁷Pasala i'a wakutu 'oro lomanga, 'i waiti ḏi'i matengo 'ai lomanga Yudas, ngowa'a Galilea. Sababu 'ai bo-baja lai te'e, ngowa'a manga repe ḏi'i 'aḏi mete'e unanga di'a 'aḏi malawana Roma manga pamarenta. Mada'a unanga ḏi'i ngowa'a 'u sisengene re 'ai me-mete'e mo-moini 'aḏi matai are.

³⁸Sababu gena-ge, mangale 'ori i'a 'i dadi ḏua ne, ngoi to ajele mangale ngini na'u 'a'a cira ananga awa, sieanga ananga ḇato! Na'o ananga manga do-doto'o re manga ga'a ma 'asala toma manusia, ḏuanga i'a enanga 'i iranga.

³⁹Mada'a ioronongoḏu ngowa'a Yahudi, na'o ma 'asala ra Ma Jou'ongu Madutu tala, 'a guna ua nga'unu 'a singi-ngiranga, sababu ngini ni malawana Ma Jou'ongu Madutu!” 'O Mahkamah 'Agama ya dawongo 'a Gamaliel 'ai ajele mangale gena-ge.

⁴⁰Ḏua Yesus 'ai so-soma'a 'aḏi sanga 'aro'o ya'u ca'olo re ya'u simaha ua 'aḏi doto'o mangale Yesus. Togumu i'a kara ya'u eanga.

⁴¹Yesus 'ai so-soma'a ya sisoi'i tala Mahkamah 'Agama remanga roanga, sababu Ma Jou'ongu Madutu ya'u cumutu ananga balasu 'aḏi sanga je-jengere toma ngowa-ngowa'a gena-ge sababu ananga 'aḏi doto'o ngowa-ngowa'a ra Yesus 'ai do-doto'o.

⁴²Ma wangere ma jelele i'a, ananga 'aḏi doto'o re 'aḏi singadolo Habari Roanga tau-taunu mangale Yesus gena-ge 'O Kristus ra Ma Jou'ongu Madutu 'ai Wala ma soana re ngowa'a manga wala-wala.