Read Sahu Yesus 'ai so-soma'a 7 Bible Online

Yesus 'ai so-soma'a 7 - Sahu bible

Yesus 'ai so-soma'a 7

¹'Imam 'agung 'o sano ra Stefanus, “Ngowa-ngowa'a gena-ge 'aḏi siajele 'oru ga'a 'i banari bolo ua?”

²Stefanus 'a sangoro, “Baba-baba re ngini ioronongoḏu ngowa'a Yahudi, tai'i ni 'isene ngoi! Nanga ete re dotumu 'a Abraham wakutu unanga 'o tegoro toma daeraha Mesopotamia moju, re 'o malage i'a nyangu toma limau Haran, Ma Jou'ongu Madutu rai mulia 'O sapolo ra unanga,

³re 'O kanau, ‘Na sisoi'i tala 'ani nagara, re 'ani ngitu re ngale, 'ani ioro re nongoḏu, re no supu no tagi toma ngi'i rimoi, maha Ngoi tini sijumu ra ngana.’

⁴Gena ḏua, Abraham 'a sisoi'i tala ngowa'a Mesopotamia manga daeraha,[14] 'o malage i'a toma limau Haran. Abraham 'ai Ḇaḇa 'o sengene pasala i'a, Ma Jou'ongu Madutu 'o soma'a Abraham 'o malage ino, ga'a ḇaḇa-ḇaḇa re ioronongoḏu ngowa'a Yahudi mo-moini ya ḏegoro 'orasa nange-ne.

⁵Wakutu gena-ge, daeraha nena-ne Ma Jou'ongu Madutu 'a sibalangu ua di'a Abraham 'ai warisi, awa lamo'o sata moi i'a mai ua. Mada'a Ma Jou'ongu Madutu 'a sijaji 'o pula'a daeraha nena-ne di'a Abraham re 'ai ju'uda. Wakutu gena-ge, 'a Abraham 'o sanga ngowa'a nyangu.

⁶Ma Jou'ongu Madutu 'o kanau ra unanga, ‘ 'Ani ju'uda 'aḏi tegoro sa'olo ngowa'a sa-sapolo ino, toma ngowa'a wola i'a manga nagara. Bangsa gena-ge ma manusia 'aḏi sibudaka re 'aḏi sisikisa ananga ma di'ara musungu latu rata.

⁷Mada'a Ngoi ta'u sihukumu 'o bangsa ga'a sibudaka ngini, re ngini ni supu toma nagara gena-ge, re ni silamo'o re siḏubuso Ngoi toma ngi'i nena-ne.’

⁸Wakutu Ma Jou'ongu Madutu 'o siajele togumu i'a, Unanga 'o soma'a Abraham 'o suna 'ai ngowa'a sa'olo 'Ai jaji ma nana'o. Sababu gena-ge, Ishak, Abraham 'ai ngowa'a, sibuoro togumu i'a, ma soana wangere tu'angere 'a Abraham 'o suna unanga. Ḏua 'a Ishak 'o suna 'ai ngowa'a, re ḏuanga i'a 'a Yakub ḏi'i 'o suna 'ai ngowa'a nga nyagi moi re nga muḏiḏi, ananga gena-ge 'aḏi dadi 'o Yahudi manga ete re dotumu.

⁹Sababu nanga ete re dotumu gena-ge 'aḏi telengoro ra Yusuf, ananga 'aḏi wu'unu unanga re 'o dadi budaka toma Mesir, mada'a Ma Jou'ongu Madutu 'o sieanga i'a unanga ua,

¹⁰re 'O silalo'o unanga toma jira mo-moini. Wakutu unanga 'o talaḏi ra Firaun, Mesir manga 'olana, Ma Jou'ongu Madutu 'o sicocatu ra unanga 'o dadi utu ma ngai ma sua-sua, singadolo 'a Firaun 'o sitede unanga dadi gubernur toma Mesir re 'o sanga kuasa ra Firaun 'ai kadato.

¹¹Pasala i'a, toma nagara Mesir re Kana'an mo-moini 'i dadi 'orasa sawini singadolo ngowa'a 'aḏi basono kangela masala re nanga ete re dotumu manga ngo-ngoromo mai ri moini ḏi'i.

¹²Wakutu 'a Yakub 'o 'isene toma nagara Mesir 'age rema gandum, unanga 'o soma'a 'ai ngowa-ngowa'a, ngene nanga ete re dotumu, 'aḏi tagi tibo gandum da'a toma nagara Mesir. Gena-ge 'orasa ma mulaingi.

¹³Toma 'orasa ma soi ḏiḏi, wakutu ananga 'aḏi dadunu sapolo, 'a Yusuf 'o masiajele tai ioro re nongoḏu mangale unanga gena-ge 'a Yusuf. Toma 'orasa gena-ge, 'olana Mesir 'a waro mangale ananga gena-ge 'a Yusuf 'ai ioro re nongoḏu.

¹⁴Pasala i'a, 'a Yusuf 'o siḏingoto habari tai ḇaḇa 'a Yakub. Unanga 'o golo'o 'ai ḇaḇa 'a Yakub re ananga rera moi mo-moini 'aḏi sapolo re tegoro toma nagara Mesir. Ananga mo-moini nga nyagi tumudingi re nga motoara.

¹⁵Ḏua 'a Yakub 'o tagi re 'o tegoro toma nagara Mesir, singadolo unanga re nanga ete re dotumu 'aḏi sengene.

¹⁶Manga mayeti ya siḏibo toma gamu Sikhem re ya singosama toma kubu ma aḏu'u da'a. 'A Abraham ra tibo pasala ḏua kubu ma aḏu'u gena-ge ro pipisi salaka ra suku Hemor.

¹⁷Wakutu Ma Jou'ongu Madutu 'ai jaji ra Abraham sa'i ri ngadolo, nanga bangsa toma nagara Mesir 'aḏi ganapu repe masala.

¹⁸Ma ḏo-ḏogumu tala, 'olana lelegu matengo 'o parenta toma nagara Mesir. 'Olana gena-ge 'o nana'o ua 'a Yusuf ga'a ro sengene ḏua.

¹⁹'Olana gena-ge 'ai gu-gasa cira masala tananga ete re dotumu: ngowa kiau aro sibuoro tala, unanga gena-ge 'o simau-mau ya upa'a manga ngowa kiau toma ḇanyo Nil, la 'aḏi sengene.

²⁰Wakutu gena-ge, 'a Musa 'o sibuoro ḏua. Unanga gena-ge 'o rousu masala. Ananga 'aḏi piara unanga ra ma ḇaḇa 'ai wala ma di'ara ngara ro'ange.

²¹Ananga 'aḏi sirarini 'a Musa toma ḇanyo Nil togumu i'a, Firaun 'ai ngowa'a were'a mu 'oro re mo piara unanga sa'olo 'ami ngowa'a madutu.

²²Ngowa'a Mesir mo-moini manga wo-waro 'i sidoto'o ra unanga singadolo unanga rai kuasa bae tai demo re ganau, bae de'oso re ḏegoro.

²³Wakutu 'a Musa 'ai 'umuru musungu nyagi rata, 'ai 'akala re sinyingara 'i mau ma'u sanga 'ai ioronongoḏu ngowa'a Israel.

²⁴Ḏua unanga 'o oḏi'i ngowa'a Mesir 'aḏi sisikisa ngowa'a Israel matengo, dadi 'a Musa 'o riono ngowa'a Israel gena-ge re 'u sisengene ngowa'a Mesir gena-ge.

²⁵'A Musa 'o madibanga 'ai ioronongoḏu masiretene, nyengara ya sahe mangale Ma Jou'ongu Madutu 'o pake unanga di'a sibebasa ananga, mada'a ma nyonyata ananga ya sahe ua.

²⁶Ma ḇiḇini ino, unanga 'o oḏi'i ngowa'a Israel nga muḏiḏi 'aḏi ma'u tutu'u, ḏua unanga mau sila-la ananga re 'o kanau, ‘Ngini nena-ne ioronongoḏu, i'a sa'olo ngini ni ma'u tutu'u?’

²⁷Mada'a unanga ga'a 'o ca'olo 'ai ḏagilomu, 'o itomo 'a Musa, re 'o kanau, ‘ 'A guna ni sitede ngana no dadi sae'e re no sijuruhakimi ngomi?

²⁸Bolo ngana mau no sisengene ngoi, ma tero sa'olo 'au nyigo no sisengene ngowa'a Mesir matengo?’

²⁹Wakutu 'a Musa 'a 'isene demo gena-ge, unanga 'o wiḏi sisoi'i nagara Mesir re 'o tegoro toma daeraha Midian. I'a da'a, unanga 'o molo'ara re 'o sanga ngowa'a nau'u nga muḏiḏi.

³⁰Musungu nyagi rata palisi'i i'a, mala'ekata matengo sapolo ra Musa toma ngi'i dongi-dongi co-cori Kie Sinai. Mala'ekata gena-ge 'o waiti toma u'u ma dara toma rurubu dodowo'o ḏu moi 'i leja-lejanga.

³¹Wakutu Musa 'a oḏi'i so'o gena 'o heranga. Dadi 'o maco-cori i'a toma ngi'i gena-ge 'o mau 'a disa waro 'o 'oru gena-ge. Ḏua unanga 'o 'isene Ma Jou'ongu Madutu 'ai iḏingi ma betongo so'o ne:

³²‘Ngoi nena-ne Ma Jou'ongu Madutu ga'a ninga ete re dotumu 'aḏi silamo'o re siḏubuso, Ngoi nena-ne Ma Jou'ongu Madutu ga'a Abraham, Ishak re Yakub 'aḏi silamo'o re siḏubuso.’ Wakutu Musa 'a 'isene iḏingi gena-ge, unanga 'o dadi mojongo singadolo terewete re 'a tatamo yoḏu'u 'o rurubu dodowo'o ḏu moi gena-ge.

³³Togumu i'a, Ma Jou'ongu Madutu 'o kanau, ‘Na woi'i ni tarupa, sababu ngi'i ga'a ngana no made-de'oso gena-ge tana'a 'ofi-'ofi.

³⁴Ngoi ta oḏi'i re ta waro 'Ari 'umata toma nagara Mesir, ananga manga 'ahu enanga 'i mamaḏi re ta 'isene ḏua ananga manga gogoru. Sababu gena-ge, ngoi to 'uci ta'u sisupu ananga. Ino, Ngoi tini 'utusu ngana no maḏibo toma nagara Mesir.’

³⁵Musa unanga nena-ne, ga'a ngowa'a Israel 'aḏi sije-jengere re 'aḏi dawongo ua, ananga 'aḏi kanau, ‘ 'A guna ni sitede ngana no dadi sae'e re no sijuruhakimi ngomi?’ Mada'a Ma Jou'ongu Madutu 'o 'utusu unanga 'o dadi ananga manga sae'e re 'o sisupu ngowa'a Israel re 'o sanga ri-riono toma mala'ekata ga'a 'o sapolo toma rurubu dodowo'o ḏu moi ga'a 'i leja-lejanga.

³⁶'A Musa 'o sibi-biri'i sisupu ngowa'a Israel toma nagara Mesir re 'o 'a'a didina'o heranga re 'ori i'a hera-heranga toma nagara Mesir, toma Ngoloto Kolili, re toma ngi'i dongi-dongi ma di'ara musungu nyagi rata ma dara.

³⁷Musa, unanga nena-ne ga'a 'o kanau toma ngowa'a Israel, ‘Ma Jou'ongu Madutu ḏuanga i'a 'o 'utusu nabi matengo. Unanga gena-ge 'o cumutu taninga sigolona ma tero sa'olo Unanga ro cumutu Ngoi.’

³⁸'A Musa 'o dadi demo ma do-dowanga toma ngowa'a Israel manga sigolona toma ngi'i dongi-dongi wakutu mala'ekata matengo 'o siajele ra nanga ete re dotumu toma Kie Sinai. Unanga 'a dawongo ra Ma Jou'ongu Madutu ino habari mangale nanga 'ahu ma duhu di'a 'a singadolo ra ngene.

³⁹Kalaha so'o gena, nanga ete re dotumu oḏu'u 'aḏi 'isene Musa. Ananga 'aḏi dawongo ua unanga, re 'aḏi mau maḏibo toma nagara Mesir.

⁴⁰Ananga 'aḏi soma'a Harun, ‘No 'a'a dulada di'a ngomi, la enanga 'i sibi-biri'i ngomi. Sababu ngomi mawaro ua 'oru 'i dadi ra Musa ga'a 'o sibi-biri'i ngomi mi supu toma Mesir!’

⁴¹Ma 'orasa gena-ge, ananga 'aḏi 'a'a dulada sapi ma ngowa rimoi, kara ananga 'aḏi gasa manga jou-jou re 'aḏi 'a'a laya, la ya silamo'o dulada gena-ge ga'a manga giama ma munara masiretene.

⁴²Dadi Ma Jou'ongu Madutu ya'u sisoi'i tala ananga, re ya'u sieanga i'a ananga 'aḏi silamo'o re siḏubuso 'o mumuḏungu toma diwanga. Gena-ge 'i ma tero ga'a 'i silefo pasala ḏua toma nabi-nabi manga boku, ma betongo so'o ne: ‘Hai ngowa'a Israel, na tola'a re na tau'u haiwani di'a ninga jou-jou ma di'ara musungu nyagi rata toma ngi'i dongi-dongi, mada'a gena-ge di'a Ngoi ua.

⁴³Ngini na mete'e re na gasa dulada Molok ma suyu'u[15] re dulada mumuḏungu di'a jou'ongu ma somoara Refan[16] ngini ni silamo'o re siḏubuso jou'ongu-jou'ongu ma somoara gena-ge. Sababu gena-ge, Ngoi to nyengara ninga lawana 'aḏi gasa ngini toma giḏanga da'a nagara Babel kaci moi.’

⁴⁴Wakutu ete re dotumu 'aḏi tegoro toma ngi'i dongi-dongi ananga 'aḏi 'a'a Ma Jou'ongu Madutu 'ai suyu'u, 'aḏi mete'e Unanga 'ai 'atoranga re ma duhu mete'e Unanga 'ai 'akala ma mau ga'a Unanga ro pula'a ra Musa.[17]

⁴⁵Togumu i'a, nanga ete re dotumu ya gasa-gasa suyu'u gena-ge le'a bolo le'a. Wakutu ananga re 'a Yosua 'aḏi rabasa daeraha nena-ne toma bangsa-bangsa ga'a Ma Jou'ongu Madutu ya'u sisupu ra ananga gena-ge, ananga 'aḏi gasa Ma Jou'ongu Madutu 'ai suyu'u gena-ge ḏi'i. Suyu'u gena-ge rema enanga moju singadolo Daud 'ai 'orasa.

⁴⁶Unanga gena-ge ga'a 'o sisanangi Ma Jou'ongu Madutu 'ai 'akala re sinyingara re 'o golo'o na'o nyengara 'o 'a'a Ma Jou'ongu Madutu 'ai Wala, Ma Jou'ongu Madutu ga'a Yakub 'o silamo'o re siḏubuso.

⁴⁷Mada'a 'a Salomo 'a side'oso Ma Jou'ongu Madutu 'ai Wala.

⁴⁸Momongolo ua, Ma Jou'ongu Madutu toma Gau'u 'a ḏegoro ua toma wala gena-ge ga'a manusia ya 'a'a. Nabi matengo 'o lefo tai boku so'o ne:

⁴⁹‘Diwanga sa'olo Ngoi to parenta ma ngi'i, re 'o tana'a ma tero sa'olo 'Ari rou ma ba-bangini, wala 'oru ngini side'oso di'a Ngoi?! Bolo ma ngi'i le'a di'a Ngoi to mangomasa?!

⁵⁰Ngoi, Ma Jou'ongu Madutu bolo 'a guna 'o sidadi 'ori i'a rana mo-moini gena-ge?!’

⁵¹Ioronongoḏu ngowa'a Yahudi, ngini ninga sae'e lai te'e madutu re kangela masala ni mete'e Ma Jou'ongu Madutu, ngini reninga ngau'u mada'a ni 'isene Ma Jou'ongu Madutu 'ai demo ua. Ngini mo-moini ma tero sa'olo ninga ete re dotumu: Ngini ni lawana Ma Ngagara 'Ofi-'Ofi tau-taunu!

⁵²Nabi matengo i'a mai ua, ninga ete re dotumu 'aḏi sikisa ua! 'Ua re 'au wali, ananga 'aḏi sisengene Ma Jou'ongu Madutu 'ai nabi-nabi ga'a 'aḏi siajele mangale Yesus 'ai ta-sapolo, Unanga gena-ge Ngowa'a Loasa re Banari. Nange-ne ngini ni sipula'a Unanga gena-ge Tai lawana re ngini nu sisengene Unanga!

⁵³Ngini ni dawongo ḏua Ma Jou'ongu Madutu 'ai parenta-parenta ga'a mala'ekata-mala'ekata ya singadolo ra ngini, mada'a ngini mo-moini ni mete'e ua.”

⁵⁴Wakutu Mahkamah 'Agama ya 'isene mo-moini Stefanus 'o kanau so'o gena, ananga manga 'akala re sinyingara go-goḏi, re 'aḏi ruta masala ra unanga.

⁵⁵Mada'a Ma Ngagara 'Ofi-'Ofi 'u ḏegoro, ḏua unanga 'o magelelo ie 'o oḏi'i ie diwanga talanga re Ma Jou'ongu Madutu 'ai mulia re Yesus 'o made-de'oso toma ngi'i kuasa ma pari cua ra Ma Jou'ongu Madutu 'ai giama ma kuwiḏa i'a.

⁵⁶Stefanus 'o kanau, “Oḏi'i! Ngoi to oḏi'i soroga ma ngalana 'i welanga re Manusia ma Ngowa'a Nau'u 'o made-de'oso ra Ma Jou'ongu Madutu 'ai giama ma kuwiḏa i'a.”

⁵⁷Ngowa-ngowa'a toma Mahkamah 'Agama ya pu'i manga ngau'u re 'aḏi mapataha re 'aḏi marimoi mau cako'o unanga.

⁵⁸Ananga 'u taba'a unanga sisupu toma limau ma ḏuḏunu, kara ananga 'aḏi poini unanga reo maḏi. Re sakisi-sakisi gena-ge ya woi'i manga juba ya siḏingoto ra Saulus tubaie matengo, kara 'aḏi poini 'a Stefanus.

⁵⁹Wakutu ananga 'aḏi poini 'a Stefanus, unanga 'o maḏigaro'o re 'o manyiata, “Ma Jou Yesus, na dawongo 'ari nyawa!”

⁶⁰Ḏua 'a Stefanus 'o maḏipolono tala re 'o poa'a 'a siduga-duga 'o kanau, “Ma Jou, singa'unu awa ḏosa nena-ne ra ananga!” Unanga 'o kanau gena-ge togumu i'a, ḏua ro sengene.