Read Sahu Roma 3 Bible Online

Roma 3 - Sahu bible

Roma 3

¹Na'o so'o gena-ge, ma barakati 'oru di'a wo dadi ngowa'a Yahudi?! Ma faeda 'oru di'a wo mete'e suna ma 'atoranga?!

²Tantu ḏua, enanga rema barakati lai repe re ma faeda repe ḏi'i! Siḏa-siḏa, Ma Jou'ongu Madutu 'a siwatasa 'Ai 'Idini ra ngene nanga ete re dotumu.

³Mada'a ananga gena-ge manga repe 'aḏi cufala ua di'a siḏagi Musa 'ai hukumu. Dadi na'o so'o gena, awa-awa Ma Jou'ongu Madutu 'o cufala ua di'a sitotomo 'Ai jaji ra ngene, ngowa'a Yahudi?!

⁴Sanga ua! Kalaha manusia mo-moini 'aḏi sa-sakala re 'aḏi sitotomo ua manga jaji, Ma Jou'ongu Madutu 'o banari, re Unanga 'o cufala di'a sitotomo 'Ai jaji. Toma Boku 'Ofi-'Ofi ma dara 'i silefo so'o ne: “ 'Oru ḇato Ma Jou'ongu Madutu 'o kanau, ngowa'a mo-moini 'aḏi oḏi'i gena-ge 'i banari. Re Ma Jou'ongu Madutu 'o 'utungu tau-taunu na'o 'O sijuruhakimi.”

⁵Mada'a na'o Ma Jou'ongu Madutu ganapu 'a sijumu 'Ai 'adili wakutu ngene wo 'a'a 'ori i'a ma jira, ngene wo kanau 'oru?! Awa-awa ngene wo aje, “Ma Jou'ongu Madutu 'o 'adili ua, na'o 'O siba'ala 'Ai borata ra ngene!” (Tero mode'e gena-ge manusia manga fikirana!)

⁶Sanga ua! Na'o Ma Jou'ongu Madutu 'o 'adili ua wakutu Unanga 'o sijuruhakimi ngene ngowa'a Yahudi; tantu ḏua Unanga 'o patasa ua di'a 'O sijuruhakimi manusia mo-moini!

⁷Mada'a ḏa 'age mamuni'a ga'a 'aḏi ta'ajiri so'o ne: “Na'o Ma Jou'ongu Madutu 'o sijumu Unanga 'ai cufala di'a sitotomo 'Ai jaji re dadi manusia 'aḏi ganapu puji re silamo'o Unanga sababu ngene wo cufala ua di'a sitotomo nanga jaji; i'a sa'olo Unanga 'o singe-ngeta'a hukumu ra ngene sababu nanga ḏosa gena-ge?!”

⁸Na'o so'o gena-ge, i'a sa'olo ngene wo kanau yoḏu'u, “Jobilaha wo 'a'a ḏosa, la 'ori i'a ma la-la 'i waiti?!” Mode-mode'e ngowa'a 'aḏi sipula'a mara'a ra ngoi wakutu 'aḏi aje ngoi to kanau so'o gena. Ngowa-ngowa'a gena-ge patasa Ma Jou'ongu Madutu ya'u sihukumu!

⁹Na'o so'o gena-ge, ra Ma Jou'ongu Madutu 'ai momina, ngene ngowa'a Yahudi nanga bai'i 'oru reo ngowa'a Yahudi ua?! So'o gena-ge ua! Ngoi reta siajele so'o ne: bae ngowa'a Yahudi, bae ngowa'a Yahudi ua, ngowa'a mo-moini ḏosa ya'u ḏegoro.

¹⁰Ma tero sa'olo 'i silefo ḏua toma Boku 'Ofi-'Ofi so'o ne: “Matengo ua 'o loasa re banari, matengo i'a mai ua!

¹¹Matengo i'a mai ua 'o nana'o mode-mode'e Ma Jou'ongu Madutu, matengo i'a mai ua 'o nyafusu mode-mode'e di'a 'o nana'o Unanga.

¹²Ngowa'a mo-moini raḏi maki-kiḏanga ra Ma Jou'ongu Madutu ngowa'a mo-moini manga faeda ri cua ra Unanga; matengo ua 'o 'a'a la-la, matengo i'a mai ua!”

¹³“Ananga gena-ge 'aḏi kanau demo-demo ga'a sijira ngowa'a, gena-ge ma tero sa'olo kubu ma da-damunu 'i we-welanga ḏu-ḏuanga ḏua di'a dawongo ngowa'a sengene; Manga yai'i 'i wale pa'i di'a sihaga ngowa'a ḇato.” “Ananga manga 'uḏu ma betu'u pa'i sije-jengere ngowa'a ḇato, ma tero sa'olo racimi toma cuku'u ma bisa.”

¹⁴“Manga madanga ma dara 'i romanga reo kutuki re go-go'oro!”

¹⁵“Ananga 'aḏi cautu di'a sisikisa re 'aḏi sisengene ngowa'a;

¹⁶ananga 'aḏi siare susa re bahala 'aḏi tagi toma ngi'i le'a ḇato,

¹⁷re 'aḏi nana'o ua mangale dame ma ngo'omo.”

¹⁸“Ananga gena-ge 'aḏi mojongo ua mangale Ma Jou'ongu Madutu 'ai borata.”

¹⁹Mada'a ngene wa waro mangale 'oru ga'a ri silefo ra Musa 'ai hukumu, gena-ge pa'i di'a ngowa'a Yahudi ga'a 'aḏi 'ahu mete'e hukumu gena-ge ma 'atoranga. Sababu gena-ge, matengo i'a mai ua toma dungia sitabi donga nga'unu ua pula'a 'alasana ra Ma Jou'ongu Madutu, la Unanga 'u sihukumu ua. Sababu ngene mo-moini rewo sala ra Ma Jou'ongu Madutu 'ai momina.

²⁰Sababu gena-ge, matengo i'a mai ua nga'unu 'o dadi loasa re banari ra Ma Jou'ongu Madutu 'ai momina sababu unanga ra mete'e Musa 'ai hukumu. Siḏibo ḏi'i, Musa 'ai hukumu pa'i sijumu ḇato ra ngene mangale ngene ngowa'a baraḏosa.

²¹Mada'a nange-ne Ma Jou'ongu Madutu ro sijumu ngo'omo, la ngene wo dadi loasa re banari ra Unanga 'ai momina. Ngo'omo gena-ge 'i ma'u sanga yoḏu'u sababu wo mete'e Musa 'ai hukumu. Siḏibo ḏi'i, 'a Musa 'ai boku-boku re nabi manga boku-boku 'i silefo mangale

²²ngene pa'i wo dadi loasa re banari na'o ngene nanga ngo-ngaku ra Yesus Kristus. Re Ma Jou'ongu Madutu ḏuanga i'a 'a si'a'a so'o gena di'a ngowa'a mo-moini ga'a manga ngo-ngaku ra Yesus Kristus. Ngowa'a mo-moini ma tero ra Ma Jou'ongu Madutu 'ai momina,

²³sababu ngene mo-moini ngowa'a baraḏosa. Dadi ngene wo kiḏanga madutu ra Ma Jou'ongu Madutu ga'a 'o mulia,

²⁴re pa'i ngene wo dadi ngowa'a kananga sala ua ra Ma Jou'ongu Madutu 'ai momina sababu Unanga 'ai mura re dadalara ḇato. Unanga 'o si'a'a so'o gena-ge di'a ngene sa'olo cocatu sababu Kristus Yesus rena tuusu.

²⁵Ma Jou'ongu Madutu 'o sijumu Yesus toma mandan sa'olo jou-jou wakutu Unanga 'ai ngaunu ri pa'ala toma salib. Dadi na'o ngene wo ngaku mangale Yesus 'o sengene di'a ngene, Unanga 'ai ngaunu gena-ge 'i singi-ngiranga Ma Jou'ongu Madutu 'ai borata ra ngene sababu nanga ḏosa. Ma Jou'ongu Madutu 'a si'a'a so'o gena di'a 'a sijumu 'O sijuruhakimi rai 'adili. Sababu 'ua re 'au wali moju, Unanga ro pake 'akala ma ḇanyo toma manusia manga ḏosa-ḏosa singadolo Unanga ya'u sihukumu nyangu.

²⁶Mada'a nange-ne sababu Yesus Kristus 'ai se-sengene, Ma Jou'ongu Madutu ra sijumu mangale Unanga 'o 'adili.[2] Re Unanga ḏi'i 'o sijumu mangale Unanga 'o 'adili, sababu Unanga 'o kanau 'a guna ḇato ga'a 'ai ngo-ngaku ra Yesus, unanga gena-ge 'o dadi loasa re banari ra Unanga 'ai momina.

²⁷Dadi nange-ne ngene nanga 'alasana ri cua di'a wo matoro! I'a sa'olo so'o gena?! Sababu Ma Jou'ongu Madutu 'o sidadi ua ngene sa'olo ngowa'a loasa re banari, sababu ngene rewo mete'e Musa 'ai hukumu. Siḏibo ḏi'i, Unanga gena-ge 'o sidadi ngene sa'olo ngowa'a loasa re banari, pa'i sababu ngene rewo ngaku Yesus ḇato!

²⁸Dadi enanga ma ḏo-ḏogumu tala so'o ne: Ngene wo dadi ngowa'a loasa re banari ra Ma Jou'ongu Madutu 'ai momina sababu wo ngaku Yesus Kristus. Matengo ua 'o dadi ngowa'a loasa re banari sababu 'a mete'e Musa 'ai hukumu.

²⁹Ma Jou'ongu Madutu gena-ge di'a pa'i ngowa'a Yahudi ḇato?! Bolo Unanga ḏi'i Ma Jou'ongu Madutu di'a ngowa'a Yahudi ua?! Ya, tero mode'e Unanga Ma Jou'ongu Madutu di'a ngowa'a Yahudi ua ḏi'i.

³⁰Sababu 'age Ma Jou'ongu Madutu pa'i matengo ḇato. Re Unanga 'o welanga ngo'omo dadi ngowa'a Yahudi nyengara 'aḏi dadi ngowa'a loasa re banari sababu manga ngo-ngaku ra Yesus. So'o gena ḏi'i, Unanga 'o pula'a ngo'omo, la ngowa'a Yahudi ua nyengara 'aḏi dadi ngowa'a loasa re banari sababu manga ngo-ngaku ra Yesus.

³¹Dadi sababu ngene wo ngaku Yesus, ngene wa upa'a Musa 'ai hukumu bolo ua?! Sanga Ua! Siḏibo ḏi'i sababu nanga ngo-ngaku, ngene nga'unu wa sitotomo mode-mode'e Musa 'ai hukumu gena-ge.