Read Sahu Roma 14 Bible Online

Roma 14 - Sahu bible

Roma 14

¹'Age taninga sigolona, ananga ga'a manga ngo-ngaku 'i te'e nyangu mangale 'ahu ma ngo'omo su-sungi ma duhu sa'olo. Ngini balasu ni dawongo reninga 'akala re sinyingara mereoso ananga gena-ge. Awa ni rubutu ra ananga mangale manga 'atoranga ma lelegu reo ngini.

²Si'ade-'ade: 'Age mamuni'a ga'a 'aḏi ngaku nyengara 'aḏi oromo 'oru ḇato. Mada'a 'age ḏi'i ngowa'a lelegu ga'a manga ngo-ngaku 'i te'e nyangu, ananga 'aḏi masibasono tala nyengara 'aḏi oromo pa'i uge-uge ḇato.

³Ngowa'a ga'a nyengara oromo 'oru ḇato, awa ngini ni sipake-pake ua ananga ga'a pa'i 'aḏi oromo uge ḇato. So'o gena ḏi'i, ngowa'a ga'a oromo pa'i uge ḇato, awa ngini ni sisala ananga ga'a 'aḏi oromo 'oru ḇato. Sababu ngowa'a gena-ge Ma Jou'ongu Madutu ro dawongo ananga.

⁴Ngini nena-ne 'a guna singadolo nga'unu sijuruhakimi tuanga lelegu 'ai falalomu?! Falalomu gena-ge bae 'o eta'a sababu 'o rapu, bae 'o te'oso sababu 'o banari, gena-ge unanga 'ai tuanga ma 'urusana. Re tantu ḏua falalomu gena-ge ḏuanga i'a 'o te'oso sababu Ma Jou 'o riono side'oso unanga gena-ge.

⁵'Age mamuni'a ga'a 'aḏi mata'ajiri so'o ne: Wangere nange-ne lebe la-lamo'o i'a reo wangere ma lelegu. Mada'a 'age ḏi'i ngowa'a ma lelegu ga'a 'aḏi mata'ajiri so'o ne: Wangere-wangere gena-ge ma tero mo-moini. Mada'a lebe la-lamo'o ma re'u i'a nena-ne: Matengo re matengo balasu 'o mete'e 'oru ga'a unanga 'o ngaku mode-mode'e mangale Ma Jou'ongu Madutu 'ai 'akala ma mau.

⁶Matengo i'a ga'a 'o siwola i'a wangere rimoi sa'olo lai lamo'o; unanga 'o 'a'a so'o gena, la silamo'o Ma Jou. Re matengo i'a ga'a 'o oromo ngo-ngoromo 'oru ḇato; unanga 'o 'a'a so'o gena, la silamo'o Ma Jou sababu unanga ro sibere ie 'ai murasa ma la ra Ma Jou'ongu Madutu. So'o gena ḏi'i matengo i'a ga'a 'o oromo pa'i uge-uge ḇato; unanga 'o 'a'a so'o gena, la silamo'o Ma Jou re 'o sibere 'ai murasa ma la ra Ma Jou'ongu Madutu.

⁷Ngene wo 'a'a so'o gena sababu matengo i'a mai ua 'o 'ahu di'a mete'e unanga 'ai mau masiretene, re matengo i'a mai ua 'o sengene mete'e unanga 'ai mau masiretene ḏi'i.

⁸Sababu na'o ngene wo 'ahu, ngene wo 'ahu gena-ge mete'e Ma Jou 'ai mau. Re na'o ngene wo sengene, ngene wo sengene mete'e Unanga 'ai mau. Sababu bae ngene wo 'ahu, bae ngene wo sengene; ngene ta Unanga.

⁹Ma sababu gena, Kristus ro sengene re dadunu Ro 'ahu moju. Dadi bae ngowa'a 'ahu-'ahu bae ngowa'a raḏi sengene, Unanga gena-ge nanga Jou.

¹⁰Dadi i'a sa'olo ngini nena-ne mau sipa-pake ua ioronongoḏu ngo-ngaku rimoi ga'a 'aḏi oromo pa'i uge-uge ḇato?! Bolo i'a sa'olo ngini nena-ne mau sisala ioronongoḏu ngo-ngaku rimoi ga'a 'aḏi oromo ngo-ngoromo mo-moini?! Sababu ngene mo-moini ḏuanga i'a wo talaḏi Ma Jou'ongu Madutu di'a Unanga 'o sijuruhakimi ngene.

¹¹Sababu toma Boku 'Ofi-'Ofi ma dara 'i silefo so'o ne: “Ma Jou'ongu Madutu 'o kanau, ‘Mode-mode'e sa'olo Ngoi to 'ahu, ngowa'a mo-moini matengo re matengo 'aḏi maḏipolono ra Ngoi 'ari biono. Re ananga mo-moini matengo re matengo 'aḏi kanau mangale Ngoi nena-ne Ma Jou'ongu Madutu.’ ”

¹²Dadi ngene mo-moini matengo re matengo balasu masiajele mode-mode'e mangale ngene nanga de'oso re ḏegoro ra Unanga.

¹³Sababu gena-ge, awa ngene wo sijuruhakimi matengo re matengo. Siḏibo ḏi'i, ngini balasu ni makutale ni 'a'a dola'aku awa, singadolo ninga ioronongoḏu ngo-ngaku rimoi 'aḏi pele'e bolo eta'a toma ḏosa.

¹⁴Sababu ngoi reto marimoi ra Kristus, ngoi to ngaku mode-mode'e mangale ngo-ngoromo 'i cua ga'a 'i wosono Tai momina. Mada'a na'o matengo i'a ga'a 'o ta'ajiri mangale ngo-ngoromo rimoi 'i wosono; tantu ḏua ngo-ngoromo gena-ge 'i wosono di'a unanga.

¹⁵Na'o ninga ioronongoḏu ngo-ngaku rimoi 'ai 'akala re sinyingara 'i kangela sababu ngini ni oromo ngo-ngoromo ga'a unanga 'o oḏi'i re 'o mafikiri mangale ngo-ngoromo 'i wosono; ḏua ngini ni sijumu dadalara ua ra unanga. Kristus ro sengene di'a unanga, dadi awa ngini ni sijira 'ai ngo-ngaku sababu ngo-ngoromo ga'a ni oromo.

¹⁶Sababu gena-ge, awa ngini ni siḏagi 'oru ḇato ga'a la-la mete'e ngini; mada'a ninga ioronongoḏu ngo-ngaku rimoi 'o kanau, “Gena-ge 'i cira.”

¹⁷Sababu ra Ma Jou'ongu Madutu 'ai parenta ma dara, 'oru ga'a matengo i'a 'a oromo bolo 'a ka'e, gena-ge 'i la-lamo'o ua. Mada'a enanga ga'a lebe la-lamo'o ma re'u i'a so'o ne: Ngene balasu wo 'ahu sa'olo ngowa'a loasa re banari, re ngene wo ma'u dame matengo re matengo, re ḏi'i ngene balasu wo maroanga sababu Ma Ngagara 'Ofi-'Ofi taninga 'akala re sinyingara.

¹⁸Sababu 'a guna ḇato ga'a 'o de-de'oso Kristus ma duhu so'o gena, unanga gena-ge 'o sisanangi Ma Jou'ongu Madutu 'ai 'akala re sinyingara, re ngowa'a lelegu 'u silamo'o unanga.

¹⁹Sababu gena-ge, ino ngene wo makutale mode-mode'e di'a 'ahu ma'u 'aro'o la, re ma'u site'e nanga ngo-ngaku.

²⁰Awa ngene wo sijira Ma Jou'ongu Madutu 'ai munara tananga ioronongoḏu ngo-ngaku rimoi manga 'akala re sinyingara, sababu ngo-ngoromo ga'a ngene wa oromo. Mode-mode'e ngo-ngoromo 'oru ḇato 'i wosono ua. Mada'a na'o 'oru ga'a ngene wa oromo 'i sigasa ioronongoḏu ngo-ngaku rimoi ma lelegu 'aḏi eta'a toma ḏosa, ḏua ngene nanga ga'a gena-ge 'i rapu!

²¹Jobilaha ngini ni oromo haiwani ma la-la'eme awa bolo ka'e 'anggur awa bolo ni siḏagi 'oru ḇato awa ga'a si'a'a ninga ioronongoḏu ngo-ngaku rimoi 'aḏi eta'a toma ḏosa.

²²Dadi sieanga ḇato Ma Jou'ongu Madutu 'o waro mangale 'oru ga'a ngini ni ngaku mangale oromo re ka'e. Bara'utungu ngini, na'o ngini ni siḏagi 'oru ga'a ni fikiri 'i banari re ḏi'i ninga 'akala re sinyingara 'i sijuruhakimi ngini ua.

²³Mada'a na'o matengo i'a 'o oromo ngo-ngoromo re 'ai 'akala re sinyingara 'i taka-taka, Ma Jou'ongu Madutu ru singe-ngeta'a hukumu unanga. Sababu unanga gena-ge 'a mete'e 'ai ngo-ngaku ua. Re 'oru ḇato ga'a ngene wo siḏagi na'o ga'a mete'e ua nanga ngo-ngaku, gena-ge 'i ḏosa.