Read Sahu Roma 13 Bible Online

Roma 13 - Sahu bible

Roma 13

¹Ngene matengo re matengo balasu ta'aloko toma pamarenta, sababu pamarenta rimoi i'a mai ua ga'a sanga kuasa ua ra Ma Jou'ongu Madutu tala. Re pamarenta ya siḏagi manga kuasa mete'e Ma Jou'ongu Madutu 'ai 'akala ma mau.

²Sababu gena-ge, ngowa'a ga'a lawana pamarenta ma tero ḇato 'aḏi lawana 'oru ga'a Ma Jou'ongu Madutu 'a siwatasa. Re ananga ḏuanga i'a 'aḏi sanga hukumu.

³Sababu, ngowa'a ga'a siḏagi 'ori i'a ma la-la, ananga gena-ge 'aḏi mojongo pamarenta awa. Pa'i ngowa'a ga'a 'aḏi siḏagi 'ori i'a ma jira, ngowa'a gena-ge balasu 'aḏi mojongo pamarenta. Dadi na'o ngini mau ni mojongo ua pamarenta, ngini balasu ni siḏagi 'ori i'a ma la-la, re ni sanga puji re silamo'o toma pamarenta ma bi-biri'i.

⁴Sababu pamarenta ma bi-biri'i gena-ge Ma Jou'ongu Madutu 'ai falalomu ga'a 'aḏi munara, la ngini sanga 'ahu ma la-la. Mada'a na'o ni siḏagi 'ori i'a ma jira, ngini balasu ni mojongo bi-biri'i gena-ge, sababu ananga sanga kuasa di'a sihukumu ngowa'a. Pamarenta ma bi-biri'i gena-ge Ma Jou'ongu Madutu 'ai falalomu, ga'a singe-ngeta'a hukumu di'a ngowa'a ga'a siḏagi 'ori i'a ma jira.

⁵Sababu gena-ge, ngini balasu ni ta'aloko toma pamarenta, sababu ngini mau ni sanga hukumu ua, re ḏi'i ngini waro gena-ge 'i banari sababu ninga 'akala re sinyingara ma kanau.

⁶Gena-ge ḏi'i 'alasana ngini balasu ni fangu balastengi, la pamarenta ma bi-biri'i nyengara 'aḏi siḏagi tau-taunu manga munara sa'olo Ma Jou'ongu Madutu 'ai falalomu.

⁷Dadi balasu ni pula'a ra guna ḇato 'oru ga'a ni mabanyatoro ra ananga: Na'o ni mabanyatoro balastengi 'oru ḇato; ḏua ni fangu ninga balastengi mo-moini. Na'o gena-ge 'i patasa di'a ta'aloko ra ananga; ḏua ni ta'aloko ra ananga. Na'o gena-ge 'i patasa di'a silamo'o ananga; ḏua ni silamo'o ra ananga.

⁸Awa ngini ni mabanyatoro ra guna ḇato. Mada'a pa'i banyatoro rimoi ḇato ga'a balasu ni fangu tau-taunu: Ngini balasu ni ma'u dadalara matengo re matengo. Sababu 'a guna ḇato 'o dadalara toma ngowa'a lelegu, unanga ra sitotomo 'a Musa 'ai hukumu.

⁹Sababu toma hukumu gena-ge 'age parenta so'o ne: “Ni tinikai awa, Ni sisengene ngowa'a awa, Ni tori'i awa, Ni nyafusu ngowa'a lelegu manga 'ori i'a awa.” Na'o ngini ni mete'e pa'i parenta rimoi ḇato so'o ne: “Ni dadalara ngowa'a lelegu ma tero sa'olo ni dadalara ninga diri masiretene,” ngini ni mete'e mo-moini gena-ge re parenta ma lelegu ḏi'i.

¹⁰Ngowa'a ga'a remanga dadalara toma ngowa'a lelegu, ananga 'aḏi siḏagi 'ori i'a ma jira ua toma ngowa'a lelegu. Sababu gena-ge, na'o ngini ni dadalara ngowa'a lelegu, ngini ni sitotomo 'a Musa 'ai hukumu.

¹¹Ngini balasu ni 'a'a so'o gena-ge, sababu ngini ni waro 'oru ga'a 'i patasa di'a 'a'a toma 'orasa nange-ne: Ngini balasu reni wangolo taninga tingidu, sababu ma 'orasa lebe cori i'a wakutu Ma Jou dadunu 'o sapolo moju di'a sigasa ngene toma soroga, reo toma 'orasa ngene wo ngaku ma mulaingi.

¹²Lobi'i sa'i ri palisi'i, ti'ara riwara ri wangere. Dadi, ino ngene wo matogumu siḏagi 'ori i'a ma hafu-hafu. Re ino ngene wo sidodahe dare ma tarangi.

¹³Ninga de'oso re ḏegoro balasu 'i patasa di'a 'orasa wangere: Awa 'a'a laya ngadolo pai-pai'i singadolo ni 'etolo. Awa ni 'a'a su-sudala fara muḏuo i'a, awa ni ruta bolo awa ni telengoro.

¹⁴Siḏibo ḏi'i, ngini balasu ni mete'e Ma Jou Yesus Kristus 'Ai tabeata re 'Ai de'oso re ḏegoro, singadolo 'Ai tabeata re de'oso re ḏegoro gena-ge, enanga 'i dadi ma tero sa'olo ninga pakeanga. Re ni fikiri riwara mangale ni mete'e ninga tabeata baraḏosa ma nyafusu.