Read Sahu Roma 1 Bible Online

Roma 1 - Sahu bible

Roma 1

¹Surata nena-ne ra ngoi, Paulus ga'a ta Kristus Yesus ma tero sa'olo 'Ai budaka,[1] ngoi ga'a Ma Jou'ongu Madutu ro cumutu re ro sitede siwola i'a ngoi sa'olo Yesus 'ai so-soma'a di'a to singadolo Habari Roanga da'u ra Ma Jou'ongu Madutu tala.

²Habari Roanga gena-ge ga'a Ma Jou'ongu Madutu ro sijaji pasala ḏua, Unanga 'ai nabi-nabi ya silefo ḏua toma Boku 'Ofi-'Ofi ma dara, ga'a 'ofi-'ofi.

³Habari Roanga gena-ge mangale Ma Jou'ongu Madutu 'ai Ngowa'a Nau'u matengo ga'a mete'e manusia, Unanga gena-ge 'ai 'asala ra 'Olana Daud 'ai ju'uda.

⁴Mada'a mete'e Ma Ngagara 'Ofi-'Ofi, Unanga gena-ge Ma Jou'ongu Madutu 'ai Ngowa'a Nau'u. Ma Jou'ongu Madutu 'o sijumu rai kuasa rema pari cua mangale Yesus Unanga 'Ai Ngowa'a Nau'u wakutu Ma Jou'ongu Madutu dadunu 'o si'ahu nanga Jou Yesus Kristus toma ngowa'a senge-sengene manga sigolona.

⁵Sababu Yesus Kristus 'ai lomanga, ngoi reto sanga barakati wakutu Ma Jou'ongu Madutu 'o sitede ngoi sa'olo Yesus 'ai so-soma'a, la ngoi to doto'o ngowa'a toma bangsa mo-moini di'a mete'e Yesus Kristus 'ai do-doto'o sababu manga ngo-ngaku.

⁶Re ngini ga'a ni tegoro toma limau Roma; ngini ḏi'i reni sanga 'aro'o di'a marimoi ra Yesus Kristus.

⁷Toma ioronongoḏu ngo-ngaku rimoi mo-moini toma limau Roma, ga'a Ma Jou'ongu Madutu 'o dadalara, re ro 'aro'o ngini di'a ni dadi Unanga 'ai 'umata; ngoi to golo'o ra Ma Jou'ongu Madutu ngene nanga Baba, re Yesus Kristus nanga Jou mangale Ananga 'aḏi pula'a manga mura re dadalara, re dame ra ngini.

⁸Siḏa-siḏa sababu 'oru Yesus Kristus ro 'a'a di'a ngene, ngoi nyengara to sibere ie murasa ma la tari Jou'ongu Madutu sababu ngini mo-moini. Sababu ngowa'a toma dungia sitabi donga, ananga raḏi siajele mangale ngini ninga ngo-ngaku ra Yesus Kristus.

⁹Ngoi to de-de'oso Ma Jou'ongu Madutu rari 'akala re sinyingara mode-mode'e di'a to singadolo Habari Roanga mangale 'Ai Ngowa'a Nau'u. Ma Jou'ongu Madutu, Unanga 'ari sakisi mangale ngoi to 'elingi ngini tau-taunu, wakutu to manyiata.

¹⁰Re ḏi'i, ngoi to manyiata tau-taunu ra Ma Jou'ongu Madutu mangale nange-ne na'o nga'unu gari'a, Unanga 'o pula'a ngo'omo ra ngoi, la tini tutumu ngini.

¹¹Ngoi to nyanyaḏi masala di'a ma'u sanga ra ngini, la ngini ni sanga barakati toma Ngagara 'Ofi-'Ofi di'a site'e ngini ninga ngo-ngaku.

¹²Ngoi 'ari maksudu mangale ngene ma'u babata nanga 'akala re sinyingara matengo re matengo, sababu nanga ngo-ngaku ra Yesus Kristus.

¹³Ioronongoḏu ngo-ngaku rimoi, ngoi to mau ngini ni waro mangale soi muḏuo ḏua ngoi 'ari maksudu tini tutumu ngini, mada'a singadolo nange-ne rema dola'aku. Ngoi 'ari maksudu di'a tutumu ngini, la 'ari munara taninga sigolona sigasa ngowa'a di'a ngaku Yesus Kristus, ma tero sa'olo 'ari munara toma gamu-gamu ma lelegu, ri sigasa ngowa'a Yahudi ua di'a raḏi ngaku Unanga.

¹⁴Sababu ngoi rari banyatoro toma bangsa 'oru ḇato di'a to singadolo Habari Roanga: bae ngowa'a ga'a pake 'adata Yunani, bae ngowa'a ga'a pake ua 'adata Yunani, bae ngowa'a raḏi sokola bolo ngowa'a sokola ua.

¹⁵Sababu gena-ge, ngoi to nyafusu madutu di'a to singadolo Habari Roanga ra ngini ga'a ni tegoro toma limau Roma ḏi'i.

¹⁶Sababu ngoi to ngaku ti-tiai toma Habari Roanga ga'a kuasa ra Ma Jou'ongu Madutu tala di'a sisalamata ngowa'a ga'a raḏi ngaku mo-moini: Siḏa-siḏa ngowa'a Yahudi, kara nange-ne ngowa'a Yahudi ua ḏi'i.

¹⁷Sababu reo Habari Roanga gena-ge, Ma Jou'ongu Madutu 'o sijumu ma ngo'omo mangale ngowa'a nyengara 'aḏi dadi ngowa'a loasa re banari ra Ma Jou'ongu Madutu 'Ai momina. Pa'i gena-ge 'i dadi ḇato, sababu ngowa'a matengo 'o ngaku Ma Jou'ongu Madutu; ngo'omo lelegu 'i cua! Gena-ge ma tero sa'olo ri silefo toma Boku 'Ofi-'Ofi so'o ne: “Ngowa'a ga'a loasa re banari ra Ma Jou'ongu Madutu 'ai momina sababu manga ngo-ngaku ḇato, ananga gena-ge ḏuanga i'a 'aḏi 'ahu kasingado-ngadolo i'a.”

¹⁸Sababu Ma Jou'ongu Madutu ga'a 'o tegoro toma soroga, Unanga gena-ge ro sijumu 'Ai borata sababu manusia manga ḏosa. Dadi Unanga ḏuanga i'a 'O sijuruhakimi re 'O sihukumu ngowa'a mo-moini ga'a 'a'a ḏosa re kajahatana. Ngowa'a gena-ge ga'a manga kajahatana 'i dola'aku ngowa'a lelegu 'aḏi ngaku Ma Jou'ongu Madutu 'ai ba-banari.

¹⁹Sababu 'oru ḇato ga'a manusia nyengara 'aḏi waro mangale Ma Jou'ongu Madutu, gena-ge 'i tarangi toma manusia sababu Unanga masiretene Ra sibaiti toma manusia.

²⁰Sababu toma 'orasa Ma Jou'ongu Madutu 'o sidadi dungia, manusia nyengara 'aḏi sahe mangale Unanga 'ai kuasa kama ḏo-ḏogumu ua, re Unanga mode-mode'e Ma Jou'ongu Madutu. Kalaha manusia 'aḏi oḏi'i yoḏu'u Unanga mada'a manusia nyengara 'aḏi waro 'Ai tabeata sababu 'oru ga'a Unanga ra sidadi ḏua. Sababu gena-ge, manusia manga 'alasana 'i cua di'a 'aḏi waro ua mangale Ma Jou'ongu Madutu rema enanga.

²¹Kalaha manusia 'aḏi waro mangale Ma Jou'ongu Madutu rema enanga, ananga 'aḏi silamo'o ua Unanga sa'olo Ma Jou'ongu Madutu re 'aḏi sibere ie murasa ma la ua ra Unanga ḏi'i. Siḏibo ḏi'i, manusia manga fikirana 'i dadi ma faeda 'i cua, re manga 'akala re sinyingara ri dadi hafu-hafu.

²²Kalaha ananga gena-ge 'aḏi magoro ino 'aḏi pahe, momongolo ua 'aḏi haga!

²³Ananga 'aḏi oḏu'u silamo'o re siḏubuso Ma Jou'ongu Madutu ga'a 'ahu kasingado-ngadolo i'a. Siḏibo ḏi'i ananga gena-ge 'aḏi silamo'o re siḏubuso jou'ongu ma somoara ga'a 'i matuhu sa'olo manusia ga'a 'i sengene nyengara, re 'aḏi silamo'o re siḏubuso jou'ongu ma somoara ga'a 'i matuhu sa'olo namo toma diwanga, haiwani ma rou rata, re haiwani tare-tare toma tana'a ma re'u.

²⁴Sababu gena-ge, Ma Jou'ongu Madutu 'o sieanga i'a ananga, la manga 'akala re sinyingara ma nyafusu 'i kuasa ananga, di'a si'a'a 'ori i'a ma jira singadolo 'aḏi madaga'a 'ori i'a ma faja matengo re matengo.

²⁵Ananga gena-ge 'aḏi dawongo ua do-doto'o banari mangale Ma Jou'ongu Madutu, mada'a 'aḏi ngaku do-doto'o banari ua; dadi ananga 'aḏi silamo'o re siḏubuso re 'aḏi de-de'oso Ma Jou'ongu Madutu 'ai do-dadi. Mada'a Unanga gena-ge, 'O do-dadi ma cimi, ananga ya silamo'o re siḏubuso ua re ya de-de'oso ua! Unanga gena-ge ga'a 'o patasa di'a sanga puji re silamo'o kasingado-ngadolo i'a. 'Amin.

²⁶Sababu manusia manga ga'a so'o gena, Ma Jou'ongu Madutu 'o sieanga i'a ananga di'a mete'e manga nyafusu ma jira. Dadi we-were'a manga 'akala ma nyafusu riwara toma na-nau'u sa'olo biasa di'a manusia, mada'a manga 'akala ma nyafusu toma we-were'a lelegu.

²⁷So'o gena ḏi'i, na-nau'u manga 'akala ma nyafusu riwara toma we-were'a sa'olo biasa di'a manusia. Mada'a ananga gena-ge manga 'akala ma nyafusu pa'i toma na-nau'u lelegu ḇato. Na-nau'u 'aḏi madaga'a 'ori i'a reo na-nau'u lelegu ga'a 'i pula'a mara'a ananga, singadolo 'aḏi sanga enanga ma balasa mete'e manga ga'a ma jira.

²⁸Sidogo ḏi'i, sababu ananga 'aḏi basono tala paralu riwara nana'o Ma Jou'ongu Madutu, Unanga 'o sieanga i'a ananga manga fikirana 'i dadi cira, singadolo ananga 'aḏi madaga'a 'ori i'a ga'a si'a'a yoḏu'u.

²⁹Manga 'akala re sinyingara ri romanga reo 'ori i'a ma jira mo-moini, nyafusu ngowa'a lelegu manga harata re mau 'a'a cira toma ngowa'a lelegu. Manga 'akala re sinyingara ri romanga reo kaleḏa, ma'u sisengene, ma'u ruta, ma'u sihaga, ma'u gogono 'akala. Ananga 'aḏi nyanyaḏi ma'u sikanau ngowa'a,

³⁰sijira ngowa'a manga lomanga, 'aḏi momole, waro do-doto'o ua, 'aḏi emono Ma Jou'ongu Madutu, 'aḏi matoro. Ananga 'aḏi pahe disa ngo'omo di'a 'aḏi 'a'a kajahatana, 'aḏi malawana tamanga bi-biri'i.

³¹'aḏi bilangana ngowa'a ua, 'aḏi sitotomo ua manga jaji, 'aḏi sijumu dadalara ua re 'aḏi sijumu manga 'akala re sinyingara ma la-la ua ra guna ḇato.

³²Ananga ya waro mangale mete'e Ma Jou'ongu Madutu 'ai hukumu, 'a guna ḇato 'a'a cira so'o gena-ge, ananga ḏuanga i'a sanga hukumu sengene. Kalaha so'o gena, ananga 'aḏi 'a'a 'ori i'a ma jira tau-taunu re 'aḏi sanangi na'o ngowa'a lelegu 'aḏi 'a'a so'o gena ḏi'i!