Read Sahu Roma 5 Bible Online

Roma 5 - Sahu bible

Roma 5

¹Sababu gena-ge, nange-ne ngene wo 'ahu dame ra Ma Jou'ongu Madutu sababu 'oru ga'a nanga Jou Yesus Kristus ra 'a'a di'a ngene. Gena-ge 'i dadi sababu ngene nanga ngo-ngaku ra Yesus Kristus, dadi ngene rewo dadi ngowa'a kamanga sala ua Tai momina.

²Re ḏi'i, sababu ngene rewo ngaku Yesus Kristus, ngene wo basono Ma Jou'ongu Madutu 'ai mura re dadalara tananga 'ahu tau-taunu sababu 'oru ga'a Yesus Kristus ro 'a'a di'a ngene. Re ngene wo maroanga, sababu ngene renanga ngo-nganono 'i te'e mangale ḏuanga i'a ngene wo sanga balangu ra Ma Jou'ongu Madutu 'ai mulia.

³So'o gena-ge ḏi'i, ngene wo maroanga na'o wo sanga susa re sangisara, sababu ngene wa waro mangale susa re sangisara gena-ge 'i riono ngene di'a wo tahana renanga 'akala ḇanyo.

⁴Re na'o ngene wo tahana ma tero gena-ge Ma Jou'ongu Madutu 'o 'akoru ngene nanga de'oso re ḏegoro. Sidogo ḏi'i, ngene nanga ngo-nganono ganapu te'e ra Unanga, sababu ngene wo waro Unanga na 'akoru.

⁵Reo ngo-nganono ma duhu so'o gena-ge, ḏuanga i'a nanga 'akala re sinyingara 'i rapo'o ua, sababu Ma Jou'ongu Madutu 'o sitotomo 'Ai jaji ra ngene. Ngene rewo waro gena-ge sababu Ma Ngagara 'Ofi-'Ofi ga'a Unanga ro pula'a ra ngene, Enanga 'i siromanga nanga 'akala re sinyingara Rai dadalara.

⁶Toma 'orasa ga'a Ma Jou'ongu Madutu ra sitantukanga pasala ḏua, wakutu ngene nga'unu wo sisalamata ua ngene masiretene, Kristus 'o sengene di'a ngene ga'a wo kiḏanga ra Ma Jou'ongu Madutu.

⁷Biasa kalaha toma ngowa'a manga momina 'age ngowa'a matengo i'a ga'a 'o mete'e Musa 'ai hukumu, matengo i'a mai ua 'o mau sengene di'a sisalamata unanga gena-ge. Mada'a ḏa matengo i'a 'o nau'u di'a sengene, la sisalamata ngowa'a matengo i'a ga'a 'ai 'akala re sinyingara la-la!

⁸Mada'a Ma Jou'ongu Madutu masiretene 'a sijumu 'Ai dadalara madutu ra ngene so'o ne: Wakutu ngene wo 'ahu toma ḏosa moju, Kristus 'o sengene di'a ngene!

⁹Sababu gena-ge, toma 'orasa nange-ne ngene rewo dadi ngowa'a kamanga sala ua ra Ma Jou'ongu Madutu 'ai momina, sababu Kristus 'ai ngaunu wakutu Unanga 'o sengene di'a ngene. Re tantu ḏua, Kristus ḏuanga i'a 'o sisalamata ngene ra Ma Jou'ongu Madutu 'ai borata wakutu Unanga 'o sihukumu dungia nena-ne.

¹⁰Sababu na'o wakutu ngene Ma Jou'ongu Madutu 'ai lawana, Unanga 'o sirimoi ngene ra Unanga sababu 'Ai Ngowa'a Nau'u 'ai se-sengene; tantu ḏua toma 'orasa nange-ne, wakutu ngene rewo marimoi ra Ma Jou'ongu Madutu, Kristus ḏuanga i'a 'o sisalamata ngene sababu Unanga dadunu 'o 'ahu moju!

¹¹Re sidogo ḏi'i, ngene wo maroanga mangale ngene rewo marimoi ra Ma Jou'ongu Madutu sababu nanga Jou Yesus Kristus ga'a ro sirimoi ngene ra Ma Jou'ongu Madutu.

¹²Sababu gena-ge ma tero sa'olo ḏosa 'i osama toma dungia sababu Adam 'ai ḏosa re dadi sababu pa'i ngowa'a gena-ge 'ai ḏosa ḇato, ngowa'a 'aḏi basono sengene. So'o gena-ge ḏi'i ngowa'a mo-moini toma dungia 'aḏi basono sengene, sababu ananga mo-moini gena-ge 'aḏi baraḏosa.

¹³Wakutu Musa 'ai hukumu 'i sipula'a nyangu, ḏosa 'age rema enanga ḏua toma dungia. Mada'a ḏosa gena-ge sisala manusia ua, sababu Musa 'ai hukumu 'i cua moju.

¹⁴Mada'a toma 'orasa Adam singadolo 'orasa Musa, ngowa'a mo-moini toma dungia sitabi donga ananga gena-ge 'aḏi basono sengene. Kalaha 'age rema ngowa'a 'aḏi 'a'a ḏosa ma tero ua sa'olo Adam, ngowa'a gena-ge ḏi'i mai 'aḏi basono sengene ḏi'i. Re Adam sa'olo gabara di'a Unanga ga'a ḏuanga i'a 'o sapolo, gena-ge Yesus.

¹⁵Mada'a Adam 'ai ḏosa re Ma Jou'ongu Madutu 'ai cocatu ma tero ua, sababu Ma Jou'ongu Madutu 'ai cocatu lebe la-lamo'o rea Adam 'ai ḏosa: Wakutu matengo i'a 'o 'a'a ḏosa, ngowa'a mo-moini 'aḏi basono sengene. Mada'a ma la-lamo'o i'a ḏi'i wakutu Ma Jou'ongu Madutu ro siba'ala 'Ai mura re dadalara toma ngowa'a mo-moini sababu ngowa'a matengo i'a 'ai 'akala re sinyingara ma la-la, unanga gena-ge Yesus.

¹⁶Re ḏi'i, Adam 'ai ḏosa re Ma Jou'ongu Madutu 'ai cocatu ma tero ua sababu matengo i'a 'o 'a'a ḏosa togumu i'a, Ma Jou'ongu Madutu 'o sijuruhakimi ga'a manusia mo-moini balasu 'aḏi sanga hukumu. Momongolo ua, togumu i'a manusia raḏi 'a'a ḏosa repe, Ma Jou'ongu Madutu 'o pula'a 'ai cocatu ra ngene, la ngene wo dadi ngowa'a kamanga sala ua Tai momina.

¹⁷Sababu matengo i'a 'o 'a'a ḏosa, ngowa'a mo-moini 'aḏi basono sengene sababu ananga mo-moini gena-ge raḏi marimoi ra unanga. Mada'a lebe la-lamo'o i'a ḏi'i matengo 'ai ga'a, gena-ge Yesus Kristus. Sababu ngowa'a ga'a manga ngo-ngaku ra Yesus Kristus, ananga gena-ge raḏi dawongo Ma Jou'ongu Madutu 'ai mura re dadalara lamo'o re Unanga ra si'a'a ananga ngowa'a loasa re banari. Sidogo ḏi'i, ananga gena-ge ḏuanga i'a 'aḏi 'ahu kasingado-ngadolo i'a, 'aḏi parenta toma soroga sababu 'aḏi marimoi ra matengo i'a, gena-ge Yesus Kristus.

¹⁸Sababu gena-ge, ma tero sa'olo matengo i'a 'a'a ḏosa soi moi ri sigasa manusia mo-moini di'a sanga hukumu, so'o gena ḏi'i matengo i'a 'a'a loasa re banari soi moi ri sigasa nyengara manusia mo-moini sanga bebasa toma hukumu, re dawongo 'ahu kasingado-ngadolo i'a.

¹⁹Re ma tero sa'olo ngowa'a repe 'aḏi dadi ngowa'a baraḏosa sababu matengo i'a 'o mete'e ua Ma Jou'ongu Madutu, so'o gena ḏi'i ngowa'a repe 'aḏi dadi ngowa'a loasa re banari ra Ma Jou'ongu Madutu 'ai momina sababu matengo i'a 'o mete'e Ma Jou'ongu Madutu.

²⁰Musa 'ai hukumu Ma Jou'ongu Madutu 'a pula'a, la manusia manga ḏosa 'i waiti. Mada'a kalaha manusia lebe 'a'a ḏosa, Ma Jou'ongu Madutu ganapu dogo pula'a 'ai mura re dadalara toma manusia.

²¹Dadi ma siḏa, ḏosa 'i kuasa ngowa'a mo-moini manga 'ahu singadolo ananga mo-moini balasu 'aḏi sanga hukumu sengene. Mada'a nange-ne Ma Jou'ongu Madutu 'ai mura re dadalara 'i kuasa nanga 'ahu, sababu ngene rewo dadi ngowa'a loasa re banari, re sanga 'ahu kasingado-ngadolo i'a sababu nanga Jou Yesus Kristus.