Read Sahu Roma 4 Bible Online

Roma 4 - Sahu bible

Roma 4

¹Dadi na'o so'o gena, 'oru ngene nyengara wo kanau mangale Abraham nanga bangsa ma ete re dotumu?! Ma duhu sa'olo Unanga gena-ge 'o dadi ngowa'a loasa re banari ra Ma Jou'ongu Madutu 'ai momina?!

²Na'o Abraham 'o dadi ngowa'a loasa re banari ra Ma Jou'ongu Madutu 'ai momina sababu 'ai ga'a, tantu ḏua unanga nyengara 'o matoro toma manusia. Mada'a unanga gena-ge 'ai 'alasana 'i cua di'a 'o matoro ra Ma Jou'ongu Madutu,

³sababu toma Boku 'Ofi-'Ofi ma dara 'i silefo so'o ne: “Abraham 'o ngaku Ma Jou'ongu Madutu re sababu unanga 'ai ngo-ngaku gena-ge, Ma Jou'ongu Madutu 'o dawongo unanga sa'olo ngowa'a loasa re banari.”

⁴Na'o ngowa'a matengo 'o munara, unanga gena-ge 'o sanga pipisi di'a 'ai munara gena-ge. Pipisi gena-ge bu-bula'a ua, mada'a gena-ge 'ai haku.

⁵Mada'a ngene wo sanga salamata so'o gena-ge ua. Siḏibo ḏi'i, na'o ngowa'a matengo i'a 'o masinganono tai ga'a ua di'a sanga salamata mada'a 'o ngaku Ma Jou'ongu Madutu ga'a pa'i nyengara 'O kanau ḇato ngowa'a baraḏosa dadi ngowa'a loasa re banari, ḏua Ma Jou'ongu Madutu 'o dawongo ngowa'a matengo i'a gena-ge sa'olo ngowa'a loasa re banari sababu pa'i 'ai ngo-ngaku ḇato.

⁶'Olana Daud 'o kanau ma tero gena-ge wakutu 'o siajele mangale ngowa'a matengo ga'a bara'utungu sababu Ma Jou'ongu Madutu 'u dawongo sa'olo ngowa'a loasa re banari, 'A sitotoho ua ngowa'a matengo gena-ge 'ai ga'a. 'Olana Daud 'o kanau so'o ne:

⁷“Bara'utungu ananga ga'a manga ḏosa Ma Jou'ongu Madutu 'a singi-ngiranga re sidaioranga.

⁸Bara'utungu ngowa'a matengo i'a ga'a 'ai ḏosa, Ma Jou'ongu Madutu 'a tuntutu riwara.”

⁹Dadi bara'utungu gena-ge pa'i di'a ngowa'a ga'a raḏi mete'e suna ma 'atoranga ḇato bolo di'a ngowa'a ḏi'i ga'a 'aḏi mete'e suna ma 'atoranga ua?! 'Au nga'ene ngomi mi kanau ḏua mangale Ma Jou'ongu Madutu 'o dawongo Abraham sa'olo ngowa'a loasa re banari pa'i sababu 'ai ngo-ngaku ra Ma Jou'ongu Madutu ḇato.

¹⁰'Au ngau Ma Jou'ongu Madutu 'o dawongo Abraham sa'olo ngowa'a loasa re banari?! Wakutu Abraham ro suna ḏua bolo nyangu?! Ma nyonyata, wakutu Unanga 'o suna nyangu, Ma Jou'ongu Madutu 'u dawongo sa'olo ngowa'a loasa re banari!

¹¹Togumu i'a kara unanga 'o masuna. Re 'ai suna gena-ge pa'i 'i dadi didina'o ḇato mangale Ma Jou'ongu Madutu ro dawongo unanga sa'olo ngowa'a loasa re banari sababu 'ai ngo-ngaku ra Unanga wakutu Abraham 'o suna nyangu. Sababu gena-ge, Abraham 'o dadi ḇaḇa rohani di'a ngowa'a mo-moini ga'a 'aḏi suna ua mada'a ngowa'a loasa re banari sababu manga ngo-ngaku ra Ma Jou'ongu Madutu.

¹²So'o gena-ge ḏi'i, Abraham 'o dadi ḇaḇa rohani di'a ngowa'a Yahudi sababu pa'i ananga gena-ge raḏi masuna ḇato ua, mada'a sababu ananga ḏi'i manga 'ahu 'i sijumu manga ngo-ngaku ra Ma Jou'ongu Madutu, ma tero sa'olo Abraham wakutu unanga gena-ge 'o suna nyangu.

¹³Ma Jou'ongu Madutu ro sijaji ra Abraham re unanga 'ai ju'uda rohani ḏi'i, mangale ḏuanga i'a dungia nena-ne 'i dadi ananga gena-ge manga harata. I'a sa'olo Ma Jou'ongu Madutu 'o sijaji so'o gena-ge ra Abraham?! Sababu unanga 'o mete'e Musa 'ai hukumu?! Ua! Sababu pa'i 'a Abraham 'o ngaku Ma Jou'ongu Madutu ḇato. Dadi Ma Jou'ongu Madutu 'o dawongo unanga sa'olo ngowa'a loasa re banari.

¹⁴Sababu na'o ngowa'a ga'a 'aḏi 'ahu mete'e Musa 'ai hukumu 'aḏi dawongo 'oru ga'a Ma Jou'ongu Madutu ro sijaji, gena-ge ma ngale ngene nanga ngo-ngaku ra Ma Jou'ongu Madutu ma faeda 'i cua, re 'Ai jaji 'i cua di'a ngene.

¹⁵Siḏibo ḏi'i, na'o ngene wo mete'e Musa 'ai hukumu, ngene pa'i wo dawongo Ma Jou'ongu Madutu 'ai borata ḇato; sababu wo mete'e ti-tiai Musa 'ai hukumu yoḏu'u. Re na'o Musa 'ai hukumu 'i cua, ḏosa mai 'i cua ḏi'i.

¹⁶Sababu gena-ge, ngene ḏuanga i'a wo sanga 'oru ga'a Ma Jou'ongu Madutu ro sijaji sababu nanga ngo-ngaku, la 'oru ga'a ngene wo sanga sababu Unanga 'ai mura re dadalara. Jaji gena-ge sitantukanga ra Abraham 'ai ju'uda mo-moini: bae ngowa'a Yahudi ga'a 'aḏi waro Musa 'ai hukumu re manga ngo-ngaku ra Ma Jou'ongu Madutu ma tero sa'olo Abraham, bae ngowa'a Yahudi ua ga'a manga ngo-ngaku ra Ma Jou'ongu Madutu ma tero sa'olo Abraham. Dadi Abraham ngene mo-moini nanga ḇaḇa rohani.

¹⁷Sababu Ma Jou'ongu Madutu ro kanau ra Abraham so'o ne: “Ngoi reto sidadi ngana no dadi ḇaḇa di'a bangsa ma repe.” Abraham 'o dadi ḇaḇa di'a ngene mo-moini ra Ma Jou'ongu Madutu 'ai momina sababu unanga 'ai ngo-ngaku ra Unanga. Ma Jou'ongu Madutu gena-ge ga'a 'O dadunu si'ahu moju ngowa'a senge-sengene re pa'i 'O kanau ḇato re 'ori i'a 'i dadi nyangu, nyengara 'i dadi rema enanga.

¹⁸Kalaha mete'e manusia ma fikirana, ngo-nganono 'i cua di'a Abraham 'o sanga ngowa'a, unanga 'o ngaku re 'o masinganono ra Ma Jou'ongu Madutu moju. Dadi Abraham 'o dadi ḇaḇa toma bangsa ma repe. Gena-ge 'i dadi ma tero sa'olo mete'e 'oru ga'a 'i silefo toma Boku 'Ofi-'Ofi ma dara so'o ne: “ 'Ani ju'uda ḏuanga i'a lai repe madutu ma tero sa'olo mumuḏungu toma diwanga.”

¹⁹Toma 'orasa gena-ge, Abraham 'ai lese ma tero sa'olo 'i sengene, sababu 'ai 'umuru sebanga musungu latu moi. Dadi unanga ro waro mangale unanga nga'unu 'o sanga ju'uda riwara. So'o gena ḏi'i, ngo Sara mo ngonono. Mada'a Abraham 'ai ngo-ngaku kama kuranga ua.

²⁰Unanga 'o taka-taka ua mangale Ma Jou'ongu Madutu 'ai jaji. Siḏibo ḏi'i, unanga 'o ngaku tau-taunu singadolo 'ai ngo-ngaku 'i site'e 'ai 'akala re sinyingara. Sababu gena-ge, unanga 'o puji re silamo'o Ma Jou'ongu Madutu,

²¹sababu unanga 'o ngaku mode-mode'e mangale Ma Jou'ongu Madutu nga'unu 'o 'a'a 'oru ga'a Unanga ro sijaji.

²²Sababu Abraham 'ai ngo-ngaku, toma Boku 'Ofi-'Ofi 'i silefo so'o ne: “Ma Jou'ongu Madutu 'o dawongo 'a Abraham sa'olo ngowa'a loasa re banari.”

²³Demo-demo gena-ge: “dawongo sa'olo ngowa'a loasa re banari,” gena-ge 'i silefo pa'i Abraham matengo ḇato ua,

²⁴mada'a di'a ngene ḏi'i. Ngene ḏi'i Ma Jou'ongu Madutu ḏuanga i'a na dawongo sa'olo ngowa'a loasa re banari, sababu ngene wo ngaku Ma Jou'ongu Madutu ga'a dadunu 'O si'ahu Yesus moju, nanga Jou.

²⁵Ma Jou'ongu Madutu ro sidoa'a Yesus toma manusia, la ananga 'aḏi sisengene Unanga di'a ngene nanga ḏosa. Ḏua Ma Jou'ongu Madutu dadunu 'o si'ahu Unanga moju, la Ma Jou'ongu Madutu nyengara na dawongo ngene sa'olo ngowa'a loasa re banari.