Read Sahu Roma 2 Bible Online

Roma 2 - Sahu bible

Roma 2

¹Dadi Ma Jou'ongu Madutu ḏuanga i'a 'o sihukumu ngowa'a ga'a manga de'oso re ḏegoro so'o gena-ge. Momongolo ua ngini ga'a ni sijuruhakimi ngowa-ngowa'a gena-ge, ngini masiretene ninga de'oso re ḏegoro ma tero sa'olo ananga manga de'oso re ḏegoro! Sababu gena-ge, ngini ninga 'alasana 'i cua di'a ngini ni sijuruhakimi ngowa-ngowa'a gena-ge! Sidogo ḏi'i, na'o ngini ni 'a'a so'o gena-ge, ngini ni sijuruhakimi ninga diri masiretene!

²Ngene wa waro mangale wakutu Ma Jou'ongu Madutu 'o singe-ngeta'a hukumu toma ngowa-ngowa'a ga'a 'aḏi 'a'a cira so'o gena-ge, Unanga 'ai putusanga 'i mete'e ba-banari.

³Dadi na'o ngini ni sijuruhakimi ngowa'a ga'a 'aḏi 'a'a jira, mada'a ngini ni 'a'a ma tero; awa ngini ni ta'ajiri Ma Jou'ongu Madutu 'o sihukumu ngini ua ḏi'i!

⁴Awa ni ta'ajiri ngini ni paralu ua ni maḏibo toma ngo'omo boloto, sababu Ma Jou'ongu Madutu 'ai 'akala re sinyingara ma la-la, re sababu Unanga 'ai 'akala ḇanyo lai lamo'o; dadi jau-jau Unanga 'o sihukumu ngini ua. Ngini ni waro ua, Unanga 'ai de'oso re ḏegoro so'o gena-ge ra ngini, la ngini ni sanga donga di'a ni maḏibo toma ngo'omo boloto.

⁵Mada'a sababu ngini ninga 'akala re sinyingara lai te'e re ni maḏibo ua toma ngo'omo boloto, Ma Jou'ongu Madutu ḏuanga i'a 'o sihukumu ngini lebe tubuso i'a toma Kiamata ma Wangere. Toma wangere gena-ge, Unanga 'o sijumu 'Ai borata sababu ngowa'a manga ḏosa re 'O singe-ngeta'a hukumu rai 'adili:

⁶Unanga ḏuanga i'a 'a balasa mete'e matengo re matengo nanga ga'a.

⁷'Age ngowa'a mamuni'a ga'a 'a'a 'ori i'a la-la tau-taunu sababu ananga gena-ge mau Ma Jou'ongu Madutu 'o silamo'o ananga, sanga mulia re ḏi'i 'aḏi 'ahu mamete'e ra Unanga toma soroga. Ananga gena-ge, ḏuanga i'a Unanga ya'u pula'a 'ahu kasingado-ngadolo i'a.

⁸Mada'a 'age ngowa'a lelegu ga'a 'aḏi mete'e manga mau masiretene singadolo ananga gena-ge dawongo ua Ma Jou'ongu Madutu 'ai ba-banari re 'aḏi madaga'a 'ori i'a ma jira. Ananga gena-ge ḏuanga i'a sanga duruta ra Ma Jou'ongu Madutu tala.

⁹Ngowa'a mo-moini ga'a madaga'a 'ori i'a ma jira tau-taunu, ḏuanga i'a Ma Jou'ongu Madutu ya'u pula'a 'ahu 'i susa re sangisara: Siḏa-siḏa ngowa'a Yahudi, kara ngowa'a Yahudi ua.

¹⁰Mada'a ngowa'a mo-moini ga'a 'a'a 'ori i'a la-la tau-taunu, ḏuanga i'a Ma Jou'ongu Madutu ya'u pula'a mulia, dame re Unanga ya'u silamo'o: Siḏa-siḏa ngowa'a Yahudi, kara ngowa'a Yahudi ua.

¹¹Sababu Unanga gena-ge 'o pa'ala kaci moi ua.

¹²Ngowa'a mo-moini ga'a 'aḏi waro Musa 'ai hukumu ua wakutu ananga gena-ge 'aḏi madaga'a ḏosa, Ma Jou'ongu Madutu ḏuanga i'a 'o siwola i'a ananga di'a sanga hukumu. I'a sa'olo Unanga 'o 'a'a so'o gena-ge?! Sababu ananga 'aḏi mete'e Musa 'ai hukumu ua! Sanga ua! Unanga 'o sihukumu ananga gena-ge sababu pa'i ananga manga ḏosa ḇato. Momongolo ua, ngowa'a Yahudi ua ga'a 'aḏi waro Musa 'ai hukumu ua, wakutu ananga gena-ge ya mete'e ananga manga 'akala re sinyingara masiretene ga'a ya mete'e Musa 'ai hukumu. Kalaha ananga ya waro Musa 'ai hukumu ua, ananga manga 'akala re sinyingara masiretene 'i dadi ma tero sa'olo Musa 'ai hukumu ra ananga! Dadi tamanga de'oso re ḏegoro 'i sijumu mangale 'atoranga-'atoranga ga'a ri silefo ra Musa 'ai hukumu, Ma Jou'ongu Madutu ro lefo enanga gena-ge tamanga 'akala re sinyingara ma dara. Ḏi'i ananga manga 'akala re sinyingara ma kanau 'i dadi bukiti sababu soi rai o'o i'a manga fikirana 'i kanau, “Gena-ge 'i rapu,” soi rai o'o i'a manga fikirana 'i kanau, “Gena-ge 'i banari”. <(...)

¹⁶Toma Kiamata ma Wangere, Ma Jou'ongu Madutu ḏuanga i'a 'o pula'a kuasa ra Yesus Kristus di'a 'o sijuruhakimi manusia manga ḏosa ga'a 'aḏi sigogono tamanga 'akala re sinyingara ma dara. Gena-ge 'i dadi mete'e Habari Roanga ga'a ngoi reto singadolo.

¹⁷Mada'a ngini ga'a ni kanau ngini ngowa'a Yahudi, ninga duhu sa'olo? Ngini ga'a ni macako'o namo-namoto ra Musa 'ai hukumu di'a ninga salamata, re ga'a ni mahie mangale ninga 'ahu marimoi ra Ma Jou'ongu Madutu.

¹⁸Ngini ga'a reni sanga do-doto'o mangale Musa 'ai hukumu singadolo ngini ni waro Ma Jou'ongu Madutu 'ai 'akala ma mau re ni waro 'ori i'a ga'a ma la-la re ma jira.

¹⁹Ngini ga'a ni ta'ajiri mangale ngini ni dadi ngowa'a bi-biri'i di'a ni gasa ngowa'a hafu re ni gasa tarangi toma ngowa-ngowa'a ga'a tegoro toma hafu-hafu!

²⁰Ngini ga'a ni ta'ajiri mangale ngini ni dadi guru di'a ni doto'o ngowa'a ga'a ma tero ngowa 'olo sababu ananga gena-ge 'aḏi waro Musa 'ai hukumu ua. Ngini ni ngaku gena-ge, sababu ngini ni sanga Musa 'ai hukumu, ga'a Ma Jou'ongu Madutu 'ai wo-waro re ba-banari 'i silefo toma dara.

²¹Dadi, ngini ga'a ni doto'o ngowa'a lelegu, i'a sa'olo ni doto'o ua ninga diri masiretene?! Ngini ni doto'o ngowa'a lelegu: Tori-tori'i awa; mada'a ngini masiretene ni tori-tori'i!

²²Ngini ni siajele ngowa'a lelegu: Tinikai awa, mada'a ngini masiretene ni tinikai! Ngini ni emono jou'ongu ma somoara, mada'a ngini masiretene ni rabasa 'oru ḇato toma wala ga'a ngowa'a ya silamo'o re siḏubuso jou'ongu ma somoara!

²³Ngini ni mahie mangale ngini reni sanga Musa 'ai hukumu, mada'a ngini ni silamo'o ua Ma Jou'ongu Madutu sababu ni mete'e ua Musa 'ai hukumu.

²⁴Toma Boku 'Ofi-'Ofi 'i silefo so'o ne: “Ma Jou'ongu Madutu 'ai lomanga, ngowa'a Yahudi ua ya sileleje. Ma sababu ngini ngowa'a Yahudi ninga de'oso re ḏegoro ma jira.”

²⁵Ngini reni masuna mete'e Musa 'ai hukumu. Dadi ngini ga'a ni siḏagi Musa 'ai hukumu; na'o ngini ni masuna, enanga gena-ge rema faeda. Mada'a ngini ga'a ni mete'e Musa 'ai hukumu ua; na'o ngini ni masuna, enanga gena-ge ma faeda 'i cua; sababu ngini ni dadi ma tero sa'olo ngowa'a Yahudi ua ga'a 'aḏi masuna ua!

²⁶Na'o ngowa'a Yahudi ua matengo ga'a 'o masuna ua, mada'a unanga gena-ge 'a mete'e Musa 'ai hukumu; kalaha 'o masuna nyangu, unanga gena-ge ra Ma Jou'ongu Madutu 'ai momina ma tero sa'olo unanga ro masuna ḏua!

²⁷Dadi ngini, ngowa'a Yahudi, Ma Jou'ongu Madutu ḏuanga i'a nu singe-ngeta'a hukumu. Sababu kalaha ananga gena-ge 'aḏi masuna ua, 'age ngowa'a Yahudi ua ga'a 'aḏi mete'e Musa 'ai hukumu. Momongolo ua, ngini, ngowa'a Yahudi, kalaha ngini reni sanga Musa 'ai hukumu re reni masuna ḏi'i, ngini ni sito-to'u Musa 'ai hukumu!

²⁸Ngowa'a matengo 'o dadi ua ngowa'a Yahudi mode-mode'e ra Ma Jou'ongu Madutu 'ai momina sababu 'ori i'a ga'a ngowa'a nyengara ya oḏi'i so'o ne: bae ngowa'a lelegu ro suna unanga, bae unanga 'o mete'e Musa 'ai hukumu.

²⁹Siḏibo ḏi'i, pa'i ngowa'a matengo 'o dadi ngowa'a Yahudi mode-mode'e ḇato ra Ma Jou'ongu Madutu 'ai momina sababu 'ori i'a ga'a ngowa'a 'aḏi oḏi'i yoḏu'u: 'Ai 'akala re sinyingara 'i su-sungi re sanga suna sababu Ma Ngagara 'Ofi-'Ofi ma kuasa. Gena-ge 'i dadi ua sababu ngowa'a matengo 'o mete'e hukumu-hukumu ga'a ri silefo. Re kalaha manusia 'aḏi puji re silamo'o unanga ua ga'a sanga suna so'o gena, Ma Jou'ongu Madutu 'u puji re silamo'o!