Read Sahu Roma 11 Bible Online

Roma 11 - Sahu bible

Roma 11

¹Dadi ngoi to sano: 'Oru Ma Jou'ongu Madutu 'o upa'a 'Ai 'umata masiretene bolo ua?! Ua! Sababu ngoi masiretene ngowa'a Israel, 'a Abraham 'ai ju'uda re 'ari 'asala toma suku Benyamin.

²Dadi Ma Jou'ongu Madutu 'a upa'a ua 'Ai 'umata ga'a Unanga 'o cumutu ḏua 'ua re 'au wali moju. Ioronongoḏu ngo-ngaku rimoi, ngini ni 'elingi 'oru ga'a 'i silefo toma Boku 'Ofi-'Ofi ma dara mangale nabi Elia. Wakutu unanga 'o kalaki ra Ma Jou'ongu Madutu mangale ngowa'a Israel, unanga 'o kanau so'o ne:

³“Ma Jou,[4] ngowa'a Israel raḏi sisengene 'Ani nabi-nabi re ya sipinya'olo 'Ani jou-jou ma ngi'i. Re ma jingianga ngoi to matengo, re ananga mau 'aḏi sisengene ngoi ḏi'i.”

⁴'Oru Ma Jou'ongu Madutu 'a sangoro sa'olo ra Elia?! Ma Jou'ongu Madutu 'a sangoro so'o ne: “Ngoi reto cumutu ngowa'a nga cala tumudingi di'a Ngoi masiretene. Ananga gena-ge 'aḏi silamo'o re siḏubuso nyangu jou'ongu ma somoara si'aro'o Baal.”

⁵So'o gena ḏi'i, 'orasa nange-ne kalaha repe ua, 'age rema ngowa-ngowa'a Yahudi ga'a Ma Jou'ongu Madutu ya'u cumutu ḏua mete'e Unanga 'ai mura re dadalara.

⁶Dadi Unanga ro cumutu ananga gena-ge mete'e 'Ai mura re dadalara, re mete'e ua ananga manga ga'a. Sababu na'o Unanga 'o cumutu mete'e manusia manga ga'a, ngo'omo gena-ge 'i mete'e 'Ai mura re dadalara riwara.

⁷Dadi ngene wo magoro ino sa'olo?! Mangale ngowa'a Israel 'aḏi disa ngo'omo, la ananga 'aḏi dadi ngowa'a loasa re banari ra Ma Jou'ongu Madutu 'ai momina, mada'a ananga mo-moini ua 'aḏi sanga ngo'omo gena-ge. Pa'i mamuni'a ḇato ga'a Unanga ro cumutu ḏua, ananga gena-ge raḏi sanga ngo'omo gena-ge re dadi ngowa'a loasa re banari. Ma lelegu 'aḏi sanga ngo'omo gena-ge ua, sababu Unanga 'o site'e manga 'akala re sinyingara.

⁸Gena-ge 'i ma tero sa'olo ri silefo toma Boku 'Ofi-'Ofi so'o ne: Ma Jou'ongu Madutu 'a siruwahe ananga manga 'akala re sinyingara singadolo manga fikirana ri kuci. Dadi singadolo 'orasa nange-ne, ananga remanga la'o mada'a 'aḏi oḏi'i ua ngo'omo banari; remanga ngau'u, mada'a 'aḏi 'isene ua habari banari.

⁹Re ḏi'i 'Olana Daud 'o kanau, “Kalaha ananga 'aḏi madiga'a laya, gena-ge 'i dadi jojoḏi rimoi di'a ananga masiretene. Enanga 'i dadi tana'a ma duso'o ga'a ananga 'aḏi eta'a toma duso'o gena-ge singadolo 'aḏi sanga bahala re hukumu.

¹⁰Sieanga ḇato manga momina 'i dadi hafu-hafu, la ananga 'aḏi matingoḏi'i ua, re sieanga ḇato ḏi'i ananga 'aḏi pukutu nena-ne re si'a.”

¹¹Ḏi'i ngoi to sano: Awa-Awa wakutu ngowa'a Yahudi 'aḏi dawongo Yesus ua, gena-ge ma ngale ananga nga'unu sanga salamata riwara, ma tero sa'olo ngowa'a 'aḏi eta'a re nga'unu 'aḏi te'oso riwara?! Sanga ua! Siḏibo ḏi'i, ananga 'aḏi madiga'a ḏosa sababu 'aḏi dawongo Yesus ua, la ngowa'a Yahudi ua 'aḏi sanga donga di'a 'aḏi dawongo Yesus, dadi nyengara 'aḏi sanga salamata. Gena-ge 'i si'a'a ngowa'a Yahudi manga 'akala 'i go-goḏi, la mau 'aḏi dawongo Yesus ḏi'i.

¹²Dadi sababu ngowa'a Yahudi 'aḏi madiga'a ḏosa gena-ge, ngowa'a Yahudi ua 'aḏi sanga barakati lai lamo'o. Re wakutu ngowa'a Yahudi sanga ua ngo'omo gena-ge di'a 'aḏi dadi ngowa'a loasa re banari, ngowa'a Yahudi ua sanga barakati lai lamo'o. Dadi tantu ḏua Ma Jou'ongu Madutu 'o pula'a toma ngowa'a Yahudi ua barakati lebe la-lamo'o i'a reo barakati ma siḏa, na'o ngowa'a Yahudi maḏibo toma ngo'omo boloto!

¹³Nange-ne, ngoi to kanau ra ngini ngowa'a Yahudi ua: Ngoi Yesus 'ai so-soma'a di'a ngowa'a Yahudi ua re ngoi to sitoro mode-mode'e mangale 'ari munara gena-ge, sababu ngowa'a Yahudi ua sanga salamata.

¹⁴Dadi na'o nyengara gari'a ngoi to sigo-goḏi 'ari ioronongoḏu ngowa'a Yahudi manga 'akala re sinyingara, la mamuni'a tamanga sigolona ḏuanga i'a sanga salamata ḏi'i.

¹⁵Sababu wakutu Ma Jou'ongu Madutu 'o itomo ngowa'a Yahudi, ma ngo'omo 'i welanga di'a ngowa'a mo-moini toma dungia sitabi donga ananga nyengara 'aḏi marimoi ra Ma Jou'ongu Madutu. Dadi tantu ḏua Unanga 'o pula'a barakati lebe lamo'o i'a reo barakati gena-ge, wakutu Unanga 'o dawongo ngowa'a Yahudi moju. Barakati gena-ge ḏuanga i'a ma tero sa'olo ngowa'a raḏi sengene, dadunu 'aḏi 'ahu moju!

¹⁶Na'o roti jule moi ri sipula'a ra Ma Jou'ongu Madutu sa'olo hasili ma jomolo, gena-ge ma ngale roti mo-moini di'a Unanga ḏi'i. Na'o ate ma utu'u di'a Ma Jou'ongu Madutu, ma uma-umanga di'a Unanga ḏi'i. Re Abraham, Isak, re 'a Yakub ma tero sa'olo ate ma utu'u, re ananga manga ju'uda ma tero sa'olo ate ma uma-umanga. Na'o ete re dotumu gena-ge Ta Ma Jou'ongu Madutu, so'o gena ḏi'i manga ju'uda mai Ta Unanga.

¹⁷Sidogo ḏi'i, Israel manga ete re dotumu ma ju'uda mamuni'a gena-ge, ma tero sa'olo ate zaitun ma umanga ga'a ngowa'a ya tola'a. Re ngini ngowa'a Yahudi ua ma tero sa'olo zaitun ma ja-jaga ga'a 'i konyo toma bangana. Re jaga-jaga ma la'o gena-ge 'i sipata toma ate zaitun ma lese di'a singali umanga ga'a ri sitola'a. Ḏua jaga 'i sanga oromo toma ate zaitun ma utu'u nange-ge. So'o gena ḏi'i ngini ngowa'a Yahudi sanga barakati ga'a Ma Jou'ongu Madutu 'o sijaji toma ngowa'a Yahudi manga ju'uda.

¹⁸Sababu gena-ge, awa ngini ni matoro re ni sipa-pake ua ngowa'a Yahudi ga'a Ma Jou'ongu Madutu ya'u itomo, ananga gena-ge ga'a ma tero sa'olo ate ma umanga ga'a ngowa'a ya tola'a. Ngini balasu ni 'eli-'elingi ne: Ngini ḏi'i pa'i ma tero sa'olo ate ma umanga ḇato. Re Ate ma umanga sanga ngo-ngoromo toma ate ma utu'u, ate ma utu'u sanga ngo-ngoromo ua toma ate ma utu'u!

¹⁹Awa ngini ni sangoro so'o ne: “Tero mode'e. Mada'a ma umanga ga'a ngowa'a ya tola'a gena-ge di'a ngene nena-ne ngowa'a Yahudi ua ga'a ma tero sa'olo ate ma ja-jaga ga'a sipata toma ate ma lese.”

²⁰Gena-ge tero mode'e ḏi'i. Mada'a ngini balasu ni 'eli-'elingi ne: Ma Jou'ongu Madutu 'o itomo ngowa'a Yahudi gena-ge sababu manga ngo-ngaku ra Yesus ua. Re Ma Jou'ongu Madutu 'o dawongo ngini pa'i sababu ninga ngo-ngaku ra Yesus ḇato. Dadi awa ngini ni mabasono momole. Siḏibo ḏi'i, ngini balasu ni basono mojongo re dadi ni silamo'o Ma Jou'ongu Madutu.

²¹Sababu kalaha ngowa'a Yahudi gena-ge ma uma-umanga ma mulaingi, Ma Jou'ongu Madutu 'o itomo ananga sababu manga ngo-ngaku ra Yesus ua. Tantu ḏua, na'o ninga ngo-ngaku ra Yesus riwara, Unanga nga'unu 'o itomo ḏi'i ngini ngowa'a Yahudi ua.

²²Sababu gena-ge totoho la-la ino Ma Jou'ongu Madutu 'ai la-la, re ḏi'i Unanga nyengara 'o sijuruhakimi reo hukumu. Unanga ro sijuruhakimi reo hukumu toma ngowa'a Yahudi ga'a manga ngo-ngaku ra Yesus ua. Mada'a Unanga 'o sijumu 'Ai la-la ra ngini ngowa'a Yahudi ua, na'o ngini ninga ngo-ngaku tau-taunu ra Unanga ga'a ro sijumu 'Ai la-la ra ngini. Mada'a na'o ngini ni 'a'a so'o gena ua, Unanga 'o itomo ngini ḏi'i.

²³Re na'o ngowa'a Yahudi 'aḏi maḏibo toma ngo'omo boloto re pula'a manga ngo-ngaku ra Yesus, Ma Jou'ongu Madutu 'o dawongo ananga moju sababu Unanga 'ai kuasa ga'a lai lamo'o.

²⁴Sababu na'o ngini ngowa'a Yahudi ua, ga'a ma tero sa'olo ate zaitun ma ja-jaga toma bangana, Unanga nga'unu 'o sipata ngini toma ate zaitun ma lese lamo'o ga'a ya so'ana. Dadi lebe gapanga umanga toma ate zaitun ya so'ana nga'unu ya sipata toma ngi'i ma siḏa toma ate zaitun ma lese lamo'o. [5]

²⁵Ioronongoḏu ngo-ngaku rimoi, ngoi to mau ngini ni waro mangale 'ori i'a ga'a rahasia ma siḏa, la ni dadi ngowa'a momole ua. Rahasia nena-ne: Ngowa'a Yahudi mamuni'a manga 'akala re sinyingara 'i dadi te'e, singadolo ngowa'a Yahudi ua ga'a Ma Jou'ongu Madutu ro cumutu, ananga mo-moini 'aḏi pula'a manga ngo-ngaku ra Yesus.

²⁶Re dadi ngowa'a Israel mo-moini ḏuanga i'a sanga salamata. Gena-ge ma tero sa'olo toma Boku 'Ofi-'Ofi ma dara 'i silefo so'o ne: “Salamata ma cimi toma Sion ḏuanga i'a 'O sapolo, Unanga ḏuanga i'a 'A singi-ngiranga Yakub 'ai ju'uda manga kajahatana.

²⁷Re Ngoi to 'a'a jaji nena-ne ra ananga: Toma 'orasa gena-ge, Ngoi ta singi-ngiranga ananga manga ḏosa.”

²⁸Ngowa'a Yahudi Ma Jou'ongu Madutu 'ai lawana, sababu ananga gena-ge 'aḏi oḏu'u dawongo Habari Roanga. Re gena-ge 'i dadi 'utungu rimoi di'a ngini ngowa'a Yahudi ua. Mada'a ngowa'a Yahudi, Unanga ya'u dadalara moju. Sababu toma 'ua re 'au wali ananga, Unanga ya'u cumutu ḏua, re Unanga 'o 'elingi tau-taunu 'Ai jaji tamanga ete re dotumu.

²⁹Sababu na'o Ma Jou'ongu Madutu ro cumutu re ro sibarakati bangsa rimoi, sanga ua Unanga 'a sitotomo ua 'oru ga'a Unanga ro sijaji re Unanga ra si'a'a ma siḏa.

³⁰Ua re 'au wali, ngini ngowa'a Yahudi ua ni mete'e ua Ma Jou'ongu Madutu. Mada'a 'orasa nange-ne Ma Jou'ongu Madutu ro sijumu 'ai 'akala re sinyingara ma la-la ra ngini, sababu ngowa'a Yahudi 'aḏi mete'e Unanga ua.

³¹So'o gena ḏi'i di'a ngowa'a Yahudi. Ananga gena-ge raḏi mete'e Ma Jou'ongu Madutu ua, la 'orasa nange-ne Ma Jou'ongu Madutu 'a sijumu 'Ai 'akala re sinyingara ma la-la ra ngini ngowa'a Yahudi ua. Mada'a ḏuanga i'a Unanga 'o sijumu 'ai 'akala re sinyingara ma la-la ḏi'i ra ananga ngowa'a Yahudi, sababu Unanga ro sijumu 'Ai 'akala re sinyingara ma la-la ra ngini, ngowa'a Yahudi ua.

³²Ma Jou'ongu Madutu 'o si'a'a ngowa'a mo-moini 'aḏi dadi ma tero sa'olo ngowa'a bui, sababu ananga raḏi mete'e Unanga ua. Unanga 'a siḏagi so'o gena, la Unanga nyengara 'o sijumu 'Ai 'akala re sinyingara ma la-la ra ananga mo-moini.

³³Ma Jou'ongu Madutu 'ai mura re dadalara ma pari cua toma ngowa'a mo-moini. Unanga gena-ge 'Ai 'akala ma soro'unu re 'Ai wo-waro ma pari cua ḏi'i. 'A guna ua nga'unu 'a sahe Unanga 'ai maksudu! 'A guna ua nga'unu 'a sahe Unanga 'ai ngo'omo!

³⁴Toma Boku 'Ofi-'Ofi 'i silefo so'o ne: “ 'A guna ua nga'unu 'o sahe 'Ai fikirana! 'A guna ua nga'unu 'o pula'a duga re domolo ra Unanga.”

³⁵“ 'A guna ua ro pula'a soi moi nyangu 'ori i'a rimoi ra Ma Jou'ongu Madutu, kara 'o golo'o enanga ma balasa.”

³⁶Sababu mo-moini toma diwanga re dungia ma dara, Ma Jou'ongu Madutu ra sidadi. Mo-moini gena-ge ma 'asala ra Ma Jou'ongu Madutu tala re di'a Unanga ḏi'i. Dadi, ino ngene wo puji re silamo'o Ma Jou'ongu Madutu, nena re si'a kasingado-ngadolo i'a. 'Amin.