Read Sahu Yesus 'ai so-soma'a 6 Bible Online

Yesus 'ai so-soma'a 6 - Sahu bible

Yesus 'ai so-soma'a 6

¹Ngowa'a ngaku Yesus lebe ti'ara ganapu repe. Toma 'orasa gena-ge Ngowa'a Yahudi ga'a 'aḏi pake demo Yunani, 'aḏi kuḏubungu toma ngowa'a Yahudi ga'a 'aḏi pake demo 'Ibrani. Ngowa'a Yahudi ga'a ya pake Yunani manga demo 'aḏi kanau, “Ngomi minga balo-balo sanga balangu ua di'a manga 'ahu lobi'i re wangere.”

²Sababu gena-ge, Yesus 'ai so-soma'a ya'u lomu ngowa'a ngaku Yesus mo-moini re 'aḏi kanau ra ananga, “Rousu ua, na'o ngomi mi matogumu doto'o Ma Jou'ongu Madutu 'ai demo, la mi 'urusu ngo-ngoromo.

³Sababu gena-ge, ioronongoḏu ngo-ngaku rimoi, ngini ni cumutu ngowa'a nga tumudingi ga'a manga lomanga camari nyangu taninga sigolona, re Ma Ngagara 'Ofi-'Ofi ya'u ḏegoro re 'aḏi pahe, la nga'unu ngomi soma'a 'aḏi 'urusu gena-ge,

⁴sababu ngomi mau mi manyiata re mi singadolo Ma Jou'ongu Madutu 'ai demo.”

⁵Ananga mo-moini ya dawongo 'a Yesus 'ai so-soma'a manga demo. Ḏua ananga 'aḏi cumutu 'a Stefanus, unanga 'o ngaku mode-mode'e Yesus, re Ma Ngagara 'Ofi-'Ofi 'u ḏegoro. Gena ḏi'i 'aḏi cumutu 'a Filipus, Prokorus, Nikanor, Timon, Parmenas, re 'a Nikolaus ngowa'a Yahudi ua da'a limau Antiokhia ino mada'a ro osama Yahudi manga 'agama.

⁶Ananga nga tumudingi, ga'a sanga cumutu gena-ge, ya'u sigasa i'a ra Yesus 'ai so-soma'a re 'aḏi siteru manga giama ra ananga, re 'aḏi manyiata golo'o Ma Jou'ongu Madutu ya'u sibarakati ananga.

⁷Dadi, Ma Jou'ongu Madutu 'ai demo, 'i dogo rera re walata. Ngowa'a ngaku Yesus toma limau Yerusalem 'i ganapu 'aḏi dogo repe, re 'imam manga repe ḏi'i 'aḏi ngaku re 'aḏi mete'e Yesus 'ai do-doto'o.

⁸Ma Jou'ongu Madutu 'o sibarakati Stefanus singadolo unanga 'o 'a'a didina'o heranga re 'ori i'a hera-heranga ma repe toma ngowa'a kawasa.

⁹Mada'a rema ngowa'a 'aḏi lawana unanga, ananga gena-ge ngowa-ngowa'a toma wala puji ga'a si'aro'o Wala Puji Ngowa-ngowa'a Bebasa.[13] Ngowa-ngowa'a toma wala puji gena-ge ngowa-ngowa'a Yahudi toma limau Kirene re toma limau Aleksandria. Ananga gena-ge, re ngowa'a Yahudi ḏi'i toma daeraha Kilikia re Asia, ma'u rubutu ra Stefanus.

¹⁰Mada'a ananga 'aḏi nga'unu ua lawana Stefanus 'ai demo, sababu Ma Ngagara 'Ofi-'Ofi si'a'a unanga 'o pahe wakutu 'o kanau.

¹¹Ḏua ananga 'aḏi masigo-gogoro 'aḏi baja ngowa'a nga muḏuo i'a, la 'aḏi kanau so'o ne: “Ngomi mi 'isene ḏua unanga gena-ge 'o je-jengere 'a Musa re Ma Jou'ongu Madutu.”

¹²Dadi ananga gena-ge 'aḏi tau-tau'u u'u toma ngowa-ngowa'a re ngowa'a Yahudi manga sae'e re 'o guru-guru 'agama. Ḏua ananga 'aḏi tagi cako'o 'a Stefanus, kara 'aḏi gasa unanga sitalaḏi toma Mahkamah 'Agama.

¹³Ananga 'aḏi sitalaḏi sakisi-sakisi sa-sakala ra Stefanus. Sakisi-sakisi gena-ge 'aḏi kanau, “Unanga nena-ne 'o si'u'ua tau-taunu Ma Jou'ongu Madutu 'ai Wala re 'o je-jengere Musa 'ai hukumu.

¹⁴Ngomi mi 'isene unanga 'o siajele mangale Yesus, ngowa'a Nazaret, 'a ruba Ma Jou'ongu Madutu 'ai Wala nena-ne re 'a ngali nanga 'adata re 'atoranga mo-moini ga'a 'a Musa ra sisoi'i tala ra ngene.”

¹⁵Ngowa'a mo-moini ga'a 'aḏi tegoro toma Mahkamah 'Agama 'aḏi tailako 'a Stefanus re 'aḏi oḏi'i unanga 'ai biono ma tero sa'olo mala'ekata ma biono.