Read Sahu Roma 10 Bible Online

Roma 10 - Sahu bible

Roma 10

¹Ioronongoḏu ngo-ngaku rimoi! Ngoi to nyafusu lai siḏi 'ari bangsa, ngowa'a Yahudi 'aḏi sanga salamata. Dadi ngoi to manyiata mode-mode'e ra Ma Jou'ongu Madutu di'a gena-ge.

²Ngoi nga'unu to sisakisi mangale ananga laḏi cufala madutu di'a 'aḏi mete'e Ma Jou'ongu Madutu. Mada'a ananga manga cufala 'i mete'e ua Ma Jou'ongu Madutu 'ai ngo'omo.

³Ananga ya sahe ua Ma Jou'ongu Madutu 'ai ngo'omo di'a ananga 'aḏi dadi ngowa'a loasa re banari Tai momina. Siḏibo ḏi'i ananga 'aḏi mau mete'e manga ngo'omo masiretene di'a 'aḏi dadi ngowa'a loasa re banari. Dadi ananga 'aḏi ta'aloko ua ra Ma Jou'ongu Madutu 'ai ngo'omo.

⁴Mada'a sababu Kristus, ngowa'a 'aḏi paralu mete'e Musa 'ai hukumu riwara, la 'aḏi dadi ngowa'a loasa re banari. Siḏibo ḏi'i, ngowa'a mo-moini ga'a manga ngo-ngaku ra Kristus, nyengara 'aḏi dadi ngowa'a loasa re banari ra Ma Jou'ongu Madutu 'ai momina, gena-ge Ma Jou'ongu Madutu 'ai ngo'omo.

⁵Musa ro lefo mangale ngowa'a ga'a mau 'aḏi dadi ngowa'a loasa re banari ra Ma Jou'ongu Madutu 'ai momina sababu ananga 'aḏi mete'e Musa 'ai hukumu so'o ne: “Ngowa'a gena-ge balasu 'aḏi mete'e hukumu gena-ge 'i ti-tiai, la 'aḏi sanga 'ahu kasingado-ngadolo i'a.”

⁶Mada'a mangale ngowa'a ga'a sababu manga ngo-ngaku raḏi dadi ngowa'a loasa re banari ra Ma Jou'ongu Madutu 'ai momina, gena-ge ḏi'i toma Boku 'Ofi-'Ofi 'i silefo so'o ne: “Awa no kanau tani 'akala re sinyingara ma dara, ‘ 'A guna ḏuanga i'a 'o pere da'u soroga?’ (ma ngale: 'A guna ḏuanga i'a 'o siguci Kristus?)

⁷bolo, ‘ 'A guna ḏuanga i'a 'o 'uci toma ngowa'a senge-sengene manga ngi'i?’ (ma ngale: 'A guna ḏuanga i'a dadunu si'ahu Kristus tai sengene ie?).”

⁸Mada'a Musa 'o kanau ḏi'i so'o ne: “Ma Habari ra Ma Jou'ongu Madutu tala lai cori madutu ra ngini: Taninga madanga re taninga 'akala re sinyingara ma dara.” Habari gena-ge mangale ngo-ngaku, ngomi rema singadolo so'o ne:

⁹Na'o ngini ni kanau raninga madanga mangale “Yesus, Unanga gena-ge Ma Jou,” re taninga 'akala re sinyingara ma dara ngini ni ngaku mangale Ma Jou'ongu Madutu 'o dadunu si'ahu moju Yesus tai sengene, ngini ḏuanga i'a sanga salamata.

¹⁰Sababu reninga 'akala re sinyingara ngini ni ngaku Yesus, dadi Ma Jou'ongu Madutu 'o dawongo ngini gena-ge sa'olo ngowa'a loasa re banari. Re ngini ni kanau reninga madanga, mangale Yesus Unanga gena-ge Ma Jou, dadi ngini sanga salamata.

¹¹Toma Boku 'Ofi-'Ofi ma dara 'i silefo so'o ne: “Ngowa'a mo-moini ga'a manga ngo-ngaku ra Unanga, ananga manga 'akala re sinyingara 'i rapo'o ua.”

¹²Sababu ma'u rapu ua, bae ngowa'a Yahudi bae ngowa'a Yahudi ua: 'Age pa'i Ma Jou matengo ḇato di'a ngowa'a mo-moini. Unanga 'o sibarakati pai-pai'i ngowa'a mo-moini ga'a maḏigaro'o ra Unanga.

¹³Sababu, “Ngowa'a mo-moini ga'a maḏigaro'o ra Ma Jou, ananga gena-ge ḏuanga i'a 'aḏi sanga salamata.”

¹⁴Mada'a ma ngo'omo sa'olo ngowa'a 'aḏi maḏigaro'o na'o ananga 'aḏi ngaku nyangu ra Ma Jou?! Re ma ngo'omo sa'olo ngowa'a 'aḏi ngaku Ma Jou, na'o ananga 'aḏi 'isene mangale Unanga nyangu?! So'o gena ḏi'i ma ngo'omo sa'olo ananga nyengara 'aḏi 'isene mangale Ma Jou, na'o ngowa'a tagi nyangu di'a singadolo mangale Unanga?!

¹⁵Re ma ngo'omo sa'olo ananga nyengara singadolo mangale Ma Jou, na'o ngowa'a sanga 'utusu nyangu? Toma Boku 'Ofi-'Ofi ma dara 'i silefo so'o ne: “Ma rousu mura ua rema ngowa'a ga'a sapolo sigasa Habari Roanga ra Ma Jou'ongu Madutu tala!”

¹⁶Mada'a ngowa'a mo-moini ua ya dawongo Habari Roanga gena-ge. Sababu Nabi Yesaya 'o kanau so'o ne: “Ma Jou, 'a guna 'o ngaku minga habari?!”

¹⁷Sababu gena-ge ngowa'a pa'i nyengara 'aḏi ngaku ḇato Kristus, na'o 'aḏi 'isene 'Ai habari. Re habari gena-ge ananga pa'i nyengara ya 'isene ḇato, na'o ngowa'a ya'u singadolo habari mangale Kristus.

¹⁸Mada'a ngoi to sano: Mode-mode'e ngowa'a Israel ya 'isene nyangu habari gena-ge?! Tantu ḏua reya 'isene! Sababu toma Boku 'Ofi-'Ofi ma dara 'i silefo so'o ne: “Ananga ya sipataha ḏua manga iḏingi singadolo toma dungia sitabi donga, manga demo-demo 'i ngadolo ḏua toma ngi'i le'a ḇato.”

¹⁹Mada'a ngoi to sano ḏi'i: Mode-mode'e ngowa'a Israel ya sahe nyangu habari gena-ge?! Tantu ḏua reya sahe! Siḏa-siḏa 'a Musa 'o kanau: “Ma Jou'ongu Madutu 'o kanau so'o ne, ‘Ngoi ḏuanga i'a to si'a'a ngini ninga 'akala si-siḏi toma bangsa ga'a 'Ari 'umata ua. Re Ngoi tini 'a'a ngini ni ruta toma bangsa ga'a nana'o Ngoi ua.’ ”

²⁰Nabi Yesaya ganapu 'a sibarani 'ai 'akala re sinyingara, dadi 'o kanau, “Ma Jou'ongu Madutu 'o kanau so'o ne: ‘Ngowa-ngowa'a ga'a 'aḏi disa Ngoi ua, ananga raḏi ma'u sanga ra Ngoi; re Ngoi reto masijumu ra ananga ga'a 'aḏi sano Ngoi ua.’ ”

²¹Mada'a mangale ngowa'a Israel, nabi Yesaya 'o kanau, “Ma Jou'ongu Madutu 'o kanau so'o ne: ‘Ma wangere ma giḏanga i'a, Ngoi to sidoa'a 'Ari giama toma bangsa di'a ta'u dawongo, mada'a ananga manga 'akala re sinyingara 'i te'e re oḏu'u 'aḏi 'isene Ngoi.’ ”